Amajjii 4/2017(TOI)- Sagantaan xumuraa dorgommii Ispoortii Ayyaana guyyaa Poolisii Itiyoophiyaa 116ffaa sababeeffachuun adeemsifamaa ture adeemsifamaa jira. Komishinar Jeneraaliin poolisii federaalaa Itiyoophiyaa Dammallaash Gabramikaa’el, de’eetaan ministiraa aadaa fi Ispoortii Makkiyyee Mahaammad akkasumas hooggantoonni olaanoo poolisii federaalaa fi keessummoonni afeeraman sagantaa Istaadiyeemii Finfinneetti adeemsifamaa jirurratti argamaniiru. Dorgommii yaaddannoo hundeeffamaa Mudde 22 irraa eegalee guyyoota 12 darbaniif adeemsifamaa jiru kanarratti Ispoortessitoonni 640 akaakuu Ispoortii shaniin hirmaataniiru. Dorgommichi har’a wayita xumuramu hooggantoota tarsiimawaa poolisii federaalaa jidduutti taphni kubbaa miilaa michoomaa taasifameera. Dorgommiiwwan taphoota xumuraa Ispoortii addaddaa har’a nidorgomamu. #Ethiopia #Ethiopian_news_agency #federalpolice

Amajjii 4 /2017(TOI)-Maaraatoonii Dubaayi 24ffaa har’a ganama dorgomameen dhiiraan Atileet Buttee Gammachuu, dubatootaan Atileet Badhaatuu Hirphaa mo’ataniiru. Dorgommii dhiiraatiin Atileetonni Itiyoophiyaa sadarkaa 1 amma 10 bahaniiru. Atileet Buttee Gammachuu sa’aatii 2 fi daqiiqaa 4 fi sakondii 50’n fageenya Kanaan sa’aatii hatattamaa bara kana galmeessisuun xumureera. Atileet Birhaanuu Tsagguu fi Atileet Shifarraawu Taammiruu lammaffaa fi sadaffaa bahaniiru. Karaa walfakkaatuun dubartootaan Atileetonni Itiyoophiyaa 1ffaa amma 10ffaa bahuun olaantummaan xumuraniiru. Atileet Badhaatuu Hirphaa sa’aatii 2 fi daqiiqaa 18 fi sakondii 27’n xumuruun mo’atteetti. Atileet Darraa Didhaa fi Atileet Tigist Girmaa lammaffaa fi sadaffaa bahuun xumuraniiru. Atileet Zayinabaa Yimar afraffaa baateetti. Atileetotonni saala lamaaniin tokkoffaa bahan doolaara Ameerikaa kuma 80 badhaafamaniiru. Dorgommicha kan qopheesse walumaa gala doolaara Ameerikaa kuma 504 badhaaseera. Maaraatooniin Dubaay A.L.A bara 1998 irraa kaasee dorgomamaa jiru dorgommii dirreerraa atileetiksii addunyaatiin sadarkaa Warqeen kennameefidha. #Ethiopian_News_Agency #Ethiopia

Sadaasa 25/2017 (TOI) - Kabaja guyyaa saboota, sablamootaa fi uummatoota Itoophiyaa 19ffaa sababeeffachuun dorgommii fiigicha kilomeetira 5 magaalaa Arbaamincitti geggeeffame. Dorgommiin fiigichaa kunis mata duree '' Ashaaraa keenya Istaadeemii keenyaaf'' jedhuun geggeeffame. Sagantaa kanarratti pirezidaantiin naannoo Kibba Itoophiyaa obbo Xilahuun Kabbadee akka himanitti; kaayyoon dorgommii fiigichaa kun guyyaa saboota, sablamootaa fi uummatoota Itoophiyaa sababeeffachuun kan qophaa'e ta'uu himanii asumaanis ijaarsa Istaadeemii Arbaaminci mallaqaaan deeggaruudhafi jedhaniiru. Ijaarsa istaadeemii kana dabalatee magaalichatti hojiiwwan misoomaa biroo hojjetama jiran xumuruuf fayyadamummaa uummata mirkaneesuuf ciminaan xiyyeeffannoon ni hojjetamas jedhaniiru. Guyyaan saboota, sablamootaa fi uummatoota Itoophiyaa 19ffaan sadaasa 29/2017 magaalaa Arbaaminicitti kabajama.    

