Guraandhala 15/2017 (TOI)- Hooggantoonni mootummaa olaanoon hojiiwwan misooma magaalaa Bahaa Daaritti hojjetamaa jiran daawwataniiru. Ministirri gorsaa dhimma hawaasummaa ministira muummee Mu’aaze Xibabaat Diyaaqon Daani’eel Kibrat, ministirri nageenyaa Mahaammad Idriis, bulchaan baankii biyyaalessaa Maannoo Mihiratuu, pirezidaantiin mana murtii walii gala naannoo Amaaraa Alam Antee Aggidoo, dursaan itti aanaa Kantiibaa magaalaa Bahaar Daar Goshuu Indaalaamaawu dabalatee hooggantoonni biroon daawwannaa kanarratti argamaniiru. Hooggantoonni kunneen hojiilee riifoormii mana murtii walii galaa naannoo Amaaraa akkasumas misooma kooriidarii magaalaa Bahaar Daar fi hojiilee misoomaa biroo daawwataniiru. Hojiileen riifoormii mana murtii waliigalaa Kanaan hojjetamaa jiran abdachiisaa fi kan jajjabeeffaman ta’uun ibsamuusaa odeeffannoon waajjira paartii Badhaadhinaa damee Amaaraa irraa argame nimul’isa.

Guraandhala 15/2017(TOI)-Bulchaan naannoo Beeniishaangul Gumuz Obbo Ashaadlii Hasan hojiilee misoomaa naannoo Somaalee magaalaa Jigjigaatti hojjetamaa jiran daawwataniiru. Hoogganaan waajjira damee paartii badhaadhinaa naannoo jiddugaleessa Itiyoophiyaa Dr. Dillaamoo Otoree daawwannaa kanarratti argamaniiru. Hooggantoonni olaanoo paartii badhaadhinaa konfaransii ummataa boru magaalaa Jigjigaatti taa’amu akka gaggeessan odeeffannoon biiroo komunikeeshinii naannoo Beeniishaangul Gumuz irraa argame nimul’isa.

Guraandhala 14/2017(TOI)- Hojiin misooma Kooriidarii magaalaa Bahaar Daar miidhagina magaalichaa caalaatti kan mul’isudha jedhan hoogganaan damee ummataa fi hariiroo alaa paartii Badhaadhinaa Dr. Biqilaa Hurrisaa. Dr. Biqilaa Hurrisaa fi bulchaan naannoo kibba Itiyoophiyaa obbo Xilahuun Kabbadaa dabalatee miseensonni hooggansaa biroon galgala kana hojii misooma kooriidarii magaalaa Bahaar Daaritti hojjetamaa jiru daawwataniiru. Konfaransii ummataa magaalaa Bahaar Daaritti taa’amurratti hirmaachuuf magaalaa Bahaar Daaritti kan argaman Dr. Biqilaa Hurrisaa misoomni Kooriidarii magaalaa Bahaar Daaritti hojjetamaa jiru raajiidha jedhaniiru. Boruu eegalee magaalaawwan Itiyoophiyaa guruddoo 25 keessatti guyyoota lamaaf konfaransiin ummataa akka taa’amu beeksisaniiru. Bulchaan naannoo Kibba Itiyoophiyaa Xilahuun Kabbadaa gamasaaniin, misooma Kooriidarii dabalatee hojiiwwan bu’uraaleen misoomaa magaalaa Bahaar Daaritti hojjetamaa jiran keessumaa naannoo haaraa isaan gaggeessaniif muuxannoon kan irraa fudhatamudha jedhaniiru. Dursaan Kantiibaa magaalaa Bahaar Daar fi hooggantoonni olaanoon naannichaa daawwannaa kanarratti hirmaataniiru.

Guraandhala 14/2017(TOI)- Itti aanaan ministira muummee Tamasgeen Xurunaa yaa’ii biyyoota Afriikaa Buna oomishanii G-25 yeroo sadaffaa adeemsifamu irratti argamuuf Taanzaaniyaa Daaree Salaam dhaqaniiru. Afriikaarraa Buna oomishuun adda duree kan taate Itiyoophiyaa dabalatee biyyoonni Afriikaa Buna oomishan 25 yaa’ii kanarratti nihirmaatu. Yaa’ii mata duree “Industirii Buna Afriikaa dadammaqsuun dargaggootaaf carraa hojii uumuu” jedhuun adeemsifamu Kanaan mariin damee kana dadammaqsuu fi carraa hojii bal’aa uumuu dandeesisan akka adeemsifaman ni’eegama.

