Sadaasa 5/2017(TOI)- Bulchaan bulchiinsa Jiyaangizuu Chaayinaa Shuu Kuliin baga gara yaadannoo Adwaa nagana dhuftan jechuun simanneerra jedhan Kantiibaan bulchiinsa magaalaa Finfinnee Adaanech Abeebee. Kantiibaa Adaanech Abeebee ergaa karaa fuula marsariitiisaanii dabarsaniin tumsa bal’isuu kan dandeessisuu fi hojiilee fayyadama waloorratti hundeeffamee fi akkaataa pirojektoota kaampaanii Jiyaangizuun magaalaa keenya keessatti hojjetamaa jiran hatattamaa fi qulqullinaan xumuruun danda,amurratti mari’anneerra jedhaniiru.

Sadaasa 5/2017(TOI) - Godina Harargee bahaatti hojiin misooma Qamadii hojjetama jiru carraa hojii uumuu qofaa osoo hin taane eeggatummaas hambisaa jiraachuu Bulchituun Godinichaa beeksisan. Godinichatti bara kana waqtii bonaa lafa heektaara kuma 130 irratti Qamadiin jallisiin kan misoomfamu ta'uu beeksisaniiru. Bulchituun godinichaa aadde Miskii Mahaamad TOI'tti akka himanitti; godinichatti bara 2013 lafa heektaara 7 irraatti hojiin misooma qamadii kan jalqabame ta'uu eeranii yeroo ammaa misoomni kun sadarkaa olaanaan babal'achaa jira jedhaniiru. Godinichatti hojiin misooma qamadii waqtii bonaa fi gannaa bal'inaan hojjetama jirachuu eeranii; kun hawaasa sagantaa seeftineetiin gargaarsa argatu dhibbeentaa 72 wabii nyaataan akka of danda'u taasiseera jedhaniiru. Misooma qamadii kanarratti lakkoofsi dargaggoota hirmaatanii dabalaa jiraachuun babal'achuu misooma qamadiif carraa guddaa uumeera jedhaniiru. Dabalataan ilaalchi qonnaan bultoonni qaban waan jijjirameef eeggatummaa irraa gara oomishitummaatti akka ce'aan gargaara jiras jedhaniiru.

Sadaasa 5/2017(TOI)- Daandiin qilleensaa Itiyoophiyaa boba’aa Xiyyaaraa kaarboonii gadi lakkifamu hir’isu fayyadamuuf hojiitti galuusaa hojii raawwachiisaan olaanaa daandii qilleensichaa Obbo Masfin Xaasoo ibsan. Waldaan geejjiba qilleensaa idil addunyaa(Ayaataa)karrboonii sababa geejjiba qilleensaatiin gadi lakkifamu hir’isuuf daandiin qilleensaa hundi A.L.A amma bara 2050tti boba’aa Xiyyaaraa filmaata egeree qabu guutummaatti hojiirra akka oolchan kallattii kaa’eera. Hojii raawwachiisaan olaanaa garee daandii qilleensaa Itiyoophiyaa Masfin Xaasoo TOIf akka ibsanitti, yeroo dhufu bu’aaleen teeknooloojii hedduun sektara Aviyeeshinii keessatti hojiirra kan oolan ta’a. Kanneen keessaa kaarboonii sababa geejjiba qilleensaatiin gadi lakkifamu hir’isuuf boba’aa Xiyyaaraa filmaata egeree (Sustainable Aviation Fuel-SAF) tti fayyadamuun tokko akka ta’e ibsaniiru. Haala Kanaan boba’aa kana mootummaan Itiyoophiyaa imaammanni biyya keessatti oomishuun danda’amuu qopheeffamaa akka jiruu fi qorannoon taasifamaa jiru jedhaniiru. Yeroo itti aanu kaampaaniiwwan xiyyaara oomishan boba’aan Xiyyaaraa filmaataa kun faayidaarra akka oolu xiyyaarota kanaaf mijatan kan oomishan yoo ta’u, daandiin qilleensaa Itiyoophiyaas boba’aa kana baay’inaan fayyadamuuf hojiitti galuusaa ibsaniiru. Kaampaaniin Ameerikaa tokko boba’aa kana Itiyoophiyaa keessatti oomishuuf qophii ga’aa taasisuusaa eeranii, daandiin qilleensaa Itiyoophiyaa kaampaanicha waliin waliigaltee mallatteessuusaa beeksisaniiru. Boba’aa Xiyyaaraa kaampaaniin kun oomishu daandiin qilleensaa Itiyoophiyaa baay’inaan fayyadamuuf akka isa dandeessisu ibsaniiru. Daandiin qilleensaa Itiyoophiyaa yeroo ammaa boba’aa kana Xiyyaarota muraasaan guutummaattii fi walakkeessaan faayidaarra oolchaa akka jiru eeraniiru.

