Sadaasa 4/2017 (TOI) - Sagantaan misooma teeknooloojii biyyoolessaa lammataa har'a kan eegalu ta'uu Ministeerri Hojii fi Ogummaa beeksise. Sagantaa kana Ministeerri Hojii fi Ogummaa, Inistiitiyuutii Leenjii, Teeknikaa fi Ogummaa akkasuma Inistiitiyuutii Misooma Intarpinarishiippitu waliin ta'uun qopheese jedhameera. Sagantaan kun mata duree " Ogummaan Itoophiyaaf'' jedhuun gaggeeffama. Sagantaan kun dargaggoota dandeettii fi fedhii qaban guutuu biyyattii irraa walitti fiduun dandeettii kalaqa teeknooloojii isaanii guddisuun teeknooloojiiwwan rakkoo furuu danda'an kan teeknooloojiiwwan biyya alaatii galfaman bakka bu’anii oomishaa fi oomishtummaa dabaluu danda’an akka hojjetan deeggarsa kan taasisuu ta'uu odeeffannoon ministeericha irraa argame ni mul’isa.

Sadaasa 3/2017(TOI) - Damee dippilomaasii irratti humna dubartootaa cimsuu fi murtee kennumma isaanii gabbisuu irratti xiyyeeffannoon hojjetama jiraachuu Ministir deetaan ministira Dhimma Alaa ambaasaaddar Burtukaan Ayyaanoo beeksisan. Ministeera dhimma alaatti qindeesummaa wajjirra hirmaachisummaa dhimma dubartootaa fi hawaasumaatiin waltajjiin hubannoo uumuu akkasuma qorannoo duraa kaanserii harmaa fi kaanserii fiixee gadameessa har'a geggeeffameera. Ministir deetaan ministira dhimma alaa ambaasaaddar Burtukaan Ayyaanoo dubartoonni hojjetoonni dirqama dachaa hawaasa keessatti qaban bakka hojiitti fayyaa guutuu qachuun akka bahataniif waltajjiwwan akka kanaa cimee itti fufuu qaba jedhaniiru. Ministeericha keessatti hirmaannaa fi murteesummaan isaanii akka cimu hojiin adda addaa hojjetamaa jirachuu fi gara fuula duraattis kun cimee akka itti fufu himaniiru. Hoji geggeesituun wajjirra hirmaachisummaa dhimma dubartootaa fi hawaasumaa ministeerichaa doktar Aziizaa Galataa dippilomaatota dubartoota fayyaan isaanii eeggame horachuuf sagantaan kun jalqabamuu himaniiru.

Sadaasa 3/2017 (TOI):- Naannoo Amaaraatti Kaanserii fiixee gadameessaa ittisuuf talaalliin daa'imanii fi shamarraniif kennamuuf qophiin taasifama jiraachuu Biiroon Fayyaa naannichaa beeksise. Talaallii kana kennuf har'a magaalaa Bahaar daaritti qooda fudhatoota waliin mari'atameera. Talaalliin kun daa’immanii fi shamarran umuriin isaanii waggaa 9 hanga 14 ta’aniif manneen barnootaa fi jiddugalaawwan biroo keessatti duulan kennama jedhameera. Itti aanaan hogganaa biiroo fayyaa naannichaa obbo Ababee Tasammaa; Kaansariin kun kan dhufu vaayirasii 'human papilloma' jedhamun yoo ta'u, yoo dursa ittisuu baatame dhukkuboota lubbuu namaa galaafatan keessaa isa tokkodha jedhaniiru. Naannichatti dhukkuba kana ittisuuf kan oolu talaallin Sadaasa 9 hanga 14/2017'tti kan kennamu ta'uu ibsaniiru. Talaalli kun naannichatti daa'imanii fi shamarraan miliyoona jahaa ol ta'aniif kan kennamu ta'uus eeraniiru. Dhibee kana ittisuuf talaallii fi wal'aansa kennuun dabaltatti karaa qindaa'een hubannoo hawaasa cimsuun barbaachisaadha. Milkaa'ina duula kanaaf hunduu tumsa akka taasisu waamicha taasisaniiru.