Guraandhala 14/2017(TOI)- Itiyoophiyaan damee Industirii Oomishaatiin tumsa Hindi waliin qabdu cimsuu akka barbaaddu de’eetaa ministira Industirii Hasan Mahaammad ibsan. De’eetaan ministiraa kun dureeyyota waldaa Industirii Hindi (Confederation of Indian Industry) waliin waajjira isaaniitti mari’ataniiru. Mariin kun haala dureeyyiin kunneen Itiyoophiyaatti damee Industirii oomishaa irratti hojjechuu danda’an irratti kan xiyyeeffatedha. Mootummaan fayyadama dinagdee lammiilee mirkaneessuu fi badhaadhina Itiyoophiyaa dhugoomsuuf damee Industirii oomishaaf xiyyeeffannoo addaan hojjechaa akka jiru de’eetaan ministiraa kun ibsaniiru. Invastaroota biyya alaa hojii kana hojjetaniif hammattoo seera Industirii mijataa uumuu irraa eegalee filmaattonni Invastimantii mijachuusaanii himaniiru. Tumsi Itiyoophiyaa fi Hindi damee Industirii oomishaatiin cimuun guddina Industirii akkasumas cehumsa Teeknooloojii fi beekumsaaf qooda olaanaa akka qabaatu dubbataniiru. Dureeyyiin waldaa Industirii Hindirraa dhufan damee Industirii oomishaatiin Itiyoophiyaa keessatti Invast gochuuf haalli mijataan akka jiru hubachuusaanii ibsuusaanii odeeffannoon ministeericharraa argame nimul’isa.

Guraandhala 14/2017(TOI)- Hojiin misooma Kooriidarii bifa Buttaa jiraa jijjiiruu fijireenyaaf filatamaa taasisu Kiiloo meetira 25 hojjetamaa akka jiru bulchiinsi magaalichaa beeksise. Kantiibaan bulchiinsa magaalichaa obbo Abduu Ahimad TOI’tti akka himanitti, misoomni kooriidarii magaalota miidhagaa, jireenyaaf mijataa fi dorgomaa taasisuuf bu’ura ta’aa jira. Hojii ijaarsaa misooma kooriidarii boqonnaa duraa magaalaa Buttaa Jiraa kiiloo meetira 2 tuqaa 2 xumuramee tajaajilaaf ooluusaa dubbataniiru. Boqonnaa lammataan hojiin misooma Kooriidarii Kiiloo meetira 25 yeroo ammaa hojjetamaa akka jiru ibsaniiru. Daandiin lafoo fi biskileetii akkasumas iddoowwan magariisaa fi faawunteenii dabalatee bu’uraaleen misoomaa biroon misooma kanaa hammatamuu eeraniiru. Misoomni kooriidarii boqonnaa lamaan hojjetamu kun walumaa gala amma Waxabajjii 30 bara 2017tti xumuruun tajaajilaaf oolchuuf karoorfameera. Maallqni hojii kanaaf barbaachisu galii keessoo fi hawaasa qindeessuu fi hirmaachisuun akka hojjetamu himaniiru. Hojiin misooma kooriidarii kun naannawa miidhagaa fi qulqulluu uumaa akka jiru kan dubbate ammoo jiraataa magaalichaa dargaggoo Jamaal Makkaati. Misoomni kun bakka aara galfii, bashannanaa, bakka kitaaba itti dubbisan kan mijeesse yoo ta’u, magaalicha jiraataaf mijataa taasisaa waan jiruuf cimee itti fufuu qaba jedha dargaggoon kun. Jiraataan magaalichaa obbo Machaal Taaddasaa gamasaaniin, misoomni kooriidarii mootummaan jalqabe jajjabaachuu fi cimuu akka qabu dubbataniiru. Hojiin kun miidhagina magaalichaa dabalaa fi sochii dinagdee kakaasaa jiraachuu dubbatanii, milkaa’ina isaaf gumaacha irraa eegamu akka bahan ibsaniiru.

