Bitootessa 23/2017(TOI)- Woorkishooppiin walitti hidhata tumsa qaxanaa qabeenya galaanaa fi bishaan dhugaatii tarsiimoo bulchiinsa galaanaa Afriikaa raggaasuuf qophaa’e har’a Taanzaaniyaa Daareesalaamitti jalqabameera. Walgahicha gamtaa Afriikaa fi dhaabbata mootummaatti sagantaa eegumsa naannootu waliin qopheesse. Tarsiimoon bulchiinsa galaanaa Afriikaa tumsa biyyootaa fi damee kanarratti hojjetanii cimsuuf faayidaa qabeenya galaanaa fi bishaan dhugaatii irratti qabu ilaalchisuun mariin akka taasifamu odeeffannoon TOI, gamtaa Afriikaarraa argate nimul’isa. Woorkishooppiin kun raawwii hojmaataa A.L.A bara 2023 waliigaltee fayyadama egeree lubbu qabeeyyii galaanaa idil addunyaa (BBNJ Agreement) Ameerikaa Niwuyoorkitti mallatteeffame ajandaa marii kanaati. Biyyoonni Afriikaa ejjennoon waloo konfaransii galaanaa mootummoota gamtoomanii sadaffaa A.L.A Juun 2025 Faransaayi Niis adeemsifamurratti qabatanii dhihaatan akka ifoomsan odeeffannoon gamtichaa nimul’isa. Woorkishooppiin tarsiimoo bulchiinsa galaana Afriikaa raggaasuuf adeemsifamu amma Bitootessa 16 bara 2017tti nitura.

Bitootessa 17/2017 (TOI)- Eksipoon Teeknooloojii Idil Addunyaa Itiyoophiyaa 2025 Caamsaa 8 bara 2017 irraa eegalee guyyoota sadiif giddugala Konveenshinii Idil addunyaa Addisitti ni’adeemsifama. Eksipoon tumsa bulchiinsa nageenya neetwoorkii odeeffannoo fi Inistiitiyuutii hubannoo namtolcheen qophaa’u kun Baha Afriikaatti taatee Teeknooloojii isa guddaa ta’uun ibsameera. Eksipoo kana ilaalchisuun daarektarri olaantuu bulchiinsa nageenya neetwoorkii Tigist Hamiid fi daarektarri olaanaa Inistiitiyuutii hubannoo namtolchee Injiinar Warquu Gaachanaa waliin ta’uun ibsa kennaniiru. Daarektarri olaantuu bulchiinsa nageenya neetwoorkii Tigist Hamiid akka jedhanitti, Eksipoon kun milkaa’inoota Itiyoophiyan cehumsa dijitaalaan galmeessifte addunyaaf beeksisuuf kan akeekamedha. Nageenyi Saayibarii, Hubannoon namtolchee, nageenyi faayinaansii, Smaart Siitii fi barumsi teeknooloojii qabxiilee xiyyeeffannoo Eksipoo kanaa ta’uu dubbataniiru. Eksipoo dameewwan xiyyeeffannoo shanan bakka tokkotti qabate waan ta’eef baha Afriikaatti taatee teeknooloojii guddicha ta’uu eeraniiru. Namoonni kuma 10 caalan Eksipoo kanarratti akka argaman ibsanii, kana cinaatti walgahiiwwan, Egzibiishiniin, Simpooziyeemii fi dorgommiiwwan akka taasifaman eeraniiru. Daarektarri olaanaa Inistiitiyuutii hubannoo namtolchee Itiyoophiyaa Injiinar Warquu Gaachanaa gamasaaniin, Eksipoon kun Itiyoophiyaan teeknooloojiishee addunyaaf kan itti beeksiftu, akkasumas addunyaarraa kan itti barattu waltajjii Teeknooloojii ta’uu ibsaniiru. Kessumaa sektarri dhuunfaa bal’inaan akka hirmaatan gochuun dirreen muuxannoo itti waliif qoodan ni’uumama jedhan. Eksipoon kun imala dijitaalaayizeeshinii ajandaa gamtaa Afriikaa 2063 waliin kan walsime ta’uu ibsanii, dorgommiin hubannoo namtolchees akka taasifamu dubbataniiru.