Sadaasa 3 /2017(TOI)- Ogeeyyonni Artii gumaacha ijaarsaa fi guddina biyyaaf taasisan caalaatti akka ittifuu akka qaban ministirri aadaa fi ispoortii Shawiit Shaankaa ibsa. Ministeerri aadaa fi Ispoortii mata duree “"Artiin misooma hunda galeessaa fi ijaarsa mootummaaf” jedhuun ogeeyyota sektarichaa waliin waltajjii marii qopheessaniiru. Ministirri aadaa fi ispoortii Shawiit Shaankaa waltajjicharratti akka ibsanitti, seenaa addunyaa keessatti hojiilee biyya tokko guddisanii agarsiisan keessaa artiin kan dursaati. Biyyoonni badhaadhan sadarkaa guddinarra kan gahan lammiisaanii aartiin waan bocaniifi jedhaniiru. Itiyoophiyaan sektara Kanaan qabeenya dilbii kan qabdu, uumamaan kan badhaatee fi aadaa hedduu waan qabduuf raawwiiwwan aartiif mijattuudha jedhaniiru. Kanaaf hawaasa hojiiwwan aartiidhaan bocuun Itiyoophiyaa badhaate uumuuf qoonni ogeeyyonni sektarichaa olaanaa ta’uu ibsaniiru. Mootummaanis waggoota jahan darban sektara kana cimsuuf hojiilee addaddaa akka raawwatee fi fuulduras hammattoowwan imaammataa, qorannoo fi qu’annoo gochuun damee kana guddisuuf nihojjetama jedhan.

Sadaasa 3/2017 (TOI)- Hojii biyya keessaa babal’isuu fi ammayyeessuurra darbee carraa idil addunyaa duguuguun fayyadamuuf xiyyeeffannoon akka hojjetamu ibsame. Raawwii Eksipoo hojii biyyaalessaa 5ffaa fi kallattii fuulduraarratti mariin taasifameera. Ministirri hojii fi ogummaa Mufariyaat Kaamil fi de’eetaan ministiraa hojii, hojiitti galchuu fi damee gabaa obbo Salamoon Sokkaa dabalatee hooggantoonni hojii sadarkaa doot koom fi Itiyoo Joobsi maricharratti argamaniiru. Hojiileen bu’a qabeessummaa dhaabbilee fi sektaroota qacartootaa fi hojii barbaaddota guddisan waalitti fiduun cimsuun itti fufsiisuun akka barbaachisu himameera. Dhimmoonni dirree kalaqaa bal’isuu dandeessisan marii kanarratti bal’inaan dhihaataniiru. Haala Kanaan hojiileen bu’a qabeessummaa dhaabbilee fi sektaroota qacartootaa fi hojii barbaaddota guddisan waalitti fiduun cimee akka itti fufu eerameera. Hojii biyya keessaa babal’isuu fi ammayyeessuun gamatti sadarkaa idil addunyaatti damee hojii hojii fageenyaa dabalatee carraalee dameelee addaddaan jiran duguuguun fayyadamuuf akka hojjetamu ibsameera. Haala Kanaan sektarri dhuunfaan qoodasaa akka bahu dandeessisuu, carraaqqiin hudhaalee furuun fi haallen mijataa uumuun lammiileen fayyadamoo carraa hojii mijataa gochuuf jalqabaman cimanii akka ittifufan ibsamuunsaa odeeffannoon ministeera hojii fi ogummaarraa argame nimul’isa.

Onkoloolessa 3/2017(TOI) - Hospitaalli waliigalaa mana barnootaa Yuunivarsiitii Arbaamincii naannawwichatti uummanni dhamaatii malee tajaajila waldhaansa fayyaa akka argatu taasisuu beeksise. Yuunivarsiitii Arbaaminicitto diiniin koolleejjii saayinsii fayyaa doktar Dastaa Ganchaa TOI'tti akka himanitti; Hospitaalichi Agayyaa 29/2016 irraa eegalee tajaajila kennaa jira. Hospitaalli kun sireewwan 600 ol kan qabuu fi balaawwan tasaa dabalatee waldhaansa fayyaa sadarkaa ispeeshaalitii fi sab ispeeshaalitiin kennaa akka jiru himaniiru. Kanaas ijoodhaan tajaajila siitii iskaanii, MRI, FI dijitaal Eksireey kennaa jiraachuu himaniiru. Hospitaalichi erga hojii jalqabee hawaasaaf gatii madaalawwaan tajaajila kennuun dhibbaa hawaasarra jiru salphisuufii danda'uu eeraniiru. Hospitaalli kun guyyaatti qorannoo siitii iskaanii 20 hanga 30 akkasuma tajaajilamtoota hanga 50 ta'aniif immoo tajaajila exsireey kennaa jira jedhaniiru. Kunis hawaasni naannawwaa isaatti tajaajila waldhaansa fayyaa fooyyee qabu akka argatu taasiseera jedhaniiru.