Sadaasa 23/2017 ( TOI) - Atileet Taammiraat Tolaa fi Atileet Simboo Alamaayyoo badhaasa Atileetii cimaa bara 2024 badhaafaman. Atileet Taammiraat Tolaa badhaasa Atileetii dorgommii dirree Istaadiyeemiin alaa kan baranaa mo’ateera. Atileet Taammiraat Tolaa Olompiikii Paarusurratti riikoordii haaraa galmeessisuun mo’atee biyyasaaf meedaaliyaa Warqee argamsiisuunsaa niyaadatama. Atileet Simboo Alamaayyoo badhaasa atileetii guddattuu cimtuu kan bara kana badhaafamteetti.

Sadaasa 22/2017(TOI)- Dorgommii Maaraatoonii Speen Vaaleensiyaatti har’a dorgomameen Atileet Darrasaa Galataa atileetii Keeniyaa Seebaastiyaa Saaweetti aanuun lammaffaa bahee xumureera. Atileetiin Keeniyaa kan biraan Daanii’eel Maateekoo sadaffaa yoo bahu, Cimdeessaa Dabalee 6ffaa akkasumas bardheengaddaa dorgommicha kan mo’ate atileet Sisaay Lammaa 10ffaa baheera. Maaraatoonii Vaaleensiyaa bardheengaddaa dorgomameen atileet Sisaay Lammaa sa’aatii 2 daqiiqaa 1 sakondii 48n xumuruunsaa niyaadatama. Atileet Sisaay lammaa dabalatee olompiikii sadiin kan injifate atileet Qananiisaa Baqqalaa, atileet Andaamlaak Ballihuu, atileet Darrasaa Galataa, atileet Birhaanuu Maggasaa, atileet Guyyee fi atileet Cimdeessaa Dabalee walumaa gala atileeetonni Itiyoophiyaa torba dorgommii Valeensiyaa baranaarratti hirmaataniiru.

Sadaasa 22/2017(TOI) Atileet Magartuu Alamuu dorgommii Maaraatoonii Vaaleensiyaa har’a waareerratti taasifame mo’atteetti. Atileet Magartuun dorgommii kana sa’aatii 2 daqiiqaa 16 sakondii 49n xumurteetti. Atileetiin Itiyoophiyaa kan biraan Xiruyyee Masfin sadaffaa baatee xumurteetti. Atileetiin lammii Yugaandaa Steellaa Cheesaand sadarkaa lammaffaa baateetti. Dorgommii Vaaleensiyaa waggaa darbe dorgomameen atileetonni Itiyoophiyaa olaantummaan xumuruunsaanii niyaadatama. Dorgommicha atileet Warqinash Dagafuu tokkoffaa yoo baatu atileet Almaaz Ayyaanaa lammaffaa atileet Hiywoot G/Kidaan sadaffaa bahuun mo’ataniiru. Atileet Amaanee Bariisoo Riikoordii Maaraatoonii Vaaleensiyaa kan harkaa qabdu yoo ta’u dorgommii waggaa lama dura taasifameen sa’aatii 2 daqiiqaa 14 sakondii 58n xumuruun riikoordii haaraa galmeessitee mo’achuunshee niyaadatama. Atileet Amaaneen sababa miidhaatiin dorgommii Vaaleenshiyaa baranaa irratti akka hinhirmaanne ibsameera.