Guraandhala 13/2017(TOI)- Riifoormiin dinagdee Gooroo hammataan bu’aa dameen dhuunfaa argatan guddisuun Invastimantii kallattii alaa akka dabalu taasisuusaa Ministirri maallaqaa Ahimad Shidee ibsan. Ministirri maallaqaa Ahimad Shidee, Itti aantuun ministira muummee Ingiliz Anjelaa Reeynar, daarektarri olaanaa abbaa taayitaa gabaa kaappitaalaa Itiyoophiyaa Haannaa Tehelquu fi hojii raawwachiisaan olaanaa gabaa sanadaa Itiyoophiyaa Dr. Xilahun Ismaa’el tumsa dinagdee biyyoota lamaanii ilaalchisuun waloon ibsa kennaniiru. Ministirri maallaqaa Ahimad Shidee wayita kana akka jedhanitti, waggootta jahan darban Itiyoophiyaan riifoormii dinagdee mandhaleen jijjiirama bu’uraa galmeessiteetti.   Riifoormii dinagdee guutuu taasisuun dhaabbilee misoomaa mootummaanis ta’e damee dhuunfaan jijjiirama guddaa fiddeetti. Daandii qilleensaa Itiyoophiyaa, Itiyoo-telekoom, baankii daldala Itiyoophiyaa fi dhaabbilee misoomaa mootummaarratti jijjiirama hojmaataa taasisuun guddina dinagdee hunda galeessa fiduun akka danda’ame ibsaniiru. Riifoormiin dinagdee kun Invasimantii kallattii alaa dabaluusaa ibsanii, hirmaannaan kaampaaniiwwan Ingiliz dabalaa dhufuu beeksisaniiru. Itti aantuun ministira muummee Ingiliz Anjelaa Reeyinar gamasaaniin, jijjiiramni dinagdee gama hundaan galmaa’aa jiru dinqisiisaa ta’uu ibsaniiru.   Ingilizii fi Itiyoophiyaan damee garagaraan tumsa bara dheeraa akka qaban yaadachiisanii, Ingiliz bu’a qabeessummaa gabaa sanadaa Itiyoophiyaa jalqabameef deeggarsaa fi tumsa barbaachisu nitaasifti jedhaniiru. Dureeyyiin Ingiliz damee garagaraan Itiyoophiyaatti invast gochaa akka jiran eeranii, damee geejjibaa fi lojistiksiin tumsa cimsanii akka itti fufan ibsaniiru.   Daarektarri olaanaa abbaa taayitaa gabaa kaappitaalaa Itiyoophiyaa Haannaa Tehelquu Itiyoophiyaan gabaa sanadaa Itiyoophiyaa bal’inaan eegaluuf boqonnaawwan gabbisaa fi leenjii dhaabbilee xumuruun hojiitti galteetti jedhan. Abbaan taayitichaa tumsa tarsiimawaa badhaadhina dinagdee mirkaneessuu dandeessisu akka taasisu ibseera.

Guraandhala 13/2017(TOI)- Itiyoophiyaan tumsa daldalaa fi Invastimantii Jaappaan waliin qabdu cimsuuf hojjechaa akka jirtu Jaappaanitti ambaasaaddarri Itiyoophiyaa Dhaabaa Dabaleen ibsan. Ambaasaaddar Dhaabaan hooggantoota Kaampaanii “KYO-ROMAN GROUP HOLDINGS” Jaappanitti daldala jumlaa uffannaa fi oomishoota addaddaa irratti bobba’e waajjira isaaniitti mari’ataniiru. Ambasaaddar Dhaabaan carraalee fi filmaattota daldala Itiyoophiyaa ilaalchisuun hooggantootaaf ibsaniiru.   Itiyoophiyaa fi Jaappaan aadaa boonsaa kan qaban ta’uu ibsanii, Embaasiin Itiyoophiyaa Tookiyootti argamu tumsa ummattoota biyyoota lamaanii, daldalaa fi Invastimantii cimsuuf hojjechaa akka jiru himaniiru. Hooggantoonni Kaampaanichaa albuunni Itiyoophiyaa Oppaal fudhatama guddaa akka qabu ibsanii, oomisha kana baay’inaan Jaappaan galchuuf fedhii qabna jedhaniiru. Kaampaanichi A.L.Atti jalqaba baatii Juun 2025 guyyaa hundeeffamasaa waggaa 40ffa wayita kabaju Albuuda Itiyoophiyaa Oppaal akka beeksisu ibsuusaanii odeeffannoon Embaasii Itiyoophiyaa Jaappaan irraa argame nimul’isa.

