Amajjii 12/2017(TOI) - Pirojektoonni misoomaa maqaa gaarii Itiyoophiyaa olkaasuun badhaadhina ishee mirkaneessan hojjetamaa jiraachuu miseensonni hawaasa Diyaaspooraa himan. Mootummaan damee qonnaa, turizimii, dinagdee dijitaalaa, industirii fi albuudaaf xiyyeeffannoo kennuun hojjechaa jiraachuus himan. Daiyaaspooronni kunneen wayita ammaa kana dameewwan invastimantii adda addaa irratti hojjechuuf qophaa’uu himanii; mootummaanis deeggarsa isaan barbaachisu taasisaafii jiraachuu eeran.

Amajjii 10/ 2017 (TOI) - Bara kana hanga ammaatti Albuuda gara Alaatti ergamerraa galiin Doolaarri miiliyoonni 300 fi miiliyoona 85 argamuu Abbaan Taayitaa Misooma Albuudaa Oromiyaa beeksise. Qabeenya albuudaa sirnaan hoogganuu fi bulchuun diinagdee rogdaneessa milkeessuu keessatti shoora olaanaa qabaachuu Hogganaan Abbaa Taayitaa Misooma Albuudaa Oromiyaa Doktar Namarraa Gabayyoon ibsaniiru. Bara kana Albuuda Kiiloo Giraama kuma 3 fi 435 Baankii Biyyoolessaaf dhiyeessuuf karoorfamee, karooraa ol raawwachuun danda'amuu himaniiru. Oomisha albuudaa gabaa alaaf dhiyaaterraas hanga ammaatti galiin Doolaarri miiliyoonni 300 fi miiliyoonni 85 argamuu Doktar Namarraan dubbataniiru. Oomisha gabaa biyya keessaaf dhiyaaterraa ammoo galiin Birriin biiliyoonni 1 ol argamuu eeraniiru. Damichaan lammiilee kuma 47 fi 496'f carraa hojii dhaabbii fi yeroo uumuun danda'amuu Doktar Namarraan himuu Odeeffannoon BKO irraa argame ni mul'isa.  

Amajjii 9/2017(TOI) - Naannoo Oromiyaatti bara bajataa kana Xaa'oo uumamaa bal'inaan qopheesuun misooma jallisiif fayidaarra oolfamaa jiraachuu Biiroon Qonnaa naannichaa beeksise. Biirichaatti Itti aanaa Hogganaa fi hogganaan damee qabeenya uumamaa obbo Eeliyaas Kadir TOI'tti akka himanitti; gabbina biyyoo eeguu dabaluuf gaheen Xaa'oon uumamaa qabu olaanaadha. Naannichatti erga waggaa sadii as xaa'oo uumamaa qopheesuun bal'inaan hojjetama akka jiru eeranii; haala qophii fi itti fayyadama isaarratti qonnaan bultootaaf hojiin hubannoo kennuu hojjetamu himaniiru. Haaluma kanaan bara bajata kana Xaa'oo uumamaa meetirik kiyuubii miliyoona 250 qopheesuuf kan karoorfame yoo ta'u; hanga ammaattis xaa'oon uumamaa idilee fi Varmii Kompoositiin meetirik kiyuubiin miliyoonni 163 qophaa'uun hojiirra oolaa jira jedhaniiru. Naannichatti waggoota darban jiddugalaawwan xaa'oon uumamaa itti qophaa'an 287 ijaaramuu himanii; hojii hanga ammaatti hojjetameen xaa'oon uumamaa misooma qonnaa keessaatti oomishaa fi oomishitummaa dabaluu keessatti gahee gaarii bahateera jedhaniiru. Biirichatti daarektarri gabbina biyyee obbo Isheetuu Laggaasaa gama isaaniin naannichaatti ji'a Hagayyaa irraa eegalee xaa'oo uumamaa bal'inaan qopheesuun hojetama jira jedhaniiru. Keessattu kompoositii idileen dabalatatti tekinolojiin deeggaramuun qophiin Vaarmi Kompoostii fi haftee oomisha baayoo gaaziirraa xaa'oo uumamaa qopheesuun hojjetama jira jedhaniiru. Xaa'oon uumamaa qophaa'ee kun misooma jallisii waqtii bonaa kanaaf fayidaarra oolaa jirachuu himanii; naannichatti xaa'oon uumamaa oomishaa fi oomishitummaa guddisuu keessaatti gahee olaanaa bahachaa jira jedhaniiru.