Sadaasa 19/2017 (TOI) – Feestivaala Ispoortiii Humnoota waraanaa guutuu Afrikaa Naayijeeriyaa Magaalaa Abuujatti gaggeeffamaa jiruun Atileet Yewarqiwuhaa Getaachoon meedaaliyaa Warqee 2ffaa injifatte. Atileet Yewarqiwuhaa Getaachoon fiigicha gufachiisaa meetira kuma 3 dubartoota gidduutti gaggeeffame injifachuun dorgommichaan Meedaaliyaa Warqee 2ffaa yoo argattu, akka kilabichaatti ammoo Meedaaliyaa Warqee 6ffaa ta'eera. Kilabni Ispoortii Raayyaa Ittisaa hanga ammaatti meedaaliyaa Warqee 6, Meetii 7 fi Nahaasii 2 waliigala Meedaaliyaa 15 argachuu ragaan fuula miidiyaa hawaasummaa Raayyaa Ittisaarraa argame ni mul’isa.

Sadaasa 16/2017(TOI)- Atileet Warqiwuhaa Geetaachoo Feestivaalii Ispoortii humnoota waraanaa guutuu Afriikaatii lammaffaatiin Machaaliif warqee fudde. Feestivaaliin Naayijeeriyaa Abujaatti adeemsifamaa jiru har’a guyyaa shanaffaasaati. Kilabiin Ispoortii Machaal dorgommii Atileetiksiin Itiyoophiyaa bakka bu’uun dorgomaa jira. Dorgommii xumuraa dubartootaa meetira 5000niin Warqiwuhaa Geetaachoo tokkoffaa baatee Meedaaliyaa Warqee fiddeetti. Ajajaa shantamaa Ayaalfim Daanyaachoo lammaffaa bahuun meedaaliyaa Meetii badhaafamnteetti. Utaalchoo dheeraa dubartootaa ittaantuu ajajaa kudhanii Batsaloot Alamaayyoo fi diskasii darbachuu dubartootaan ajajjuu kudhanii Zurgaa Usmaan meedaaliyaa Meetii badhaafamteetti. Naayijeeriyaatti ambaasaaddarri Itiyoophiyaa Laggasee Garramuu fi dippilomaatonnii fi hojjettoonni biroon dorgommicharratti argamuun atileetota jajjabeessa niiru. Haala wal fakkaatuun atileetonni dhiiraa fi dubartii dorgommii gulaallii meetira 400 irratti hirmaatan saala lamaanuu xumuraaf darbaniiru. Machaal feestivaalii Kanaan amma ammaatti Warqee 1 fi meetii 4 walumaa gala meedaaliyaa 5 argachuusaa odeeffannoon ministeera ittisaarraa argame nimul’isa. Itiyoophiyaa dabalatee Ispoortessitoonni biyyoota Afriikaa 25 irraa walitti dhufan kuma 1 184 Feestivaalii Ispoortii kanarratti hirmaachaa jiru. Fwwstivaalii kana jalqabaaf Keeniyaan erga qopheessitee booda waggaa 20f addaan citee waggaa 20 booda deebi’ee dorgomamuu jalqabeera.

Sadaasa 15/2017(TOI)-Dhaloota sammuu fi qaamaan gabbate magaalaa keenyatti uumuuf bakkeewwan Ispoortiin itti hojjetaman kuma 1 fi 300 caalan hojjetamanii taajaajilaaf ooluusaanii kantiibaan magaalaa Finfinnee Adaanech Abeebee ibsan. Kantiibaa Adaanech Abeebee ergaa fuula marsariitiisaaniirratti dabarsaniin ayyaana hundeeffama paartii badhaadhinaa waggaa shanaffaa sababeeffachuun har’a ganama sosochii h ga’umsa qaamaa kan jiraattonni kuma 300 caalan irratti hirmaatan taasifneerra jedhan. Paartiin badhaadhinaa waggoota shaman darban magaalaa Finfinnee miidhagsuun gamatti, dhaloota sammuu fi qaamaan gabbate uumuuf bakka jiraattonni ispoortii itti hojjetan kuma 1 fi 300 caalu qopheessee tajaajilaaf oolcheera jedhan.

