Amajjii 12/2017(TOI) - Dhiibbaa Jijjirama Qabeenya Qilleensaa hiri'isuuf haala raaga haala qilleensaa ammayyeesuu fi odeeffannoo qaqaabamaa taasisuurratti xiyyeeffannoon hojjetama jiraachuu Daarektarri olaanaa Instiititiyutii Meetirolojii Itoophiyaa Faxxanee Tashoomee beeksisan. Foramiin raaga haala qilleensaa Ganfa Afrikaa 69ffaan magaalaa Finfinneetti geggeeffama jira. Foramii kana mata duree ''Tajaajila qabeenya qilleensaa irratti qaawwa akeekachiisa duraa irratti jiru duuchuu'' jedhuun Raagni haala qilleensa IGAD fi deeggartoonni isaa waliin ta'uun kan qopheesanidha. Daarektar olaanaa Institiyuutii Meetirolojii Itiyoophiyaa obbo Faxxanee Tashoomaa sirna banisa foramicharratti jijjiramni qabeenya qilleensaa qormaata addunyaa ta'us naannawwichatti dhiibbaan inni geesisaa jiru garuu hunda caalaa cimaadha jedhaniiru. Jijjirama qabeenya qilleensa yeroo yeroon mudatu dursanii baruun odeeffannoo qaqqabamaa taasisuun dhiibbaa cimaa inni geesisuu danda'u hiri'isuun ni danda'ama jedhaniiru. Itiyoophiyaan dhiibbaa Jijjirama qabeenya Qilleensaa irraa damdamachuuf tajaajila raaga qilleensaa ammayyeesuu irratti xiyyeeffannoon hojjecha jiraachuu ibsaniiru. Abbaa Taayitaa Misooma Mootummoota Afrika Bahaa (IGAD)tti Daarektarri Giddugala raaga Qilleensaa fi Hojiirra Oolmaa (ICPAC) Dooktar Abdii Fidaa gama isaaniin; jijjiirama qilleensaaf deebii qindaa'afi qorannoo irratti hundaa'etu barbaachisa jedhaniiru. Afrikaan Bahaa yeroo baayyee jijjiirama qilleensaatiin waan miidhamtuuf dursanii raaga kana beeksisuun barbaachisaa ta’uu ibsaniiru.

Amajji 7/2017(TOI) - Yuunivarsiitiin Haramaayyaa sanyii filatamaa Moosee fi midhaan adda addaa kan qorannoon argate qonnaan bultootaaf rabsuuf akka jiru beeksise. Sanyiin filataamaa yuunivarsiitichi qorannoon fooyyesee kunneen dhukkuba kan damdamatanii fi oomishinni guddaan kan irraa argamu ta'uun ibsameera. Yuunivarsiitiin Haramaayyaa hojii baruu fi barsiisuu idileen hojjetu cinaatti hojii qorannoo fi qo'annoo hawaasa naannaawwaa fayyadamoo taasisaan hedduu hojjecha jirachuu beeksiseera. Yuunivarsiitichatti daarektara misooma Intarpiraazii Doktar Katamaa Baqqalaa TOI'tti akka himanitti; Yuunivarsiitichi sanyii filatamaa Moosee fi midhaan gosa adda addaa qorannoon bu'a qabeesummaan isaanii mirkanaa'e baay'iseera. Haaluma kanaan mooraa muummee Yuunivarsiitichaa keessaatti kan argamu lafa heektaara 106 irratti sanyii moosee, boqqoolloo, mishingaa, qamadii fi midhaan gosa adda addaa kan biroo gatii madaalawwaan qonnaan bultootaaf rabsuuf qophaa'eera jedhaniiru. Sanyiiwwan fooyyeeffamaN kanneen ooyiruu qonnaan bultootarratti hojiin madaksuu hojjetamuus himaniiru. Sanyiiwwan filatamoo kanneen keessaa keessattu sanyiin moosee ''Bubu fi Guddannee'' jedhaman dhibee damdamachuun lafa heektaara tokko irraa hanga oomisha kumataala 350 kennuu danda'anidha jedhaniiru. Sanyiin filatamaa boqqoolloo Malkaasaa 3 fi BH-560 jedhamanis lafa heektaara tokko irraa callaa kumataala 55 hanga 60 oomishuun kan ittiin danda'amudha jedhaniru. Dabalataan mooraa yuunivarsiitii Haramaayyaa kan muummee keessaatti kan argamu lafa heektaara 11 irratti hojiin sanyii filatamaa Ataraa baay'isuu hojjetama jirachuu eeraniiru. Sanyiiwwan baay'ifamaa turan kunneen yeroo dhihootti naannoo Hararii, godina Harargee Bahaa fi Lixaatti waldaalee sanyii baay'isuu irratti bobba'anii fi qonnaan bultootaaf rabsuuf hojjetama jira jedhaniiru.

