Sadaasa 4/2017(TOI) - Itoophiyaan humna dhiibbaa jijjirama qilleensaaf hin jilbeeffanne uumuuf ejjennoon isheen qabdu dinqisiisadha jedhan Hoji raawwachiiftuun olaantuu Kilaameet Invastimat Fanid Tariyee Badigeesiin. Dhaabbata Mootummoota Gamtoomaniitti Yaa'iin jijjirama qilleensa 29ffaa (COP 29) Azerbajaan magaalaa Baakuutti geggeeffamu erga eegalee har'a guyyaa sadaffaa ta'eera. Pirezidaanit Taayyee Atsiqesillaasee, Ministira Karooraa fi misoomaa Doktar Fitsum Asaffaa, Ministira Qonnaa doktar Girmaa Amantee dabaltee jilli Itoophiyaa biroon yaa'icharratti hirmaacha jira. Pirezidaanit Taayyee Atsiqesillaasee misooma ashaaraa magariisaa Itoophiyaa fi eegumsa naannoo irratti hojii hojjecha jirtu kan agarsiisu 'Paaviliyoonii' eebbisanii bananiiru. Hirmaattoonni yaa'icharrtti hirmataanis 'Paaviliyoonii' kana daawwachaa jiru. Jilli Hoji raawwachiiftuun olaantuu Kilaameet Invastimanit Fanid (Climate Investment Fund) Taryee Badigeesiin durfamus daawwataeera. Ministirri Qonnaa doktar Girmaa Amantee hoji raawwachiftuu kana waliin marii gamlamee dhimma misooma bosonarratti xiyyeeffate taasisaniiru. Taryee Badigeesiin ejjennoo Itoophiyaan humna dhiibbaa jijjirama qilleensaaf hin jilbeeffanne uumuuf hojjecha jirtu dinqisiifataniiru. Doktar Girmaa Amantee jilli isaanii Paaviliyoonii kana daawwachii isaaniif galateeffataniiru.

Sadaasa 4/2017(TOI)- Itiyoophiyaan qonna egeree imaammatashee haala qilleensaa biyyaalessaa keessatti qindeessuun wabii nyaataa fi eegumsa naannoo guddisuuf hojjechaa akka jirtu Pirezidaant Taayyee Atsqasillaasee ibsan. Itiyoophiyaan yaa’ii jijjiirama haala qilleensaa mootummoota gamtoomanii 29ffaa (COP29) Azarbaajaanitti adeemsifamaa jirurratti walgahii jijjiirama haala qilleensaa sadarkaa olaanaa fi sirna nyaataa fi uumama bayyanachiisuu gaggeessitoonni addunyaa irratti argamerratti xiyyeeffate taasifteetti. Pirezidaant Taayyee Atsqasillaasee, ministirri muummee Deenmaark Meetee Fireedriiksen, ministirri jijjiirama haala qilleensaa fi eegumsa naannoo Emereetota Araba Gamtoomanii Dr. Amnaa Biint Abdullaah Al Dahaak Alshamsii, Pirezidaantiin COP29 fi ministirri eegumsa naannoo Azarbaajaan Muktaar Babayeev fi bakka bu’oonni dhaabbilee idil addunyaa walgahii kanarratti hirmaataniiru. Walgahichi galma haala qilleensaa hoo’innni addunyaa digirii seelshiyeesii 1 tuqaa 5 akka hincaalle gochuuf qabame milkeessuu akkasumas sirnoota nyaataa fi barbaachisummaa qabu irratti kan xiyyeeffatedha. Itiyoophiyaan qonna egeree imaammatashee haala qilleensaa biyyaalessaa keessatti qindeessuun wabii nyaataa fi eegumsa naannoo guddisuuf kutannoo qabdi jedhan Pirezidaant Taayyee Atsqasillaasee . Tarkaanfiin haala qilleensaa Itiyoophiyaa guddaan kun carraalee dinagdee Itiyoophiyaa waliin kan walqabate ta’uunsaa fayyadama lammiilee mirkaneessuu akka danda’u himaniiru. Itiyoophiyaan gama jijjiirama haala qilleensaatiin furmaatilee guddaa tarkaanfachiisuun fi tumsa idil addunyaa cimsuuf kutannoo akka qabdu ibsameera. Kaarboonii gadi lakkifamu hir’isuun, lafa miidhame deebisanii bayyanachiisuu fi qonna egeree bal’isuun barbaachisaa akka ta’e walgahicharratti kaafamuusaa odeeffannoon ministeera pilaanii fi misoomaa irraa argame nimul’isa.

Sadaasa 4/2017(TOI)- Pirojektoota Itiyoophiyaan jijjiirama haala qilleensaa qolachuuf hojjechaa jirtuuf hawaasni idil addunyaa deeggarsa taasisuu akka qabu Pirezidaant Taayyee Atsqasillaaseen ibsan. Yaa’iin jijjiirama haala qilleensaa mootummoota gamtoomanii 29ffaa(COP29)Azarbaajaan Baakuutti taa’amaa jiru har’a guyyaa sadaffaa qabateera. Pirezidaant Taayyee Atsqasillaasee haasawa yaa’icharratti taasisaniin Itiyoophiyaan inisheetiivii ashaaraa magariisaa dabalatee hojiiwwan ijoo eegumsaa fi kunuunsa qabeenya uumamaa taasisaa jirtu himaniiru. Hawaasni addunyaa carraaqqiiwwan akkasii akka ciman deeggarsa taasisuu akka qabu ibsuusaanii odeeffannoonministeera alaarraa argame nimul’isa.

