Guraandhala 14/2017(TOI)- Sirna dinagdee jijjiirama haala qilleensaa damdamatu ijaaruu keessatti hirmaannaa damee dhuunfaa cimee akka ittifufu Ministirri karooraa fi misoomaa Dr. Fitsum Asaffaa gaafatan. Woorkishooppiin ajandaa jijjiirama haala qilleensaa irratti hirmaannaa damee dhuunfaa Faayinaansiin walqabate cimsuuf akeekame Finfinneetti taa’amaa jira. Itiyoophiyaan waliigaltee Paaris dabalatee waliigalteewwan jijjiirama haala qilleensaa idil addunyaa fudhattee hojiirra oolchaa jirti jedhan ministirri Dr. Fitsum Asaffaa. Misoomni dinagdee magariisaa jijjiirama haala qilleensaan hinmiidhamne karoora misoomaa muummee keessatti xiyyeeffannoon akka kennameef eeraniiru. Sirna dinagdee jijjiirama haala qilleensaa damdamatu ijaaruu keessatti dameen dhuunfaa dammaqinaa fi adda durummaan akka hirmaatu gaafataniiru. Fakkeenyaaf jijjiirama haala qilleensaa damdamachuu keessatti faayinaansii barbaachisu dhiheessuuf tumsa damee dhuunfaa fi mootummaa cimsuun akka barbaachisu eeraniiru. Itiyoophiyaatti bakka bu’aan inistiitiyuutii misooma magariisaa idil addunyaa Daani’eel Obonaayaa gamasaaniin, Itiyoophiyaan dhiibbaa jijjiirama haala qilleensaa damdamachuu keessatti hojiilee bu’a qabeessa hojjechaa jiraachuushee dinqisiifataniiru. Itti aanaan barreessaa olaanaa mana maree daldalaa fi waldaalee damee Itiyoophiyaa Dr. Qananiisaa Lammii, dameen dhuunfaa pirojektoota misooma dinagdee magariisaa fi egeree eegumsa naannoof gumaacha taasisan irratti hirmaannaasa akka cimsu dubbataniiru.

Guraandhala 5/2017(TOI)- Yaa’iin idil addunyaa misooma jallisii fi oomishtummaa jijjiirama haala qilleensaaf hinmiidhamne kan Itiyoophiyaan yeroo jalqabaaf keessummeessitu Finfinneetti eegalameera. Pirezidaant Taayyee Atsqasillaasee, ministirri muummee Itiyoophiyaa duraanii Hayilamaariyam Dassaaleny, ministirri jallisii fi naannawa gammoojjii Dr. Abrahaam Balaay,hooggantoonni biyyoota Afriikaa duraanii, hooggantoota olaanoo dabalatee hirmaattonni yedduun yaa’ii kanarratti hirmaachaa jiru. Yaa’iin idil addunyaa ministeera jallisii fi naannawa gammoojjiin qophaa’e kun har’a dabalatee guyyoota sadiif nitaa’ama. Muuxannoowwa idil addunyaa gama misooma jallisii, dhiibbaa jijjiirama haala qilleensaa ittisuu iaalchisee nidhihaatu jedhameera. Itiyoophiyaan hojiiwwan eegumsa naannoo fi birmadummaa nyaataa mirkaneessuuf hojjette keessumaa misooma Qamadii Bonee fi Ashaaraa magariisaa ilaalchisuun hojjette muuxannoo akka qooddu ni’eegama. Egzibiishiniin hojiiwwan jallisii agarsiisu yaa’ii kanarratti ifatti banameera.  

Amajjii 30/2017(TOI)- Yaa’iin idil addunyaa jallisii fi oomishtummaa jijjiirama haala qilleensaaf hinmiidhamnee Guraandhala 5 amma 7 bara 2017tti Finfinnee yaadannii injifannoo Adwaatti nitaa’ama Hooggantoonni biyyootaa, ogeeyyonnii fi qooda fudhattoonni biroon yaa’ii kanarratti nihirmaatu. Yaa’ichi hojiirra oolmaa imaammata teeknooloojiiwwan jijjiirama haala qilleensaan hinmiidhamnee bocuu fi birmadummaa nyaataa Afriikaa mirkaneessuurratti kan xiyyeeffate ta’uu odeeffannoon ministeera jallisii fi naannawa gammoojjiirraa argame nimul’isa. Mariin kun akka waltajjii hubannoo uumuutti akka gargaaru ibsamra. #Itiyoophiyaa #Tajaajila oduu Itiyoophiyaa #TOI