Amajji 5/2017(TOI) -Guyyoota itti aanaan naannawwaa adda addaatti haalli qilleensaa jiidhaa fi duumeessa qabu bal'inaan kan jiraatu ta'uu Instiitiyutiin Meetirolojii Itiyoophiyaa beeksise. Insitiitiyutichi ibsa TOI'f ergeen guyyoota kurnan dhufanitti bakkeewwan muraasa jiddugala Baha, Kabaa bahaa,Kaaba lixaa akkasuma Naannaawwaa Kibba Lixa Itiyoophiyaatti haalli qilleensa jiidhaa fi uuwwisni duumessaa bal'inaan kan jiraatu ta'uu beeksiseera. Kunis naannolee biyyatti bakka hedduutti erga midhaan walitti qabameen booda hojii hojjetamuuf mijata ta'uu eerera. Haaluma kanaan Kibbi Oromiyaa, Sidaamaa, Kibbaa lixaa fi Lixinni roobaa salphaa hanga jiddugaleessa kan argatu ta'uu beeksiseera. Haalli qilleensa bonaa gogaa, aduu fi qilleensa qabu guyyoota itti aananis kan itti fufu ta'uu eerera. Keessattu naannaawwaan oomishini Arfaasaa itti oomishamutti ooyiruu irraa haftee oomishaalee adda addaarra hafanii qulqullesuun barbaachisaa ta'uu hubachiiseera. Guyyoota jalqabaa torban kanaa keessatti naannolee kibba Itiyoophiyaa, baha, kaaba bahaa fi giddugaleessa biyyattii tokko tokkotti jiidhinni sadarkaan xiqqaa ta'e ni jiraata jedheera. Kunis naannoo Horisiise bulaa fi gariin horiise bulaatti dhiyeessii nyaata beelladaa fi bishaan dhugaatii fooyyesuu keessatti gahee gaarii ni qabata jedheera. Inistiitiyuutichi ibsa baaseen naannaawwan oomisha ji'a arfaasaa dafanii jalqaban ooyiruu isaanii dafanii akka qopheeffataniif haala mijata kan uumu ta'uus ibseera. Amajji 13 hanga 23/2017'tti haalli qilleensa bonaa gogaa, aduu fi qilleensa qabu naannaawwa biyyatti irra caalaan kan jiraatu ta'uu ibseera.

Amajji 1/2017 (TOI) - Dargaggoonni naannoo Affaar, Sidaamaa fi Harii irraa leenjii 'Ethio Coders' irratti hirmaachaa jiran leenjicha irratti hirmaachuun keenya hojii keenya haala gaariin akka hojjennu nu gargaaraa jira jedhan. Ministirri Muummee Doktar Abiyyi Ahimad sagantaan Kooderota Miliyoona Shanii dargaggootaaf carraa guddaa ta’uu ibsuun isaanii ni yaadatama. Dargaggoonni saganticharratti hirmaachuuf galmaa’uun ragaa gahumsaa sadarkaa idil-addunyaatti beekamtii qabu akka argatan hunduu jajjabeessuu akka qabu waamicha taasisanii turan. Dargaggootaa Leenjiin Koodaroota Itiyoophiyaa (Ethio Coders) irratti hirmaachaa teeknooloojiiwwan ammayyaa haala yeroo ammaa jiranitti dafanii akka madaqaniif leenjichi murteessa ta'uu himaniiru. Dargaggoo Shaambel Mohaammad Naannoo Affaaritti ogeessa tajaajila elektirikii Itiyoophiyaati. Leenjii koodaroota Itiyoophiyaa irratti hirmaachuun isaa hojii isaa haala gaariin akka raawwatu isa dandeessisuu ibseera. Teeknooloojii dijitaalaatiin hojjechuun kan yeroon gaafatuu fi karaa filatamaa ta'uu ibsee; carraa mootummaan mijeesefitti fayyadamuun ogummaa fi dandeettii biyyoota addunyaa adda addaa waliin walqunnamsiisuu horachuu danda'uu himeera. Naannoo Sidaamaatti ogeessa Ejensii Saayinsii fi Teeknooloojii Naannoo Sidaamaa kan ta'e Roobeel Daani'eel gama isaan; Leenjii koodaroota Itiyoophiyaaf kennamu hundaa leenji'uun xumuruu himeera. Dargaggeessi kun adeemsi jijjiirama teeknooloojii addunyaa baayyee saffisaa ta'uu eeree koodariin Itoophiyaa leenjii dhaloonni teeknooloojiiwwan ammayyaa haala jijjiirama yeroo ammaa keessatti mul’achaa jiranitti saffisaan akka madaqsu kan dandeessisu ta’uu himeera. Leenjichi akka biyyaatti hojii diinagdee dijitaalaa ijaaruuf hojjetamu keessattis gumaacha olaanaa akka qabus ibseera. Ejensii Innooveeshinii fi Teeknooloojii Naannoo Harariitti leenjisaa koodarsoota Itoophiyaa kan ta'e dargaggoo Idris Sefaa gama isaan yeroo ammaa teeknooloojiin jireenya salphisuu fi hirmaannaa fi fayyadamummaa dabaluu dandeessisaa jira jedheera. Dargaggoota damichaa leenjisuu fi humneessuu akkasuma teeknooloojii waliin wal barsiisuuf karaa Ejensii Innoveeshinii fi Teeknooloojii Naannichaatiin hojjetamaa akka jirus eeraniiru. Keessumaa teeknooloojiiwwan dijitaalaa fi walxaxaa hubachuu fi itti fayyadamuudhaan leenjiin kun yeroo waliin tarkaanfachuuf kan gargaaru ta’uu eeraniiru. Kunis biyyittiin sadarkaa teeknooloojii dijitaalaatiin addunyaan irra geesse akka geessu kan taasisu ta’uu ibsaniiru. #Itoophiyaa#Oromiyaa#coders