Sadaasa 4/2017(TOI)- Itiyoophiyaan waliigaltee Paarisiis fi ittigaafatamashee ‘COP 28’ waggaa darbee waan sadiin hojeessaa akka jirtu Ministirri muummee Dr. Abiyyi Ahimad ibsan. Kan jalqabaa hojii ashaaraa magariisaatiin biqiltuuwwan biiliyoona 40 dhaabuun bosonni dhibbantaa 6n akka guddatu taasiseera jedhan. Kan biraan bara 2015 hanqina oomishaa gara oomisha irraa hafaa oomishuutti geeddare sagantaan misooma Qamadii jallisii yoo ta’u pirojektiiwwan misooma magaalaa ammayyaa eegumsa haala qilleensaaf mijataa kan ta’an magaalaawwan egeree fi magariisaa kan uuman humna haaromfamuun kan deeggaraman daandii lafoo kan qabanii fi konkolaattonni Elektiriikii kan itti dhihaatan hojiilee birooti jechuun ibsaniiru. Ministirri muummee Dr. Abiyyi Ahimad ergaa fuula marsariitiisaaniirratti dabarsaniin wayita #COP29 adeemsifamaa jirutti hojiileen Itiyoophiyaan rakkoo jijjiirama qilleensaaf furmaata fiduuf hojiilee hojjetaman Faayinaansiirratti kaayyeffachuun gamatti ittigaafatamoota waloo garuummoo ittifayyadama tokkoon tokkoon namaan adda bahan akkasumas ittigaafatama seenaa kan gaafachiisan ta’uu akka qaban xiyyeeffannoo guddaa kenniteetti jedhan. Murteewwan deeggarsa maallaqaa haala qilleensaa iftoomina qaban biyyoota akka Afriikaa misooma xiqqaa qaban qabatamaan hordofuuf barbaachisoodha jedhaniiru.  

Sadaasa 3/2017(TOI)- Paaviiliyooniin Itiyoophiyaan hojiin ashaaraa magariisaa fi eegumsa naannoorratti hojjechaa jirtu agarsiisu yaa’ii ‘COP 29’ Azarbaajaan Baakuutti adeemsifamaa jirurratti pirezidaant Taayyee Atsqasillaaseen eebbifamee banameera. Yaa’ii idil addunyaa biyyoonni jijjiirama haala qilleensaa fi gammoojjummaa qolachuuf hojii hojjechaa jiran dhiheessanirratti Itiyoophiyaan paaviliyoonii ashaaraa magariisaa fi eegumsa naannoorratti hojii hojjechaa jirtu agarsiisu banaa taasifteetti. Pirezidaant Taayyee Atsqasillaasee wayita kana akka jedhanitti, Itiyoophiyaan hojii humna haaromfamu, qonna egeree fi eegumsa bosonaarratti hojjechaa jirtu kaasaniiru. Haala Kanaan Itiyoophiyaan gaasii faalan gadhiisuu hir’isuu fi hawaasa jijjiirama haala qilleensaaf hin hinsaaxilamne ijaaruuf kutannoo qabdi jedhan. Dabalataanis addunyaan jijjiirama haala qilleensaarratti xiyyeeffachuudhaan deeggarsa qabatamaa keessumaa biyyoota guddachaa jiraniif akka kennu akka qabu eeraniiru. Itti fufuunis tumsa idil addunyaa taasisuun gufuulee jijjiirama qilleensaa furuun akka barbaachisu ibsaniiru. Keessumaa furmaata egeree biyyoota Afriikaatti fiduun shoora murteessaa tumsi idil addunyaa qabu hubachiisuun akka barbaachisu dubbataniiru. Ministirri pilanii fi misoomaa Dr. Fitsum Asaffaa gamasaaniin,Itiyoophiyaan humna haaromu dhiheessuudhaann wabii nyaataa fi hojii bakkeewwan tuurizimii babal’isuutiin akkasumas biqiltuu dhaabuu fi hojiiwwan ashaaraa magariisaatiin dursuun hojjechaa jirti jedhaniiru. Gareen jilaa Itiyoophiyaa ‘COP’29 baranaa Azarbaajaan Baakuutti jalqabamerratti hirmaachaa jiru mariiwwan ijoo taasisuun hojii ashaaraa magariisaa fi eegumsa naannoo Itiyoophiyaan hojjachaa jirturratti muuxannoo niqooda jedhamee akka eegamu odeeffannoon ministeera pilaanii fi misoomaa irraa argame nimul’isa.