Sadaasa 2/2017(TOI)- Mandarri Beenunaa tuurizimii misooma qonnaan kan walitti qindeesse bakka turizimii miidhagaa ta’uusaa Itiyoophiyaatti Ambaasaaddarri gamtaa Awurooppaa Soofii Firoom-Imesberger ibsan. Mandarri Beenunaa qarqara haroo Basaqaatti kan argamu kutaalee ciisichaa, galma walgahii, sinimaa, bakka bashannanaa, spa ammayyaa akkasumas misooma muduraa fi dhaala leemataa ofkeessatti kan qabatedha. Ijaarsi mandarichaa bakkee turizimii ogummaa artii gamoo aadaa ijaarsa gamoo ammayyaan waliin qindeessee qabachuun misooma hawataa hawaasa naannawaaf humna turizimii dabalataa kan uumedha. Ministirri muummee Dr. Abiyyi Ahimad mandaricha eebbisanii wayita banan ergaa dabarsaniin, mandarri Beenunaa nidanda’ama kan jedhami ija keenyaan kan itti arginedha jechuun ibaniiru. Bakkichatti kan argaman Itiyoophiyaatti ambaasaaddarri gamtaa Awurooppaa Soofii Firom-Imesberger, naannichi qabeenyi uumamaa fi nam tolchee walta’uun miidhagina kan kennaniif bakkee dinqisiisaadha jedhaniiru. Oomisha kuduraa fi muduraa mandara Beenunaatti misoome dabalatee ibsituu misooma egeree hojiileen qonnaa gochuun kan fudhataman ta’uu ibsaniiru. Qilleensawaa kan ta’e mandarri Beenunaa tuurizimiif mijataa akka ta’e kaasaniiru. Mandarichi misooma Burtukaanaa, Loomii Paappaayaa fi maangoo akkasumas horsiisa Lukkuu, Gaala, loonii fi Re’ee waliin makuun waan qabateef bakka bashannanaarra darbee muduraa fi misooma dhaala leemataa walitti hidhuun barumsi kan irraa fudhatamu ta’uunsaa ibsameera. Tumsa mootummaa Itiyoophiyaa, damee dhuunfaa fi Emereetota Araba Gamtoomaniin ijaaramee kan eebbifame mandara Beenunaa Hoteelli Skaayi laayiti akka bulchu ittigaafatamni kennameeraaf.

Onkoloolessa 30/2017(TOI)- Yuunivarsiitiin Maqalee barattoota sagantaalee barnootaa digirii jalqabaa, lammaffaa fi sadaffaan barsiise kuma 2 fi 811 har’a eebbisiisaa jira. Kanneen keessaa gameewwan waldhaansaa, Injiinariingii, saayinsii Uumamaa fi teeknooloojii odeeffannoon kan baratan ta’uu odeeffannoon rejistiraarii Yuunivarsiiticharraa argame nimul’isa. Eebbifamtoota keessaa kuma 1 fi 950 digirii jalqabaan kan eebbifaman yoo ta’u, kan hafan digirii lammaffaa fi sadaffaa kan baratanidha. Dabalataanis eebbifamtoota keessaa dhibbantaan 28 dubartootaa akka ta’an beekameera.

Onkoloolessa 29/2017(TOI)- Finfinneetti Seerota fayyadama lammiilee mirkaneessuuf gargaaran qopheeffamaa fi fooyyeffamaa akka jiru biiroon haqaa magaalaa Finfinnee beeksise. Ittigaafatamaan biiroo haqaa magaalaa Finfinnee Taklee Bazzaabih TOIf akka ibsanitti waggaa darbee eegalee bulchiinsi magaalaa Finfinnee hojii riifoormii fi ijaarsa dhaabbilee xumuree dhaabbilee hedduu hojii jalqabsiiseera. Ijaarsi dhaabbilee kan dhugoomu seeraa fi qajeelfama hojmaataan ta’uu eeraniiru. Riifoormii dhaabbileen hojjetan irratti hundaa’uun hammattoowwan sera haaraa qopheessuu fi kan turan fooyyeffamaa akka jiran dubbataniiru. Haala Kanaan sirnoota hojmaataa dhaabbilee bulchiinsa magaalichaa jala jiranii ammayyeessuu fi fooyyessuuf hammattoowwan seeraa, dambiiwwanii fi qajeelfamoota hojmaataa qorannaarratti hundaa’an bal’inaan qophaa’aa jiru jedhan. Akka Kanaan baatiiwwan sadan darban dhaabbileen gaaffii seerri haaraan akka wixinaa’uuf gaafataniin fooyyessoonni seeraa sadii fi qajeelfamni hojmaata seeraa haaraa 18 qophaa’uusaa beeksisaniiru. Seerota bahan hundi akka hubatu karaa maxxansaa, dijitaalaa fi miidiyaalee fi waltajjii uumuun akka hubataman hojjetamaa akka jiran kaasaniiru.