Sadaasa 5/2017(TOI)-Mootummaan sirna bulchiinsa sharafa alaa seera qabsiisuuf imaammataa fi hojmaata diriirsaa wayita jirutti qaamolee riifoormicha gufachiisuuf yaalan irratti tarkaanfii akka fudhatu bulchaan baankii biyyaalessaa Itiyoophiyaa Maammoo Mihiratuu ibsan. Itiyoophiyaatti hanqina sharafa alaa barootaaf turee fi hidda qabate dinagdee biyyatti guddaa qoraa akka ture niyaadatama. Bulchaan Baankii biyyaalessaa Maammoo Mihiratuu TOItti akka himanitti, hojmaanni badaa Baankichaa hidda gadifageeffate imaammataan jijjiirameera. Baankichi qaamolee karaa seera qabeessaan sharafa alaa barbaadaniif dhiheessuu akka qaban eeranii, haata’u malee qaamoleen tokko tokko hojmaata sirrii hintaane wayita hordofan mul’ata jedhaniiru. Baankichi sirna bulchiinsa sharafa alaa seera qabeessa akka ta’u riifoormiiwwan addaddaa raawwachuusaa dubbataniiru. Rakkoo kana egereef furuuf imaammanni riifoormii dinagdee gooroo hojiirra ooluusaatiin sirni bulchiinsa sharafa alaa fooyyeffamuusaa ibsaniiru. Alergitoonni ykn misoomsitoonni sharafa alaa yoo barbaadan hojmaanni karaa seera qabeessa ta’een baankotarraa itti argatan hojiirra ooleera jedhan. Kana malees imalaa fi dhimmoota xixiqqoof sharafa alaa barbaadaniif eyyamni biiroo sharafa alaa lammiileen itti keessummeeffaman kennamuusaa eeraniiru. Kaampaaniiwwan hawaalaa carraan karaa seera qabeessaan bittaa fi gurgurtaa sharafa alaarratti hirmaatan uumamuusaa ibsanii, sababni hojmaata seeraan alaa hordofuun barbaachisuuf akka hinjirre ibsaniiru. Haata’u malee mootummaan carraalee kanneen hunda uumee osoo jiruu ammas qaamoleen karaa seraan alaa hordofuun riifoormicha gufachiisuuf yaalanirratti baankiin biyyaalessaa tarkaanfii fudhachuuf nidirqama jedhaniiru. Riifoormiin dura garaagarummaan gatiin sharafa alaa idilee fi idileen alaa jidduu jiru dhibbantaa 97 ol akka ture yaadachiisanii, yeroo ammaa dhibbantaa 10 gaditti bu’eera jedhan. Baankileen bittaa fi gurgurtaa sharafa alaa karaa seera qabeessaa raawwachuun ittigaafatamasaanii bahuu akka qaban hubachiisaniiru.

Sadaasa 5/2017(TOI) - Ya'iin Dhaabbata Hojii Addunyaa 20ffaan sadarkaa ardiitti Caamsaa 11-15/2017'tti Finfinneetti ni geggeeffama jedhame. Yaa'icha ilaalchisuun Ministira Magaalaa fi bu'uuralee misoomaa aadde Caaltuu Saanii fi Dhaabbata Hojii Addunyaatti bakka bu'aan gaanfa Afrikaa Niwaalaa Kambaalaa miidiyaaleef ibsa kennaniiru. Yaa'iin kun mata duree '' Haala jijjiramaa rakkisaa addunyaa hawaasa gamdamachuu danda'u uumuu'' jedhuun kan geggeeffamu ta'uu ibsaniiru. Yaa'iin kun Caamsaa dhufu gaafa guyyaa 11 -15/2017'tti Finfinnee galma Yaadannoo Adwaatti kan geggeeffamu ta'uu ibsanii; waraqaan qorannoo damicha irratti xiyyeeffatan dhihaachuun irratti ni mari'atama jedhaniiru. Kanneen yaa'ii kanarratti hirmaataan hojiin bu'uuralee misoomaa Itoophiyaan hojjecha jirtus kan daawwatan ta'uu ibsaniiru. Yaa'ii kanarratti kanneen imaammata qopheessan, waldaaleen hojjechiisttotaa fi hojjettootaa, ogeeyyii tekinolojii hojjetootarratti xiyyeeffatan, dhaabbilee miti mootummaa, dhaabbileen akkadaamii fi qorannoo kan hirmaatan ta'uu ibsaniiru. Yaa'ii kana karaa milkaa'ina qabuun geggeesuuf dhaabbilee mootummaa 15 irraa koreen walitti dhufe hundaa'uun qophii dursaa taasisaa jirachuu Ministirri Magaalaa fi Bu'uuralee misoomaa aadde Caaltuu Saanii ibsaniiru.