Sadaasa 2/2017 (TOI) - Yaa'iin Jijjiirama Qilleensaa Dhaabbata Mootummoota Gamtoomanii (COP 29), kan Itoophiyaan irratti hirmaatte, magaalaa guddoo Azarbaajaan Baakuutti taa'amuu eegaleera. Yaa'iin kun hanga aaraa qilleensatti gad lakkifamuu hiri'isuu, dandeettii faayinaansii jijjiirama qilleensaa cimsuu akkasuma jijjiirama qilleensaa karaa itti fufiinsa qabuun hiri'isuu irratti xiyyeeffata taa'ama jedhamee eegama. Yaa'iin COP29 bara kanaa mata duree "Together for a Green Earth" jedhuun gaggeeffamaa jira. Itoophiyaan yaa'ii kanarratti hirmaachaa kan jirtu yoo ta’u, hojii eegumsa haala qilleensaa irratti hojjechaa jirtuu tumsaa fi deeggarsa barbaaduuf itti fayyadamti jedhamee eegama. Inishiyeetiiviin Misooma ashaaraa Magariisaa Itoophiyaa keessattuu hojii qonnaa, ikootuurizimii fi anniisaa haaromfamuu danda’u irratti hojjetamaa jiru haala qilleensaa itti fufiinsa qabu eeguuf gumaacha guddaa akka taasisu beekamaadha. Kanaaf Itoophiyaan lafa bosonnni irraa cirame irra deebiin misoomsuu fi itti fayyadama lafaa itti fufiinsa qabuu irratti hojii kutannoon hojjette yaa'ii kanarratti akka muuxannootti ni dhiheesiti jedhameera..

Onkoloolessa 27/2017(TOI)-Sagantaa ashaaraa magariisaa yaada ministirri muummee Dr. Abiyyi Ahimad maddisiisaniin hojeeffamaa jiru Giiniitti hojeessuuf fedhii akka qaban ministirri muummee biyyattii Amaaduu Urii Baah ibsaniiru. Ministirri muummee Giinii Amaaduu Urii Baah har’a ministira dhimmi alaa Dr. Geediyoon Ximootiwoos waliin dhimmoota gamlamee fi Afriikaarratti mari’ataniiru. በHaala Kanaan ministirri muummee Giinii Amaaduu Urii Baah sagantaan ashaaraa magariisaa Itiyoophiyaatti hojeeffamaa jiru bu’a qabeessa ta’uusaa ibsuusaanii odeeffannoon ministeera dhimmi alaarraa argame nimul’isa. Sagantaa ashaaraa magariisaa bu’a qabeessa kana biyasaaniitti hojeessuuf fedhii akka qaban ibsaniiru. Itiyoophiyaan muuxannoo misooma dinagdee fi kanneen biroo qabdu Giiniitti fudhachuuf akka barbaadan ibsuudhaan kanaaf ammoo deeggarsi teekiniikaa akka taasifamuuf gaafachuunsaanii himameera. Biyyoonni lamaan Kanaan dura dhimmoota hedduurratti kan walii mallatteessan hojiirra oolchuuf tumsaan hojjechuun akka barbaachisus kaasaniiru. Ministirri dhimmi alaa Dr. Geediyoon Ximootiwoos gamasaaniin Itiyoophiyaan muuxannoo garagaraa qabdu Giiniif qooduuf qophiidha jedhaniiru. Qabeenyi bishaanii Itiyoohiyaa deebi’ee akka bayyanatu Ashaaraan magariisaa qooda olaanaa bahaa akka jiru ministirichi ibsaniiru. Daawwannaan ministirri muummee Dr. Abiyyi Ahimad A.L.Atti bara 2020 Giiniitti tasisan hariiroo seena qabeesa kana sadarkaa olaanaatti kan ceesise ta’uu ministirichi dubbataniiru. Barreessaa olaanaa dhaabbata gamtaa Afriikaa kan turan Diyaaloo Teelii hariiroo Itiyoo-Giinii keessatti qooda olaanaa akka bahan Ministirri muummee Giinii yaadachiisuunsaanii odeeffannoo kana keessatti ibsameera.