Amajjii 9/2017(TOI) - Itti Aanaan Pirezidaantii Mootummaa Naannoo Oromiyaa Obbo Awwaluu Abdii fi hoggantoonni hojii mootummaa naannicha biroon sochi hojii Dhaabbilee Misoomaa Mootummaa Naannoo Oromiyaa daawwachaa jiru. Daawwannaa kanaanis workishooppii tajaajila maashinaroota qonnaa, konkolaataafi farniichara ( ECAFCO ) Magaalaa Finfinneetti argamu daawwachuu Odeeffannoon Biiroo Kominikeeshinii Oromiyaarra argame ni mul'isa.

Amajji 9/2017 (TOI) - Mootummaan boba’aa kan deeggaru lammiilee galii gadi aanaa qaban irraa dhiibbaa salphisuuf malee namoota dhuunfaa muraasa fayyadamoo gochuuf miti jedhan Ministirri Tajaajila Komunikeeshinii Mootummaa Doktar Laggasaa Tulluu. Doktar Laggasaa Tulluun haala waqtaawwa biyyaalessaa ilaalchisuun ibsa kennaniiru. Ibsa isaaniin Itiyoophiyaan marsaa fooyya'insa dinagdee gooroo hundagaleessa ta’e keessa akka galte eeranii; kunis dinagdee tasgabbaa’aa uumuu, haala daldalaa fi invastimantii fooyyessuu, oomishtummaa seektaroota fooyyessuu, dandeettii raawwachiisummaa mootummaa cimsuuf kan kaayyeffate ta’uu ibsaniiru. Kunis hirmaannaa damee dhuunfaa tilmaama keessa galchee dameelee hedduu bu'uura kan godhate xiyyeeffannoo madaalawaa kan kennudha jedhaniiru. Fooyya'insa imaammata dinagdee gooroo taasifame sharafni biyya alaa gabaan akka murtaa'un oomishtoonni oomisha isaanii irraa bu’aa gahaa akka argatan kan gargaaru yoo ta’u, kontirobaandii fi seeraan alummas akka ittisus ibsaniiru. Kanaaf, fooyya'insi taasifme kun sirna seeraan alaa gara seeraa qabeessaatti fiduudhaan gabaa addaan fagaatee ture akka walitti dhihaatu taasiseera jedhaniiru. Haalli sharafa alaa gabaan murtaa’uun isaa dhiyeessiin warqee baankii giddu galeessaaf dhihaatu haalaan akka dabalu taasisuu ibsaniiru. Akkasumas, hangi sharafa alaa buna, zayita, midhaan, oomishaalee industirii fi tajaajilaa irraa argamu dabaluu isaa ibsaniiru. Daballiin gatii mudachuu malu hawaasa irratti dhiibbaa akka hin uumneef mootummaan tarkaanfiiwwan adda addaa fudhachuu isaa ibsaniiru. Fooyya'insi kun gufuu tokko malee akka hojiirra ooluf mootummaan to’annoo cimaa taasisaa jiraachuus ibsaniiru. Fayyadamummaa hawaasaa mirkaneessuu fi lammiileen galii gadi aanaa qaban akka hin miidhamneef deeggarsa Birrii biiliyoona 400 ol taasifamuu ibsaniiru. Fayyadamtoonni deeggarsa kanaa faayidaa barbaadamu argachaa akka jiran mirkaneessuun barbaachisaa ta’uus hubachiisaniiru. Deeggarsa boba’aa irratti taasifamu ilaachisee rakkoon adda addaa mul’achaa akka jiru eeranii; Konkolaattooni bottee kan boba’aa fe'an hedduun bosona keessa dhokatanii argamuu himanii; to'annoon taasifamu cimee kan itti fufu ta'uu himaniiru. Deeggarsi mootummaan xaa’oo irratti taasisuu oomishtummaa guddisuu fi oomishni gatii madaalawaadhaan akka argamu taasisuuf kan kaayyeffate ta’uus ibsaniiru. #Itoophiyaa #Oromiyaa