Bitootessa 16/2017(TOI)- Hojiileen carraa hojii uumuuf sektara dhuunfaa waliin hojjetaman cimanii akka itti fufan Ministirri hojii fi ogummaa Mufarihaat Kaamil ibsan. Ministeeri hojii fi ogummaa fi Hayibiriid diizaayin (Raayid) kalaqa, carraa hojii fi misooma ogummaan waliin hojjechuuf waliigaltee mallatteessaniiru. Walii galtichi namoota hedduuf carraa hojii kan uumuu fi waggoota shaniif akka turu beekameera. Ministirri hojii fi ogummaa Mufarihaat Kaamil wayita kana akka jedhanitti, mootummaan carraa hojii uumuuf qooda fudhattoota dhimmi ilaalu waliin hojjechaa jira.   Adeemsa Kanaan qoonni sektarri dhuunfaa qabu bakka bu’aa kan hinqabne waan ta’eef carra hojii uumuurratti hojiileen tumsaan hojjetaman akka jiran ibsan. Waliigalteen Haayibiriid Diizaayin waliin irra gahame damee teeknooloojiitiin dargaggoota, dubartootaa fo qaama miidhamtoota hedduuf carraa hojii uumuu akka danda’u eeraniiru.   Hundeessituu fi hojii raawwachiiftuun Haayibiriid Diizaayin(Raayid) Saamiraawit Fiqruu gamasaaniin, dhaabbannisaanii sektara teeknooloojii geejjibaatiin namoota kuma dhibba ta’aniif carraa hojii uumaa akka jiru ibsaniiru. Waliigaltichi dameen tajaajila geejjiba teeknooloojii gumaacha carraa hojii uumuuf qabu guddisuuf kan akeekamedha jedhaniiru. Haala Kanaan Haayibiriid Diizaayin Raatyidiin ala pirojektoota biroo bocuun namoota hedduuf carraa hojii akka uumu eeraniiru.

Bitootessa 16/2017(TOI)-Sadarkaa biyyaalessaatti namoonni kuma 580 caalan leenjii koodarsii Itiyoophiyaanotaa miiliyoona shanii hordofaa akka jiran ministeerri Innoveeshinii fi Teeknooloojii beeksise. Kanneen leenjicha xumuran kuma 180 caalan waraqaa raga argachuusaanii ministeerichi beeksiseera. Sagantichi pirojektii tumsaa Itiyoophiyaa fi deeggarsa Emereetota Arana Gamtoomaniin kan gaggeeffamu ogummaa hojii dijitaalaa kan guddisudha. Pirojektichi yaadama “dhaloonni haabaratu,dhaloonni haa leenji’u, addunyaa waliin haa dorgomu” jedhuun namoonni beekumsa isaanii gabbifachuun sadarkaa idil addunyaatti dorgomaa fi ga’oomaa akka ta’an hojiirra oolaa jira. Sagantichi waggoota sadan dhufan dargaggoonni miiliyoona shan weeb pirogiraamiingii, Andirooyidii hojjechuu, saayinsii daataa fi hubannoo namtolchee irratti ogummaa dijitaalaa bu’uraa akka horatan nidandeessisa. Ministeera Innoveeshinii fi Teeknooloojiitti de’eetaan ministiraa damee Ayisiitii fi dinagdee dijitaalaa Dr. Yishuruun Alamaayyoo TOI’tti akka himanitti, sagantichi ogummaa dijitaalaa guddisuuf nidandeesisa. Namoonni kuma 580 caalan galmaa’anii leenji’aa yoo jiran kanneen keessaa kuma 180 kan ta’an leenjii xumuranii waraqaa raga argachuusaanii ibsaniiru. Raawwiin leenjii kun Finfinnee, Dirree Dawaa fi Hraritti fooyya’aa ta’uu eeraniiru. Sagantaa kana milkeessuuf naannoleen biroo xiyyeeffannoon hojjechuu akka qaban hubachiisaniiru. Deeggarsi barbaachisu akka taasifamus dubbataniiru. Leenjichi hojii kalaqaa jajjabeessuuf kan gargaaru waan ta’eef dargaggoonni carraa kanatti fayyadamanii of ga’oomsuu akka qaban himaniiru.

Bitootessa 15/2017(TOI)- Paartiin Badhaadhinaa mata duree “Miidiyaa fi Komunikeeshiniin bu’a qabeessi ijaarsa seenessa waloof” jedhuun magaalaa Walqixxeetti leenjii adeemsisaa jira Miseensi mana maree Paartii Badhaadhinaa fi ministirri hoogganaa damee ummataa fi hariiroo idil addunyaa Paartii Badhaadhinaa Dr. Biqilaa Hurrisaa, hoogganaan waajjira paartii badhaadhinaa damee naannoo jiddu galeessa Itiyoophiyaa Dr. Dillaamoo Otoree fi hooggantoonni olaanoo naannichaa biroon, leenicharratti argamaniiru. Leenjichi Sirna miidiyaa fi komunikeeshinii bu’a qabeesa diriirsuun qaqqabama odeeffannoorratti waliigaltee uumuuf kan dandeessisu ta’uun himameera. Komunikeeshinii waloo uumuun ummata misoomaaf kakaasuuf leenjichi qooda guddaa akka qabu eerameera.