Onkoloolessa 12/2017(TOI)- Sagantaan ashaaraa magariisaa Itiyoophiyaa misooma naannawaa fi fayyaaf bu’ura ta’uusaa dhaabbata fayyaa addunyaatti daarektarri naannawaa, jijjiirama haala qilleensaa fi fayyaa Dr. Maariyaa Neeraa ibsan. Haallottan qormaata addunyaa yeroo ammaa keessaa jijjiirama haala qilleensaa fi waliin dhahamuu waqtootaati. Sababa Kanaan Ongeen, roobni hamaa fi cabbiin akkasumas taateewwan fayyaa namaaf rakkisaa ta’an bal’inaan mul’achaa dhufaniiru. Rakkoo idil addunyaa kana furuuf carraaqqiin waloo fi misoomni barbaachisaa akka ta’e amanamus biyyoonni akka Itiyoophiyaa carraaqqii dhuunfaasaanii tiin furmaata egereef hojjechaa jiru. Haala Kanaan Itiyoophiyaan waggoottan jahan darbaniif biqiltuu biiliyoona 40 dhaabuun dinagdee jijjiirama haala qilleensaaf hinsaaxilamne ijaaruuf carraaqqii guddaa taasisaa jirti. Amma ammaattis bosonni Itiyoophiyaa sadarkaa xiqqaa jirurraa gara dhibbantaa 23 tuqaa 6 guddachuun jijjiiramni mul’atu galmaa’eera. Dhaabbata fayyaa addunyaatti daarektarri naannawaa, jijjiirama haala qilleensaa fi fayyaa Dr. Maariyaa Neeraa sektara kanarratti carraaqqiin Itiyoophiyaa dinqisiisaa ta’uu TOItti himaniiru. Sagantaan Ashaaraa magariisaa Itiyoophiyaa misooma naannawaa fi fayyaaf bu’ura ta’uusaa ibsaniiru. Keessumaa qaamolee bishaanii kunuunsuun dhukkuboota bishaaniin dhufan hir’isuu fi dhukkuboota sababa jijjiirama haala qilleensaatiin dhufan ittisuuf furmaata ijoo ta’uu ibsaniiru. Sagantaan ashaaraa magariisaa Itiyoophiyaa isheerra darbee idil addunyaaf hiikoo akka qabaatu daarektarri kun ibsaniiru. Baay’ina ummataatiin Afriikaarraa adda duree kan ta’an keessaa tokko kan taate Itiyoophiyaan du’a haadholii fi daa’immanii hir’isuu dabalatee carraaqqiin fayyaa lammiishee waliigalaa eeguuf taasiftu dinqisiisaa ta’uu kaasanii, dhaabbannisaanii deeggarsa kana cimsee akka ittifufu mirkaneessaniiru.

Onkoloolessa 11/2017(TOI)- Carraaqqii Itiyoophiyaan jijjiirama haala qilleensaa damdamachuu fi bulchiinsa lafaa egeree cimsuuf taasiftuuf tumsashee akka cimsitu ambaasaaddarri biyyattii Miirooslaav koosiik dubbatan. Embaasichi dhaabbilee gargaartotaa biroo waliin ta’uun marii dandeettii Itiyoophiyaan jijjiirama haala qilleensaa damdamachuu fi bulchiinsa lafaa egeree cimsuuf tumsa ogeessotaa guddisuu jedhuun qopheesserratti ambaasaaddarichi kana kan dubbatan. Itti dabaluunis, dhiibbaa jijjiirama haala qilleensaa addunyaa qoraa jiruuf tumsa cimsuun fi furmaata teeknooloojiin deeggarame nibarbaachisa jedhan. Dandeettii Itiyoophiyaan jijjiirama haala qilleensaa damdamachuuf qabdu guddisuuf hojii hojjechaa jirtuuf Cheek tumsashee Kk cimsitu ibsaniiru. Kana malees jijjiirama haala qilleensaa damdamachuuf gama teeknooloojii fi hojiilee birootiin tumsashee akka ittifuftu mirkaneessaniiru. Gorsaan ministira qonnaa Dr. Mitikkuu Ayyalee gamasaaniin, Itiyoophiyaan jijjiirama haala qilleensaa damdamachuuf hojii hedduu hojjechaa jirti jedhaniiru. Oomishaa fi oomishtummaa qonnaa guddina dinagdee biyyaaf gumaacha olaanaa qabu dabaluuf bulchiinsa lafaa egereerratti xiyyeeffannoon hojjetamaa akka jiru ibsaniiru. Hojii kana caalaatti bu’a qabeessa taasisuuf dhaabbileen mootummaa fi mitmootummaa akkasumas tumsi hawaasa addunyaa murteessaa ta’uu eeranii, teekniikaa fi kanneen biroon tumsasaanii akka ittifufan waamicha taasisaniiru. Ogeeyyonni jijjiirama haala qilleensaa fi bulchiinsa lafaan walitti dhufeenya qaban, bakka bu’oonni mootummaa fi qooda fudhattoonni biroon argamaniiru.

Onkoloolessa 7/2017 (TOI)- Kirkirri lafaa guyyaa keesaa naannawa sa’aatii 6tti Awaash Fantaannee mudate Finfinneetti naannawa addaddaatti dhagahameera. Raafamni kirkira lafaa kaleessa galgala mudate ammas deebi’ee Finfinneetti mudachuusaa Yuunivarsiitii Finfinneetti daarektarri Ji’oofiiziiksii fi Saayinsii hawaa Dr,. Eliyaas Leewii ‘EBC’ mirkaneessaniiru. Kirkirri lafaa guyyaa keessaa sa’aatii 6 daqiiqaa 10 sakondii 9tti Awaash Fantaaleetti mudate Rekta Iskeeliidhaan 4.6 akka ta’e ibsaniiru. Kirkirri lafaa kun naannawa Awaash Fantaallee bakka yeroo darbe mudatetti yemmuu ta’u sochiin kirkira lafaa naannawicha jiru ammallee akka hindhaabanne Dr. Eliyaas Leewwii dubbataniiru. Raafamni kirkira lafaa amma mudate xiqqaa ta’uusaa ibsanii, sochiin dhagaa baquu Awaash Fantaallee fi magaalaa Saaburee jidduu jiru amma hindhaabannetti kirkirri lafaa ittifufuuf akka danda’u eeraniiru.