Aadde Adaanech Abeebee gamoo bulchiinsa Kutaa magaalaa Lidataa eebbisuun tajaajila jalqabsiisan. Amajji 8/2017(TOI)-Kantiibaan Magaalaa Finfinnee Aadde Adaanech Abeebee magaalaa Finfinneetti gamoo bulchiinsa Kutaa magaalaa Lidataa abbaa darbii 13 ijaarame eebbisuun tajaajila jalqabsiisan. Aadde Adaanech Abeebee ergaa karaa miidiyaa hawaasummaa isaani qoodaniin ''har'a ijaarsa gamoo bulchiinsa kutaa magaalaa Lidataa xumuruun tajaajilaaf banaa taasisneerra'' jedhaniiru. Gamoon kun tajaajiloota bakka adda addaatti faca'anii kennamaa turan gara jiddugaleessa tokkootti fiduun tajaajilli kennamu si'ataa akka ta'u kan taasisu, qaama miidhamtootaaf mijataa, dhamaatii tajaajilaa fi tajaajilamaa kan hiri'isu, galma 'ismaarti siitii' uumuuf hojjechaa jirruu milkeesuuf bu'uuralee tekinolojii guuttatee kan ijaaramedha jedhaniiru. Gamoon kun biiroowwan 120 dabaltee gamoota walga'ii tokkoon tokkoon isaanii namoota kuma 1 fi 500 fi 500 keesumeesuu kan danda'an kan qabu, bakka dhaabbii konkolaataa gahaa kan qabu, jiminaazeemii, bakka oolmaa fi tapha daa'immanii fi tajaajiloonni biroon kan guutameedha jedhaniiru. Dhuma irratti gamoo kana bu'uura waadaa uummata keenyaaf galleen qulqullinaan ijaarree xumuruun kanaan dura kiraa biiroof abeenya oolchaa turre hambisuun misoomaaf akka oolchinu nu gargaara jedhaniiru.  

Amajji 8 / 2017 (TOI) - Godina Wallagga Lixaatti lafa waqtii gannaa bara 2016/17 misoomerra callaan kumtaalli miliyoonni 14 ol walitti qabamuu Waajirri Qonnaa godinichaa beeksise. Itti gaafatamaan waajjrichaa obbo Fayisaa Hambisaa akka himanitti, callaan kun kan walitti qabame oomisha lafa heektaara kuma 487 fi 752 irratti misoomerraayyi. Wayita oomishinni walitti qabamu qisaasamni akka hin uumamne ogeeyyiin qonnaa itti dhiheenyaan qonnaan bultoota hodofaa fi deeggaraa waan turaniif callaa fooyyee qabu walitti qabuun akka danda'ame eeraniiru. Keessattu oomishaa fi oomishitummaa dabaluuf tattaaffii taasifameen waqtii gannaa oomisha misoome keessaa harki caalan kilaasteraan kan misoome ta'uu beeksisaniiru. Akkasuma galteewwan qonnaa fi sanyiin filatama dhihaate kan bara achi aanuurra fooyyee qabachuun callaan fooyyee qabu akka argamu taasisuu himaniiru. Godinicha keessa haalli rakkoo ngeenyaa ture fooyya'uu isaan qonnaan bultoonni misooma irratti humna guutuun akka hirmaatan haala mijataa uumuus himaniiru.

Amajjii 8/2017 (TOI) - Itiyoophiyaan baay'ina oomishaalee gara Azarbaajanitti ergitu guddisuu fi babal’isuuf kutannoo akka qabdu Ministirri Daldalaa fi Tumsa Naannaawwaa Doktar Kasahuun Gofee ibsan. Doktar Kaasahuun Goofee jila itti aanaa Ministira Dhimma Alaa Azarbaajaan Yaalchiin Raafiyeeviin durfamu waliin mari’ataniiru. Marii isaanii kanarratti Doktar Kaasaahuun Goofee Itiyoophiyaan baay'ina oomishaalee gara Azarbaajanitti ergitu guddisuu fi babal’isuuf kutannoo akka qabdu ibsaniiru. Mariin jilicha waliin taasifames tumsa biyyoonni laman damee diinagdee irratti qaban guddisuuf boqonnaa haaraa kan banee fi carraawwan bal'aa jiran adda baasuuf kan dandeessisedha jedhaniiru. Gara fuula duraattis hariiroo diinagdee fi daldalaa keenya guddisuuf carraa dabalataa jiran qorachuuf tarsiimoowwan dandeesisan irratti wal hubannoorra geenyerra jedhaniiru. Dabalataanis waliigaltee bal’aa taasisuun tumsa diinagdee yeroo dheeraa uumuuf waliigaluu himaniiru. Oomishaalee Itiyoophiyaan gara Azarbaajanitti ergitu keessaa oomishaaleen akka Saliixaa, Buna akaa'ame, Talbaa, Foon Re'ee fi Hoolaa keessatti argamu.

Amajji 8/2017 (TOI ) - Godina Gondor lixaatti Jirbiin lafa heektaara kuma 23 irratti misoomfame karaa qulqullina qabuun walitti qabama jirachuu Qajeelchi Qonnaa godinichaa beeksie. Qajeelcha Qonnaa godinichaatti ogeessii eegumsaa fi misoomaa midhaanii obbo Daggisaaw Ayyaalee Jirbiin karaa qulqullina qabuun walitti qabamaa jiru kun qindaa'ee Indastiriiwwaniif akka dhihaatu TOI'tti himaniiru. Bara oomishaa kana Jirbii godinichatti misoofme keessaa lafa heektaara kuma 12 fi 300 irratti kan misoomsan dureeyyoota yoo ta'u kan hafe immoo qonnaan bultootaan misoome jedhaniiru. Waliigalaan kan misoomfame irraa jirbii kumtaala kuma 422 walitti qabuuf karoorfamee hojjetama akka jirus himaniiru.  