Bitootessa 12/2017(TOI)- Guyyoota kudhan dhufan sululoonni Arfaasaan misooman rooba xiqqaa amma guddaatti ni’argatu jedhe Inistiitiyuutiin Miitiiworoolooji Itiyoophiyaa. Haalli kun dhangala’uu bishaan lafa keessaa waan dabaluuf baay’ina bidhaanii kuusaawwan garagaraa keessa galu akka dabalu akka taasisu ibseera. Gama biraan bakkeewwan lolaaf saaxilamoo ta’an irratti lolaa battalaa uumuu akka danda’u inistiitiyuutichi hubachiiseera. Bakkeewwan lolaaf saaxilamanirratti bo’oo lolaan keessa darbu qulqulleessuun rakkoo uumamuu danda’u ittisuuf gamanumaa hojiin qophii dursaa hojjetamuu akka qabu odeeffannoon Inistiitiyuutichi fuula marsariitii isaarratti base nimul’isa.

Bitootessa 08/2017 (TOI )- Hooggantoonni Ittisaa olaanoon Taanzaaniyaa bulchiinsa nageenya Neetwoorkii Infoormeeshinii daawwataniiru. Hooggantoonni kunneen jiddu gala misooma Taalentii dhaabbatichaa dabalatee oomishaa fi tajaajiloota odeeffannoo fi komunikeeshinii dandeettii ofiin hojjetaman ilaalaniiru. Daarektaarri olaantuu bulchiinsa nageenya neetwoorkii informeeshinii adde Tigist Hamiid dhaabbatichi itti gaafatama waliigalaa mootummaa fi ummataan kennameef sirriitii bahachuuf oomishootaa fi tajaajilootaa dandeettii ofiin hojjechaa jiran ilaalchisuun ibsa taasisuu isaanii odeeffannoon bulchiinsicharraa argame nimul’isa.

Bitootessa 08/2017(TOI)-Abbaan taayitaa qabeenya kalaqa sammuu baatii jahan bara bajataa 2017mirgoota kuma sadii galmeessuusaa ibse. Abbaan taayitichaa mirgoota koppii fi Kanaan walqabatan, Paatentoota(moodeloota tajaajilaa dabalatee), diizaayinoota Industiriif fi mallattoo daldalaaf eegumsa mirgaa nitaasisa. Daarektarri olaanaa abbaa taayitichaa Walduu Yimassil TOItti akka himanitti, abbaan taayitichaa umurii dheeraa akka qabu dubbataniiru. Waggoota kaneenitti hojii hedduu hojjetu illee amma barbaadamu akka hinturre dabalanii ibsaniiru. Fakkeenyaaf amma bara 2015tti waggaatti mirgoota hundaan galmee xiqooraawwachuusaa eeraniiru. Waggoota 20 darban Paatentii 500 galmeessuu isaa dubbatanii, kana fooyyessuuf sirna galmeessaa irratti fooyya’insa taasisuu isaa ibsaniiru. Haala Kanaan bara bajataa 2017 baatii jahatti mirgoota kuma sadii galmeessuu isaa dubbatanii, mirga koppii fi Kanaan walqabatan, Paatentii fi mallattoo daldalaa galmeessuu isaa dubbataniiru. Jalqabbiin amma jiru onnachiisaa ta’us sadarkaa barbaadamurra akka hingeenye ibsaniiru. Sababnisaas bu’aalee qu’annoo dhaabbilee barnoota olaanoo keessatti taasifaman maxxansiisuun gamatti Paatentiin akka bahuuf waan hintaasifamneef ta’uu eeraniiru. Haala Kanaan qu’annoowwan dhaabbileen barnoota olaanoo taasisan maxxansiisuun alatti gara Paatentiitti akka ceesisan waamicha taasisaniiru.