Mudde 24/2017(TOI) - Lammileen Kirkira lafaa naannoo Affaar naannnwa Sulula Qinxamaatti mudachaa jiru hordofuun ogummaa Saayinsiin alaa odeeffannoo tamsaafamaniin barjaaja'uu akka hin qabne Yuunivarsiitii Finfinneetti qorataan damichaa Piroofeesar Attaalay Ayyalee beeksisan.   Kirkirri lafaa taatee uumamaa walitti bu'insa dhaagaa lafa jalaanii fi humna lafa jalaa dhiibbaan ol bahuun kan uumamuu ta'uu qoaratoonni damichaa kan himan.   Erga yeroo dhihoo as naannoo Affaar naannawwaa sulula qinxamaatti keessattu gaara Fantaallee fi naannawwaa isaatti darbee darbee kirkirri lafaa uumamaa jirachuun ni beekama.   Tajaajilli Oduu Itiyoophiyaa dhimma kana ilaalchisuun Yuunivarsiitii Finfinneetti qorataa kirkira lafaa fi barsiisaa Inistiitiyuutii Ji'oofiziksii, Saayinsii Hawaa fi Astiroonomii piroofeesar Attaalay Ayyaalee dibbiseera   Akkataa saayinsiitti lafti yeroo hundaa sochiirra kan jirtu waan taateef Voolkaanoo, Sigiginni fi kirkirri lafaa akkasuma taateewwan balaa uumamaa kana fakkatan biroon kan eegamanidha jedhaniiru.   Bara darbe ji'a Fulbaanaa fi Onkoloolessaa keessa naannaawwa Awaash Fantaalee kirikirri lafaa walfakaataan turuu yaadachiisanii; erga yeroo dhihoo as garuu irra deddebiin mudachaa jiraachuu piroofesarichi himaniiru. Itiyoophiyaa naannaawwa sululula qinxamaatti kirkirri lafaa mudatu dhagaa gubataa lafa jala jiruun kan wal qabatu ta'uu eeranii, kirkirri lafaa kanaan mudatu miidhaa guddaa kan uumuu danda'u miti jedhaniiru.   Kirkira lafaa kana waliin walqabatee odeeffannoowwan doggoraa saayinsawwaa hin taanee fi kanneen lammilee jeeqan tamsaafamaa jirachuu eeranii; odeeffannoo sirrii madda sirrii irraa qofa argachuun barbaachisaadha jedhaniiru.   Kirkirri lafaa irra deddeebiin Awaash Fantaallee fi naannawaa isaatti mudachaa jiru miidhaa cimaa kan geessisu akka hin taane hawaasni hubachuu qaba jedhaniiru.   Damee kanarratti hubannoo uumuu akkasumas mootummaan ogeeyyii leenjisuu fi humna dinagdee biyyaa ilaalcha keessa karaa galcheen meeshaalee hojii qorannoof barbaachisan bituu akka qabu himaniiru.

Mudde 23/2017 (TOI) - Yuunivarsiitiin Raayyaa Ittisa Itoophiyaa Itoophiyaan teeknooloojiiwwan barbaachisoo ta’an irratti dandeettii guddaa horattu gumaacha olaanaa taasisaa jira jedhan Ministirri Teeknooloojii fi Innooveeshinii doktar Ballaxee Mollaa. Doktar Ballaxee Mollaa fi hoggantoonni dhaabbilee itti waamamtoota ministeerichaa ta'an hojii Yuunivarsiitichaa daawwataniiru. Daawwannaa kanarratti Itoophiyaan teeknooloojiiwwan barbaachisoo ta’an irratti dandeettii guddaa akka horattu taasisuu keessaatti gaheen yuunivarsiitichi barnootaa fi qorannoo keessatti qabu guddaa ta'uu ministirri Tekinolojii fi Innooveshinii doktar Ballaxee Mollaa ibsaniiru. Hojiin qorannoo damdaneesii ogummaa waraanaa irratti Yuunivarsiitichi taasisaa jiru ogummaa raayyichaa yeroo gabaabaa keessatti sadarkaa olaanaan gahuu kan danda'udha jedhaniiru. Raayyaan Ittisaa qorannoo waraanaa fi ce'uumsa teeknooloojii irratti bu’a qabeessa akka ta’u dhaabbileen dhimmi ilaallatu yuunivarsiiticha waliin ta’uun akka hojjetan waamicha taasisaniiru. Ministeerri Innooveeshinii fi Teeknooloojii Yuunivarsiiticha waliin ta’uun teeknooloojii hawaa, bu’uuraalee misoomaa TQO, misooma humna namaa, fi kanneen biroo irratti akka hojjetu ibseera. Yuunivarsiitiin kun hojii qorannoo fi misoomaa bal’aa gaggeessaa akka jiru komandentiin Yuunivarsiitii Rayyaa Ittisa Itoophiyaa Birgaadeer Jeneraal Kabbadee Raggaasaa ibsaniiru. Odeeffannoon Raayyaa Ittisa Biyyaa irraa argame akka mul'isutti, Ministeerichii fi dhaabbileen itti waamamtoonni isaa wiirtuu barnoota waraanaa guddicha biyyattii teknooloojii ammayyaatiin cimsuuf deeggarsa akka godhamu waamicha dhiyeessaniiru. #Oromia #Ethiopia #ethiopiannewsagency #technology #inovation