Guraandhala 13/2017(TOI)- Itiyoophiyaa fi Ruusiyaan Invastimantii biyyoota lamaanii guddisuuf walii galaniiru. Komishinariin komishinii Invastimantii Itiyoophiyaa Dr. Zallaqaa Tamasgeen garee jilaa ministira dinagdee Ruusiyaa Maksiim Raashtiiniikooviin durfamu waliin waajjira isaaniitti mari’ataniiru. Riifoormiin mootummaan damee dhuunfaa guddisuu fi dirree Invastimantii mijataa uumuuf taasisaa jiruu fi carraaqqiin Invastimantii babal’isuuf taasisaa jiru ilaalchisuun jila kanaaf ibsa taasisaniiru. Hariiroon hunda galeessi biyyoota lamaanii waggaa dheeraa ta’e dinagdee fi Invastimantiin akka guddatu mootummaan Itiyoophiyaa kutannoo akka qabu komishinarichi ibsaniiru.   Biyyisaanii tumsa dinagdee fi invastimantii dhuunfaan Itiyoophiyaa waliin qabdu guddisuuf fedhii qabdi jedhan Ministirri dinagdee Ruusiyaa Maksiim Rashtiiniikoov. Ruusiyaa fi Itiyoophiyaan misooma qabeenya albuudaa, oomisha Xaa’oo, humna elektiriikii madda haaromfamurraa maddisiisuu fi dameewwan teeknoloojii odeeffannoo fi zooniiwwan dinagdee addaa ammayyeessuun tumsaan hojjechuuf waliigalteerra gahaniiru. Biyyoonni lamaan dameewwan invastimantii fi pirojektoota waliin fo’achuu itti danda’an foramiiwwan Invastimantii fi Biizinasii fuuldura waliin akka adeemsisan ibsuusaanii odeeffannoon Komishinicharraa argame nimul’isa.

Guraandhala 13/2017(TOI)- Foramiin Invastimantii Itiyoophiyaa fi Sudaan Kibbaa kan lammaffaa Caamsaa 17 amma 19 bara 2017Juubaatti nitaa’ama. Foramicha adeemsisuuf koreen qindeessaa qooda fudhattoota garagaraa irraa walitti dhufe hundeeffamee qophiin jalqabamuu odeeffannoon Embaasiin Itiyoophiyaa Juubaatti argamu nimul’isa. Koreen kun Embaasicha dabalatee ministeera dhimma alaa fi tumsa idil addunyaa Kibba Sudaan, ministeera daldalaa fi Industirii, ministeera Invastimantii kibba Sudaan, daldala biyyaalessaa Kibba Sudaan, mana maree Industirii fi qonnaa fi Kibba Sudaanitti kominiitii Biizinasii Itiyoophiyaa ofkeessatti kan hammatedha. Foramiin Invastimantii Itiyoophiyaa fi Kibba Sudaan kan jalqabaa A.L.Atti baatii Caamsaa 2024 Juubaatti taa’amuunsaa niyaadatama. Foramichi walitti hidhamiinsa daldalaa fi Invastimantii biyyoota lamaanii cimsuurratti kan xiyyeeffatedha. Dabalataanis hariiroo hawaasa daldalaa biyyoota lamaanii gabbisuufis kan kaayyeffatedha.