Amajjii 19/2017(TOI)- Hojiin misooma sululaa qindaa'aan naannoo Sidaamaatti ifatti eegalameera. Hojiin misooma Sululaa kun hooggantoonni olaanoon naannichaa bakka argamanitti qarqara godina kaaba Sidaamaa ganda Aldadaa tti sirni jalqabsiisaa raawwateera. Hojiin misooma Sululaa mata duree "qabeenyi biyyoo keenyaa badhaadhina keenyaaf" jedhuun baatii tokkoof ittifufa. Sululoota naannichaa 678 irratti lafa heektaara kuma 136 fi 400 irratti hojiin eegumsa biyyoo fi bishaanii ni'adeemsifama jedhameera. Hojiilee misooma Sululaa kanaan ummanni miiliyoona 1 fi tuqaa 4 ol nihirmaata jedhamee akka eegamu ibsameera.

Amajjii 17/2017 (TOI) - Naannoo Harariitti hojiin misooma Sululaa kan bara kana mata duree '' biyyoo keenya badhaadhina keenyaaf'' jedhuun har'a ifatti hojjetamuu eegaleera. Sirna jalqabiisa misooma sululaa kan bara kanaa kana irratti miseensonni hoggansa naannichaa sadarkaa hundatti argaman, qonnaan bultoonni fi kutaaleen hawaasaa biroon argamaniiru. Biiroo Misooma Qonnaa Naannichaatti Daarektarri Misooma Qabeenya Uumamaa, Kunuunsaa fi Itti Fayyadama isaa obbo Araarsoo Adem; naannichatti hojiin misooma sululaa har'a eegale kun ji'a tokkoof kan turu yoo ta'u sululoota 16 keessaatti lafa heektaara 900 iirratti hojiin eegumsa biyyee fi bishaaniif tajaajilan akka hojjetaman himaniiru.

Amajjii 15/2017 (TOI) - Naannoo Oromiyaatti duulli misooma sululaa guyyoota 60’f turu godinaalee Oromiyaa garaagaraatti eegaleera. Hojiin kun Bulchiinsa Magaalaa Shaggar Kutaa Magaalaa Malkaa Noonnootti kan eegalame yoo ta’u, qaamoleen hawaasa garaa garaa irratti hirmaataa jiru. Haaluma walfakatuun Godina Wallagga Bahaa Aanaa Guutoo Giddaa fi aanaalee godinichaa birootti eegalamuun himameera..