Onkoloolessa 29/2017(TOI)- Mariin Ministiroota sirna saalaa fi dhimma hawaasummaa hooggantoota olaanoo biyyoota Afriikaa Finfinneetti taa’amaa ture murteewwan garagaraa dabarsuun xumurameera. Miidhaa dubartootarratti raawwatamu ilaalchisuun waliigalteen gamtaan Afriikaa miidhaa dubartootaa fi shamarran irra gahu dhaabsisuuf dandeessisu walgahichaan walii galameera. Ibsa maricha ilaalchisuun dhihaateen hammattichi haqa qaqqabaa taasisuuf, hundi qoodasaa akka bahu abbummaa fi ittigaafatamaa buusuuf deebii hunda galeessa kennuuf akka dandeessisu ibsameera. Waliigaltichi walgahii hooggantootaaf osoo hindhihaatiin dura akkaataa hojmaata gamtaa Afriikaatiin kutaan seeraa fi imaammataa akka ilaalu waliigaluun ragga’eera. Biyyoonni miseensa gamtaa Afriikaa hojiirra oolmaa ibsa qajeelfamootaa walqixxummaa sirna saalaa mirkaneessuu ilaalchisee gabaasni 2023 dhihaateera. Itiyoophiyaa dabalatee biyyoonni miseensa gamtichaa yeroo qabaneefitti gabaasa kan dhiheessan yoo ta’u biyyoonni biroos gabaasa akka dhiheeessan gaafatameera. Walgahichi mirgaa fi ittigaafatamummaa mirkaneessuuf kan kaayyeffate ibsa fi sagantaa raawwii Beejiing gabaasa Afriikaa akkasumas ejjennoo waloo Afriikaa walgahii komishinii dhimma dubartootaa mootummoota gamtoomanii raggaasisuun milkaa’inaan xumurameera. Teessoo Afriikaa komishinichaa taatee kan filatamte Itiyoophiyaan ejjennoo Ardichaa beeksisuu fi biyyoota miseensaa qindeessuun qoodashee akka baatu waltajjicharratti ibsamuusaa odeeffannoon ministeera dhubartootaa fi dhimma hawaasummaarraa argame nimul’isa.

Onkoloolessa 29/2017(TOI)- Itiyoophiyaan qabeenya aadaa fi Ispoortii qabdu addunyaaf dhiheessuun bu’aa isaarraa fayyadamtuu ta’uuf cimnaan hojjechuun nibarbaachisa jedhan ministirri aadaa fi Ispoortii Shawiit Shaankaa. Ministeerri aadaa fi Ispoortii hooggantoota naannoo fi bulchiinsa magaalaa waliin ta’uun dhimmoota imaammataa fi tarsiimoorratti mari’achaa jira. Ministirri aadaa fi Ispoortii Shawiit Shaankaa baniinsa waltajjiirratti akka jedhanitti, Itiyoophiyaan qabeenya aadaa fi Ispoortii qabdu addunyaatti baasuun bu’aa argamurraa fayyadamtuu ta’uuf ciminaan hojjechuutu barbaachisa jedhaniiru. Walitti bu’iinsa furuu fi nageenya buusuun shoorri artii olaanaadha kan jedhan ministirittiin, artii fi duudhaalee aadaa biyya beeksisuu fi dhaloota ijaaruuf akka meeshaa guddaatti fayyadamuu gabbifnee ittifufna jedhaniiru. Waltajjichi rakkoolee Ispoortii biyyaalessaarra jiran furuuf imaammata Ispoortii keessa deebi’amee fi wixinee labsii Ispoortii, raawwii kurmaana waggaa jalqabaa bara 2017 fi dhimmoota tarsiimoo biroorratti akka mari’atu ibsameera.