Guraandhala 13/2017 (TOI) - Ministirri magaalaa fi bu’ura misoomaa Caaltuu Saanii hojiiwwan misoomaa magaalaa Arbaa Minci daawwachaa jiru. Itti aantuun hooggantuu biiroo hojii fi misooma magaalaa naannoo kibba Itiyoophiyaa Yemiissiraach Gemmedee TOItti akka himanitti, ministirittiin hooggantoota bioo waliin ta’uun hojiilee misoomaa magaalaa Arbaa Mincitti hojjetamaa jiran ilaalaa jiru. Kanneen daawwatamaa jiran keessaa misooma Kooriidarii, , daandii fi ijaarsi bu’uraalee misoomaa biroon keesatti argamu. Akkasumas tajaajilli mana qopheessaa, kaadaastariin magaalaa Arbaa Mincii fi hojiiwwan misoomaa Seeftii neetii nidaawwatamu. Sadarkaa hojiiwwan bu’ura misoomaa mootummaa fi hirmaannaa ummataa magaalaa Arbaa Mincitti hojjetamaa jiran irra jiran ilaaluun ciminaan akka hojjetaman kallattiin nikaa’ama jedhamee akka eegamu himaniiru. Hooggantoonni mootummaa Federaalaa, naannoo, kibba Itiyoophiyaa, godina Gaamoo fi bulchiinsa magaalaa Arbaa daawwannaa kanarratti hirmaachaa jiru.

Guraandhala 13/2017(TOI)- Bu’aaleen misoomaa hunda galeessi Itiyoophiyaan galmeessifte aartii hooggansaa kan beekumsaa fi ga’umsaa irratti hundaa’een akka ta’e gorsaan olaanaa pirezidaantii Baankii Afiikaa Dr. Viiktor Olaadukuu ibsan. Itiyoophiyaan ajandaa 2063 Afriikaan qabatte milkeessuuf hojiiwwan hedduu raawwachaa akka jirtu gorsaan kun ibsaniiru. Gorsaan olaanaa Baankii Afriikaa Dr. Viktor Olaankuu hojiiwwan misoomaa fi misoomaan walqabatan kan Itiyoophiyaatti raawwatamaa jiran ilaalchisuun TOI waliin turtii taasisaniiru. Yaadama Afriikaa barbaannu dhugoomsuuf jedhuun Afriikaaan waggaa shantamaaf kan ittiin gaggeeffamtu ajandaa 2063 bocuun hojeessaa kan jirtu yoo ta’u, biyyoonni ajandaa kana milkeessuuf xiyyeeffatanii hojjechaa jiru. Ajandaan kun kallattiiwwan xiyyeeffannoo torba kan ofkeessaa qabuu fi guddina Afriikaa, nageenya lammiilee fi fudhatama idil addunyaa mirkaneessuuf haala mijataa kan uuman ta’uu ibsaniiru. Haala Kanaan sochiiwwan si’ataa Itiyoophiyaan taasisaa jirtu jiraattota gara jireenya fooyya’aatti kan ceesisudha jedhaniiru. Misoomni Qamadii wabii nyaataa agama mirkaneessuun sadarkaa Afriikaatti fakkeenya isa tokko ta’uu ibsanii, kunis Afriikaa badhaate dhugoomsuuf qooda guddaa qaba jedhan. Itiyoophityaan hojiiwwan misoomaa fakkeenya ta’an galmeessisuunshee kan dinqisiifamuu fi kan jajjabaachuu qabudha jedhaniiru. Kun ammoo aartiin hooggansaa cimaa fi beekumsa irratti hundaa’e jiraachuu isaa kan mirkaneessu ta’uu Dr. Viiktor ibsaniiru. Itiyoophiyaan hojmaata ammayyaa, si’ataa fi bu’aa qabatamaa fidan hordofuun raawwii guddaa agarsiisuushee dhugaa bahaniiru. Kanaaf ammoo ijaarsonni bu’ura misoomaa gurguddoon Finfinneetti hojjetaman agarsiiftuu ta’uu ibsaniiru.