Bitootessa 04/2017(TOI)-Dirreen mijataa Yaadamoota Teeknooloojii fi Kalaqaa ijaarsa dinagdee dijitaalaaf shoora qaban gabbisuuf dandeessisu uumamuusaa ministeerri Innoveeshinii fi Teeknoloojii ibse. Dorgommiin Roobootiiksi Shaampiyoonshiippii Afriikaa 2025 Golambaa Saayinsiitti eegalameera. De’eetaan ministiraa Innoveeshinii fi Teeknooloojii Dr. Baayyisaa Badhaadhaa akka jedhanitti, bara kana teeknooloojiiwwan akka Roobootiiksii fi hubannoo namtolchee biyya keenyaaf baay’ee barbaachisu. Itiyoophiyaan guddina fulla’aa fi walirraa hincinne galmeessisuuf akkasumas dinagdee dijitaalaa walirraa hincinne ijaaruuf hojjechaa jirti jedhaniiru. Hammattoowwan seerraa garagaraa qopheessuun damee dijitaalaan dirree mijataa uumuuf hojjetamuusaa kaasanii, kun ammoo dandeettii fi beekumsa damee kanaa gabbisuu fi yaada kalaqaa gumaachuuf gargaaruusaa eeraniiru. Inisheetiiviin Koodaroota Itiyoophiyaanota miiliyona 5nii guddina dandeettii dijitaalaaf gumaacha taasisaa akka jiru eeraniiru. Dameen dhuunfaa guddina dijitaalaaf gumaachasaa akka taasisu dirreen mjataan uumamuusaa dubbataniiru. Dorgommiin Roobootiiksii hojiileen kalaqa jajjabeessan kan keessatti mul’atanii fi yaada maddisiisuu fi guddisuun akkasumas hojiirra oolchuun qabeenyii fi carraan hojii akka uumu eeraniiru. Hojii gaggeessaan jiddugaleessa Itiyoo Roobotiiksi obbo Senaakirem Mokonnon gamasaaniin, barattoonni dandeettii Pirogiraamingii, Diizaayinii, Maandisummaa fi dandeettii wal fakkaatan akka fooyyeffatan kan gargaarudha jedhaniiru. Dorgommiin kun guyyoota sadiif kan taasifamu yoo ta’u, barattoonno Itiyoophiyaa kan mootummaa, dhuunfaa fi manneen barnootaa idil addunyaa nihirmaatu.

Bitootessa 01/2017(TOI)-Sabboonummaa bara kanaatiin dandeettii keenyaan Itiyoophiyaa badhaate ijaaruun akka danda’amu ministirri hojii fi dandeettii Mufariyaat Kaamil ibsan. Waltajjiin maree “dandeettiin Itiyoophiyaa” boqonnaa lammaffaa dhaabbanni Pireessii Itiyoophiyaan mata duree “Itiyoophiyaan mo’achaa itti fufti” jedhuun qopheesse taa’amaa jira. Ministirri hojii fi dandeettii Mufariyaat Kaamil agarsiisa suuraa hojiilee Industitii, hojii uumuu fi dandeettii ka’umsa waltajjichaaf qophaa’e eebbisanii bananiiru. Wayituma kanatti dandeettii keenyaan Itiyoophiyaa Badhaate ijaaruu nidandeenya jedhaniiru. Waltajjiin dandeettiin Itiyoophiyaaf jedhu baatii Guraandhalaa abbootiin keenya yaadama gita bittaa itti mo’atanitti qophaa’uunsaa adda akka isa taasisu ibsaniiru. Dhaloonni har’aas onnee abbootii guutummaa biyyattiirraa gaara Adwaarratti walgahanii diina ittiin mo’atan sanaan ciminaan hojjechuun akka irraa eegamu hubachiisaniiru. Itiyoophiyaa Injifannoo bilisummaa abbootii keenyaan har’a geese beekumsaan guutamnee sabboonummaa bara kanaatiin Itiyoophiyaa Badhaate ijaaruu nidandeenya jedhaniiru.

Guraandhala 29/2017(TOI)- Qaamoleen bara 2025 Itiyoophiyaan teek eksipoo irratti hirmaatan pirooppoozaalii akka galchan Inistiitiyuutiin hubannoo namtolchee waamicha taasiseera. Eksipoo Itiyoophiyaan teek A.L.A Caamsaa 16 amma 18 bara 2025 jiddugala konvenshinii idil addunyaa Addisitti taa’amurratti qorattoonni, hayyoonnii fi qooda fudhattoonni damee kanaa pirooppoozaalii isaanii akka dhiheessan afeereera. Bara hubannoo namtolchee nageenya Saayibarii, nageenya saayibarii magalaawwn ammayyaa keessatti, shallaggii kuwaantam, Faayinteek irratti pirooppoozaalii isaanii akka dhiheessan waamicha taasiseera. Inistiitiyuutiin hubannoo namtolchee odeeffannoo fuula marsariitii isaarratti baaseen guyyaan xumuraa pirooppoozaaliin iitti galfamu A.L.Atti Ebla 20 akkasumas yeroon qabxiin itti beeksifamu Ebla 30 bara 2025 akka ta’e beeksiseera. #Tajaajila Oduu Itiyoophiyaa #TOI #Itiyoophiyaa