Amajji 7/2017 (TOI) - Bara bajata kana ji'a jaha keessatti lammiileen kumni 700 ol Paaspoortii fudhchuu Tajaajilli Immigireeshinii fi Lammummaa beeksise. Daarektarri olaantuu Tajaajila Immirigeeshinii fi Lammummaa aadde Salaamawit Daawit ibsa miidiyaaleef kennaniin; bara baajataa kana ji’oota jahan keessatti ''Bookleetiin'' paaspoortii miiliyoona 1 fi kuma 158 gara biyyaatti galeera jedhaniiru. Kana keessaa hanga ammaatti paaspoortiin kumni 721 ol maxxanfamee kan raabsamee maamiltoonni kumni 701 fi 871 paaspoortii isaanii fudhataniiru. Tajaajilichis kurmaana bara bajatichaatti tajaajila kenname irraa Birrii biiliyoona 10 walitti qabuuf karoorfachuun birrii biiliyoona 16 tuqaa 3 walitti qabuun karoora isaa ol milkeeseera jedhaniiru. #ethiopia #Oromiyaa

Amajjii 7/2017 (TOI) - Ijaarsa Hidha Haaromsa Guddicha Itiyoophiyaa xumuruuf tattaaffii godhamaa jiruuf ammas boondii bitachuun ashaaraa keenya kaa'achaa jirra jedhan jiraattoonni Godina Gede'oo magaalaa Dillaa . Waancaan Hidha Haaromsaa Guddicha Itiyoophiyaa gara Godinichaa geeffamuu hordofee ijaara hidhichaaf galii Birrii miiliyoona 120 ol walitti qabuuf karoorfamee hojjetamaa jirachuu Wajjirri Kominikeeshinii godinichaa beeksiseera. Jiraattota magaalichaa kan TOI'n dubbise akka himanitti; ijaarsa hidha haaromsa guddichaa Itiyoophiyaa boondii bituu fi kennaan gumaacha irraa eeggamu bahachaa jiraachuu himaniiru.

Amajjii 7/2017 (TOI) – Mootummaan boba’aa dabalatee meeshaalee bu’uuraarratti dhiyeessii gahan akka jiraatuuf deeggarsa olaanaa taasiseeraa jedhan Ministirri Maallaqaa Obbo Ahimad Shideen. Obbo Ahimad, waggoottan darban mootummaan Birrii biiliyoona 200 fi biiliyoona 67 boba’aaf deeggarsa taasisuu ibsuun, bara 2017 immoo deeggarsa dabalataa Birrii biiliyoona 100 raggaasisuu eeraniiru. Erga Fooyyeessi Diinagdee Gooroo hojirra oolee as riifoormii diinagdee cimsuu fi guddina diinagdeef shoora olaanaa akka bahatuuf hojilee bal’aan hojjetamaa jiraachuu dubbataniiru. Haaluma kanaan Mootummaan boba’aa dabalatee meeshaalee bu’uuraarratti dhiyeessiin gahan akka jiraatuuf deeggarsa olaanaa taasisaa jiraachuu eeraniiru. keessattuu Xaa’oo biyyee,boba’aa, daballii miindaaf, qorichaaleef , Misooma Seefineetii Magaalaa fi Baadiyyaa fi kanneen biroo dabalatee waggaa waggaan Birrii biiliyoona 400 deeggarsa taasisaa jiraachuu himaniiru. Riifoormichi haawasaarra kara miidhaa hinqaqqabsifneen hojirra oolaa jiras jedhan. Mootummaan dhiyeessiin boba’aa amansiisaan akka jiraatuuf waggaa waggaan doolara biiliyoona 4 tuqaa 5 ramaduun boba’aa dhiyeessaa jiraachuu himaniiru.