Onkoloolessa 7/2017(TOI)- Kirkirri lafaa yeroo sadaffaaf kaleessa galgala Finfinneetti dhagahameera. Kirkira lafaa yeroo darbe Finfinneetti mudatetti ittifufuun deebi’ee mudachuusaa Yuunivarsiitii Finfinneetti daarektarri Ji’oofiiziiksii fi Saayinsii hawaa Dr. Eliyaas Leewii mirkaneessaniiru. Halkan kaleessaa sa’aatii 5 fi daqiiqaa 11tti kan mudate kirkirri lafaa kun Finfinneetti dhagahamuunsaa dubbataniiru. Kirkirri lafaa kun bakka yeroo darbe itti mul’ate naannawa Awaash Fantaalleetti mul’achuusaa rektar Iskeeliidhaan 4 tuqaa 6 akka ta’e Dr. Eliyaas Leewii mirkaneessaniiru. Kirkirri lafaa naannawa sana jiru ammallee sochiisaa akka hindhaabne Dr. Eliyaas ‘EBC’ f mirkaneessaniiru.

Onkoloolessa 6/2017 (TOI) -Biyyoota Afrikaa Bahaatti guyyoota saddeettan dhufan roobni ni roobuu akka itti fufu tajaajilli Odeeffannoo Haala Qilleensaa Afrikaa Bahaa beeksise. Biyyoota Afrikaa Baha kanneen akka lixaa Itoophiyaa, Yugaandaa bakkeewwan hedduutti fi Kaaba Somaaliyaatti roobni idileen olii akka roobus beeksiseera. Lixa Sudaan Kibba , Kibbaa fi jiddigaleessa Itoophiyaa akkasumas Kibba Eertiraatti immoo roobni giddu galeessaa ta'e akka roobuu eerera. Kaaba dhiha Taanzaaniyaa fi Keeniyaa naannawwaa qarqara galaanaa fi gara dhihaatti hammi rooba wal fakkaatu akka qabaatu ibseera. Baha Itoophiyaa fi kutaa gara kaabaa Yugaandaa akkasuma kibba biyyattiti roobni cimaa roobuu lolaa waan uumamuuf of eeggannoo gochuun barbaachisaa ta'uu odeeffannoon eerera. Kanaaf namoonni naannolee kanneen keessa jiraatan lolaa fi sigiga lafaa irraa of eeggachuu akka qaban odeeffannoon argame ni mul’isa. Guyyoota saddeetan itti aananitti Itoophiyaa naannaawwaa tokko tokkoo fi biyyoota Baha Afrikaa birootti roobni salphaa hanga cimaan ni rooba jedhamee eegama. Tajaajilli Odeeffannoo Haala Qilleensaa Baha Afrikaa (ICPAC) IGAD jalatti raagaa haala qilleensaa fi hojiiwwan kanaan walqabatan biroo hojjetu ta’uun beekama. Inistiitiyuutii Meetirooloojii Itoophiyaa; Taateewwan haala qilleensaa rooba uumuu danda’an kutaalee kibba, bahaa, kibba lixaa fi dhiha biyyattii keessatti mul’atan fuula fooyya’aa akka qabaatan guyyoota muraasa dura beeksisera Bakkeewwan ganna darbe rooba argachaa turan Naannoolee Lixaa, kibba lixaa fi baha biyyattitti roobni ammas akka roobuu itti fufu eeruun isaa ni yaadatama.

Fulbaana 28/2017(TOI)- Itiyoophiyaan Sirna geejjiba magariisaa hojeessuun kutannoo nageenya pilaanetii keenyaaf qabdu agarsiisaa jirti jedhan ministirri geejjibaa fi lojistiksii Dr. Alamuu Simee. Ministeerichi ijaarsa sirna geejjiba magariisaa jajjabeessuuf agarsiisaa fi siimpooziyeemii baatii tokkoon boora mata duree”Itiyoo giriin mobiliitii 2024”jedhuun adeemsifamu ilaalchisuun waltajjii taateen duraa bakka namoota dhimmi ilaallatu argamanitti har’a adeemsifameera. Ninistirichi Dr. Alamuu Simee wayita kana akka jedhanitti, Itiyoophiyaan ijaarsa dinagdee magariisaa jijjiirama haala qilleensaa jalatti hinkufneef xiyyeeffannoo adda duree kennitee hojjechaa akka jirtu eeraniiru. Seektarri geejjibaa faalama haala qilleensaaf harka 10 amma 15 sababa ta’uu ibsanii, ijaarsa dinagdee magariisaaf qooda murteessaa akka qabaatu dubbataniiru. Haala Kanaan gaasii faalaa seektara geejjibaarraa bahu hir’isuu fi konkolaattonni humna haaromfamu fayyadaman sirnicha keessa galchuu irratti xiyyeeffatamee hojjetamaa jiraachuu ibsaniiru. Ministeerichi konkolaattonni humnahaaromfamu fayyadaman ykn konkolaattota elektiriikiif onnachiiftuu addaddaa gochuu fi ijaarsa bu’ura misoomaa mijataa irratti cimsee hojjechaa akka jiru dubbataniiru. Hojiileen misooma magaalaa ammayyaa magaalaawwan Itiyoophiyaatti taasifamaa jiru sirna geejjiba magariisaaf kutannoo qabdu akka agarsiisu ibsaniiru. Haata’u malee tarkaanfiiwwan gama konkolaattota magariisaatiin amma fudhatamaa jiran ilaalchisuun hanqinni iftoomaa akka jiru eeraniiru. Kanaaf agarsiifnii fi Siimpooziyeemiin idil addunyaa Sadaasa dhufu taasifamu iftoomina uumuu fi hirmaattota seektarichaa dadammaqsuuf kan kaayyeffate ta’uu eeraniiru. Afriikaanonni sektara kana keessatti argaman 700 caalan akka hirmaatan eeraniiru. Agarsiis kana milkeessuuf ministeerichi waltajjii galiin itti walitti qabamu qophaa’uusaas eeraniiru. Haala Kanaan qaamoleen qooda fudhtoonni hundi sosochii galii walitti qabuu knaaf gumaachasaanii akka taasisan waamicha dhiheessaniiru.