Guraandhala 28/2017(TOI)- Yuunivarsiitiin Dambii Doolloo dhaloota beekumsaan guutame horachuun cinaatti damee qorannoo fi Teeknooloojiin hojiilee biyyaaf fayyadan hojjechaa akka jiru ibse. Yuunivarsiitichi hojii baruu fi barsiisuun cinaatti keessumaa qorannoo fi qu’annoo akkasumas ittigaafatama hawaasummaa bahaa akka jiru ibseera. Yuunivarsiitichi damee qonnaa, teeknooloojii Diroonii, Fayyaa fi dameelee biroon qorannoo adeemsisuun qoodasaa bahaa jira jedhan bakka bu’aan Pirezidaantii Yuunivarsiitichaa Dr. Reedaa Namoo. Soorata barattootaaf oolus ofiin ofdanda’uuf misooma qonna qindaa’aa irratti xiyyeeffatee hojjechaa akka jiru eeraniiru. Teeknooloojii Dirooniin hojii bu’a qabeessa irratti akka argamu mirkaneessaniiru. Sanyii beelladaa fooyyessuu, kuduraa fi muduraa, Bunaa fi dameelee biroon qorannoo cimaa fi fulla’insa qabu gochaa jira jedhaniiru. Kanaaf hojii qorannoo adeemsisuun hojiilee ummataa fi biyya fayyadu hojjechuu kan itti fufu ta’uu mirkaneesaniiru. Akkaataa Kallattii Yuunivarsiitonni ofdanda’uutti akka cehan mootummaa kaa’een qophiin taasifamaa akka jiru ta’uus eeraniiru.

Guraandhala 28/2017(TOI)- Itiyoophiyaa fi gamtaan Telekomunikeeshinii idil addunyaa hariiroo gama dijitaalaan qaban cimsuuf akka hojjetan ibsan. Ministirri Innoveeshinii fi Teeknoloojii Dr. Ballaxaa Mollaa gamtaa Telekomunikeeshinii Idil addunyaatti daarektra qaxanaa Afriikaa Dr. Imaanu’eel Minaasee waajjira isaaniitti simatanii mari’ataniiru. Mariin taasisan hojiirra oolmaa tarsiimoo dijitaal tiraanisfoormeeshinii irratti tumsaan hojjechuun haala danda’amurratti kan xiyyeeffatedha. Itiyoophiyaan ijaarsa dinagdee dijitaalaa irratti xiyyeeffannoo addaa kennuun qaama tumsitootaa waliin hojjechaa jirti jedhan Ministirri Innoveeshinii fi Teeknoloojii Dr. Ballaxaa Mollaan. Guddinni dinagdee Itiyoophiyaa akka guddatuu fi dijitaal tiraanisfoormeeshinii dhugoomsuun murteessaadha kan jedhan ministirichi, dinagdee dijitaalaa irratti tumsaan hojjechuun fayyadama dijitaal teeknooloojii fi abbummaa mirkaneessuuf akka dandeessisu himaniiru. Itiyoophiyaan damee dijitaalaan hojii hundagaleessa raawwachaa akka jirtu ibsan ministirichi. Sadarkaa infoormeeshinii fi komunikeeshinii karaa gamtaa Telekoomii idil addunyaa(ITU) bahan haqa qabeessaa fi hojiiwwan biyyoonni hojjetan kan wayitaawaa ilaalcha keessa kan galchan ta’uu akka qaban dubbataniiru. Gamtaa telekomunikeeshinii idil addunyaa(ITU)tti daarektarri qaxanaa Afriikaa Dr. Imaanu’eel Minaasee galmi Itiyoophiyaan damee dijitaalaan qabatte akka milkaa’u dhaabbanni isaanii tumsaan akka hojjetu himaniiru. Gamtaan isaanii hojiilee hojiirra oolmaa dijitaal Tiraanisfoormeeshinii Itiyoophiyaa cimsuuf fedhii akka qaban dubbataniiru. Fuulduras odeeffannoowwan Itiyoophiyaa ilaalchisuun bahan ilaalchisee Itiyoophiyaa waliin akka hojjetu ibsuu isaanii odeeffannoon ministeericharraa argame nimul’isa.