Amajji 7/2017 (TOI) - Tajaajilli Pirojektoota Industirii sanada qorannoo bu'a qabeesummaa(feasibility study) Warshaa Sukkaaraa Wanjii Shawaa xumuree kenneef. Itti waamamni isaa Korporeshinii Misooma Inustiriif kan ta'e dhaabbannii buleessii Tajaajila Pirojektoota Industirii, damee qorannoo fi gorsaa , Qorannoo bu'a qabeesummaa (feasibility study), tilmaama qabeenyaa fi tajaajila damee addaa irratti dhaabbilee adda addaa waliin hojjecha tureera. Haaluma kanaan tajaajilichi qorannoo bu'a qabeesummaa warshaa Sukkaara Wanjii Shawaa xumuruun warshichaaf dhiheeseera. Hogganaan Waliigalaa Tajaajila Pirojektoota Industirii obbo Shifarraw Salamoon fi Hogganaan olaanaa Warshaa Sukkaaraa Wanjii Shawaa obbo Jamaal Amaan sanada qorannichaa walirraa fudhaniiru. Obbo Shifarraaw Salamoon wayita kana akka himanitti qorannoon bu'a qabeesummaa kun warshichi saffisaan hojiitti akka seenu kan dandeessisu yoo ta’u, dhiheesii sukkaara biyya keessaa dabaluu fi sadarkaa idil-addunyaatti dorgomaa akka ta’u kan gargaarudha jedhaniiru. Hogganaan olaanaa Warshaa Sukkaara Wanjii Shawaa obbo Jamaal Amaan gama isaaniin; Warshaan Sukkaaraa Wanjii Shawaa akkuma biyyaatti warshaa hojii hedduu hojjetu ta’uu himaniiru. Sanadni qorannoo bu'a qabeesummaa dhiyaate kun yeroo dhiyootti hojiirra akka oolu himuu isaanii odeeffannoon Korporeshinii Misoomaa Paarkiwwaniirraa argame ni mul'isa.

Amajji 6/2017(TOI) - Raawwiin hojii pirojeektii babal'isuu buufata doonii goga Mojoo marsaan jalqabaa dhibbeentaa 80 gahuu Hoji geggeessaan pirojeektichaa injinar Dasaaleny Geetahuun beeksisan. Buufata Doonii Gogaa Mojoo gara buufata loojistikii hundagaleessaatti jijjiruun daldala al-ergii fi alaa galchii si'ataa taasisuuf hojiin ijaarsa isaa babal'isuu eegalamuun ni yaadatama. Ogeeyyiin miidiyaalee adda addaa irraa walitti dhufan raawwii hojii babalina pirojeektii buufata doonii gogaa Mojoo marsaan jalqabaa maal irra akka jiru daawwataniiru. Hoji Raawwachisaan Pirojektichaa injinar Dasaaleny Geetahuun Pirojektii babal’ina buufata doonii goga Mojoo saffisaan hojjetama jirachuu himaniiru. Pirojektichi marsaa jalqabaa lafa heektaara 60 irratti ijaaramaa akka jiru himaniiru. Kanaanis hojiin bu’uuraalee misoomaa, daandii konkiriitii afuu, ICT, elektiromakaanikaal, dallaa fi ijaarsi mana kuusaa hojjetamaa jiraachuu ibsaniiru. Waliigalaan ijaarsi kun kan marsaa jalqabaa hojiin isaa yeroo ammaa dhibbeentaa 80 irra gahuu himanii; bara dhufu pirojeektichi hojiin isaa xumuramuun tajaajila kunnuu ni jalqaba jedhaniiru. Pirojeektiin babal'isuu kun humna keessumeesuu buufatichaa, si'aaminaa fi tajaajiloota biroo kana waliin hidhata qaban kan jijjiru ta'uu hubachiisaniiru. Dabalaan koriidarii daldala Itiyoo -Jibutii ilaalcha keessa galchuunii fi humna dinagdee biyyatti baachuu akka baatu itti yaadamee ijaarama jira jedhaniiru.