Onkoloolessa 29/2017 (TOI) - Yaa'iin fayyaa naannoo Sidaamaa kan waggaa waggaan geggeeffamu magaalaa Hawaasaatti gaggeeffamaa jira. Yaa'ii kanarratti Pirezidaantii nnoo Sidaamaa obbo Dastaa Lendaamoo , Af-yaa'ii mana maree naannichaa aadde Faantaayee Kabbadee hogganaa biiroo fayyaa naannichaa doktar Salaamaawit Mangashaa fi hoggantoonni biroon argamaniiru. Yaa'ichi mata duree "Foyya'iinsa Eegumsa Fayyaa Sadarkaa Duraa Galmoota Misooma itti fufiinsa qabu saffisaan galma ga'uuf" jedhuun gaggeeffamaa jira. Yaa'icharratti gabaasa raawwii karoora hojiiwwan damee fayyaa keessatti raawwataman irratti mari’achuun dhaabbilee raawwii fooyya’aa galmeessisaniif beekamtiin akka kennamu beekamaadha.

Onkoloolessa 28/2017(TOI)- Hojjettoonni tajaajila oduu Itiyoophiyaa dhiiga arjooman. Hojjettoonni dhaabbaticha dhiiga yoo arjooman kun yeroo 14ffaadha. Kanneen dhiiga arjooman keessaa hoogganaan wiirtuu oduu obbo Gazzaaheny Warqinaa akka jedhanitti, dhiiga arjoomuun lammiilee hanqinni dhiigaa isaan mudate lubbuunsaanii akka hindarbine baraaruudha. Dhiiga nuyi arjoomneen lubbuu namaa baraaruun hunda caalaa itti quufinsa hunda caaludha jedhaniiru. Ittigaafatama hawaasummaa guddaa kana hubachuun hundi kanneen hafanis waan kana akka ittifufan waamicha taasisaniiru. Gaazexessituun Yeshiimmabeet Dammaqaa yeroo 11ffaaf dhiiga arjoomuushee ibsitee, lubbuu namoota da’umsaa fi sababoota addaddaan dhiigni dhangala’ee baraaruu akka ta’e jetteetti. Waggoota 10 darbaniif baatii sadi sadiin dhaabbataadhaan dhiiga arjoomaa turuusaa kan ibse ammoo Gaazexessaa Musee mallasaadha. Dhiignin ani arjoomu lubbuu namootaa waan baraaruuf fuulduras ittinfufa jedheera. Dhaabbatichatti darektarri dubartootaa fi damee heddumminaa Taaddalech Boggaalaa ogeeyyonni miidiyaa odeeffannoo hawaasaan gahuun cinaatti ittigaafatama hawaasummaa bahuun fakkeenya ta’uu akka qaban kaasaniiru. Hojjettoonni dhaabbatichaa dhiiga arjoomuu aadaa godhachuun baatii sadi sadiin dhiiga arjoomaa jiru jedhaniiru. Yuunivarsiitii Finfinneetti barsiisaan gaazexessaa fi komunikeeshinii Dr. Geetaachoo Dinquu leenjii gaazexeessummaa dhaabbatichi kennnaa wayita jiranitti gocha gaarii kanarratti argamuusaanii ibsaniiru. Fedhiin dhiiga arjoomuu kan ittifufu waan ta’eef gocha gaarii gana cimsuun lubbuu namoota hanqina dhiigaan darbuu danda’uu haabaraarru jechuun ergaa dabarsaniiru. Tajaajila Baankii dhiigaa ItiyoophiyaarraaYisaaq Yoonaas dhiigni kennaa addaa namoota keessatti uumamaan argamuta’uu eeraniiru.