Sadaasa 12/2016 (TOI)- Hojjettoonni naannoo Oromiyaa ayyaana hundeeffama waggaa 5ffaa paartii badhaadhinaa ilaalchisuun sosochii Ispoortii taasisaniiru. Ayyaana kana ilaalchisuun hojjettoota sektara hawaasumma fi qonnaa jidduutti dorgommiin kubbaa miilaa nitaasifama. Ayyaanni kun mata duree “olaantummaan yaadaa badhaadhina hunda galeessaaf” jedhuun kabajamaa akka jiru nibeekama. Af-yaa’iin Caffee Oromiyaa adde Sa’aadaa Abduraahimaan dabalatee hooggantoonni birolee fi hooggantoonni mootummaa naannichaa ayyaama kanarratti hirmaataniiru.

Sadaasa 11/2017(TOI)- Gareen Ispoortii Machaal feestivaalii Ispoortii humnoota waraanaa guutuu Afriikaa lammaffaa Naayijeeriyaa Abujaatti adeemsifamurratti nihirmaachuuf Abujaa dhaqeera. Feestivaaliin boru eegalamu akaakuuwwan Ispoortii garagaraan kan adeemsifamu yoo ta’u Machaal dorgommii Atileetiksiirratti nihirmaata. Gareen atilrrtiksii raayyaa ittisaa Itiyoophiyaa daarektara kilabii Ispoortii Machaal Birgaadiyeer Jeneraal Nuuruu Muzayyin durfamu Abujaatti shaakala taasisaa jira. Feestivaaliin Ispoortii humnoota waraanaa Naayijeeriyaa qopheessite kun sirna baniinsaa boru taasifamuun ni’eegalama. Feestivaaliin Ispoortii kun yeroo jalqabaaf Keeniyaan erga qopheessitee booda waggaa 20f addaan cite ture. Feestivaaliin kun waggooota 20 booda akka adeemsifamu odeeffannoon raayyaa ittisa biyyaarraa argame nimul’isa.

Sadaasa 7/2017(TOI)- Dorgomaan tapha Buunyaa Maayiik Taayisan morkataasaa dargaggoo Jeek Poowuliin mo’ameera. Umurii waggaa 58 kan ta’e taphataan tapha Buunyaa Maayik Taayisan nama waggaa 31 caaluun Jaak Pooliin mo’atameera. Kaayyoo Maayik Taayisan waliin walmorkuuf qabu kan milkeesse Jaak Pool dorgommii Kanaan doolaara miiliyoona 40 kan argate yoo ta’u, Maayik Taayisan doolaara miiliyoona 20 argateera.

Sadaasa 6/2017(TOI)- Ispoortiin Qaamaa fi sammuu gabbisuun gamatti tokkummaa sabdaneessummaa kan cimsu duudhaa gabbisuuf gumaacha olaanaa akka qabaatu hoogganaan waajjira paartii badhaadhinaa damee naannoo Hararii Geetuu Wayyeessaa ibsan. Hundeeffama waggaa shanaffaa Paartii badhaadhinaa ilaalchisuun maas Ispoortiin magaalaa Hararitti adeemsifameera. Hoogganaan waajjira paartii badhaadhinaa damee naannoo Hararii Geetuu Wayyeessaa wayita kana akka jedhanitti, hawaasni eenyummaansaa Ispoortiin gaabbifame dinagdee fi hawaasummaa keessatti hirmaannaa cimaa gochuu nidanda’a. Ispoortiin Qaamaa fi sammuu gabbisuun gamatti tokkummaa sabdaneessummaa kan cimsu duudhaa gabbisuuf gumaacha olaanaa akka qabaatu dubbataniiru. Hirmaattonni maas Ispoortii kunneenis Ispoortiin qaamaa fi sammuu gabbisuun alatti walitti hidhamiinsa hawaasummaa cimsuuf akka dandeessisu himaniiru. Ispoortii aadaa godhachuun yeroo hunda hojjechuun akka barbaachisus hubachiisaniiru. Hooggantoonni naannichaa Ispoortii kanarratti hirmaachuusaanii odeeffannoon waajjira dhimmoota komunikeeshinii naannichaarraa argame nimul’isa.