Guraandhala 13/2017(TOI)- Dureeyyiin doolaara miiliyoona 160 ol galmeessisan zoonii dinagdee addaa keessatti hojiiwwan ijaarsaa fi Maashina dhaabuu raawwachaa akka jiran korporeeshiniin misooma paarkiiwwan industirii beeksise. Dureeyyiin biyya keessaa fi biyya alaa jaha zoonii dinagdee addaa Boolee Lammii keessatti sochii jalqabuun ibsameera. Hojii raawwachiisaan olaanaa korporeeshinii misooma paarkiiwwan Industirii Dr. Fissahaa Yittaagasuu, sochii waliigalaa dureeyyii zoonicha keessatti oomisha jalqabuuf adeemsarra jiranii daawwataniiru. Dureeyyiin kunneen bara bajataa kanaa fi xumura bara bajataa 2016 zoonii dinagdee addaa Boolee Lammiitti hojii jalqabuuf waliigaltee mallatteessaniiru jedhameera. Haala Kanaan kanneen keessaa kaampaaniiwwan jaha hojii oomisha jalqabuuf isaan dandeessisu raawwachaa jiru. Wayita hojii jalqaban namoota 2000 ta’aniif carra hojii akka uuman odeeffannoon korporeeshinicha irraa argame nimul’isa.

Guraandhala 13/2017(TOI)- Damee Industirii Oomishaa babal’isuun badhaadhina akeekkanneef murteessaadha jechuun ibsan Itti aanaan ministira muummee Tamasgeen Xurunaa Itti aanaan ministira muummee, Intarpiraayiziin misooma industirii Sibiilaa fi Teeknooloojii maashinii Amaaraa gumaacha badhaadhinaaf qabaatan eeraniiru. Pooliiwwan Smaartii, haguuggiin Diichii fi oomishtoonni biroo magaalaa Bahaar Daaritti oomishaman misooma kooriidarii naannichatti hojjetamaa jiraniif faayidaarra ooluu jalqabuusaanii ergaa fuula marsariitii isaaniirratti dabarsaniin ibsaniiru.

Guraandhala 12/2017(TOI)- Dhimmoot Teekniikaa Waliigaltee Ankaaraa Itiyoophiyaa fi Somaaliyaa jidduutti taasifame irratti mariin marsaa jalqabaa har’a magaalaa Tarkiyyee Ankaaraatti taasifameera. Marii Waltajjii Ministirri dhimma alaa Tarkiyyee Haakaan Fiidaan mijeessan irratti gama Itiyoophiyaan ministirri dhimma alaa Dr. Geediyoon Ximootiyoos fi gama Somaaliyaan itti aanaan ministira dhimma alaa Alii Mohaammad Omaar hirmaataniiru. Mari’attoonni lamaan waliigalticha qabatamaan lafa qabsiisuuf akkasumas faayidaa waloo mirkaneessuuf hojjetamaa jiraachuu marii taasisan irratti kaasuu isaanii odeeffannoon ministeera dhimma alaa nimul’isa. Biyyoonni lamaan walitti dhufanii dhimma waloo isaaniirratti akka mari’atan carraaqqii Turkiyyeen taasiftuuf galateeffataniiru. Ministirri muummee Dr. Abiyyi Ahimad fi pirezidaantiin Somaaliyaa Hasan Sheek Mohaammad Jalqaba baatii Muddee darbe afeerraa pirezidaantiin Tarkiyyee Resiip Xayiib Erdoganiin Ankaaraatti wal arganii waliigalticha mallatteessuun isaanii niyaadatama.

Guraandhala 12/2017(TOI)-Naannoo Oromiyaa Godina Shawaa bahaatti jallisii boneerraa oomisha kuntaala miiliyoona 16 caalu argachuuf karoorfamee hojjetamaa akka jiru waajjirri qonnaa godinichaa beeksise. Oomishni qamadii jallisii boneen godinichatti misoome walitti qabamuu jalqabuun ibsameera. Hoogganaan waajjira qonnaa godina Shawaa bahaa obbo Masfin Tashoomaa TOItti akka himanitti, godinichatti qamadiin jallisii bonee waggaa afur dura aanaa tokko keessatti heektaara 250 irratti ture yaaliif kan eegalame. Yeroo ammaa misoomni Qamadii jallisii bonee godinicha gandoota 164 kessatti lafa heektaara kuma 395 irratti misoomaa jira jedhaniiru. Qonnaan bulaan oomisha gaarii akka argatu xaa’oo fi deeggarsa ogummaa taasisuun kuntaala miiliyoona 16 tuqaa 1 argachuuf karoorfamee hojjetamaa jira jedhan. Lafa amma ammaatti qotam e heektaara kuma 395 keessaa amma ammaatti heektaara kuma 285 irra sanyiin facaafamuu ibsaniiru. Oomishni walitti qabamaa jiru heektaararraa kuntaalli 70 caalu argamaa akka jiruu fi oomishtummaan jiddugaleessaan kuntaala 40 qaqqabuu ibsaniiru. Oomishni walitti qabamuuf qaqqabe harki 85 kombaayinariin walitti qabamaa akka jiru ibsaniiru. Qonnaan bulaan oomisha argaturraa qusatee tiraaktara 200 binneerra kan jedhan hoogganaan kun, baranas 200 bituuf karoorfameera jedhaniiru.