Amajjii 14/2017 (TOI) - Qormaata jijjiirama qabeenya qilleensaa qolachuuf hojii misooma Sululaa milkeessuun furmaata waaraa ta'uu Biiroon Komnikeeshinii Oromiyaa beeksise. Biirichi hojii misooma Sululaa ilaalchisee ibsa kenneera. Guutuun ibsichaa haala armaan gadiin dhiyaatera. Qormaatni jijjiirama qilleensaa Addunyaa keenya mudachaa jiru jiruu fi jireenya ilma namaa gaaffii keessa galchaa jira. Madaallin uumamaa jeeqamuu isaatiin qormaatawwan mudatanis to'annoo ilma namaatiin ala ta'uun addunyaan keenya gaaga'ama hamaaf akka saaxilamtu taasiseera. Libsuu ijaatiin taateewwan baramaa hin taane mudachaa jiraniin biyyootni dinagdeen badhaadhanii fi teeknoloojiin fagaatan yoo ta'anillee qolachuu akka hin dandeenye argaa jirra. Taateen baramoo hin taane kunneen ilma namaaf yaaddoo hamaadha. Kanaaf falli madaala uumamaaf xiyyeeffannoo kennuun itti fufiinsaan tiksuu qofaadha. Biyyootni , dhaabbilee fi namoonnis ofiif jecha dammaquun dhuunfaan, garee fi akka biyyaatti madaala uumamaa iddootti deebisuuf tarkaanfii irraa eegamu fudhachuun ajandaa boruuf bulfamuu hin qabnedha. Mootummaan Naannoo Oromiyaa rakkoowwan jijjiirama qilleensaan mudachuu malan qolachuuf tarkaanfii haaraa sagantaa Ashaaraa magaariisaa Looreetii Nagaa Addunyaa fi Muummicha Ministiraa keenya Dr. Abiyyi Ahmadiin maddisiifame hojiirra oolchuun Bona hojii Fizikaalaa fi Ganna hojii dhaabbii biqilaa Ashaaraa Magariisaa gaggeeffameen injifannoon fakkeenyummaa qabu galmaa’uu danda’eera. Sagantaa Ashaaraa magariisaatiin galmoota akka Addunyaatti madaala uumamaa tiksuuf kaa'aman dursinee kan eegalle qofa osoo hin taane fakkeenyummaa olaanaa mul'isuun sadarkaa Idil Addunyaatti beekamtii fi badhaasa biyyaa fi hoggansa keenya gonfachiiseera. Kabajamtoota uummattoota naannoo keenyaa; icciitiin qormaatota qolachaa injifannoo rogdaneessa galmeessaa jirruuf hoggansa olaanaa bifa tarsiima'aan haala Addunyaa beekee yaade karoorsu, waadaas gochaan dhugoomsuu fi uummata akka raajiitti hojjetee milkeessu qabaachuu keenyadha. Uummata keenya waamicha mootummaan isaa taasise fudhachuun hojii misooma sululaa irratti hirmaachuun qabatamaan mirkaneessee biyyaa fi biyyoo biyya abbaa isaatti ulfina guutuu deebisaa jiruuf mootummaan Naannoo Oromiyaa dinqisiifannaa olaanaa qaba. Kana malees, hoggansa, ogeessotaa fi qooda fudhattoota milkaa’ina hojii misooma suluulaatiif humnaa fi beekumsa isaanii osoo hin qusatiin tumsaniif galata guddaatu mala. Waggoota Ja'an darbe keessa Baddaa, Badda Daree fi Gammoojjiiwwan Oromiyaa keessatti lafa heektaara miliyoona hedduu misoomsuun dandaa’ameera. Waktii Bonaa hojiiwwan fiizikaalaa adda addaa hojjetamaa dhufee fi Gannas sagantaa ashaaraa magariisaatiin biqiloota dhaabamaa dhufaniin roobni akka lafa seenu taasifameera. Kanaanis Gaaronni mancaatiin hubamanii turan misoomuun dachaawwan goganii turanis mirgisuun bishaan kennuu eegalaniiru. Dhiqamni biyyoos hir'atee oomishaa fi oomishtummaan keenya dabaluu eegaleera. Uwwisni bosona Oromiyaa bara 2011 % 17 irra ture hanga bara 2016tti % 26.7 irraan ga'uun danda'amee jira. Kabajamtoota uummattoota naannoo keenyaa: Boqonnaan hojii kunuunsaa fi eegumsa qabeenya uumamaa duula xiiqiitiin gaggeessaa jirru kun kan harka keenyaan mancaafne harkuma keenyaan yeroo itti deebisaa jirruu fi Oromiyaa jiituu ijaaruun ergama dinagdee magariisaa milkeessuuf bobbaanee hojiirra jiraachuu hunduu hubachuu qaba. Galmi isaas madaala uumamaa jeeqame sirreessuun Addunyaa jireenya ilma namaaf mijaawaa taate ijaaruudha. Hojiiwwan misooma sululaa waggoottan Ja'an darbe hojjetamaa dhufeen harki Ashaaraa dhalootaaf darbu hojjetee Addunyaa raajeffachiise injifannoo biraa dalaguun seenaa haaraa akka galmeessu shakkiin hin jiru. Hojii misooma sululaa bara 2017tiin sululoota, daagaawwan gosa adda addaa, istiraakcheroota jiidhina qusatanii fi kanneen jiidha yaasan kan hojjetaman yoo ta'u lafa mancaatiif saaxilame tuttuqaa namaaf beeladaa irraa bilisa taasisuu, hallayyaa hidhuu, daagaawwan suphuu fi hojiiwwan biroo dhimmoota ogummaan dabaalamanii xiyyeeffannoon hojjetamanidha. Hojiiwwan misooma sululaa waqtii Bonaa hojjetamu kana keessatti sagantaa Ashaaraa magariisaa marsaa 2ffaa waggaa 3ffaatiin biqiloota biliyoona 5 ol dhaabuuf karoorfamee hojjetamaa jira. Biqiloota faayidaa damdaneessummaa qabanii fi wabii nyaataa mirkaneessuuf oolaniifis xiyyeeffannoo addaa kennuun kan hojjetamu ta'a. Hojichi beekumsaa fi hubannoon hogganamee seeraa fi sirna Gadaa hordofuun qe'ee qonnaan bultootaa fi horsiisee bultoota keenyaatti duulaan hojjechuu irraa gara aadeffannaatti ceesisuuf mootummaan kutannoon hojjeta. Uummanni keenya Kaabaa hanga Kibbaa Bahaa hanga Lixaatti hojii misooma sululaa duula xiiqii Amajjii 15\2017 labsamu keessatti qooda fudhachuun Oromiyaa akka misoomsitan waamicha dhiyeessaa qabeenya uumamaa eeguu, kunuunsuu fi sirnaan itti fayyadamuun dirqama dhaloota har’aa ta'uu hunduu hubachuu qaba. Biiroo Komnukeeshiinii Oromiyaa Amajjii/2017 Finfinnee  