Muddee 22/2017 (TOI) - Mana Maree Bakka Bu'oota Uummataatti Koreen Dhaabbii Dhimmoota Seeraa fi Haqaa kenniinsa tajaajilaa Mana Murtii Waliigalaa ammayyeessuuf hojii teeknooloojii dijitaalaa hojjetamaa jiru daawwateera. Pireezidaantiin Mana Murtii Waliigalaa Teediroos Mirat hoggantoota olaanoo mana murtii waliigalaa biroo waliin ta’uun kenniinsa haqaa teeknooloojii dijitaalaatiin deeggaramee kennamu ilaalchisuun miseensota koree dhaabbiitii kanaaf ibsa kennaniiru. Teeknooloojiiwwan dijitaalaa kunneen tajaajila abbaa seerummaa fi hojimaataa manneen murtiitiin kennaman bu’a qabeessa, ammayyaa fi dhaqqabamaa akka ta’uuf kan qophaa’an ta’uun daawwannaa kana irratti ibsameera. Koreen Dhaabbii kun ijoon teeknooloojiiwwan dijitaalaa sadii Mana Murtii Waliigalaa Federaalaatti tajaajila adda addaa kennaa jiran daawwateera. Kana malees korichi Giddugala Teeknooloojii Itiyoo-Telekoomiin misoome kan Muuziyeemii Adwaatti argamu daawwateera. Giddugalichi wiirtuu teeknooloojiiwwan dhaabbilee adda addaa walitti hidhu yoo ta'u; teeknooloojiiwwan Mana Murtii Waliigalaas karaa giddugalichaa tajaajila kennaa akka jiran ibsameera.        

Sadaasa 25/2017 (TOI)- Gareen jilaa hojii raawwachiiftota Jibutii Telekoom fi green telekomunikeeshinii Sudaateeliin durfamu jiddugaleessa Itiyoo telekoom eksipiiriyeensi yaadannoo injifannoo Adwaatti argamu daawwataniiru. Hojii raawwachiiftuun olaanaa Itiyoo Telekoom Fireehiywoot Taammiruu fi hooggantoonni biroon tajaajiloota teeknooloojii dheeraa, dijitaalaa fi tajaajiloota dameewwan garagaraa ilaalchisuun ibsa taasisaniiru. Jilli kun xiyyeeffannoo gudda dijitaal sooluushinootaaf kennee fi dandeettii bu’ura misoomaa guddaa Itiyoo Telekoom ijaare dinqisiifateera. Itiyoo Telekoom oppireetaroota Afriikaa hedduuf fakkeenya kan ta’udha jedhaniiru. Itti dabaluunis jiddugaleessa eksipiiriyeensii kalaqa,dirree dijitaalaa guddisuun tiraanisfoormeeshinii dijitaalaa Afriikaa irratti ashaaraa kaa’uu kan danda’u akka ta’e ibsaniiru. Kaampaanichi Biyyarra darbee tiraanisfoormeeshinii Afriikaa dhugoomsuuf qooda bahaa jiru dinqisiifachuun hooggansi Itiyoo telekoom guddinni dinagdee dijitaalaa hundagaleessi akka mirkanaa’u kutannoo qabu dinqisiifachuusaanii odeeffannoon dhaabbaticharraa argame nimul’isa. Itiyoo telekoom jibutii telekoomii fi garee telekomunikeeshinii Sudaateel waliin walitti hidhamiinsa telekoomii Afriikaa daangaa cehuuf qooda olaanaa kan qabu Inisheetiivii konneektiviitii Horaayizen Faayiber waliin hojjechuuf kaleessa waliigaltee mallatteessuunsaanii nibeekama.

Sadaasa 24/2017(TOI)- Itiyoo telekoom telekoomii Jibutii fi garee telekomunikeeshinii Sudateel walitti hidhamiinsa telekoomii daangaa cehuuf qooda murteessaa kan qabu inisheetiivii horaayizen faayibar konneektiiviitii waliin hojjechuuf waliin waliigaltee mallatteesseera. Inisheetiivichi Afriikaanota telekoomiin walitti hidhuu fi gaanfa Afriikaa Isiyaa, Awurooppaa fi addunyaa addunyaa hafe waliin walitti fuiduuf kan akeekkatedha jedhameera. Hojii raawwachiiftuun olaanaa Itiyoo-telekoom Fireehiywoot Taammiruu akka dubbatanitti, Inisheetiivichi keebilii lafarra diriirfamuun walitti hidhamiinsa telekoomii daangaa cehu mijeessuuf kan yaadamedha. Waliigaltee kana hojeessuuf oppireetaroonni sadan bu’ura misoomaa qaban qindeessanii akka fayyadaman ibsaniiru. Waliigaltichi galma 2030tti Afriikaa dijitaalaa dhugoomsuu fi walitti hidhamiinsa Ardii cimsuuf gomaacha gaarii qaba jedhan. Inisheetiivichi sararoota bu’a qabeessa odeeffannoon ittiin dabarfamu dhiheessuu, suphaa si’ataa gochuun addaan ciccituu neetwoorkii hir’isuuf galma kan godhatedha.