Guraandhala 26/2017(TOI)- Miidiyaaleen carraaqqii nageenya waaraa Itiyoophiyaatti mirkaneessuuf taasifamu keessatti qoodasaanii cimsuu akka qabanministeerri nageenyaa waamicha taasise. Ministeerri nageenyaa fi abbaan taayitaa biroodkaastiingii Itiyoophiyaa qooda miidiyaaleen ijaarsa nageenyaa irratti qabaatan ilaalchisee miidiyaalee daldalaa waliin mari’achaa jiru. De’eetaan ministira nageenyaa Dr. Keyiraddiin Tazarraa wayita kana akka ibsanitti, mootummaan nageenya waaraa jiraattotaa mirkaneessuu fi tokkummaa biyyaa itti fufsiisuuf xiyyeeffannoon hojjechaa jira. Kana keessaas duudhaalee nageenyaa fi araaraa aadaa hojiirra oolchuu, waltajjiiwwan maree mijeessuu, qorannoowwan nageenyarratti xiyyeeffatan taasisuu fi muuxannoo biyyootaa qindeessuun keessatti argamu. Kunis ijaarsa nageenyaa akka biyyaatti hojjetamaa jiruuf qooda guddaa gumaachaa kan jiru ta’uu eeraniiru. Hojiiwwan mootummaan nageenya lammiilee mirkaneessuuf hojjetu akka milkaa’an qooda fudhattoonni ga’ee isaanii bahuun akka irraa eegamu kaasaniiru. Miidiyaaleen qaqqabummaa qabanitti fayyadamuun ijaarsa nageenyaa irratti hojii hojjetan cimsuu akka qaban de’eetaan ministiraa kun hubachiisaniiru. Gama Kanaan ministeerichi dhaabbilee amantaa, dhaabbilee hwaasa siviikii, miidiyaalee fi qooda fudhattoota biroo waliin qindoominaan hojjechaa jira jedhaniiru. Miidiyaaleen daldalaa ijaarsa nageenyaa irratti waliigaluu fi muuxannoo qindoominaan hojjechuu gabbifachuu qabu jedhaniiru. Nageenyi biyyaa akka mirkanaa’u miidiyaaleen itti gaafatama irraa eegamu bahuuf ittigaafatamummaan akka hojjetan hubachiisaniiru. Daarektarri olaanaa abbaa taayitaa miidiyaalee Itiyoophiyaa Dr. Saamson Mokonnon gamasaaniin, miidiyaaleen odeeffannoo naamusa ogummaa kabaje, wayitaawaa, sirrii fi madaalawaa tamsaasan akka jiraatan gochuuf hojjetamaa jira jedhaniiru. Akkasumas miidiyaalee odeeffannoo sobaa fi jibbiinsa tamsaasan gaafachuu fi to’achuun xiyyeeffannaan hojjetamaa akka jirus akkasuma. Bakka bu’oonni miidiyaalee daldalaa, ogeeyyonni damee miidiyaa, qorattoonnii fi qooda fudhattoonni biroon marii kanarratti argamaniiru.

Guraandhala 25/2017(TOI)- Itiyoophiyaa fi Arjentiinaan damee Aviyeeshiniin tumsa isaanii caalaatti cimsuuf waliigalaniiru. Itiyoophiyaatti ambaasaaddarri Arjantiinaa Juwaan Iignachiyoo Rookaataagiliyaataa abbaa taayitaa siviil Aviyeeshinii Itiyoophiyaa daawwataniiru. Ambaasaaddarichi daarektara abbaa Taayitichaa obbo Geetaachoo Magngistee waliin mari’ataniiru. Waliigalteen tajaajila qilleensaa sadarkaa mallattoo gabaabaa marii baatii tokko dura Arjantiinaa Boonas Ayirasitti taasifameen xumurame sadarkaa mallattoo guutuun haala itti xumuramu si’achiisuu irratti yaada waljijjiiraniiru. Kaampaanii Arjantiinaa Xiyyaara oomishuu, suphuu fi maandisummaa irratti bobba’e “FAdeA” jedhamu waliin cehumsa teeknooloojii, karaa Afriikaa xiyyeeffannoo keessa galcheen haala Finfinneetti damee banu irratti fi abbaa taayitichaaf deeggarsa haala dandeessisu irratti mari’ataniiru. Walgahiin mana maree hojii raawwachiisaa dhaabbata siviil Aviyeeshinii idil addunyaa dhimmoota dhihaatan irratti waliin hojjechuun haala danda’amu irrattis mari’ataniiru. Waliigalteen tajaajila qilleensaa sadarkaa mallattoo gabaabaan jiru sadarkaa mallattoo guutuun akka xumuramu lammiileen hundi carraaqqii taasisuuf waliigalaniiru. Kaampaaniin Arjentiinaa Xiyyaara oomishuu fi suphu “FAdeA” haala Itiyoophiyaatti damee banu irratti murteessuuf qaamolee dhimmi ilaalu waliin waltajjiin marii akka mijaa’u waliigalteerra gahamuu odeeffannoon abbaa taayitichaa irraa argame nimul’isa.