Amajjii 6/2017 (TOI)- Itti aanaan Ministira Muummee obbo Tamasgeen Xurunaan sosochii biyyaalessaa Misooma Sululaa kan bara 2017 eegalchiisaniiru. Obbo Tamasgeen Xurunaa ergaa gama miidiya hawaasummaa isaaniin dabarsaniin, Misooma sululaa babal’isuun qabeenya biyyee qabnu badhaadhinaaf olchuuf tattaafachuu qabna jedhaniiru. Haaluma kanaan sosochiin biyyaalessaa misooma Sululaa qindaa'aan kan bara 2017 eegaluu ibsaniiru. Karoora misooma qabeenya umaama galmaan ga’uuf waggaa waggaan lammiilee miiliyoona 14 ol hirmaachiisuun hojii misooma Sululaa hojjetameen jijjiramni qabatamaan argamuu eeraniiru. Kunuunsa qabeenya umamaa fi misooma Sululaa hojirra oolchuun diinagdee jijjirama qilleensaa dandamachu danda’u ijaaruun murannoo qabnu agarsifmeerra jedhan. Bara kana lafa heektaara miiliyoona 4 tuqaa 1 irratti eegumsi qabeenya umamaa fi misoomni Sululaa kan gaggeeffamu ta’uu ibsaniiru. Obbo Tamasgeen Xurunaa karoorri qabame akka milkaa’uuf qaamni hundi akka hirmaatu waamicha dhiyeessaniiru.

Mudde 18/2017(TOI)- Dhiibbaa jijiirama qilleensaa sababa manca'uu qabeenya uumamaan mudachaa jiru xiqqeessuuf hirmaannaan qooda fudhattootaa cimsuun murteessaa ta'u Abbaan Taayitaa Bosonaafi Jijjiirama Qilleensaa Oromiyaa beeksise. Hubannoon Labsii Misooma, Bulchiinsaafi ittifayyadama bosona naannoo Oromiyaa murteessuuf bahe lakkoofsa 257/2016rratti qooda fudhattootaafi Baalee Roobeetti kenname. Daarektarri ol'aanaan Abbaa Taayitaa Egumsa Naannoofi Jijjiirama Qilleensaa Oromiyaa Obbo Seeyfaddiin Mahdii akka jedhanitti tarsiimoo diinagdee magariisaa sadarkaa biyyaatti hojiirra oolaa jiru karaa giddugaleessa godhateen misooma ittifufiinsa qabu mirkaneessuuf qabeenyi bosonaa gahee olaanaa qaba. Naannichatti misoomni bosona ittifufiinsa qabu akka jiraatu hojjachuun cinaatti sababa mancaatii bosonan dhiibbaa jijjiirama qilleensaa mudachaa jiru xiqqeessuufis qindoominni qooda fudhattootaa cimuu qaba jedhaniiru. Itti aanaan daarekatara olaanaa Dhaabbata Bosonaafii Bineensa Bosonaa Oromiyaa Obbo Kadiir Niinoo naannichatti iddoolee hirmaannaa hawaasaatiin bosona kunuunsuun eegalametti mancaatiin bosonarra gahaa jiru xiqqaachaa jira jedhaniiru. Hawaasni naannawwaa bosonaa jiraatu bosona kunuunsuun waggoottan dabran gurgurtaa daldala kaarboonirraa qarshii miliyoona 450 ol arggachuusaanii eeraniiru. Ittigaafatamaan abbaa Taayitaa Eegumsa Naannoofi Jijjiirama qilleensaa Godina Baalee Obbo Assagid Fallaqaa gamasaaniitiin mancaatii hafteelee bosona uumamaa godinichaarra gahu hambisuuf qooda fudhattoota gara garaa wajjiin qindoominaan hojjetama jirachuu himaniiru. Dhaabbata Farm Afrikatti qindeessaan pirojektii FSDP Obbo Tilmoo Jamaa gamasaaniitiin carraaqqii mootummaan kunuunsa qabeenya umamaa ittifufiinsa qabu mirkaneessuuf taasisaa jiru milkeessuuf tumsaa jiraachuu eeraniiru.