Sadaasa 5/2017(TOI) - Galii albuudarra argamu guddisuuf Ministeerri Albuudaa imaammataa fi hammattoo seeraa hojiif barbaachisan irratti xiyyeeffannoo addaa kennuun hojjechuu akka qabu Mana maree bakka bu'oota uummataatti Koreen dhaabbii dhimma bulchiinsi fi to'annoo baasii mootummaa hubachiise. Koreen dhaabbii kun gabaasa odiitii hojii fi tarkaanfiiwwan sirreeffamaa waajjirri Odiitara Muummichaa daballii fi sassaabbii galii albuudaa Ministeerri Albuudaa bara baajataa 2015/16 hojjete ilaalchisee mari'atee jira. Ministeerri Albuudaa kuufama qabeenya albuudaa adda baasuu, qo’annoo bu'a qabeesummaa duraa taasisuun dhaqqabamaa taasisuu fi damichaaf imaammata qopheessuu irratti qaawwi akka jiru gabaasa odiitii hojii irratti mul’achuun himameera. Haaluma walfakaatuun gabaasni odiitii kun invastimantii fi misooma albuudaa irratti hirmaannaa damee dhuunfaa guddisuuf sirni hojii gahumsaa fi bu’a qabeessa ta’e akka hin qophaa’in ibseera. Omishaaleen Albuudaa sadarkaa idil-addunyaatti akka ta'aniif sirna diriirsuu fi raawwii isaa hordofuurrattis hanqinni akka jiru ibsameera. Gabaasni kun seeraan alummaa ittisuu, galteewwan bakka bu'an uumuu fi oomishtoota albuudaa aadaa naannolee waliin ta’uun hordofuu irrattis qaawwi akka tures eereera. Miseensonni Koree Dhaabbii Bulchiinsaa fi To’annoo Baasii Mootummaa fi qooda fudhattoonni waltajjii kanarratti argaman argannoo odiitii irratti hundaa’uun tarkaanfiiwwan sirreeffamaa Ministeerri Albuudaa fudhate irratti ibsi akka kennamu gaafataniiru.

Sadaasa 4/2017(TOI)- Alergitoonni boruu eegalee hojmaanni sharafa alaa maddisiisanirraa dhibbantaa 50 gurguruun kan hafe yeroo hinmurtoofneef akkaawuntiisaanii Itiyoophiyaa keessa jiru keessa kaa’uu itti danda’an akka hojeeffamu Baankiin Biyyaalessaa Itiyoophiyaa ibse. Bulchaan Baankii biyyaalessaa Itiyoophiyaa Maammoo Mihiratuu akka jedhanitti, alergitoonni sharafa alaa maddisiisan keessaa dhibbantaa 50 Baankotaaf battalatti gurguruun kan hafe baatii tokko keessatti gurguruuf nidirqisiifamu ture. Wayita hojmaatichi yeroof hojeeffamu sharafa biyya alaa tasgabbaa’aan akka jiraatu barbaaduurraa akka ture obbo Maammoon yaadachiisaniiru. Alergitoonni boruu eegalee garuu sharafa alaa maddisiisan dhibbantaa 50battalatti gurguruun dhibbantaa 50 hafe yeroo hinmurtoofneef akkaawuntiisaanii keessa kaa’uu nidanda’u. Kana jechuun sharafa alaa maddisiisan baatii tokko keessatti akka gurguran hindirqisiifaman jechuudha.

Sadaasa 4/2017(TOI)- Riifoormiin dinagdee Gooroo Itiyoophiyaan hojeessaa jirtu kaampaaniiwwan Awurooppaaf carraa caalu kan kennudha jedhan Itiyoophiyaatti ambaasaaddarri gamtaa Awurooppaa Soofii Firoom-Imesbergern. Ministirri dhimma alaa Dr. Geediyoon Ximootiwoos Itiyoophiyaatti ambaasaaddara gamtaa Awurooppaa Soofii Firoom-Imesbergern waajjirasaaniitti simatanii dubbisaniiru. Gamtaan Awurooppaa carraaqqii Itiyoophiyaan sektaroota hawaas-dinagdee fooyyessuuf taasiftuuf tumsituu ijoo ta’uusaa ministirri dhimma alaa Geediyoon ibsaniiru. Hariiroo Itiyoophiyaan gamticha waliin qabdu caalaatti cimsuuf akka hojjettus dubbataniiru. Kessumaammoo hariiroo kana tumsa misoomaa, daldalaa fi Invastimantiin bal’isuuf fedhiin akka jiru ibsanii, haala wayitaawaa nageenyaa fi tasgabbii qaxanichaa ambaasaaddarittiif ibsaniiru. Itiyoophiyaatti ambaasaaddarri gamtaa Awurooppaa Soofii Firoom-Imesbergern gamasaaniin, Itiyoophiyaan shoora tarsiimawaa guddaa qaxanichatti qabduun gamtichi hariiroo biyyattii waliin qabuun xiyyeeffannoo addaa akka kennu ibsaniiru. Itti dabaluunis bakka bu’oonni biyyoota miseensa gamtichaa 22 Finfinnee fi kaampaaniiwwan Awurooppaa 180 caalan Itiyoophiyaatti akka argaman eeranii, riifoormiin dinagdee Gooroo Itiyoophiyaan hojeessaaa jirtu kaampaanii kanneeniif carraa caalu akka ta’uuf dubbataniiru. Komishiniin marii biyyaalessaa nageenyaa fi tasgabbii waaraa Itiyoophiyaaf akka uumu gochuun gumaacha gaarii akka qabaatu ambaasaaddarittiin ibsuusaanii odeeffannoon ministeera dhimma alaarraa argame nimul’isa.