Sadaasa 23/2017(TOI)- Guyyoota 10 dhufan naannawa biyyattii hedduutti qilleensi midhaan walitti qabuuf mijataa ta’e akka jiraatu Inistiitiyuutii Mitiyoorooloojii Itiyoophiyaa beeksise. Inistiitiyuutichi ibsa TOIf ergeen akka beeksisetti, guyyoota itti aanan bonni wayitii gannaa lammaffaa kan itti ta’e godinoota Gujii fi Booranaa, godinoota naannoo Sidaamaa, godinoota naannoo kibba Itiyoophiyaa, fi godinoota kibba Somaaleetti rooba xiqqaarraa amma jiddugaleessaa akka argatan eerameera. Haalli qilleensaa gogaa fi jiidhaa guyyoota 10 dhufan kutaalee biyyattii hedduutti jiru midhaan sassaabuuf mijataa ta’uu ibseera. Walakkaa torbee kanaa booda kutaaleen biyyattii Kaaba, Kaaba lixaa fi jiddugaleessaa roobni xiqqaa amma jiddugaleessaa yeroosaa hin eegne akka eegamu raageera. Kanaaf qonnaan bultoonni kana hubachuun osoo hindagatiin midhaan oyiruurra jiru guyyoota caamaa jiranitti akka walittiqaban waamicha taasiseera. Gama biraatiin jiidhinni xiqqaarraa amma jiddugaleessaatti kutaalee biyyattii kibbaa fi kibba lixaatti darbee darbee eegamu naannawoota Oromiyaa Kibbaa muraasatti midhaan bonaa oomishanitti gaarii akka ta’e ibseera. Dabalataanis naannawoota horsiisee bulaa fi walakkaan horsiisee bulaaf margaa fi bishaan dhugaatiif qooda gaarii qabaata jedhameera. Akkaataa raga kanaatiin haalli qilleensaa biyyattii bishaan hidhaa fi lafarraa fooyyessuun jallisii bonaaf gaarii akka ta’e eereera.

Sadaasa 23/2017(TOI)- Agarsiifni Innoveeshnii fi Teeknooloojii biyyoota miseensa dhaabbata tumsa kibbaa golambaa Saayiniitti baname Staartaapponnii fi Kalaqxoonni teeknooloojii biyyoota miseensarraa walitti dhufan 40 calan hojiisaanii kan dhiheessan yoo ta’u har’aa eegalee guyyoota lamaaf akka turu ibsameera. Ministirri Innoveeshinii fi Teeknooloojii Dr. Ballaxaa Mollaa, barreessaan olaanaa dhaabbata tumsa kibbaa Sheeh Mansur Biin Musaalam, bakka bu’oonni biyyoota miseensaa fi keessummoonni waamaman argamaniiru. Agarsiifni kun muuxannoo qooddachuu fi hojiiwwan kalaqaa guddisuuf kan akeekkatedha jedhameera. Kalaqxoonni hojii kalaqasaanii beeksisuun cehumsaa fi walitti hidhamiinsa teeknooloojii uumuuf isaan dandeessisa jedhameera. Ministirri Innoveeshinii fi Teeknooloojii Dr. Ballaxaa Mollaa akka ibsanitti, Itiyoophiyaan dinagdee mandhalee si’achiisuuf innoveeshinii fi teeknooloojiirratti hojjechaa jirti. Itiyoophiyaatti Kalaqxoota onnachiisuudhaan hojiiwwan kalaqaa rakkoo dinagdee fi hawaasummaa furan gabbisuun fayyadamaa ta’uu eegaluushee dubbataniiru. Barreessaan olaanaa dhaabbata tumsa kibbaa Sheeh Mansur Biin Musaalam, Hojiin Itiyoophiyaan kalaqaa fi teeknoloojii hojjechuun fayyadamuu jalqabde dinqisiisaadha jedhaniiru. Biyyoonni fayyadama Innoveeshinii fi teeknooloojii bal’isuuf tumsaan hojjechuu akka ittifufan himaniiru.

Sadaasa 14/2017(TOI)-Haala mijataa guddina start appii Itiyoophiyaatti uumuuf hojjetamaa akka jiru ministeerri Innoveeshinii fi Teeknooloojii ibse. Wixineen labsii guddina start appii Itiyoophiyaaf hojmaata dhaabbatummaa fi seera qabeessa diriirsu ummataaf dhihaatee mariin taasifamaa jira. Kaayyoon wixinee labsii kun start appiif deeggarsa dhaabbatummaa fi seera qabeessaa kennuun guddina damee kanaa Itiyoophiyaa keessatti mijataa taasisuufi. Rakkoolee sektara staar appiirratti mul’atan furuu fi dhiheessii faayinaansii mijeessuunis xiyyeeffannoo wixinee kanaa isa birooti. Ministirri Inniveeshinii fi Teeknooloojii Dr. Ballaxaa Mollaa wayita kana akka ibsanitti, hojii Itiyoophiyaan hiyyuma jalaa bahuuf hojjechaa jirtu teeknooloojii fi kalaqaan deeggaruuf hojiiwwan hedduun hojjetamaa jiru. Riifoormiin dinagdee mandhalee xiyyeeffannoo sektara dhuunfaaf kenneen hojii uumtonni hedduun dinagdee keessa gala akka jiran eeranii, start appiin qaama kanaa ta’uusaa dubbataniiru. Xiyyeeffannoo addaa mootummaan start appiif kenneen hojii uumtonni hedduun uumamaa waan jiraniif, hojmaata diriirsuuf wixinee labsii qophaa’uusaa dubbatanii labsichi hojmaata mijeessuun kalaqa jajjabeessuuf faayidaa guddaa akka qabu dubbataniiru. Hooggantoonni mootummaa olaanoon, staar apponnii fi sektara kanarratti kan hojjetan biroon marii kanarratti kan argaman yoo ta’u, galteewwan labsicha gabbisan walitti qabamu jedhameera.