Sadaasa 23/2017(TOI) - Itoophiyaan ragaa bulchiinsa misooma bosona yeroo argachuu Manni Maree Bulchiinsa Bosonaa beeksise Manni Maree Bulchiinsa Bosonaa, bulchiinsa misooma bosonaa cimsuun omishitummaa fi Addunyaa mijattuu uumuuf bara Faranjootaa 1993 kan hundeeffamee Dhaabbata Idil Addunyaati. Haaluma kanaan Addunyaa irratti lafa bosona waraqaan ragaa kennameef lafa hektaara miiliyoona irra jiru 150 ol bulcha jira. Sadarkaan Bulchiinsaa Bosonaa har’a ifoomse kunis damee bosonaan Itoophiyaa cimsuun qulqullinaa fi barbaadamummaa oomishaalee bosonaa gabaa Addunyaaf dhiyaatan kan guddisuudha jedhameera. Keessattuu dhiibbaa sirna ikoorra gahu hir'isuun qabeenyawwan akka bishaanii, kaarboonii, heddummina lubbu qabeeyyii fi kanneen biroo eeguuf ni gargara jedhameera. Itoophiyaan karoora biyyoota galii giddu galeessaa qaban keessaa tokko ta’uuf qabdu dhugoomsuuf bara 2025tti lafa bosonni irraa cirame dhume hektaara miiliyoona 15 deebistee bosonaan uwwisuuf hojjechaa jirti. Daarektarri Olaanaa Misooma Bosonaa Itoophiyaa obbo Kabbadaa Yimaam uwisnni bosona Itoophiyaa dhibbeentaa 23.6 gahuu ibsaniiru. Sadarkaan bulchiinsa misooma bosonaa kun sirni bulchiinsa bosonaa cimaa diriirsuun cirama bosonaa hi'isuuf kan dandeesisudha jedhaniiru. Itoophiyaatti sirna bulchiinsaa fi to’annoo bosonaa cimaa uumuun omishaafi oomishtummaa akka dabalu himaniiru. Itoophiyaan eegumsa bosonaa cimsuu bira darbee qulqullinaa fi baay’inaan gabaa addunyaaf dhiyeessuun akka danda’amu kan taasisudha jedhaniiru.

Sadaasa 16/2017(TOI)- Gareen hooggantoota olaanaa qajeelchicha Ministeera ittisaatti qajeelchi olaanaa letenaal Jeneraal Abduraahimaan Ismaa’eliin durfamu egzibiishinii “Itiyoo-giriin mobiliitii 2024”wateera. Ministirri geejjibaa fi lojistiksii Dr. Alamuu Simee fi de’eetaan ministiraa Dengee Boruu daawwannicharratti argamaniiru. Oomishaa fi tajaajiloota dhaabbileen biyya keessa fi biyya alaa geejjiba magariisaarratti hojjetan dhiheessan daawwataniiru hooggantoonni qajeelchaa kunneen daawwataniiru. Dhaabbileen konkolaattota anniisaa elektiriikiin hojjetan oomishan, suphanii fi biyya galchuun gurguran oomishasaanii egzibiishinii kanarratti dhiheessaniiru. Guyyaa afraffaasaa kan qabate egzibiishiniin “Itiyoo-giriin mobiliitii 2024” amma Sadaasa 20 bara 2017tti akka turu odeeffannoon ministeera geejjibaa fi lojistiksiirraa argame nimul’isa.

Sadaasa 13/2017(TOI) - Itoophiyaan qabeenya gabbataa humna haaromfamaa qabdu fayyadamuun geejiba magariisaan adda duree ta'uuf hojjecha jirti jedhan Af-yaa'iin mana maree bakka bu'oota uummata obbo Taaggasee Caafoo. Agarsiifinii fi Simpooziyeemiin idil addunyaa Itiyoo Giriin Moobiliitii 2024 har'a finfinneetti banameera. Sirna banisa agarsiisaa fi Simpooziyeemii kanarratti Af-yaa'iin mana maree bakka bu'oota uummataa Taaggasee Caafoo akka himanitti; dhiibbaa jijjiramni qilleensa sadarkaa idil addunyaatti uumaa jiru irra damdamachuuf misooma magariisaa amansiisaa fi itti fufinsa qabu uumuun barbaachisaadha. Itoophiyaan moobiliitii magariisaa deeggaruu kan danda'u qabeenya humna haaromaa gahaa qabachuu himanii; kana fayyadamuun geejiba magariisaan adda duree ta'uuf hojjechaa jirti jedhaniiru. Alaa galchitoota konkolaatota elektirikiif deeggarsi taasifamaa jirachuu eeranii kunis gara fuula duraattis cimee itti fufa jedhaniiru. Faalamaa qilleensaa hiri'isuun hawaasa badhaadhe uumuuf imaammata baastonnii fi qaamolee qooda fudhatoota damichaa qindoominaan hojechuu qabu jedhaniiru. Ministirri Geejibaa fi Loojistikii doktar Alamuu Simee gama isaaniin; geejibni magaarisaa qaama hojii Itoophiyaan dinagdee magaariisaa waaraa ta'e ijaaruuf hojechaa jirtuuti jedhaniiru. Finfinneen jiddugala dippilomaasii fi dinagdee taatee itti fufuuf hojii misooma magariisaa jalqabde gama geejiba magariisaan deeggaruuf xiyyeeffannoon hojjetama jira jedhaniiru. Agarsiifni qophaa'e hanga Sadaasa 20/2017'tti itti fufa.    