Sadaasa 4/2017(TOI) - Meeshaaleen bu'uuraalaa karaa Firaankoo Vaalutaa alaa galaa turan karaa idileen sanada wabii Baankota Daldalaan (lC) akka galfaman murtaa'uu Ministirri Maallaqa obbo Ahimad Shidee beeksisan. Mootummaan hanqinni oomishaa meeshaalee bu'uuraa akka hin mudanne yaaduun dureeyyootaa dhuunfaaf eeyyama Firaankoo Vaaluutaa kennuun ni yaadatama. Ministirri Maallaqaa Ahimad Shidee akka himanitti; karaa Firaankoo Vaaluutaan meeshaalee bu'uuraa akka biyya keessa galan taasisuun hanqinni akka hin mudannee taasisuu keessatti deeggara hanga tokko taasiseera. Ta'uus garuu Firaankoo Vaaluutaan kun karaa hin taanee gabaa seeraan alaaf waan saaxilameef sharafa alaarratti dhiibbaa uumuun fayidaa isaa caalaa miidhaan isaa guddachuu himaniiru. Fooyya'insi guutuu imaammata dinagdee gooroo taasifame gabaa sharafa alaa idilee fi kan biroo jiddu garaa garummaa jiru waan walitti buteef Firaankoo Vaaluutaan akka hafu taasifamuu himaniiru. Haaluma kanaan meeshaalee bu'uuraa karaa Firaankoo Vaaluuta biyya alaa galchuun guuttummaan guutuutti akka hafu taasifamuus eeraniiru. Meeshaaleen alaa galfamuuf adeemsarra jiran torban lama keessatti akka galan kan taasifamu ta'uu himaniiru. Haaluma bu'uura murtee kanaan meeshaaleen bu'uuraalaa karaa Firaankoo Vaalutaa galaa turan sanada wabii Baankota Daldalaan (lC) akka galfaman murtaa'uu fi kunis gara gochaatti galamuu ibsaniiru. Baankonni daldalaa meeshaalee bu’uuraaf kuufama sharafa alaa gahaa akka qaban kaasanii, baankonnis xiyyeeffannaa kennuun dhiyeessii sharafa alaa akka fooyyessan ni taasifamas jedhan. Mootummaan tarkaanfii imaammata dhiyeessii meeshalee bu’uuraa fi gatii tasgabbeessuu cimsee akka itti fufu akeekaniiru. Tarkaanfii imaammataa fi to’annoon garaagarummaan gabaalee dhiphachuu hubachiisaniiru. Hojiirra oolmaa fooyyessii imaammataa diinagdee gooroon, walbuusi tilmaama sharafa alaa hinmudanne jedhanii, fuuldurattis gama Baankii biyyaalessaan hordoffii cimaan akka taasifamu ibsaniiru. Like Comment Send Share  

Sadaasa 4/2017(TOI- Ministirri muummee Dr. Abiyyi Ahimad gabaasa hojii misooma kooriidarii Finfinnee boqonnaa lammaffaa kallattiiwwan kooriidarii saddet fi bal’ina heektaara kuma 2 fi 879 irratti hojjetamaa jiru qorataniiru. Ministirri muummee ergaa karaa fuula marsariitiisaanii dabarsaniin har’a hojii misooma kooriidarii Finfinnee boqonnaa lammaffaa kallattiiwwan kooriidarii saddet fi bal’ina heektaara kuma 2 fi 879 irratti hojjetamaa jiru qoranneerra jedhan. Magaalonni keenya guddinaa fi guddinaaf caalaatti mijattuu gochuuf boqonnaa jalqabaarraa muuxannoo fudhachuun tarkaanfii caalu tarkaanfachuun danda’ameera jechuun ibsaniiru. Yeroo ammaa ittigaafatamummaa bu’uraa sadii irratti xiyyeeffachuu qabna kan jedhan ministirri muummee Dr. Abiyyi Ahimad jalqaba magaalota fedhii dhaloota boruuf mijatan ijaaruu, kan lammataa magaalaawwan jijjiiramaa jiran keessatti dhaloota guddachuu danda’u horachuu, kan sadaffaa gaggeessaa magaalaawwan ammayyooman kanneen ga’oomaan gaggeessuuf qophaa’ega’oomsuudha jechuun ibsaniiru.