Onkoloolessa 28/2017(TOI)- Beela qolachuuf deebii waloo barbaada jedhan Ministirri muummee Dr. Abiyyi Ahiamd. Ministirri muummee ergaa fuula marsariitiisaaniin dabarsaniin beela qolachuun deebii waloo barbaada jedhaniiru. Kanaaf ammoo dhiheessii deeggarsa idil addunyaa wabii nyaataaf oolu, shaakallii beekumsa qooduu daangaa cehu, imaammata walsimaa qaqqabiinsa haqa qabeessaaf oolu akkasumas deeggarsi qonnaan bultootaa fi horiisee bultoota sadarkaa xiqqaarra jiraniif dursa kennu barbaachisaadha jechuun ibsaniiru. Yaa’ii ’World Without Hunger’ wayita xumurru, hirmaattota mariileen fayidaa olaanaa qaban akka milkaa’an baay’een galateeffadha jedhan ergaasaaniitiin. Tarkaanfiin Itiyoophiyaa mukoonni biiliyoona afurtama bakka dhaabamanitti hojiilee jijjiiramaa oomishtummaa guddisan, misooma midhaanii ongee damdamatan, karaa hojiilee sagantaa # ashaaraa magariisaa hojii qonnaa egereerratti mul’ate yaa’ii kanarratti dhihaateera jechuun baeeksisaniiru. Karaa ‘Itiyoophiyaan haa oomishtu' tiin hojii kalaqaa paarkiiwwan walmakaa industirii qonnaa, guddina galii fi invastimantiiwwan cichuun hojjetaman damee qonnaa addunyaarratti qooda Itiyoophiyaa cimsaniiru jedhan. Beela qolachuun deebii waloo barbaada. Kanaaf ammoo dhiheessii deeggarsa idil addunyaa wabii nyaataaf oolu, shaakallii beekumsa qooduu daangaa cehu, imaammata walsimaa qaqqabiinsa haqa qabeessaaf oolu akkasumas deeggarsi qonnaan bultootaa fi horiisee bultoota sadarkaa xiqqaarra jiraniif dursa kennu barbaachisaadha jechuun ibsaniiru.

Onkoloolessa 28/2017 (TOI)- De’eetaan ministira alaa ambaasaaddar Misgaanuu Argaa waajjira ittisa yakkaa fi baala balaafamaa ittisuu Dh.M.Gtti haaraa kan muudaman daarektara baha Afriikaa Ashiitaa Miitaal waliin mari’ataniiru. Baha Afriikaatti yaaddoo olaanaa kan uume deeraan ala namoota deddeebisuu, deddeebisuu baala balaafamaa, dawaa sobaa deddeebisuu, meeshaa waraanaa seeraan ala deddeebisuu, daldala kontirobaandii fi maallaqa malaammaltummaan biyyaa baafamu gama ittisuutiin tumsaan hojjechuuf marii Kanaan waliigalteerra gahuunsaanii ibsameera. Itiyoophiyaan olitti kan ibsamanii fi yakkoota qaxanichatti yaaddoo uuman ilaalchisuun Dh.M.Gtti waajjira ittisa yakkaa fi baala balaafamaa waliin tumsaan hojjechuuf kutannoo akka qabdu ambaasaaddar Misgaanuun mirkaneessaniiru. Daarektarittiin Ashiitaa Miitaal gamasaaniin Itiyoophiyaa waliin tumsaa fi qindoominaan hojjechuu jechuun qaxanicha qofatti odoo hintaane akka Afriikaatti carraaqqii taasifamu kan gargaarudha jedhan. Waajjirrisaaniis gama gabbisa dandeettii fi deeggarsa teekinikiin dhaabbileewwan Itiyoophiyaa dhimmichi ilaalu waliin cimsee Akaka ittifufu mirkaneessuusaanii odeeffannoon ministeera alaarraa argame nimul’isa.