Sadaasa 13/2017(TOI) - Yaa'iin bulchiinsa Intarneetii Afrikaa 13ffaan mata duree “Building our Multistakeholder Digital Future” jedhuun Finfinnee Dhaabbata Mootummoota Gamtoomaniitti galma Komishiinii Dinagdee Afrikaatti (UNECA) ta'aama jira. Yaa'ichi guyyoota lamaaf geggeeffama kan jiru yoo ta'u; Artefishaal Intalajensii, Pirotokoolii daldalaa dijitaalaa Afrikaa ajandaa haqa daataa Afrikaa waliin qindeesuun, bulchiinsa marsariitii, imaala ce'umsa dijitaalaa dargaggootaa hogganuu, Afrikaatti deebii sirna koorniyaa, imaammata nageenya saayiberii, yakka saayiberii fi kanneen biroo irratti mari'ateera. Yaa'ii kanarratti hirmaachaa kan jiran Ministir deetaan Ministira Tekinolojii fi Innooveshinii doktar Ishiruun Alamaayyoo marii kanarratti Itoophiyaan Artefishaal Intalajensiif xiyyeeffannoo kennitee hojjecha jiraachuu fi Afrikaanonni Artefishaal Intalajensiif xiyyeeffannoo adda kenninee hojjechuu qabna jedhaniiru. Itoophiyaatti hojiin Artefishaal Italajeensiin hojjetama jiru jajjabeessa ta'uu eeranii; kana caalaatti cimsuuf xiyyeeffannoon hojjetama jira jechuu isaanii Odeeffannoon Minsteera Tekinolojii fi Innoveeshinii irraa argame ni mul'isa.

Sadaasa 12/2017(TOI)- Cehumsi caasaa dijitaalaa Afriikaa akka mijatu Itiyoophiyaan kutannoon hojjechaa akka jirtu ministirri Inniveeshinii fi Teeknooloojii Dr. Ballaxaa Mollaa ibsan. Walgahiin bulchiinsa Intarneetii Afriikaa 13ffaan mata duree “Afriikaa dijitaalaa dhugoomsuuf qooda fudhattoota hundagaleessa ijaaruu” jedhuun mootummoota gamtoomaniitti komishinii dinagdee Afriikaatti adeemsifamaa jira. Ministirri Innoveeshinii fi Teeknooloojii Dr. Ballaxaa Mollaa wayita kana akka jedhanitti, Afriikaatti guddina dinagdee hunda hammatuu fi ittifufaa ta’e fiduuf babal’inni Intarneetii murteessaadha. Bulchiinsi Intarneetii Afriikaa guddina dinagdee hunda hammataa fi ittifufaa ta’e galmeessisuuf murteessaa ta’uu ibsaniiru. Intarneetiin tajaajiloota ummataa akka fayyaa, barnootaa, qonnaa fi kanneen kana fakkaatan mijeessuudhaan qooda murteessaa akka qabu dubbataniiru. Itiyoophiyaan hojiirra oolmaa bulchiinsa Intarneetii Afriikaa fi cehumsi dijitaalaa akka dhugoomu kutannoon hojjechaa akka jirtu ibsaniiru. Mootummoota gamtoomaniitti barreessaan olaanaa komishinii dinagdee Afriikaa Kilaaver Gateetee gamasaaniin, cehumsi caasaa dijitaalaa guddina waliigalaaf bu’ura ta’uu kaasaniiru. Afriikaatti namoonni miiliyoona 800 caalan Intarneetii fayyadamaa akka hinjirre eeranii, teeknooloojii dijitaalii Afriikaa fi cehumsa dijitaalaa dhugoomsuuf tumsaan hojjechuu barbaachisa jedhaniiru.

Sadaasa 12/2017(TOI)- Baatiin nageenya Saayibarii yeroo shanaffaaf kabajame milkaa’inaan xumuramuusaa bulchiinsi nageenya neetwoorkii odeeffannoo beeksise. Baatiin nageenya Saayibariibiyyaalessaa 5ffaan xumuramuu sababeeffachuun bulchiinsichi miidiyaaleef ibsa kenneera. Ittaanaan daarektara olaanaa bulchiinsichaa Daani’eel Guutaa ibsa kennaniin, nageenya Saayibarii mirkaneessuuf akka biyyaatti xiyyeeffa nnoo guddaan hojjetamaa jira. Baatiin nageenya Saayibarii hubannoo nageenya Saayibarii dhaabbilee fi hawaasummaa guddisuuf murteessaa waan ta’eef gama Kanaan hojiin milkaa’aan hojjetameera jedhan. Baatii nageenya Saayibarii baatii Onkoloolessaa adeemsifameen dorgommiin fiilmii gabaabaa nageenya Saayibariin walqabatan adeemsifamuusaa ibsaniiru. Dorgommii Kanaan kanneen sadarkaa 1ffaa amma 3ffaatti bahaniif walduraa duubaan birrii 50 amma kuma 200tti badhaafamuunsaanii eerameera. Baatiin nageenya Saayibarii biyyaalessaa 5ffaan kaayyoo barbaadame milkeessuudhaan bu’a qabeessa ta’uusaa ibsaniiru. Baatiin nageenya Saayibarii mata duree “nageenyi bu’ura misoomaa ijoon birmadummaa dijitaalaaf”jedhuun Onkoloolessa 1 amma 30 bara 2017tti sagantaawwan addaddaatiin kabajamuunsaa niyaadatama.

