Jila sirna walharkaa fuudhinsa Baallii Gadaa Booranaa 72ffaa sababeeffachuun magaalaa Yaaballootti dorgommiin Ispoortii Biskileetii geggeefame

Guraandhala 28/2017(TOI)-Jila sirna walharkaa fuudhinsa Baallii Gadaa Booranaa 72ffaa sababeeffachuun magaalaa Yaaballootti dorgommiin Ispoortii Biskileetii geggeefameera.

Sirni walharkaa fuudhiinsa Baallii Gadaa Booranaa 72ffaan Areeroo Gooroo Ardaa Jilaa Badhaasaatti Guraandhala 30/2017 taasifama.

Sirna kana ilaalchisuun sagantaaleen adda addaa geggeeffama kan jiru yoo ta'u, guyyaa har'aas dorggommiin Ispoortii Biskileetii ‘Gadaa Tuur’ marsaan 8ffaan magaalaa Yaaballootti geggeeffameera.

Sagantaa dorgommii Ispoortii kana irratti hoggantuun Biiroo aadaa fi Turizimii Oromiyaa aadde Jamiilaa Simbiruu, hogganaan biiroo dhimmoota Komunikeeshinii Oromiyaa obbo Hayiluu Addunyaa fi hoggantoonni naannoo fi godina Booranaa biroon argamaniiru.

Dorgommiin kun Guraandhala 26/ 2017 Finfineetti kan jalqabe yoo ta'u, kan har'a magaalaa Yaaballootti taasifame xumura sagantaa dorgommichaa ta'uun himameera.

 Dorgommichi mata duree “Biskileetiidhaan Dorgomaa, Aadaa fi Seenaa Keenya Beeksifna” jedhuun taasifame.

Dorgommii kana irratti Ispoorteesitoonni naannoo Oromiyaa, Tigiraay, Amaaraa, Haraarii Sidaamaa, Jiddugaleessa Itiyoophiyaa fi bulchiinsa magaalaa Dirree Dawaa hirmaataniiru.

Dabalataan kilaboonnii akka Garaad, Itiyoo Elektirik,  Akkaadaamii Ispoortii Itiyoophiyaa,  bulchiinsa magaalaa Shaggar,  Poolisii magaalaa Finfinnee hirmaataniiru.

Gareen Biyyaalessaa Ruwaandaa Kiigaaliirraa dhufes dorgommicharratti  hirmaateera.

Dorgommichi fageenya K.M 100 kan geggeeffame yoo ta'u Ispoorteestoonni 110 irratti hirmaataniiru.

Dorgommii Biskileetii kanaan kanneen sadarkaa hanga 10tti xumuraniif badhaasni birrii kuma 50 jalqabee ni kennama.