Guraandhala 12/2017(TOI)- Baatii Jahan darban bulchiinsa magaalaa Finfinneetti galiin birrii biiliyoona 111 tuqaa 5 walitti qabamuu Kantiibaa Adaanech Abeebee ibsan. Manni maree bulchiinsa magaalaa Finfinnee yaa’ii idilee lammaffaa waggaa afraffaa taa’aa jira. Baatii Jahan darban galiin birrii biiliyoona 111 tuqaa 5 walitti qabamuu isaa fi kunis kan bar-dheeggaddaa yeroo walfakkaataa birrii biiliyoona 37 tuqaa 2’n akka caalu kantiibaa Adaanechi yaa’icharratti ibsaniiru. Dhaabbileen daldalaa sirna taaksii dabalataa keessa galuu osoo qabanii hingalle kuma 8 fi 450 akka galan taasifamuu himaniiru. Walsimiinsii fi guddinni galii fi baasii kun magaalaan keenya jijjiirama guddaa keessa akka jirtu agarsiisa jedhaniiru. Kana malees bajanni keenya harki 71 misooma egeree, hiyyuma hir’isuu fi dhiibbaa jireenya ummataa hir’isuuf ooluunsaa xiyyeeffannoo jiraattota magaalaa keenyaaf kenninee fi amanamummaan tajaajilaa akka jirru kan agarsiisudha jechuun ibsaniiru.  

Guraandhala 12/2017(TOI)- Biyyoonni Afriikaa waadaa isaanii eeganii hojeeffama walii galtee qaxanaa daldala bilisaa Afriikaaf kutannoon hojjechuu akka qaban Baankii misooma Afriikaatti daarektarri Biiroo qindeessaa walitti makama qaxanaa Dr. Jooy Kategewaa hubachiisaan. Baankiin misoomichaa Afriikaa dameewwan walitti hidhamiinsa bu’ura misoomaa mijeessan irratti tokko taate uumuuf deeggarsi taasisu cimee akka itti fufu beeksiseera. Qaxanaan daldala bilisaa Ardii Afriikaa A.L.A bara 2020 waajjira sekreetariyaatii isaa Finfinneetti erga banatee kaasee walitti hidhamiinsa daldala bilisaa Afriikaa mijeessuuf hojjechaa jira. Yeroo ammaa biyyoonni Afriikaa 48 waliigaltee qaxanaa daldala bilisaa raggaasuun kanneen keessaa19 daldala waljijjiiruu akka jalqaban odeeffannoon waajjirichaa nimul’isa. Baankii misooma Afriikaatti daarektarri Biiroo qindeessaa walitti makama qaxanaa Dr. Jooy Kategewaa Baankichi sochii daldalaa fi Invastimantii Afriikaanotaa kan gargaarudha jedhan. Qaxanaan daldala bilisaa Afriikaa kunis imaammata fi seerota taarifa biyyootaa sirreessuun sirna daldalaa Afriikaa walsime uumuun dinagdee tasgabbaa’e ijaaruuf faayidaa guddaa akka qabaatu dubbataniiru. Qaxanaan daldala bilisaa Ardii Afriikaa sirna daldalaa ammayyaan Afriikaa walitti hidhuun qabeenyasheetti fayyadamuun guddina dinagdee akka mirkaneessitu kan dandeessisu akka ta’e beeksisaniiru. Afriikaa daldalaa fi dinagdeen walitti makamte dhugoomtee arguun kaayyoo baankichaa kan jalqabaati kan jedhan daarektarittiin, qaxanaan daldala bilisaa Afriikaas walitti makama dinagdee milkeessuuf faayidaa guddaa qabaata jedhaniiru. Biyyoonnis akkataa waadaa galaniin waliigaltee qaxanaa daldala bilisaa Afriikaa hojeessuun badhaadhina Afriikaa dhugoomsuuf kutannoon hojjechuu akka qaban hubachiisaniiru. Kun hojiirra akka oolu imaammata daldalaa fi hojmaata duraanii fooyyessuun dameewwan Industirii fi tajaajilaa dorgomummaa damee dhuunfaa guddisuu dandeessisan irratti xiyyeeffatamee hojjechuun akka barbaachisu ibsaniiru. Hojiin misoomaa Itiyoophiyaan sagantaalee garagaraan hojjechaa jirtu carraaqqii gabaa Afriikaa uumuuf taasifamuuf gumaacha gaarii kan bahu ta’uu kaasaniiru.