Sadaasa 12/2017(TOI) - Magaalaa keenyaa fi naannawwaa keenya jireenyaaf mijataa fi qulqulluu akka ta'uf hojiin hojjechuu jalqabne bu'aa buusuun magaalaa Finfinnee qulqulluu taasisuu dandeenyerra jedhan Kantiibaan magaalaa Finfinnee aadde Adaanech Abeebee. Kantiibaa Adaanech Abeebee ergaa karaa miidiyaa hawaasummaa isaanii qoodaniin hundeeffama Paartii Badhaadhina waggaa 5ffaa sababeeffachuun har'a ganama sadarkaa magaalaa Finfinneetti naannoo qulqulleesineerra. Magaalaa keenyaa fi naannawwaa keenya jireenyaaf mijataa fi qulqulluu akka ta'uf hojiin hojjechuu jalqabne bu'aa buusuu eegalee magaalaa Finfinnee qulqulluu taasisuu dandeenyeerra jedhaniiru. Gara fuula duraattis naannawwa hojiin qulqullina itti hojjetame kununsuu fi eeguu akkasuma qulqullina aadaa godhachuun karaa itti fufinsa qabuun naannawwaa kenya haa qulqulleesinu jedhaniiru.

Sadaasa 9/2017(TOI) - Itoophiyaan yaa'ii idil addunyaa tumsa misooma magariisaa idi addunyaa(P4G) bara 2027 geggeeffamu akka keessumeesitu filamte. Ministir deetaan ministira pilaanii fi misoomaa obbo Siyyum Mokonniin daarekatara Tumsa Misooma Magariisaa idil addunyaa Roobiin Makigikiin waliin mari'achuu isaanii Odeeffannoon Ministeera Pilaanii fi Misoomaarra argame ni mul'isa. Mariin kun yaa'ii idil adunyaa COP29 Azerbaajaan Baakuutti geggeeffama jiru cinaatti kan geggeeffame yoo ta'u; qormataawwan jijjirama qilllensaan dhufan qolchuuf tattaaffii taasifamu keessatti gara damee dhuunfaan gaheewwan gaarii dhufan irratti kan xiyyeeffatedha jedhameera. Ministir deetaan kun gama kanaan Tumsi Misooma Magariisaa idil Addunyaa (P4G) hojii gama kanaan hojjecha jiruuf galateeffataniiru jedhameera. Sadarkaa idil addunyaatti dhiibbaa jijjira qilleensaa ittisuuf deeggarsa taaisuuf tumsa biyyoonni qaban akka cimu taasisuu kan kaayyeeffate Tumsi Misooma Magariisaa Idil Addunyaa(P4G) yaa'ii idil addunyaa bara 2027 geggeesuu Itoophiyaan akka keesumeesitu filatamuun eerameera. Murten kunis Itoophiyaan damee misooma magariisaa waaraa irratti tumsi idil addunyaa akka cimu gahee bahachaa jirtuuf beekamtii kan kennedha jedhameera.

Sadaasa 9/2017(TOI)- Itiyoophiyaan fedhii fi faayidaa Itiyoophiyaa egeree sadarkaa idil addunyaatti mirkaneessuuf adda durummaan qoodashee bahuu akka ittifuftu ministirri pilaanii fi misoomaa Dr. Fitsum Asaffaaibsan. Yaa’iin jijjiirama haala qilleensaa dhaabbata mootummoota gamtoomanii 29ffaa (COP 29) Azarbaajaan Baakuutti ittifufeera. Yaa’iin ministiroota naannawaa Afriikaa Itiyoophiyaan dura taa’ummaan gaggeessiste taa’ameera. Ministiroonni Afriikaa, Mari’attoonnii fi ogeeyyonni haala qilleensaa marii kanarratti hirmaataniiru. Yaa’ii ministirootaa kana kan gaggeessan ministirri pilaani fi misoomaa Dr. Fitsuma Asaffaa mariin kun dhimmoota marii yaa’ii COP torbee lammaffaarratti dhihaataniif yaanni marii kan irraa argame ta’uu ibsaniiru. Waliigalteen Ejjennoo walfakkaataa wal sime COP 29 irratti calaqqisiisu irra gahamuu fi marii idil addunyaa ajandaawwan Afriikaa calaqqisiisuu danda’u gaggeessummaa ga’oomaa akka bahan waamichi dhihaachuu himaniiru. Guyyaa fi biyya yaa’iin ministirootaa 20ffaa wagga dhufu itti adeemsifamu murteessuuf mariin taasifamuus eeraniiru. Mirgaa fi faayidaalee Afriikaa mirkaneessuuf tumsii fi tokkummaan cimaan akka barbaachisu dubbataniiru. Itiyoophiyaan faayidaa fi fedhii Afriikaa egeree sadarkaa idil addunyaatti mirkaneessuuf caarraaqqii taasifamu keessatti qooda aadda durummaa bahachuu akka itti fufutu himaniiru. Yaa’iin ministirootanaannawaa Afriikaa milkaa’inaan xumuramuusaa odeeffannoon ministeera pilaanii fi misoomaarraa argame nimul’isa.