Sadaasa 1/2017(TOI)- Mata duree “sosochiin gahumsa qaamaa badhaadhina hunda galeessaaf” jedhuun Finfinnee naanawoota addaddaattinsosochiin gahumsa qaamaa ummataa(Maas Ispoort) adeemsifamaa jira. Paartii Badhaadhinaatti hoogganaan waajjira dame Finfinnee obbo Mogos Baalchaa sosochii Ispoortii kana kutaa magaalaa Ekkaatti jalqabsiisaniiru. Sosochii maas Ispoortii kutaa magaalaa Ekkaatti adeemsifamaa jiru Kanaan biiroon dargaggootaa fi Ispoortii Finfinnee fi hooggantoonni kutaa magaalaa Ekkaa hirmaachaa jiru. Akkasumas sosochii gahumsa qaamaa kutaa magaalaa Qirqoositti adeemsifamaa jiru kanarratti jiraattonni aanaalee garagaraarraa walitti dhufan Addababayii Gaazebootti sosochii Ispoortii taasisaa jiru. Maas Ispoortiin daa’imman, dargaggootaa fi ga’eessota hirmaachise kun ganama sa’aatii 12 irraa kaasee adeemsifamaa jira.

Onkoloolessa 12/2017(TOI)- Pirezidaantii Waldaa kubbaa miilaa Addunyaa (WKMA) Jiyaanii Infantiinoof buufata Xiyyaaraa idil addunyaa Booleetti gaggeessaan taasifameef. Pirezidaantiin WKMA Jiyaanii Infaantiinoo yaa’ii walii gala idilee konfedereeshinii kubbaa miilaa Afriikaa (KKMA)46ffaarratti hirmaachuuf kaleessa Finfinnee dhufuunsaanii nibeekama. Ministirri aadaa fi Ispoortuii Shawiit Shaankaa fi pirezidaantiin federeeshinii kubbaa miilaa Itiyoophiyaa obbo Isaayyaas Jiraa dabalatee hooggantoonni biroon pirezidaantii WKMA gaggeessaniiru.

Onkoloolessa 12/2017 (TOI) - Gaaffiin Itoophiyaan waancaa Afrikaa keessummeessuuf dhiheessite haala sirna adeemsa hojii CAF'n ni ilaalama jedhan Pireezdaantiin Konfedereeshinii Kubbaa Miilaa Afrikaa (CAF) Paatrisi Motsepee. Yaa'iin Waliigalaa Konfedereeshinii Kubbaa Miilaa Afrikaa 46ffaa Itoophiyaan keessummeessite xumuramera. Pireezdaantiin Konfedereeshinii Kubbaa Miilaa Afrikaa Paatriis Mootsipee fi hoggantoonni CAF biroon waliin ta'uun Yaa’ii Waliigalaa kana ilaalchisuun miidiyaaleef ibsa kennaniiru. Itoophiyaan seenaa kubbaa miilaa Afrikaa keessatti gahee gahee olaanaa akka qabduu fi miseensota hundeesitoota CAF keessaas tokko akka taate Pireezidaantin CAF ibsaniiru. Itoophiyaan biyya bilisummaa Afrikaa keessattillee shoora olaanaa taphatte ta'uu eeraniiru. Itoophiyaan waancaa Afrikaa keessummeessuuf gaaffiin dhiheessite yeroo isaakan eeggate akka ta'ees ibsaniiru. Itoophiyaanonni kubbaa miilaatiif fedhii fi hidhannii isaan qaban guddaa ta'uu kan hubatan ta'uu eeranii; Ispoortiin humna guddaa tokkummaa uummata cimsudha jedhaniiru. Ministirri Muummee doktar Abiy Ahimad Istaadiyeemii fi bu’uuraalee misoomaa ispoortii Itoophiyaatti hojjetamaa jiran isaan daawachiisuu isaanii fi waan arganittis gammaduu ibsaniiru. Gaaffiin Itoophiyaan waancaa Afrikaa keessummeessuuf dhiheesitee haala sirna adeemsa hojii CAF'n kan ilaalamu ta'uu himaniiru. Itoophiyaan Yaa’ii Waliigalaa CAF milkaa’inaan keessummeessuu himanii haala Itoophiyaanoonni itti keessuummaa simatan dinqisiifataniiru.