Amajji 6/2017 (TOI) - Tarkanfiiwwan erga jijjiramaa asii fudhatamaniin Reeshiyoo liqaan omisha Waliigalaa(GDP) Itiyoophiyaa keessatti qabu gara dhibbeentaa 13 tuqaa 7tti gadi busuun danda'amuu Ministirri Pilaanii fi Misoomaa Doktar Fitsum Asaffaa beeksisan. Doktar Fitsum Asaffaa bu'aa fooyya'insa dinagdee gooroo fi tarkaanfiiwwan itti aananii fudhatamuu qaban ilaalchisee ibsa kennaniiru. Mootummaan rakkoolee sirnaa fi caasaa jijjiirama kanaan dura turan furuuf kallattii imaammata dinagdee fi hawaasummaa haaraa hordofuu ibsaniiru. Kallattiin imaammata misoomaa kun hundagaleessa, gaaffii walqixxummaa lammiileef deebii kennuudhaaf dursa kan kennu yoo ta’u, sirna hunda hammatedha jedhaniiru. Qonna, indastirii oomishaa, albuuda, turizimii, fi dinagdeen dijitaalaa madda guddinaa walqixa akka ta'aniif xiyyeeffannoon kennamuu fi madaalliin qooda fudhattoota dinagdee gidduu jiru akka sirreeffamuu taasifamuu ibsaniiru. Kunis gahee olaanaa mootummaan dinagdee keessatti qabaachaa ture gara damee dhuunfaatti dabarsuu hojiin hojjetamuu kan agarsiisudha jedhaniiru. Imaammattoonni misoomaa kunneen waggootaf rakkoo ta'ee kan ture ca'umsa caasaa galmaan ga’uuf kan kaayyeffate ta’uus ibsaniiru. Fooyya'insi dinagdee mandhalee marsa jalqabaatti hojiirra oole keessatti imaammatichi dinagdee ammayyeessuun dorgommiif banaa taasisuu keessaatti fooyya'insa bal'aa fiduu eeraniiru. Waggoota jijjiirama darban keessatti galii mootummaa guddisuu, bulchiinsa baasii sirreessuu, hojii fi raawwii pirojektii qorannoo irratti hundaa’e fooyyessuu fi deeggarsa kaayyoo yaadameef ooluchuurratti bu’aan gaariin argamuu ibsaniiru. Keessattuu galiin mootummaa kan bara jijjiiraman ture caalaa dachaa hedduun dabaluu ibsaniiru. Jijjiirama kanaan dura akkaataan misoomni Itoophiyaa maallaqaan deeggaramee biyyattiin liqaa cimaa ofirraa akka qabaattu akka taasise himanii; waggoota jahan darban kana keessatti kana sirreessuuf hojiiwwan hedduun hojjetamaa turuu ibsaniiru. Kanaanis Liqii daldalaa kamiyyuu fudhachuu dhiisuudhaan, liqeesitoota waliin mari'achuun akka liqaa ceesisan taasisuun liqii biyya irra jiru baay’inaan kaffaluun ba’aan liqaa akka hir’atu taasifamuu himaniiru. Kanaanis reeshiyoon liqaa omisha Waliigalaa(GDP) Itoophiyaa keessatti qabu gara dhibbeentaa 13 tuqaa 7tti gadi busuun danda'ameera. jedhaniiru. Jijjiiraman dura garuu dhibbeentaa 30 ol akka ture yaadachiisaniiru.

Amajji 6 /2017 (TOI) - Dhaabbanni Tirasti Fandii Diyaaspooraa Itiyoophiyaa pirojektoota fayyadamummaa hawaasaa mirkaneessan kudhan naannolee biyyatti adda addaatti hojjechaa jirachuu beeksise. Dhaabbanni Tirast Fandii Diyaaspooraa Itoophiyaa daawwannaa Ministirri Muummee Doktar Abiy Ahimad bara 2010 Ameerikaatti taasisaniin booda, waamicha lammiileen Itoophiyaa fi dhalattoonni Itiyoophiyaa buna guyyaa guyyaan dhugan irraa doolaara tokko hir'isuun misooma biyya isaaniif akka arjoomaniif deebii kennuuf kan hundeeffamedha. Tirasit Fandichi erga hundaa'ee eegalee Vaayirasii Koroonaaf deebii kennuu dhiheessii tajaajila qulqullinaaf waantota oolan baasii doolaara miliyoona 2 tuqaa 9'n akkasuma waamicha yeroo ariifachiisaaf doolaara miliyoona 1 tuqaa 2 deeggarsa taasisuu beeksiseera. Gorsaan tarsimoo Itiyoophiyaa diyaaspooraa tirasti Fandii obbo Abirihaam Asiraat TOI'tti akka himanitti Tirasit Fandichi pirojeektota bishaan dhugaatii qulqulluu 14 ijaarsa manneen qulqullinaa(Fincaanii), manneen barnootaa 48 dabalatee sirna nyaataa fi pirojeektoota biroo hojjechuu himaniiru. Dhaabbatichi waggoota darban naannoo adda addaatti hojiiwwan rakkoo dinagdee fi hawaasummaa furuuf kan dandeesisan hojjecha turuu beeksisaniiru. Hojiin Misoomaa kunis lammilee kuma 57 fayyadama kan taasise ta'uu eeranii; yeroo ammaas doolaara miliyoona 1 tuqaa 21 oliin naannoo adda addaatti pirojeektoota adda addaa 10 kan hawaasa fayyadamaa taasisu hojjecha jira jedhaniiru. Pirojeektoonni kunneen dhaabbilee fayyaa deeggaruu, pirojeektoota misooma hawaasummaa fi dinagdee deeggaruu, deeggarsa yeroo atattama adda baasuun deeggaruu ta'uu himaniiru. Gara fuula duraattis humna diyaaspooraa walitti qabuun rakkoolee hawaasummaa fi dinagdee Itoophiyaa hojiiwwan furuu danda'an akka hojjetu hubachiisaniiru.