Onkoloolessa 27/2017 (TOI) - Agarsiisni hojii biyyaalessaa 5ffaan Galma Barkumeetti bamaeera. Agarsiisa kana dhaabbata ''Infomind Solutions'' jedhamu, Ministeera Hojii fi Ogummaa akkasuma Faawundeeshinii MasterCard tu waliin ta’uun qopheesse jedhameera. Sirna banisa agarsiisa kanaarratti hoggantoonni hojii mootummaa olaanoon fi keesummoonni affeeraman argamaniiru. Sirna banisa garsiisa kanarratti kan argaman Ministir deetaan ministira Hojii fi Ogummaa obbo Solomoon Sookaa Itoophiyaan jijjiirama ariifataa keessa jirti jedhaniiru. Humni namaa misooma biyyaatiif meeshaa ijoo ta’uu ibsuun, kana hammattu bu’uura imaammataa cimaan bulchiins barbaachisaadha jedhaniiru. Imaammattoonni haala carraa hojii uumuuf mijataniin akka qophaa’uu qabanis eeraniiru. Agarsiifni ministeerichi qopheesse dhiyeessii fi fedhii walsimsiisuuf gumaacha olaanaa taasisaas jedhaniiru. Omishaa fi oomishtummaa guddisuuf aadaa hojii cimsuun dhimma yeroon gaafatu ta’uus hubachiisaniiru. Fayyadamummaa lammiilee guddisuuf hojjetamaa jiraachuu ibsanii, waltajjiiwwan akkanaa yeroo yeroon qophaa’uu akka qaban hubachiisaniiru. Itoophiyaatti Hogganaan Biyyaa Faawundeeshinii Maastarkaard obbo Saamu'eel Yaalow gama isaaniin Faawundeeshinichi hojiilee carraa hojii uumuu Itoophiyaa keessatti hojjetamaa jiru deeggaruu kan itti fufu ta’uu ibsaniiru. Hundeessaa fi hoji gaggeessaa dhaabbata 'Rank Infomind Solutions' kan ta’an Yuusuuf Rajaa gama isaaniin; agarsiisni kun waa’ee carraa hojii uumuu qofa osoo hin taane, rakkoo hoji dhabdummaa Itoophiyaa hiikuu waan barbaachisaan qabatee dhihaachuudha jedhaniiru. Agarsiisni kun waltajjii hojii barbaaddonni kallattiin hojjechiistota waliin wal arguu fi gitoota hojii duwwaa irratti qacaruu danda’an ta’uu hubachiisaniiru. Agarsiisa kanarratti hojjechiistonni gara 300 ta’an kan hirmaatan yoo ta’u, carraan hojii kuma 30 ol damee adda addaatiin akka uumamu himaniiru.

Onkoloolessa 26/2017(TOI)- Faawundeeshiniin Erbaas meeshaalee waldhaansaa fi dawaa toonii 11 tuqaa 5 ministeera fayyaaf deeggarsa taasiseera. Ministirri fayyaa Dr. Maqdas Dhaabaa deeggarsa kana fudhataniiru. Daandiin qilleensaa Itiyoophiyaa deeggarsa Faawundeeshinii Erbaasiin taasise kana tolaan gara biyyaatti fideera. Ministirri fayyaa Dr. Maqdas Dhaabaa daandiin qilleensaa Itiyoophiyaa akkuma Kanaan duraa Xiyyaarota haaraa wayita galchu deeggarsoota biyya alaatii argaman tolaan fe’ee biyya akka galchu yaadachiisaniiru. Deeggarsa meeshaalee waldhaansaa fi dawaa faawundeeshiniin Erbaas taasiseef galateeffataniiru. Hojii raawwachiisaan olaanaa daandii qilleensaa Itiyoophiyaa Masfin Xaasoo daandiin qilleensaa Itiyoophioyaa abbaa Xiyyaara Erbaas A350-100 Afriikaatti kan jalqabaa ta’e kana waan ta’eef Afriikaatti daandii qilleensaa adda duree ta’ee akka ittifufu akka isa taasisu himaniiru. Daandiin qilleensichaa deeggarsa ministeera fayyaaf taasisu cimsee akka ittifufsiisus ibsaniiru. Baatiiwwan dhufan Xiyyaaronni Erbaasii dabalataa afur Itiyoophiyaa akka galan hojii raawwachiisaan olaanaa kun eeraniiru. Pirezidaantiin ittaanaa dame gurgurtaa Erbaas Hadii Akum, Faawundeeshiniin Erbaas deeggarsa ministeera fayyaaf taasisu akka ittifufu ibsuusaanii odeeffannoon ministeera fayyaarraa argame nimul’isa.

Onkoloolessa 26/2017(TOI)- Yuunivarsiitiin Finfinnee miseensa hundeessaa waldaa Yuunivarsiitiiwwan biyyoota ‘BRICS’ ta’uusaa beeksise. Yuunivarsiitichi Ruusiyaa, Hindii fi Biraaziil dabalatee Yuunivarsiitiiwwan biyyoota ‘BRICS’ waliin ta’uun waldaa Yuunivarsiitiiwwan biyyoota ‘BRICS’ hundeessuudhaan Yuunivarsiitii baha Afriikaa kan jalqabaa ta’uusaa ibseera. Waldaan Yuunivarsiitiiwwan biyyoota ‘BRICS’ arfan hundeessan barnoota, dippilomaasii, qorannoo fi qu’annoo akkasumas hojii kalaqaatiin waliin hojjechuu kan isaan dandeessisu akka ta’e eerameera. Yuunivarsiitiin Finfinnee akkaataa karoora tarsiimoo ofiin of bulchuutiin tumsaa fi idil addunyummaarratti xiyyeeffatee hojjechaa akka jiru ibseera.