Guraandhala 22/2017(TOI)- Bu’uraaleen misoomaa dijitaal Itiyoophiyaa 2025 diriirfamanii fi tarsiimoowwan bocaman imala cehumsa dijitaalaa kan milkeessan ta’uu ministeerri innoveeshinii fi teeknooloojii beeksise. De’eetaan ministiraa Innoveeshinii fi Teeknooloojii Dr. Yishuruun Alamayyoo TOI’tti akka himanitti, Itiyoophiyaa jiddugaleessa dijitaal tiraanisfoormeeshinii taasisuuf hojiiwwan garagaraa hojjetamaa jiru. Biyya keessatti bu’ura misoomaa dijitaalaa diriirsuun fi hojiileen daldala elektirooniksii daangaa cehan mijeessuu danda’an hojjetamaa akka jiran ibsaniiru. Itiyoophiyaan waltajjii idil addunyaa dijitaal Itiyoophiyaa dhugoomsan kan imaammata baaftonni, gaggeessitoonnii fi ogeeyyonni damee kanaa walitti dhufanii waliin mari’atan niqopheessiti jedhaniiru. Daldala elektirooniksii fi tarsiimoowwan elektirooniksii imala dijitaal Itiyoophiyaa 2025f gargaaran raggafamanii hijiirra ooluusaanii ibsaniiru. Staart aapi, leenjiin koodarsoota miiliyoona shanii wantoota dijitaal tiraanisfoormeeshinii Itiyoophyiaa si’achiisanidha jedhaniiru. Bu’uraaleen misoomaa dijitaal Itiyoophiyaa 2025n diriirfamanii fi tarsiimoowwan bocaman imala Tiraanisfoormeeshiniidijitaal Itiyoophiyaa kan milkeessan ta’uu ibsaniiru. Tarsiimoo hubannoo nam tolchee baasuun fi dhaabbata ijaaruun guddina damee kanaaf gumaacha olaanaa taasisaa akka jirtu ibsaniiru. Itiyoophiyaan dhaabbata nageenya saayibarii cimaa ijaaruun, dirree damee dhuunfaa jidduutti dorgommii gaarii taasisuu dandeessisu uumuun ofirra darbitee humna Afriikaanotaaf muuxannoo ta’u ijaarteetti jedhan.

Guraandhala 21/2017(TOI)- Sosochiin galmee waraqaa eenyummaa Faayidaa barattootaa bulchiinsa magaalaa Finfinneetti jalqabameera. Qorannoon raawwii galmee Faayidaa fi sagantaan jalqabsiisa galmee barattootaa bulchiinsa magaalaa Finfinnee taasifameera. Sadarkaa itti aanaa Kantiibaatti hojii gaggeessaan olaanaa Finfinnee Injiinar Wandimmuu Seettaa, gaggeessaan waajjira pirojektii waraqaa eenyummaa biyyaalessaa obbo Yoodaahee Ar’ayasillaasee, hoogganaan biiroo Barnootaa bulchiinsa magaalaa Finfinnee Dr. Zalaalam Mulaatuu, daarektarri olaanaa Ejensichaa obbo Yoonaas Alamaayyoo fi hooggantoonni olaanoo biroon waltajjicharratti argamaniiru. Sadarkaa itti aanaa Kantiibaatti hojii gaggeessaan olaanaa Finfinnee Injiinar Wandimmuu Seettaa wayita kana akka jedhanitti, galmeen waraqaa eenyummaa Faayidaa Finfinneetti adeemsifamaa jiru kanneen biroof fakkeenya kan ta’udha jedhan. Sosochiin galmee waraqaa eenyummaa dijitaalaa barattootaa biiroo barnootaa Finfinnee waliin tumsaan akka raawwatamu wayita kanatti ibsameera.