Amajji 5/2017(TOI) - Industiriiwwan magaalaa Sandaafaa Bakkee keessatti argaman caalaatti bu'a qabeessa taasisuuf xiyyeeffannoon hojjetamaa jiraachuun himae. Guyyaa har'aas jilli Hoogganaa Biiroo Invastimantii fi Industirii Oromiyaa Obbo Ahimad Idiriisiin durfamu qamolee dhimmi ilaallatu waliin ta'uun magaalichatti Industiriiwwan sadarkaa adda addaa irra jiran daawwate.   Kaayyoon daawwannaa kanaas Industiriiwwan magaaliichaa keessatti argaman caalaatti bu'a qabeessa akka ta'an deeggarsa barbaachisaa taasisuuf, Industiriiwwan muuxannoo gaarii qaban adda baasuun gara warra birootti muuxannoo isaanii babal'isuu fi rakkoolee Industiriiwwan muudatan sadarkaa isaaniitiin adda baasuun qooda fudhattoota waliin ta'uun furmaata akka argatan gochuuf ta'uu odeeffannoon wajira kominikeeshinii magaalichaarra argame ni'mul'isa.

Amajji 5/2017(TOI) - Mallattoo injifannoo Itiyoophiyaa kan ta'e Hidhi Haaromsaa Guddichi Itiyoophiyaa hanga hojiin isaa xumuramutti tokkummaan ciminaan hojjechuu akka itti fufu namni dhimma Hidha Haaromsaa Guddichaarratti hojjechuun beekamu Ustaaz Jamaal Bashir waamicha taasisan. Itiyoophiyaan lageen daangaa ce'anii deeman irratti karaa fayyadamummaa waloo mirkaneesseen walitti hidhamsa naannawaa cimsuuf ciminaan hojjecha jirachuu Ustaaz Jamaal Bashir beeksisaniiru. Hidha Haaromsaa Guddicha Itiyoophiyaa fi siyaasaa laga Abbaayyaa waliin wal qabatan irratti xiyyeeffachuun hojii hojjetuu fi abbaa Miidiyaa 'Abbaay Nugusoochi' jedhamuu kan ta'e Ustaaz Jamaal Bashir Hidhi Haaromsa Guddichi Itiyoophiyaa mallattoo boonsisaa fi injifannoo Itiyoophiyaati jedheera. Itiyoophiyaan biyya laggeen ishee gara biyyoota biroo deemanidha malee biyya biyya gara biraa irraa laggeen dhufan hin qabne garuu immoo misooma waloo irratti kan dursitudha jedhaniiru. Fakkeenyaaf waliigaltee Bu’uuraa Tumsa Laga Naayilii Ugaandaa Inteebeetti taasifame hojiirra oolchuuf gahee adda duree taphachuu ishee himaniiru. Waliigaltee kun biyyoonni yaa'a laggeenii waliin qooddatan sirna bulchiinsa qabeenya bishaanii haqa qabeessa ta’e diriirsuu gahee olaanaa qaba jedhaniiru. Dabalataan walitti hidhamiinsa bu’uuraalee misoomaa Afrikaa keessaatti dhiyeessii anniisaa haaromfamuu dhugoomsuuf kutannoo qabdus kan agarsiisu ta’uu ibsaniiru. Hidhi haaromsaa gudiichi Itiyoophiyaa Itiyoophiyaanonni dhiibbaa naannaawwaa fi idil-addunyaaf osoo hin jilbeeffatiin kan dhugoomsine mallattoo biyyaalessaa Itiyoophiyaati jedhaniiru. Pirojektiin kun pirojektii ashaaraa Itiyoophiyaatiin ijaarame, gumaacha diinagdee guddaa kan qabu, pirojektii dantaa biyyaalessaa ta’uu ibsaniiru. Ammas lammiileen Itiyoophiyaa hundi hanga hidhichi xumuramutti deeggarsa maallaqaa fi dippilomaasii irratti tokkummaan waliin akka hojjetan waamicha taasisaniiru. Rakkoon keessoo adeemsa mariitiin furmaata argachuu akka qabu ibsanii; tokkummaan dhaabbachuu fi dantaa biyyaatiif tumsuun barbaachisaa ta'uu eeraniiru. Kanaaf Hidha Haaromsaa Itiyoophiyaa kan mallattoo injifannoo biyyaalessa ta'e irratti ejjennoon adda ta’e jiraachuu hin qabu jedhaniiru.