Fulbaana 7/2017(TOI)- Naannoo Harariitti danbiin bulchiinsa balfa gogaa fooyya’e faalama naannawaa hambisuun magaalattii kan miidhagsu ta’uu Jiraattonni magaalaa Harar ibsan. Danbiin hundeessa waajjira danbii kabachiisaa fi bulchiinsa balfa gogaa fooyya’ee hojii jalqabe magaalaa Harar qulqulluu fi miidhagduu taasisuuf gumaacha olaanaa akka qabaatu jiraattonni magaalattii yaada kennan ibsan. Kanaan dura hanqinni qulqullinaa olaanaan jiraachuusaa kan ibsan jiraattonni xiyyeeffannoo mootummaan kenneen hojiileen hojjetaman magaalattii miidhagsuusaa eeraniiru. Keessumaa hojeeffamaa kan jiru misoomni kooriidarii daandii lafoo fi tiraafikaa mijataan akkasumas bakkeewwan aara galfii mijataan akka jiraatu dandeessisuusaa himaniiru. Bu’uraalee misoomaa hojjetaman eeguu fi kunuunsuun akka barbaachisu jiraattonni ibsanii kanaaf ammoo danbiiwwan hojiirra oolan bu’uraaleen misoomaa akka eegaman gumaacha guddaa akka taasise ibsaniiru. Akkaataa balfi itti qabamuu fi dhabamsiifamuun wal qabatee dhorkaaleen danbichaan ibsamanii fi adabbiiwwan kaa’aman hundi qulqullinni aannawaa akka eegamu magaalaa qulqulluu fi miidhagduu uumuuf kan dandeessisan ta’uu himaniiru. Gama biraatiin danbichi weerara lafaa fi ijaarsa seeraan alaa seera eegsisuun magaalattiin pilaanii fi sirnaan kan gaggeeffamtu taasisuuf akka gargaaru ibsuusaanii odeeffannoon komunikeeshinii Harariirraa argame nimul’isa. Danbiin haaraa fooyya’e qabeenya lafaa murtaa’aa naannichi qabu weerara seeraan alaarraa oolchuun karaa bu’a qabeessaa fayyadamuuf kan dandeessisu ta’uu kan ibsan jiraattonni, raawwiisaaf gumaacha irraa eegamu akka bahan mirkaneessaniiru.

Fulbaana 2/2017(TOI)- Guyyoota 10 dhufan naannawoota biyyattii kaabaa fi Kaaba bahaatti tamsaasni roobaa hir’achaa wayita dhufu bakkeewwan birootti roobni idilee olii jiraachuu akka danda’u Inistiitiyuutiin Miitiyoorooloojii Itiyoophiyaa beeksise. Inistiitiyuutichi ibsa TOIf ergeen kutaa biyyattii Lixaa fi Kibba Lixaatti roobni ittifufuu akka danda’u himeera. Kutaa kibba Itiyoophiyaa waqtii roobaa kan lammaffaa suuta suutaan argachuu akka jalqabu eereera. Kutaan biyyattii Kaaba lixaa, kibba lixaa akkasumas jiddugaleessaa roobni xiqaarraa amma jiddugaleessaatti argachuu akka danda’an raageera. Bakkeewwan tokko tokkotti kuusaawwan hurrii humna ibsaatiin ciman rooba cimaa hordofsiisuu akka danda’an odeeffannoowwan raagaa ni’eeru. Guyyoota kudhan dhufan naannolee Tigraayi, Amaaraa, Beeniishaangul Gumuz, Oromiyaa, jiddugaleessa Itiyoophiyaatti akkasumas Finfinneen roobni xiqqaarraa amma cimaatti nirooba jedhameetu eegama. Gama biraatiin godinaaleen Affaar, Oromiyaa Harargee Bahaa fi Lixaa, naannoo Amaaraa kaabaa fi Kibbaa Walloo, naannoo Gaambeellaa, naannoo Tigraayi godinaalee kibbaa fi kibba lixaa , Kibba lixa Itiyoophiyaa, naannolee Somaalee fi Hararii akkasumas Dirree Dawaan rooba cimaa argatu jedhameetu eegama jedhameera. Naannoleen qonna gannaa adeemsisan irra caalaan ciidhina xiqqaa amma guddaatti ni’argatu jedhameetu eegama. Kanaaf midhaan firiif qaqqaban akkasumas turanii facaafamaniif akkasumas kuduraa fi muduraaf faayidaa olaanaa qaba jedhameera. Gama biraatiin sulula Hawaasirraa hidhoonni Qooqaa, Tandaahoo fi Kasam Sulula Abbayyaarraa hidhoonni Xaanaa Balas, Rib fi Fincaa’aa baay’ina bishaaniirraa kan ka’e naannawoota sulula gadiirratti dhiibbaa akka hingeessifne hordoffiin nibarbaachisa jechuun hubachiiseera.