Sadaasa 4/2017(TOI)-Raawwiin ijaarsa pirojektii jallisii Lixaa Walaabuu Godina baha Booranaattu ijaaramaa jiru dhibbantaa 95 irra gahuusaa waajjirri misooma jallisii fi horsiisee bulaa beeksise. Waajjirichatti dursaan garee diizaayinii fi to’annoo Injiinar Tasfaahuneny Daani’eel, saaxilamummaa ongee horsiisee bulaa godinichaa hir’isuuf hidha jallisii hedduun ijaaramaa jiru jedhaniiru. Hidhi Pirojektii jallisii isa tokko ta’uu eeranii, raawwiinsaas harka 95 gahuusaa ibsaniiru. Pirojekticha raawwachiisuuf biiroon misooma jallisii fi horsiisee bulaa naannichaa birrii miiliyoona 130 ramaduusaa eeraniiru. Kanaaf ijaarsa hidhichaa baatii lamaan dhufan guutummaatti xumuruun tajaajilaaf oolchuuf carraaqqiin taasifamaa jira jedhaniiru. Hidhi jallisii kun tajaajila wayita jalqabu lafaa heektaara 120 misoomsuun abbootii warraa 250 akka fayyadu himaniiru.

Sadaasa 4/2017(TOI) - Hojii damee Geejibaa fi Lojistikii ammayyeesuuf xiyyeeffannoon kennamuu Ministirri Geejibaa fi Lojistikii doktar Alamuu simee beeksisan. Yaa'iin kurmaaba jalqabaa bara bajataa kana kan sektera Geejibaa fi Lojistikii magaalaa Hararitti geggeeffama jira. Ministirri Geejibaa fi Lojistikii doktar Alamuu Simee dameen geejibaa fi lojistikii guddina dinagdee biyyaf bakka olaanaa kan qabudha jedhaniiru. Keessattu imaala guddina dinagdee ariifataa biyyattiin galmeesuuf eegalete galmaan gahuuf sekteroonni wajjirichaa hojii geejibaa fi lojistikii madaalu hojechuu qabu jedhaniiru. Yaa'ii kanarratti damee loojistikii fi jgeejibaan maaltu akka hojjetame, bu'aan hagam akka galmaa'e, maaltu akka hafu adda baasuu fi maal irratti xiyyeeffachuun akka barbaachisu irratti waliigaltee uumuuf kan kaayyeeffatedha jedhaniiru. Kunis muuxannoo gaarii jiru babal'isuu fi imaala badhaadhinaa mirkaneesuuf kan gargaaru ta'uu eeraniiru. Yaa'ii kanarratti kan argaman pirezidaantiin naannoo Hararii obbo Oradiin Badirii gama isaaniin naannichaatti magaalaa fi baadiyaatti bu'uuralee misooma daandii hojjechuun yeroo gabaabaa keessatti bu'aan qabatamaan argameera jedhaniiru. Bara bajataa kanas hojiin bu'uuralee misoomaa daandiin bal'inaan hojjetama jirachuu himaniiru.      

Sadaasa 4/2017(TOI)- Ijaarsi hidha haaromsaa Itiyoophiyaa amma xumuramutti lammiin Itiyoophiyaa hundi deeggarsa taasisu cimsuu akka qabu Ugaandaatti ambaasaaddarri Itiyoophiyaa Itsagannat Bazzaabih hubachiisan. Ugaandaa Kaampaalaa kan jiraatan adde Biheer Kiflee xumura pirojektii hidha haaromsaaf kan oolu Boondii doolaara Ameerikaa kuma 31 fi 425 bitaniiru. Adde Biheer Embaasii Kampaalaatti argamuun Boondii kan bitan yoo ta’u sanada Boondii kana Ugaandaatti ambaasaaddara Itiyoophiyaa Itsagannat Bazzaabih Yimanuu harkaa fudhataniiru. Hidhi haaromsaa guddichi kan biyyi keenya itti boontu ta’uu ambaasaaddar Itsagannat ibsanii, amma hidhi kun xumuramutti lammiin Itiyoophiyaa hundi tumsa taasisu cimsee itti fufuu akka qabu hubachiisaniiru. Adde Biheer fi Maatiinsaanii ijaarsi hidha haaromsaa guddichi galmasaa akka gahu deeggarsa irra deddeebi’uun taasisaa jiraniif galateeffataniiru. Boondii kan bitan adde Biheer Kiflee gamasaaniin hidhi haaromsaa guddichi misooma Itiyoophiyaaf pirojektii biyyaalessaa gumaacha olaanaa taasisu akka ta’e kaasaniiru. Hidhi kun amma xumuramutti deeggarsa taasisan cimsanii akka itti fufan ibsuusaanii odeeffannoon ministeera alaarraa argame nimul’isa.