Sadaasa 11/2017(TOI) - Yuunivarsiitiin Jinkaa mala nyaata beelladaa biyyoo malee guyyoota 10 keessatti oomishuun danda'amu ifoomse. Itti aanaan Pirezidaantii Yuunivarsiiticha doktar Alamuu Aylaatee akka ibsanitti; 'Haayidiroopaanikii Foodar' ykn Biyyeen ala nyaanni beelladaa oomishamu oomishitummaa aannanii dachaan kan dabaludha. Malli biyyee malee nyaata beelladaa oomishuu kun Itoophiyaatti kan hin baramnee fi biyyoota aadunyaa baay'inaan muraasa ta'anitti kan hojiirra oolaa jirudha jedhaniiru. Yeroo ammaa lafti oomisha nyaata beelladaaf ooluu harki caalaan misooma midhaaniif oolaa jirachuu eeranii; malli kun rakkoo hanqina dhiheesii nyaata beellada sababa kanaan mudatu kan furudha jedhaniiru. Malli nyaata beelladaa biyyee malee oomishuu kun keessattu naannawwa magaalaatti mala filatamaadha jedhaniiru. Yuunivarsiitichatti qorataa nyaata beelladaa kan ta'an Nagaasaa Gashuu gama isaaniin nyaanni beelladaa biyyee malee oomishamu qabiyyeen Viitaaminii fi Pirotiinii isaa kaan irra kan fooyyee qabudha jedhaniiru. Malli kun keessattu bakka hanqinni bishaanii jirutti nyaata beelladaa oomshuuf tekinolojii filatamaa ta'uu eeranii jallisiidhaan nyaata beelladaa kiiloo tokko oomishuuf jiddugalaa bishaan liitira 90 kan barbaadu yoo ta'u mala biyyee malee nyaata beelladaa oomshuun immoo nyaata beelladaa kiiloo tokko oomishuuf jiddugaleessan bishaan liitira 2 qofaa hojiirra kan oolfamu ta'uu himaniiru. Mala biyyee malee nyaata beelladaa oomishuu kanaan guyyoota 7 hanga 10 keessatti oomishuun akka danda'u himanii; jallisiin garuu guyyaa 70 fudhata jedhaniiru. Malli nyaanni beelladaa biyyee malee itti oomishamu kanaan waggaa guutuu nyaata beelladaa magariisa oomishuun kan danda'amuu yoo ta'u jijjirama qilleensaas damdamachuu kan danda'u tekinolojii ammayyaa milkaa'aa ta'edha jedhaniiru. Hojii Yuunivarsiitichi tekinolojii kana beeksisaa jiru irratti qonnaan bultoonni adda duree fi ogeeyyoonni godina Arrii fi Gaamoo kibbaarra walitti dhufan hirmaataniiru.

Sadaasa 5/2017(TOI) - Bulchiinsi Nageenya Odeeffannoo fi Ministeerri Haqaa yakka Saayiberii waloon ittisuuf waliigaltee dandeesisu mallatteessan. Waliigalteen kun bu'uuralee misooma tekinolojii odeeffannoo fi hojiirra oolmaa isaa, qorannoo yakka Kompitaraan raawwatamuu, odeeffannoo walitti qabuu fi adeemsa himannaa akkasuma qorannoo seeraa fi qophii wixinee seeraa dabalatee dhimmoota yakka saayiberii ittisuu qindoominaan hojjechuuf kan dandeesisudha jedhameera. Waliigaltee kanas daarektarri olaantuu Bulchiinsa Nageenya Odeeffannoo Tigist Hamdii fi Ministira Haqaa aadde Haannaa Arayaasillaasee mallatteessaniiru. Biyya keenyaatti dijtaalaazeshiniin babal'achaa jirachuu hordofee yakki saayiberii baay'ee fi walxaxaa ta'e raawwatamuu fi gara fuula duraattis yaaddeessa waan ta'uu daarektarri Bulchiinsa Nageenya Odeeffannoo Tigisit Hamdii beeksisaniiru. Kanaaf akka biyyaatti humna yakka saayiberii ittisuu kana cimsuun barbaachisaadha jedhaniiru. Waliigalteen amma taasifame kunis qindoominaa jiru caalaatti cimsuun yakka saayibeerii hammattoo seeraa biyyaa amma jiru akkasuma qorannoo yaakka saayibeerii fi dhimmoota dijitaala foreensiik ilaallatan irratti deeggarsa barbaachisaa taasisuuf kan gargaarudha jedhaniiru.          