Guraandhala 12/2017(TOI)- Yuunivarsiitiin Dambii Doolloo biqiltuu Bunaa fooyya’an miiliyoona tokko ta’u qonnaan bulaaf Raabsuuf qophaa’uusaa beeksise. Yuunivarsiitichatti daarektarri jiddu gala qorannoo qonna qindaa’aa Sooressaa Shuumaa TOI’tti akka himanitti, Yuunivarsiitichi sanyii bunaa jiddu galeessa Jimmaa fi kanneen biroo irraa qorannoon argaman akaakuu 12 madaqasuun fi baay’isuun Caamsaa dhufu qonnaan bulaaf raabsuuf qophaa’eera. Biqiltuun Bunaa Raabsiif qophaa’an dhukkuba damdamachuun heektaara tokkorraa oomisha kuntaalli 14 akka argamu dubbataniiru. Waggaa 2 amma 3tti oomisha kennuu akka jalqabanis daarektarichi himaniiru. Biqiltuun bunaa kunneen qonnaan bultoota godinaalee Qeellam Wallaggaa fi Lixa Wallaggaaf akka raabsaman beeksisaniiru.

Guraandhala 12/2017(TOI)- Dhaabbileen qulqullina oomishaa fi tajaajilaa mirkaneessuun guddina biyyaaf qoodasanii bahuu akka qaban dhaabbanni badhaasaa qulqullinaa Itiyoophiyaa beeksise. Dhaabbatichi mata duree “karaa moodela ga’oomaa aadaa qulqullinaa” jedhuun waltajjii ga’oomaa marsaa sadaffaa qooda fudhattoota waliin waltajjii adeemsiseera. Eeggataan pirezidaantii Yuunivarsiitii Finfinnee fi walitti qabaan boordii dhaabbata badhaasaa qulqullinaa Itiyoophiyaa Dr. Saamu’eel Kiflee , hojii raawwachiisaan dhaabbatichaa Tewoodiroos Mabraat, hooggantoonni mootummaa olaanoon maricharratti argamaniiru. Dhaabbatichi ga’umsa dorgomummaa idil addunyaa guddisuu fi yaada qulqullina jedhu qabsiisuun aadaa akka ta’u akeekuun bara 2000 hundaa’e. Eeggataan pirezidaantii Yuunivarsiitii Finfinnee fi walitti qabaan boordii dhaabbata badhaasaa qulqullinaa Itiyoophiyaa Dr. Saamu’eel Kiflee waltajjichi dhaabbilee qulqullinaa raawwii fooyya’aa qabanirraa muuxannoo kan itti fudhatamu ta’uu dubbataniiru. Dhaabbileen oomishaa fi tajaajila isaanii si’ataa fi ammayyaa taasisuun biyyarra darbee sadarkaa idil addunyaatti akka dorgoman hojjechuun akka irraa eegamu dubbataniiru. Hooggantoonni dhaabbilee garagaraa gamasaaniin, mariin kun oomisha fi tajaajila fooyyee qabuuf akka isaan qopheessu ta’uu mirkaneessaniiru. Hojii raawwachiisaan dhaabbatichaa Tewoodiroos Mabraat gamasaaniin, mariin kun muuxannoo walii qooduurra darbee hayyoonni damee kanaa waa’ee qulqullinaa fi ga’oomaa argannoo qorannoo isaanii kan itti dhiheessan, dhaabbileen hariiroo kan itti uuman ta’uu dubbataniiru.