Sadaasa 4/2017(TOI) - Yaa'iin kurmaana jalqaba bara bajataa kanaa kan sektera Ministeera Geejibaa fi Lojistikii magaalaa Harariitti geggeeffama jira. Yaa'ii kanaa raawwiin karoora hojii Ministeera Geejibaa fi Lojistikii kurmaana jalqabaa bara bajatichaa ni gamaggamama jedhameera. Yaa'ii kanarratti Ministira Geejibaa fi Lojistikii doktar Alamuu Simee, Pirezidaantii naannoo Hararii obbo Oradiin Badirii, ministir deetaawwan ministira Geejibaa fi Lojistikii, haggantoota bulchiinsa magaalaa Dirre Dawaa fi Finfinnee dabalatee hoggantoonni sektirichaa kan naannolee hundaa hirmaataniiru.

Sadaasa 4/2017(TOI)- Kaampaaniiwwan Biraaziil sektaroota oomishaa fi bu’aalee qonnaa qiqindeessuurratti Itiyoophiyaatti invast akka godhan Biraazilitti abbaan aangoo guutuu ambaasaaddar Li’ulsaggad Taaddasaa waamicha taasisaniiru. Ambaasaaddar Li’ulsaggad Taaddasaa pirezidaantii Konfedereeshinii manneen maree daldalaa fi Biizinasii Biraaziil Elfireedoo Koontee Neetoo waliin marii sektaroota tumsa dinagdee Itiyoophiyaa fi Biraaziil cimsuu dandeessisu taasisaniiru. Itiyoophiyaan qabeenya uumamaan kan badhaate, filmattota Invastimantii bal’aa fi bu’uraalee misoomaa invastimantiif mijatan, humna namaa fi bakkeewwan hojii, sektarri dhuunfaa misoomarratti akka hirmaatu hooggansaa mijataa fi kutannoon jiraachuu pirezidaantii konfedereeshinichaaf ibsaniiru. Paarkiiwwan industirii dureeyyii biyya alaa Itiyoophiyaatti sektaroota oomishaa fi bu’aalee qonnaa qiqindeessan simachuu danda’an ijaaramuusaanii fi godinaaleen qaxanaa daldala bilisaa qophaa’uusaanii beeksisuusaanii odeeffannoon ministeera dhimma alaanimul’isa. Daandiin qilleensaa Itiyoophiyaa balallii imaltootaa fi kaargoo guyya guyyaatti Biraazilii fi naannawasheetti taasisu kanneen misoomarratti bobba’aniif haala mijataa kan uumu ta’uu ambaasaaddar Li’ulsaggad dabalanii ibsaniiru. Pirezidaantiin konfedereeshinichaa Alfireedoo Koontee Neetoo gamasaaniin Itiyoophiyaan carraalee Invastimantii hedduu kan qabdu ta’uushee hubachuusaanii fi kanammoo gara hariiroo Itiyoo-Biraaziil qabatamaatti guddisuun akka barbaachisu dubbataniiru. Kanaaf Konfedereeshinichi dhimmicha ilaalchisuun Embaasicha walii ta’uun akka hojjetu ibsuusaanii odeeffannoo Kanaan eerameera.