Onkoloolessa 12/2017(TOI)- Yaa’iin waliigalaa idilee konfedereeshinii kubbaa miilaa Afriikaa (KKMA) 46ffaa Itiyoophiyaan qopheessite murteewwan addaddaa dabarsuun xumurameera. Pirezidaant Taayyee Atsqasillaasee dabalatee pirezidaantiin konfedereeshinii kubbaa miilaa Afriikaa Paatriis Mootseeppee fi miseensonni hojii raawwachiisaa KKMA, pirerzidaantiin Fiifaa Jiyaanii Infantiinoo fi barreessaan muummee Fiifaa Maatiyaas Giraafstiroom, federeeshinoonni kubbaa miilaa biyyoota miseensa fi pirezidaantoonni waldaalee kubbaa miilaa qaxanaa akkasumas qaamolee qooda fudhattoota Ispoortii biroon yaa’icharratti hirmaataniiru. Gabaasonni raawwiin hojii kan waggaa, bajataa, Faayinaansii, odiitii fi koreewwan KKMA garagaraa yaa’ii waliigalaarratti dhihaatanii mariin taasifameera. Keewwattoota addaddaa shoora yaa’ii waliigalaa, walgahiiwwan koree hojii raawwachiisaa kan waggaa fi Eksipoo KKMA dabalatee danbii ittiin bulmaataa KKMA irratti argaman irratti fooyyessi taasifameera. Misoomaa fi guddina Kubbaa miilaa Afriikaa cimsuu, bu’a qabeessummaa Afriikaan guddina kubbaa miilaa addunyaarratti qabdu guddisuu, ijaarsa bu’ura misoomaa Ispoortii, baay’ina faayinaansii biyyoonni miseensa KKMA misooma kubbaa miilaaf Ramadan guddisuu kan jedhan yaadota ijoo yaa’ii kanarratti kaafamanidha. Dabalataanis naamusa Ispoortii, hojmaata badaa dhabamsiisuun bulchiinsa gaarii buusuu fisanyummaa ittisuu dhimmoota ijoo yaa’ii kanarratti kaafamanidha. Konfedereeshiniin kubbaa miilaa Afriikaa(KKMA) gaaffii Itiyoophiyaan bara 2029 Waancaa Afriikaa qopheessuuf gaafatte fudhatee akka raggaasu pirezidaant Taayyee Atsqasillaasee yaa’ii kanarratti gaafachuunsaanii niyaadatama.