Amajjii 3/2017(TOI)- Baatiiwwan shanan darban galiin birrii biiliyoona 617 walitti qabamuusaa Ministirri galiiwwanii adde Ayinaalem Nugusee ibsan. በWaltajjiin marii Faayinaansii, Pilaanii fi Galiiwwanii Jimmatti taa’amaa jiru guyyaa har’aa galii walitti qabuurratti xiyyeeffatee mari’ateera. Ministirri galiiwwanii adde Ayinaalem Nugusee wayita kana akka jedhanitti, baatiiwwan shanan darban galii birrii biiliyoona 648 walitti qabuuf karoorfamee birrii biiliyoona 617 ol walitti qabamuusaa dubbataniiru. Kunis walitti qabuuf kan karoorfamerraa dhibbantaa 95 ta’uu ibsaniiru. Karoora bara bajataa kana milkeessuuf waliidhahuu naga’ee dhaabbilee galii walitti qabanii fi taaksii miliqsuu ittisuu irratti xiyyeeffannoon akka hojjetan hubachiisaniiru. Dabalataanis hojiilee hubannoo kafaltoota gibiraa guddisuu dandeessisan cimsuu, adeemsa galii walitti qabuu teeknooloojii ammayyaan deeggaruufis xiyyeeffannoon kennamuu qaba jedhaniiru.  

Amajji 3/2017(TOI)- Gabaa Kaappitaalaa Amanamummaa qabu, hunda hirmaachisuu fi fayydamummaa dinagdee uumuu ijaaruuf xiyyeeffannoon kan hojjetu ta'uu Daarektarri olaantuu Abbaa Taayitaa Gabaa Kaappitaalaa Itoophiyaa Haannaa Tahiilkuu beeksisan. Ministirri Muummee FDRI Doktar Abiy Ahimad kaleessaa kaleessa Gabaa Qabeenyaa Sanadaa Itoophiyaa ifatti jalqabiisuun isaanii ni yaadatama. Sagantaa kanarrattis mariin paanaalii taasifameera. Marii Paanaalii kanarratti kan argaman Daarektarri olaantuu Abbaa Taayitaa Gabaa Kaappitalaa Itoophiyaa Haannaa Tahiilikuu kanaan dura sosochiin gabaa kaappitaalaa fakkaatan akka turan eeraniiru. Waggoota darban kallattii imaammata mootummaa, rifoormii dinagdee mandhalee fi hammattoo fooyya'insa dinagdee waliigalaa irraa ka'uun hojiin Gabaa Kaappitaalaa gurmeesuu hojjetama turuu himaniiru. Haaluma kanaan xiyyeeffannaa olaanaa kan ture hammattoowwan seeraa qopheessuu akka ture yaadachiisanii, hammattoon seeraa kun Abbaan Taayitaa Gabaa Kaappitaalaa, Gabaa Qabeenyaa Sanadaa Itoophiyaa fi dhaabbileen gabichaa walquunnamsiisan akka beekaman taasifamuu eeraniiru. Labsichi gabicha saffisiisuuf dhaabbilee mijatanii fi teeknooloojiiwwan akka uumaman kan taasisuu hojmaanni diriirfamuu himaniiru. Keessumaa invastaroota gidduutti daldalaa qabeenya sanadaa gaggeeffamu teeknooloojiin akka ta’uu fakkeenyan kaasaniiru. Rakkoolee invastaroota miidhaa turan hambisuu fi ragaalee murteef gargaaraan akka argatan hojimaanni taasisu umamuu duabbataiiru. Abbaan taayitichaa invastarri ijoon qabeenya sanadaa dhiyeessuun kan amanamuu gabaa kaappitaalaa ijaaruuf xiyyeeffannaan kan hojjetamu ta’uu himaniiru. Dabalataan qaamoleen qooda fudhattootaa gabicha keessatti hirmaannaa dammaqaa akka qabaatan, oomishaalee fi tajaajiloonni hedduun gabaaf akka dhiyaatanii fi hunda kan hirmaachise taasisuuf kan hojjjetamu ta’uu ibsaniiru. Interpiraayizoota xixiqqaa fi gadaanaa akkasumaas damee dhuunfaa dabalatee hunduu akka hirmaatu hojmaanni diriirfamuu kaasaniiru. Gabaan kaappitaalaa Itiyoophiyaa diinagdee waliigalaa kan tumsanii fi damee jireenya lammiilee jijjiiru akka ta’uuf xiyyeeffannaan kan hojjetamu ta’uu eeraniiru. Gabaan Qabeenya Sanadaa Itoophiya akaakuuwwan daldalaa sadii giddugaleeffachuun gabaalee garaagaraa sadii jechuunis Gabaa Aksiyoonaa, gabaa sanada idaa fi gabaa filmaataa kan dhiyeessu ta’uu ibsaniiru.