Sadaasa 8/2017(TOI)- Konfaransiin ministiroota Afriikaa qilleensa naannawaarratti xiyyeeffate kan Itiyoophiyaan dura teessuu ta’uun gaggeessituu Azarbaajaan Baakuutti adeemsifamaa jira. Konfaransii yaa’ii jijjiirama haala qilleensaa dhaabbata mootummoota gamtoomanii 29ffaa(COP29) kan ministira pilaanii fi misoomaa Dr. Fitsum Asaffaatu dura taa’ummaa gaggeessaa jira. Ministiroonni Afriikaa, ogeeyyonnii fi tumsitoonni misoomaa konfaransii kanarratti hirmaataniiru. Dhimmoonni qilleensa naannawaa ijoo, marii jijjiirama haala qilleensaa fi xiyyeeffannoowwan ijoo misooma egeree Afriikaa irratti konfaransii Kanaan mariin akka taasifamu ibsameera. Hojiiwwan garee mari’attootaa, qooda Afriikaanonni jijjiirama haala qilleensaa fi qu’annoo aayinsiitiin qaban fi konfaransii qilleensa naannawaa ministiroota Afriikaa 20ffaa irratti ajandaawwan marii ta’uusaanii odeeffannoon ministeera pilaanii fi misoomaarraa argame nimul’isa.

Sadaasa 4/2017(TOI) - Itoophiyaan humna dhiibbaa jijjirama qilleensaaf hin jilbeeffanne uumuuf ejjennoon isheen qabdu dinqisiisadha jedhan Hoji raawwachiiftuun olaantuu Kilaameet Invastimat Fanid Tariyee Badigeesiin. Dhaabbata Mootummoota Gamtoomaniitti Yaa'iin jijjirama qilleensa 29ffaa (COP 29) Azerbajaan magaalaa Baakuutti geggeeffamu erga eegalee har'a guyyaa sadaffaa ta'eera. Pirezidaanit Taayyee Atsiqesillaasee, Ministira Karooraa fi misoomaa Doktar Fitsum Asaffaa, Ministira Qonnaa doktar Girmaa Amantee dabaltee jilli Itoophiyaa biroon yaa'icharratti hirmaacha jira. Pirezidaanit Taayyee Atsiqesillaasee misooma ashaaraa magariisaa Itoophiyaa fi eegumsa naannoo irratti hojii hojjecha jirtu kan agarsiisu 'Paaviliyoonii' eebbisanii bananiiru. Hirmaattoonni yaa'icharrtti hirmataanis 'Paaviliyoonii' kana daawwachaa jiru. Jilli Hoji raawwachiiftuun olaantuu Kilaameet Invastimanit Fanid (Climate Investment Fund) Taryee Badigeesiin durfamus daawwataeera. Ministirri Qonnaa doktar Girmaa Amantee hoji raawwachiftuu kana waliin marii gamlamee dhimma misooma bosonarratti xiyyeeffate taasisaniiru. Taryee Badigeesiin ejjennoo Itoophiyaan humna dhiibbaa jijjirama qilleensaaf hin jilbeeffanne uumuuf hojjecha jirtu dinqisiifataniiru. Doktar Girmaa Amantee jilli isaanii Paaviliyoonii kana daawwachii isaaniif galateeffataniiru.