Sadaasa 5/2017(TOI)- Itiyoo Telekoom tajaajila paarkiingii Smaartii magaalaa Shaggar kutaa magaalaa Malkaa Noonnootti jalqabsiise. Hojii raawwachiiftuun olaantuu Itiyoo Telekoom Fireehiywoot Taammiruu, kantiibaan magaalaa Shaggar Dr.Tashoomaa Addunyaa fi hooggantoonni magaalichaa biroo fi keessummoonni waamaman sirna jalqabiinsaarratti argamaniiru. Hojii raawwachiiftuun olaanaa Itiyoo Telekoom Fireehiywoot Taammiruu wayita kana akka jedhanitti, Itiyoo telekoom magaalonni sirna dijitaalaan gara Smaart Siitiitti akka jijjiiraman hojii mul’atu hojjechaa jira. Tajaajilli Smaart Paarkiingii har’a magaalaa Shaggaritti ifoome qaama hojii kanaa ta’uu ibsanii, tajaajilli kun paarkiingii magaalichatti kennamu kan ammayyeessudha jedhaniiru. Tajaajilli kun magaalaa Shaggaritti kan jalqabame qaama Smaart Siitii ta’uusaa eeraniiru. Tajaajilli Smaart Paarkiing konkolaachiftoonni appilikeeshinii moobaayiliitti fayyadamuun bakka konkolaataa dhaaban barbaaduu, konkolaataa dhaabuu fi tajaalila argataniifis karaa Teelee kaffaluuf kan oolu ta’uu dubbataniiru. Tajaajilli Smaart Paarkiingii haala tiraafikaa sirreessuun gamatti yeroo fi boba’aa konkolaachiftoonni bakka konkolaataa dhaaban baraachuuf qisaasan guddaa akka hir’isu eeraniiru. Tajaajila kana fuulduratti naannawoota biyyattii garagaraatti babal’isuuf akka hojjetan hojii raawwachiiftuun kun dubbataniiru.

Sadaasa 2/2017(TOI)- Itiyoo telekoomii fi bulchiinsi magaalaa Bishooftuu Smaart Bishooftuu dhugoomsuuf waliigaltee mallatteessaniiru. Hojii raawwachiiftuun olaanaa Itiyoo-Telekoom Fireehiywoot Taammiruu fi Kantiibaan bulchiinsa magaalaa Bishooftuu Alamaayyoo Asaffaa waliigaltee kana mallatteessaniiru. Hojii raawwachiiftuun olaanaa Itiyoo-telekoom Fireehiywoot Taammiruu wayita kana akka jedhanitti, pirojektiin Smaart Bishooftuu kilaawudii, jiddugaleessa bilbilaa, jiddugaleessa daataa, Intarneetii si’aayinaa fi qulqullina qabu, optikaal faayibarii fi bu’uraalee misoomaa dijitaalii biroo ijaaruun magaalattii kan ammayyeessudha jedhaniiru. Pirojektichi tajaajiloota mana qopheessaa dabalatee barnoota, fayyaa, qonna, geejjiba fi tajaajiloota gibirri ittiin walitti qabamu ammayyeessuuf akkasumas bishooftuu nageenya amansiisaa qabdu dhugoomsuuf shoora olaanaa akka qabaatu dubbataniiru. Dabalataanis fayyadama furmaatilee dijitaalaa hundagaleessa guddisuun gamatti kafaltiiwwan karaa teelee birrii salphaatti raawwachiisuun bu’a qabeessummaa guddisuuf akka gargaarus akkasuma. Keessumaa magaalattii bakkee turizimii, industirii fi Invastimantii qabdu guddisuuf qooda guddaa akka qabaatu dubbataniiru. Kantiibaan bulchiinsa magaalaa Bishooftuu Alamaayyoo Asaffaa gamasaaniin waliigaltichi qabeenya qabnu sirnaan beeknee faayidaaf oolchuuf kan gargaarudha jedhaniiru. Sirna kaffaltii, geejjibaa, fayyaa, barnoota walumaa gala tajaajiloota ammayyeessuuf nigargaara jedhan.

Onkoloolessa 28/2017(TOI)- Boqonnaa murteessaan bu’aan hojiirra oolmaa pirojektii teeknooloojii hurrii roobsisuu(cloud seeding) addunyaarratti biyyoonni muraasni qofti hojjetan milkaa’inaan raawwanneerra jedhan Ministirri jallisii fi naannawa gammoojjii Dr. Abrahaam Balaay. Ministirichi ergaa karaa fuula marsariitiisaanii dabarsaniin fedhiin teeknooloojii madaqsuu fi hojjechuuf qabnuu fihojiin walitti aansinee hojjennu qabatamaan kan mul’atudha jedhaniiru.   Waggoota muraasa dura deeggarsa mootummaa Emereetota Araba Gamtoomaniin hojiirra kan oolee fi boqonnaan murteessaan bu’aan hojiirra oolmaa pirojektii teeknooloojii hurrii roobsisuu(cloud seeding) addunyaarratti biyyoonni muraasni qofti hojjetan milkaa’inaan raawwanneerra jechuun ibsan. Pirojektiin tumsa bulchiinsa nageenya odeeffannoo Intarneetii fi Inistiitiyuutii miitiyoorooloojii Biyyaalessaa, deeggarsa maallaqaa fi gaggeessummaa ministeera jallisii fi naannawa gammoojjiin hojiirra kan oole boqonnaan jalqabaa teeknooloojii hojjechuu milkaa’inaan xumuramuusaa fi jalqabiinsa boqonnaa lammataa tumsa dhaabbilee hedduu jalqabamuusaa ilaalchisuun kallattii raawwii haaraa keenyeerra jechuun dubbataniiru.