Sadaasa 3/2017(TOI)- Riifoormii hammattoo ijaarsa sektaraan hojjetameen qisaasama qabeenya biyyaa fi seenaa wagga waggaan kasaaruu jalaa bahuun danda’ameera jedhan Ittaanaa ministira muummee Tamasgeen Xurunaa. Ittaanaan ministira muummee ergaa karaa fuula marsariitiisaanii dabarsaniin hojiin ijaarsa sektaraa hojjenne utubaa ijoo ijaarsa mootummaa dhaabuuti jedhaniiru. Raawwii kurmaana waggaa jalqabaa bara 2017 qaamolee raawwachiisoo ministira muummeef itti waamamanii har’a qorachuu jalqabneerra jedhan. Riifoormii hammattoo ijaarsa seektaraan hojjetameen qisaasama qabeenya biyyaa fi seenaa wagga waggaan kasaaruu jalaa bahuu dandeenyeerra jechuun ibsaniiru. Haala Kanaan seektaroota dinagdee biyyaa deeggaranii fi wagga waggaan birrii biiliyoonaan lakkaa’amu galmeessisan, namoota hedduuf carraa hojii uuman, cehumsa beekumsaa fi teeknooloojiif gumaacha taasisan uumneerra jedhan. Riifoormiin Seektaroota ministira muummeef itti wamaman hunda keessatti jalqabame waggoota darban bu’aa safaramuu fi lakkaa‘amuu fiduusaanii ibsaniiru. Waltajjii har’aatiin raawwiiwwan ijoo bara bajataa kurmaana jalqabaatti hojjechuuf karoorsinee niqoranna jechuun eeraniiru. Waltajjii hojii akka gaariitti milkeessine ilaallee hanqinoota adda baasuun dhimmoota xiyyeeffannoo barbaadan adda baasuun tumsa waloo taasisuuf boqonnaa itti aanuuf kaka’umsa caalaa kan itti uumnu nita’a jedhan Ittaanaan ministira muummee ergaasaaniitiin.

Sadaasa 3/2017(TOI)- Godina Harargee Bahaatti lafa heektaara kuma 130 irratti jallisii boneen Qamadii misoomsuuf hojiitti galamuusaa Waajjirri qonnaa godinichaa beeksise. Baatii bonaa Qamadii misoomsuuf karoorfamee aanaa Baabbilee waldaa qonnaan bulaa Jaalalleetti meekaanaayizeeshinii fayyadamuun qamadii facaasuun jalqabameera. Bona kana Qamadii bal’inaan oomishuun wabii nyaataa mirkaneessuu fi carraa hojii dargaggoo bal’isuuf akka hojjetamu ibsameera. Bulchituun godinichaa adde Miiskii Mahaammad wayita kana akka ibsanitti, misoomni Qamadii godinichatti hojjetamu wagga waggaan dachaan guddachaa dhufeera. Misoomni Qamadiis wabii nyaataa qonnaan bulaa mirkaneessaa dargaggoota hojicharratti bobba’an galii argamsiisuun fayyadama dinagdee guddisaa akka jiru dubbataniiru. Humna namaa, bishaan argamuu danda’uu fi lafa sektara qonnaan jiru sirnaan ittifayyadamuun oomisha fooyya’aa argachuuf akka hojjetamu ibsaniiru. Bulchiinsi godinichaa oomisha Qamadiif xiyyeeffannoo kennuusaa kan dubbatan ammoo ittaanaa hooggana waajjira qonnaa godinichaa obbo Abdii Ahimadi. Baatii Bonaas godinichatti lafa heektaara kuma 130 irratti Qamadii misoomsuuf karoorfamee hojiin jalqabamuu beeksisaniiru. Bulchaan aanaa Baabbilee obbo Nuurii Mahaammad gamasaaniin, aanichatti lafa heektaara kuma 3 irratti kilaastaraan Qamadii misoomsuuf hojjetamaa akka jiru ibsaniiru. Qamadii gandoota aanichaa 5 keessatti misoomuuf qonnaan bultoonnii fi dargaggoonni lafa qophaa’erratti facaasaa jalqabuusaanii dubbataniiru.

Sadaasa 3/ 2017(TOI)-Bulchaan naannoo Sidaamaa Dastaa Leedaamoo Misooma Bunaa aanaalee garagaraa keessatti hojjetamaa jiru daawwachuurratti argamu. Obbo Dastaan sochii hojii Bu’aa badagaloo waldaa buna mulquu aanaa Daallee ganda Siffunaatti argamu daawwataniiru. Bakka bu’aan waldichaa obbo Maarqoos Gabbiisoo, waldichi oomisha Bunaa qabiyyeesaarratti misoomsuu fi qonnaan bultootarraa fudhatu bakkeewwan sadiitti qopheessee buna dhiqame gabaa giddugaleessaaf akka dhiheessu ibsaniiru. Waldichi namoota 500 caalaniif carraa hojii kan uume yoo ta’u, bara kana buna dhiqame kiiloogiraamii kuma 225 gabaa jiddugaleessaaf dhiheessuuf hojjechaa akka jiru himaniiru. Daarektarri olaanaa abbaa taayitaa Buna, muduraa fi mi’eessituu naannoo Sidaamaa obbo Masfin Qaarree, bara kana buna dhiqamee fi hindhiqamne toonii kuma 40 caalu gabaa jiddugaleessaaf akka dhiheessu beeksiseera. Naannichatti qonnaan bultoonni kuma 400 caalan buna misoomsaa akka jiran eeranii, lafa bunaan qabame heektaara kuma 169 keessaa heektaara kuma 142irraatti kan argamu firii kennaa jira. Bulchaan kun aanaa Daallee malees sochii oomisha bunaa fi aanaa jiddugaleessota hojiin agarsiisuu Alattaa Wandoo nidaawwatu. Itti waamamaan mootummaa naannichaa obbo Abrihaam Marshaalloo dabalatee miseensonni hooggansaa biroon daawwannaa kanarratti hirmaachaa jiru.