Onkoloolessa 12/2017(TOI)- Pirezidaant Taayyee Atsqasillaasee konfedereeshiniin kubbaa miilaa Afriikaa (KKMA) gaaffii Itiyoophiyaan Waancaa Afriikaa qopheessuuf gaafatte fudhatee akka raggaasu waamicha taasisan. Ministirri muummee Dr. Abiyyi Ahimad kaleessa afeerraa irbaataa hooggantoota olaanoo pirezidaantota Fiifaa fi Koree hojii raawwachiisaa KKMAf masaraa biyyaalessaa guddichatti taasisairratti Itiyoophiyaan Waancaa Afriikaa bara 2029 adeemsifamu qopheessuu nidandeessi jechuunsaanii niyaadatama. Pirezidaant Taayyee Atsqasillaasee yaa’ii waliigalaa KKMA 46ffaa har’a Hoteela Skaay Laayititti taa’amaa jirurratti Isin Afriikaanonni Baga gara biyya keessan Itiyoophiyaa nagaan dhuftan jedhaniiru. Itiyoophiyaan kubbaa miilaa Afriikaa keessatti ashaaraa guddaa akka qabduu fi A.L.Atti bara 1957 KKMA wayita hundeeffamu biyyoota hundeessan keessaa tokko ta’uushee ibsaniiru. Pirezidaantii KKMA kan ta’an Yidnaqaachoo Tasammaa kubbaan miilaa Afriikaa addunyaarratti bakka isaaf malu akka argatu gumaachasaanii taasisuusaanii dubbataniiru. Itiyoophiyaan biyya jaalattoota kubbaa miilaa miiliyoonota qabdudha jedhaniiru. Itiyoophiyaan qooda seena qabeessa kubbaa miilaa Afriikaa keessatti qabdu tilmaama keessa galchuun Waancaa Afriikaa A.L.Atti bara 2029 adeemsifamu qopheessuuf gaafachuushee eeraniiru. Itiyoophiyaan kubbaa miilaatti fayyadamtee kubbaa miilaa Afriikaa guddisuu fi Ispoortiidhaan biyya ijaaruuf akka hojjettu dubbataniiru. Itiyoophiyaan waancaa Afriikaa qopheessuuf Istaadiyeemota ijaaraa kan jiranirratti fooyyessa taasisaa akka jirtu himaniiru. KKMA gaaffii Waancaa Afriikaa qopheessuuf Itiyoophiyaan gaafatte fudhatee akka raggaasu pirezidaant Taayyee Atsqasillaasee gaafataniiru.

Onkoloolessa 12/2017(TOI)-Yaa’iin waliigalaa KKMA 46ffaan Itiyoophiyaatti taa’amuunsaa kubbaa miilaa keenya ni’onnachiisa jedhan Ittaanaan ministira muummee Tamasgeen Xurunaa. Ittaanaa ministira muummee Tamasgeen Xurunaa ergaa fuula marsariitiisaaniirratti dabarsaniin, taphattoonni kubbaa miilaa beekamoon Afriikaa addunyaarratti beeksisan yaa’ii kanarratti hirmaachuuf Finfinneetti argamu jechuun ibsaniiru. Yaa’iin kun akka milkaa’u guddaa hawwina jedhan ittaanaan ministira muummee Tamasgeen Xurunaa ergaasaaniitiin.

Onkoloolessa 12/2017 (TOI) - Yaa’iin Waliigalaa 46ffaa Konfedereeshinii Kubbaa Miilaa Afrikaa( CAF) har’a Finfinnee Hoteela Iskaayilaayititti geggeeffamuu eegaleera. Yaa'ii kanarratti pireezdaantiin Konfedereeshinii Kubbaa Miilaa Afrikaa Paatriis Mootsepee fi miseensonni koree hojii raawwachiiftuu CAF, pirezidaantiin Waldaa Kubbaa Miilaa Idil-addunyaa (FIFA) Gi'anii Infantiinoo fi barreessaan olaanaa FIFA Maatiyaas Giraafstiroom, pirezidaantonni federeeshinii kubbaa miilaa kan biyyoota miseensa CAF fi waldaalee kubbaa miilaa naannolee, akkasumas qooda fudhattoonni ispoortii biroo hirmaataniiru. Yaa'ichi dhimmoota kubbaa miilaa Afrikaa irratti mari'achuun murteewwan adda addaa ni dabarsa jedhamee eegama.