Sadaasa 4/2017(TOI)- Itiyoophiyaan qonna egeree imaammatashee haala qilleensaa biyyaalessaa keessatti qindeessuun wabii nyaataa fi eegumsa naannoo guddisuuf hojjechaa akka jirtu Pirezidaant Taayyee Atsqasillaasee ibsan. Itiyoophiyaan yaa’ii jijjiirama haala qilleensaa mootummoota gamtoomanii 29ffaa (COP29) Azarbaajaanitti adeemsifamaa jirurratti walgahii jijjiirama haala qilleensaa sadarkaa olaanaa fi sirna nyaataa fi uumama bayyanachiisuu gaggeessitoonni addunyaa irratti argamerratti xiyyeeffate taasifteetti. Pirezidaant Taayyee Atsqasillaasee, ministirri muummee Deenmaark Meetee Fireedriiksen, ministirri jijjiirama haala qilleensaa fi eegumsa naannoo Emereetota Araba Gamtoomanii Dr. Amnaa Biint Abdullaah Al Dahaak Alshamsii, Pirezidaantiin COP29 fi ministirri eegumsa naannoo Azarbaajaan Muktaar Babayeev fi bakka bu’oonni dhaabbilee idil addunyaa walgahii kanarratti hirmaataniiru. Walgahichi galma haala qilleensaa hoo’innni addunyaa digirii seelshiyeesii 1 tuqaa 5 akka hincaalle gochuuf qabame milkeessuu akkasumas sirnoota nyaataa fi barbaachisummaa qabu irratti kan xiyyeeffatedha. Itiyoophiyaan qonna egeree imaammatashee haala qilleensaa biyyaalessaa keessatti qindeessuun wabii nyaataa fi eegumsa naannoo guddisuuf kutannoo qabdi jedhan Pirezidaant Taayyee Atsqasillaasee . Tarkaanfiin haala qilleensaa Itiyoophiyaa guddaan kun carraalee dinagdee Itiyoophiyaa waliin kan walqabate ta’uunsaa fayyadama lammiilee mirkaneessuu akka danda’u himaniiru. Itiyoophiyaan gama jijjiirama haala qilleensaatiin furmaatilee guddaa tarkaanfachiisuun fi tumsa idil addunyaa cimsuuf kutannoo akka qabdu ibsameera. Kaarboonii gadi lakkifamu hir’isuun, lafa miidhame deebisanii bayyanachiisuu fi qonna egeree bal’isuun barbaachisaa akka ta’e walgahicharratti kaafamuusaa odeeffannoon ministeera pilaanii fi misoomaa irraa argame nimul’isa.

Sadaasa 4/2017(TOI)- Pirojektoota Itiyoophiyaan jijjiirama haala qilleensaa qolachuuf hojjechaa jirtuuf hawaasni idil addunyaa deeggarsa taasisuu akka qabu Pirezidaant Taayyee Atsqasillaaseen ibsan. Yaa’iin jijjiirama haala qilleensaa mootummoota gamtoomanii 29ffaa(COP29)Azarbaajaan Baakuutti taa’amaa jiru har’a guyyaa sadaffaa qabateera. Pirezidaant Taayyee Atsqasillaasee haasawa yaa’icharratti taasisaniin Itiyoophiyaan inisheetiivii ashaaraa magariisaa dabalatee hojiiwwan ijoo eegumsaa fi kunuunsa qabeenya uumamaa taasisaa jirtu himaniiru. Hawaasni addunyaa carraaqqiiwwan akkasii akka ciman deeggarsa taasisuu akka qabu ibsuusaanii odeeffannoonministeera alaarraa argame nimul’isa.

Sadaasa 4/2017(TOI)- Itiyoophiyaan waliigaltee Paarisiis fi ittigaafatamashee ‘COP 28’ waggaa darbee waan sadiin hojeessaa akka jirtu Ministirri muummee Dr. Abiyyi Ahimad ibsan. Kan jalqabaa hojii ashaaraa magariisaatiin biqiltuuwwan biiliyoona 40 dhaabuun bosonni dhibbantaa 6n akka guddatu taasiseera jedhan. Kan biraan bara 2015 hanqina oomishaa gara oomisha irraa hafaa oomishuutti geeddare sagantaan misooma Qamadii jallisii yoo ta’u pirojektiiwwan misooma magaalaa ammayyaa eegumsa haala qilleensaaf mijataa kan ta’an magaalaawwan egeree fi magariisaa kan uuman humna haaromfamuun kan deeggaraman daandii lafoo kan qabanii fi konkolaattonni Elektiriikii kan itti dhihaatan hojiilee birooti jechuun ibsaniiru. Ministirri muummee Dr. Abiyyi Ahimad ergaa fuula marsariitiisaaniirratti dabarsaniin wayita #COP29 adeemsifamaa jirutti hojiileen Itiyoophiyaan rakkoo jijjiirama qilleensaaf furmaata fiduuf hojiilee hojjetaman Faayinaansiirratti kaayyeffachuun gamatti ittigaafatamoota waloo garuummoo ittifayyadama tokkoon tokkoon namaan adda bahan akkasumas ittigaafatama seenaa kan gaafachiisan ta’uu akka qaban xiyyeeffannoo guddaa kenniteetti jedhan. Murteewwan deeggarsa maallaqaa haala qilleensaa iftoomina qaban biyyoota akka Afriikaa misooma xiqqaa qaban qabatamaan hordofuuf barbaachisoodha jedhaniiru.