Sadaasa 3/2017 (TOI) - Baankii Itoophiyaatti waajjiraaleen sharafa alaa dhuunfaa banamuun damee faayinaansii dorgommii irratti hundaa’e akka guddatu taasisa jedhan hoggantoonni waajjira sharafa alaa dhuunfaa. Baankiin Biyyaalessaa Itoophiyaa tajaajila sharafa alaa babal’isuu fi qaqqabummaa isaa dabaluuf qajeelfama baaseen biiroowwan maallaqa dhuunfaa baankii hin taane shan ulaagaa barbaachisaa ta’e guutaniif hayyama kennuun isaa ni yaadatama. Biiroon sharafa alaa hundi maallaqa biyya alaa fudhatama qabu bituu fi gurguruu akkasuma baankota waliin qindoomuun sharafa alaa al-ergii fi daldala alaa galchiif haala mijeessuun gabaa sharafa alaa biyyattii babal’isuu fi dagaagsuu keessatti gahee akka qaban qajeelfama kana keessatti eeramee jira. Hoggantoonni biiroo sharafa alaa dhuunfaa TOI dubbise; fooyya'insa diinagdee gooroo hordofuun jijjiiramni damee faayinaansii irratti taasifame filannoo maallaqa alaa argachuu babal’isuuf kan gargaaru ta’uu ibsaniiru. Hoji gaggeessaa dhaabbata Ethio Forex; obbo Efreem Tasfaayee gatiin sharafa alaa gabaan kan murtaa’u ta’uu ibsuun, kunis dinagdee dorgomaa ijaaruuf kan gargaaru ta’uu ibsaniiru. Carraa fooyya'insichi fide fayyadamuun damee dhuunfa hirmaachisuun tajaajila sharafa alaa fi qaqqabummaa isaa babal’isuuf damicha keessatti hirmachuu jalqabuu himaniiru. Biiroon sharafa alaa dhuunfaa ibsa gumurukaa malee maamiltoota irraa hanga doolaara Ameerikaa kuma 10 bitachuu kan danda’an yoo ta’u, hayyama gumurukaatiin maallaqa alaa dabalataa bitachuu danda’u. Baankiin Biyyaalessaas imaltoota dhuunfaa odeeffannoo imala barbaachisu qabaniif hanga doolaara Ameerikaa kuma 5, imaltoota hojiif deemanitti ammoo hanga doolaara Ameerikaa kuma 10 gurguruu akka danda’an ibseera. Bu’uura kanaan guyyaatti Doolaara Ameerikaa kuma 10 hanga 15 bitaa fi gurguraa kan jiran yoo ta’u gara fuulduraattis tajaajila kana babal’isuuf kan hojjetan ta’uu ibsaniiru. Hayyama sharafa alaa kan biraa kan argate hoji gaggeessaan dhaabbata Robust Business Group kan ta’an Geetuu Mullisaa akka jedhanitti waajjirri maallaqa dhuunfaa yeroo dheeraa keessatti seera qabeessummaa isaa cimsuuf kan gargaaru ta'uu himaniiru. Carraa fooyya'insa diinagdee gooroo damee dhuunfaaf fide fayyadamuun dinagdee dorgomaa ta’e ijaaruun damichatti makamuu isaaniis eeraniiru.      

Sadaasa 3/2017(TOI)- Bulchiinsi magaalaa Finfinnee raawwii hojii kurmaana waggaa bara 2017 qorachuu eegaluusaa waajjirri kantiibaa beeksise. Kantiibaan bulchiinsa magaalaa Finfinnee Adaanech Abeebee waltajjicharratti haasawa baniinsaa taasisaniiru. Akkaataa karoora keenya itti rraawwanne, cimina keenya itti fufsiisaa hojiilee hanqina qaban gadi qabnee qorachuu qabna jedhan haasawasaaniin. Hanqinoota numudatan duguugnee qorachuun keenya madda cimina keenyaa keessaa isa tokkodha jechuun dubbachuunsaanii odeeffannoo Kanaan ibsameera. Haala Kanaan hojmaata badaa, hanna, matta’aa nyaachuu fi hanqina tajaajila kennuurratti mul’ate furuun hooggansi hundi magaalaa jiraattotaaf mijattuu taate ijaaruuf karooraa fi raawwiisaa akkasumas akkamittan ittigaafatama koo bahe jedhee በqorachuu qaba jechuunsaanii eerameera.