Hagayya 30/2016 (TOI)-Biqiltuu dhaabuun alatti kunuunsuudaan dammaqinaan hirmaachuun naannawa jireenyaa fi bakka hojii mijataa uumuuf hundi cimee hojjechuu akka qabu mana maree bakka bu’oota ummataatti itti waamamaan mootummaa muummeen Dr. Tasfaayee Beeljigee ibsan. Qaamoleen hooggansaa mana maree bakka bu’oota ummataa fi dhaabbilee mana marichaaf itti waamaman kan itti wamamaa mootummaa muummee Dr. Tasfaayee Beeljigeen gaggeeffamu Dirree Dawaatti argamuun Biqiltuu dhaabuun ashaaraa magariisaa kaa’aniiru. Biqiltuun mata duree “biyya biqiltuu dhaabdu dhaloota ittifufsiisu” jedhuun dhaabame qaama sagantaa ashaaraa magariisaa baatii gannaa barana adeemsifamee ta’uun ibsameera. Mana marichatti ittiwaamamaan mootummaa muummee Dr. Tasfaayee Beeljigee wayita kana akka jedhanitti, biqiltuuwwan waggoottan darban ashaaraa magariisaan dhaabaman dinagdee jijjiirama qilleensaaf hinsarmine ijaaruu keessatti gumaacha murteessaa qabu. Keessumaa magaalaawwan bakka hojii fi jireenyaa mijataa gochuu keessatti gumaacha taasisaa jiru eeraniiru. Biqiltuuwwan barana akka biyyaatti dhaabaman kunuunsuu fi guddisuuf hojiilee jalqabaman cimsuun akka barbaachisu hubachiisaniiru. Biqiltuu dhaabuurratti kan hirmaatan Af-yaa’iin bulchiinsa magaalaa Dirree Dawaa adde Fathiityaa Aden gamasaaniin, sagantaan kilaastara baadiyyaa fi ashaaraa magariisaa magaalaa Dirree Dawaa milkaa’aajira. Biqiltuuwwan dhaabuu fi kunuunsuun gumaacha fooyya’insa jireenya hawaasa Dirree Dawaaf qabu hubachuun abbummaan hojjetamaa akka jiru kaasaniiru. Miseensonni mana maree bakka bu’oota ummataa olaanoo fidhaabbileen mana marichaaf itti waamaman Dirree Dawaatti argamuun ashaaraa magariisaa kaa’uusaaniif af-yaa’iin adde Fathiiyaa gammachuusaanii ibsaniiru. Kantiibaa bulchiinsa Dirree Dawaa Kadir Juhaar dabalatee hooggantoonni biroos sagantaa biqiltuu dhaabuurratti hirmaataniiru.

Hagayya 24/2016(TOI) - Ministira Qonnaa doktar Girmaa Amantee fi hoggantoonni hojii mootummaa olaanoo biroon naannoo Affaar aanaa Dubbitiitti sagantaa ashaaraa magariisaan biqiluu dhaaban. Sagantaa biqiltuu dhaabuu kanarratti ministiricha dabalatee ministir deetaawwan, daarektaroonnii fi hojjetoonni dhaabbilee itti waamamtoota ministeerichaa hirmaataniiru. Akkasuma sadarkaa Itti aanaa pirezidaantiitti qindeessaan kilaastera dinagdee naannoo Affaar obbo Alii Mahaammad, hoggansi fi hojjetoonni biiroo qonnaa naannichaa hirmaataniiru.