Guraandhala 20/2017 (TOI)-Inistiitiyuutiin spees Saayinsii fi Ji’oospaashaal abbaa taayitaa komunikeeshinii Itiyoophiyaa waliin ilaala lafaa fi saatalaayitii komunikeeshiniin waliin hojjechuuf sanada waliigaltee har’a mallatteessaniiru. Daarektarri olaanaa Inistiitiyuutichaa Abdiisaa Yilmaa fi daarektarri olaanaa abbaa Taayitichaa Injiinar Baalchaa Reebaa Waliigaltee kana mallatteessaniiru. Waliigaltichi hojiilee ilaala lafaa fi saatelaayitii kominikeeshiniin dhaabbilee lamaan jidduutti eegalaman cimsuuf akka gargaaru ibsameera. Daarektarri olaanaa abbaa taayitichaa fi jilli isaanii jiddugaleessota Inistiitiyuutii Spees Saayinsii fi Ji’oospaashaaliitti argaman daawwachuusaanii odeeffannoon Inistiitiyuuticharraa argame nimul’isa.

Guraandhala 19/2017(TOI)-Maamiltoonni Intarpiraayizii hojiisaanii caalaatti si’achiisuu akka danda’an Itiyoo-Telekoom tajaajiloota Telekoomii haaraa ifoomseera. Hojii raawwachiiftuun olaantuu Itiyoo-Telekoom Fireehiywoot Taammiruu ibsa kennaniin, teeknooloojiin maamiltoonni Intarpiraayizii tajaajiloota Telekoomii fayyadamuu barbaadan bu’ura misoomaa diriirsuun osoo isaan hinbarbaachifne salphaatti argachuu isaan dandeessisuifoomeera jedhan. Kanneen keessa sirni qabeenya beelladaa teeknooloojiin deeggaramuun odeeffannoo qabachuuf dandeessisu keessatti argama. Haala Kanaan horsiisee bulaan qabeenya beelladaa qabutti fayyadamuun deeggarsa Inshuraansii fi faayinaansii akka argatu furmaata teeknooloojiin deeggarame fidee dhufuusaa himaniiru. Itiyoo Telekoom Intarpiraayizoota Teeknooloojii uwwisa Neetwoorkii fi qaqqabiinsa fayyadamuun tajaajiloota nageenyaa, waldhaansaa, konistiraakshinii fi Kanaan walqabatan kennan tajaajila teeknooloojii sagalee fi fakkii bakkan hindaangeffamne si’ataa itti argachuu danda’an ifoomseera. Baankonnii fi Maayikiroo faayinaansonni bu’ura misoomaa Telekoomii kamiyyuu osoo hinbarbaachisiin bu’ura misoomaa Itiyoo-Telekoomitti fayyadamuun tajaajila isaanii babal’isuu beeksisuu fi tajaajila si’ataa fi qaqqabaa hawaasaaf kennuu akka danda’an furmaata qabatee dhufuusaa ibsaniiru. Gama biraan tajaajilli manneen barnootaa barattootaa fi maatii akkasumas hawaasa barnootaa waliin teeknooloojiin fayyadamuun walquunnamsiisuu dandeessisus ifoomeera. Itiyoo-Telekoom tajaajila Intarpiraayizoonni teeknooloojiin fayyadamanii maamiloota isaanii waliin walitti dhufanii duub deebii itti argachuu danda’anis har’a ifoomseera.

Guraandhala 15/2017(TOI)-Fayyadamtoonni geejjiba Baaburaa Itiyoo-Jibutii sirni waraqaa eenyummaa Faayidaa fayyadamuun karaa dijitaalaa Tikkeettii itti kutatan Wixata dhufuu eegalee hojiirra ni’oola. Hojii raawwachiisaan olaanaa waldaa Aksiyoona Baaburaa Itiyoo-Jibutii Injiinar Taakkalaa Uumaa imaltoonni waraqaa eenyummaa kanatti fayyadamuun karaa onlaayinii Tikkeettii kutachuu akka danda’an ergaa fuula marsariitii isaaniirratti barreessaniin ibsaniiru. Kun ammoo tajaajila geejjiba Baaburaa si’ataa, salphaa fi caalaatti mijataa akka taasisu himaniiru. Tajaajila kana waldaan aksiyoona Baaburaa Itiyoo-Jibutii, Itiyoo-telekoom fi sagantaan waraqqaa eenyummaa biyyaalessaa waloon qopheessuu isaanii eeraniiru.