Onkoloolessa 25/2017(TOI) - Dhaabbileen Amantii addunyaatti qormaata kan ta'e finxaalesuummaa fi yaada qoqqodinsaa dhabamsiisuuf ciminaan hojjechuu akka qaban Pirezidaantiin FDRI Taayyee Atsiqasillaasee himan. Ministeerri Nageenyaa Yuunaayitid Arab Emireetiitti kan argamu Yunivarsiitii Namoomaa Mohaammad Bin Zaayid waliin ta’uun konfiraansii idil addunyaa dhaabbilee amantaa Finfinneetti qopheessera. Sirna banissaa yaa'ichaarratti Pirezidaantii FDRI Taayyee Atsiqasillaasee dabalatee ministira Nageenyaa Binnaalif Andu'aaleem, Chaansilaraa Yuunivarsiitii Namoomaa Mohaammad Bin Zaayid doktar Kaliifaa Mubaarak, abbootii amantii, yaa'ii dhaabbilee amantii Itoophiyaa fi Yuunivarsiitoota irraa hayyoonni hirmaataniiru. Akkasuma dhaabbileen amantii Afrikaa bahaa, Ruusiyaa, Morookoo fi Afrikaa Kibbaa akkasuma dhaabbileen idil addunyaa fi keessummoonni waamichi taasifameef biroon argamaniiru. Pirezidaantiin FDRI Taayyee Atsiqasillasee yaa'ii kanarratti haasaa taasisaniin dhaabbileen amantii waldanda'uu, waliin jiraachuu fi yaadama waliif yaaduu jabeesuu keessatti gahee guddaa qabu jedhaniiru. Itoophiyaan biyya amantiiwwan hedduun waldanda'uun keessa jiraan ta'uu isheen addunyaaf fakkeenya taateetti jedhaniiru. Wayita ammaa addunyaarratti finxaalesummaa fi yaanni qoqqodaminsaa waloon jiraachuurratti balaa ta'aa dhufuu himaniiru. Dhaabbileen amantii waloon jirachuu fi waldanda'uuratti balaa kan ta'ee finxaalesummaa fi yaada qoqqodinsaa dhabamsiisuurratti cimanaan hojjechuu qabu jedhaniiru. Yaa'ii kanaanis dhaabbileen Amantii dhimmoota tokkummaa biyyaaleessaa cimsan, rakkoo waloo waloon furuuf haala dandeesisan irratti mari'achuu akka qaban hubachiisaniiru.  

Onkoloolessa 23/2017 (TOI) - Naannoo Gambeellaatti hojiiwwan qulqullina barnoota mirkaneesuu fi bu'aa qabxii qormaata biyyaaleessaa kutaa 12ffaa fooyyeesuuf dandeesisan hojjetama jirachuu Biiroon Barnootaa naannichaa beeksiseera. Baratoonni qormaata biyyaalessaa kutaa 12ffaa bara kana qoramanis qabxii fooyya'aa galmeesuuf ammuma irraa qophii gahaa taasisaa jirachuu himaniiru. Hogganaan Biiroo Barnootaa naannoo Gambeellaa obbo Ukuuny Okeeloo TOI'tti akka himanitti; qulqullinni barnootaa jiraachuu dhabuun guddina dinagdee fi hawaasummaarratti dhiibba uumeera jedhaniiru. Naannichatti bara barnootaa darbe qabxiin qormaata biyyaaleessa kutaa 12ffaa galmaa'e gad aanaa ta'uu eeranii; dameen kun xiyyeeffannoo qaama hundaa kan gaafatudha jedhaniiru. Kanaaf akka raannootti rakkoo qulqullina barnootaa mudate furuuf biirichi qaamolee qooda fudhatoota waliin ta'uun xiyyeeffannoon hojjechaa jira jedhaniiru. Keessayyuu imaammata barnootaa haaraa bu'uura godhachuun galteewwan baruu fi barsiisuuf barbaachisaan manneen barnootaaf guutuun qulqulli barnoota mirkaneesuuf xiyyeeffannoon hojjetama jirachuu himaniiru. Hojiin baruu fi barsiisuus kallatti kaa'ameen sirriin akka raawwatamuuf deeggarsii fi hordoffiin taasifamaafii jirachuu eeraniiru. Like Comment Send Share