Hagayya 20/2016 (TOI)- Miseensonni Hooggansaa fi hojjettoonni waajjira pirojektii qindeessaa hidha haaromsaa Itiyoophiyaa guddichaa biqiltuu ashaaraa magariisaa Adaamaatti dhaaban. Waajjirichi waajjira pirojektii qindeessaa hidha haaromsaa guddicha naannoo Oromiyaa waliin ta’uun har’a magaalaa Adaamaa aanaa Gooroo gaara Coqqonuurra biqiltuu dhaabeera. Daarektarri olaanaan waajjira pirojektii qindeessaa hidha haaromsaa Itiyoophiyaa guddichaa Dr. Aragaawii Barihee wayita kana akka jedhanitti, sagantaan ashaaraa magariisaa biqiltuu dhaabuu hidhi haaromsaa tajaajila dheeraa akka kennu gumaacha olaanaa taasisa. Haala Kanaan waggoottan darban miseensonni hooggansaa fi hojjettoonni waajjirichaa walitti aansuun sagantaa biqiltuu dhaabuurratti hirmaachaa jiru jedhaniiru. Hidhi haaromsaa sababa lolaatiin dalaliin akka hinguutamne qabiyyee uumama lafaa deebisuuf biqiltuu dhaabuu fi kunuunsuun hundarraa eegama jedhaniiru. Ashaaraan magariisaa mootummaa qofaan osoo hinta’iin hirmaannaa ummataan bu’a qabeessa ta’aa dhufuunsaa kan nama boonsu ta’uu ibsaniiru. Daarektarri olaantuu waajjira pirojektii qindeessaa hidha haaromsaa naannoo Oromiyaa adde Qonjiit Baqqalaa gamasaaniin qindeessichi biqiltuu dhaabuurratti hirmaachaa akka jiru yaadachiisaniiru. Qindeessichi ittigaafatama qabun alatti hidhi kun Itiyoophiyaanotaaf tajaajila fooyya’aa kennuu akka danda’uu fi qabiyyeen naannawaa akka eegamu hundi sagantaa kanarratti akka hirmaatu hubannoon uumamaa akka ture ibsaniiru. Sagantaan kun rakkoo jijjiirama qilleensaa furuun gamatti namoota hedduuf carraa hoojii uumuusaa ibsaniiru.

​ Hagayya 17/2016(TOI)- Waan yaanne osoo hinmilkeessiin aduun nutti hidhiituutii guyyaa tokkotti biqiltuuwwan miiliyoona 615 tuqaa 7 dhaabneerra jedhan Ministirri muummee doktar Abiyyi Ahimad. Sagantaa ashaaraa magariisaa guyyaa tokkoo kan har’aa ilaalchisuun ministirri muummee doktar Abiyyi Ahimad ergaan armaan gadii fuula marsariitiisaniirratti dabarsan akka armaan gadiitti dhihaateera- Guyyaa har’aa aduun baate amma lixutti biqiltuuwwan miiliyoona 600 dhaabuuf hundi keenya karoorsinee turre. Waan yaanne osoo hinmilkeessiin aduun waan nutti hindhiineef guyyaa tokkotti biqiltuuwwan miiliyoona 615 tuqaa 7 dhaabneerra. Daa’imman abdiisaanii dhaabaniiru. Dargaggoonni ciminasaanii agarsiisaniiru. Maanguddoonni dhaala ol kaa’aniiru. Itiyoophiyaanonni guddaa amma xiqqaatti ህ manaa bahanii ashaaraa hindimimmifne kaa’aniiru. Waliin ta’uu keenyaa fi cimnee waan dhaabanneef addunyaarratti guyyaa tokkotti ta’uu waan hindandeenye gochuu dandeenyeerra. Guyyaa har’aa madaallii haala qilleensaa eeguuf dhaabannee oolleerra. Dhiqama biyyee qolachuuf hiriirree oolleerra. Wabii nyaataa mirkaneessuuf dadhabaa oolleerra. Lafa irra jiraanyu magariisa uffisuuf lalisummaa deebisuuf osoo hinjilbeeffatiin hojjenneerra. Kan nu uume nugargaaree waan guyyaa har’aa yaanne milkeessineerra. Guyyaa har’aa lammiileen miiliyoona 29 tuqaa 1 iddoowwan odeeffannoon Ji’oopaarshaalii itti argametti biqiltuu dhaabaniiru. Amma ammaatti odeeffannoo galmaa’een alatti odeeffannoo biqiltuuwwan dhaabamanii walitti aansuun kan ibsamu ta’a. Gamtaa Itiyoophiyaanonni taasisaniif galanni haaga’u. hooggantoonni, ogeeyyonnii fi dhaabbileen miidiyaa galata qabu. Hawwii fi hojiin keenya hundi Itiyoophiyaa fooyyofte gamtaan ijaarree tureuudha.. Kana ammo ittifufna.

Duula sagantaa ashaaraa magariisaa guyyaa tokkoon hanga ammatti biqiltuun miliyoonni 594 dhaabameera Hagayya 17/2016(TOI) - Duula sagantaa ashaaraa magariisaa guyyaa tokkoon hanga ammatti biqiltuun miliyoonni 594 dhaabamuu Ministir deetaan Ministira Tajaajila Kominikeeshinii Mootummaa Salaamawit Kaasaa beeksisan. Duulli guyyaa tokkotti biqiltuu miliyoona 600 dhaabuu ammas cimee itti fufeera. Guyyaan kun guyyaa gootummaa dhaloota kanaa agarsiise ta'uu eeranii, miliyoononni seenaa boonsaa hojjecha jiru jedhaniiru.