Amajjii 11/2017(TOI) - Daarektarri Olaanaa Tajaajila Nageenya Odeeffannoo Biyyaaleessaa Ambaassadar Reedwaan Huseen ergaa Ministira Muummee doktar Abiyyi Ahimad irraa ergame Pirezidaantii Keeniyaa Wiiliyaam Ruutoo fi Pirezidaantii Yugaandaa Yuuweerii Museeveniin gahan. Itiyoophiyaan ollummaa fi michummaa biyyoota lachuus ta’e qaxanaa Afriikaa bahaa jabeessuuf kutannoo qabaachuu fi ulaa galaanaa argachuufis gaaffiin dhiyeessite fudhatama qabaachuusaaf hubannoo dureewwan Keeniyaafi Yugaandaa qaban, Ministirri Muummee Doktar Abiyyi Ahimad dinqisiifachuusaanii ambaasaaddar Reedwaan lamaansaaiif ibsaniiru. Dureewwan biyyoota lamaaniis hojii Itiyoophiyaan gaaddisa Gamtaa Afriikaafi Dhaabbata Biyyoota Gamtoomanii jalatti hojjettu dabalatee tattaaffii hoggansa Ministira Muumee Doktar Abiyyi Ahmediin nageenya Somaaliyaa fi biyyoota biroo eegsisuuf gumaachaa jirtu jajaniiru. Tajaajila Nageenya Odeeffannoo Biyyaaleessaarraa odeeffanne.

Amajji 9/2017(TOI) - Itiyoophiyaan walitti dhufeenya dippilomaasii Iraan waliin qabdu caalaatti cimsuuf fedhii akka qabdu Af-yaa'iin Mana Maree Bakka Bu'oota Uummataa Taggaasee Caafoo beeksisan. Obbo Taaggasee Caafoon Jila misiseensoota Paarlamaa irra kan Af-yaa'ii paarlaamichaa Doktar Mahaammad Gaaliibaafiin durfamu waliin walitti dhufeenya biyyoota lamaanii fi dhimkoota Dippilomaasii Paarlaamentaawwii irratti mari'ataniiru. Marii kanarratti Itiyoophiyaa fi Iraan walitti dhufeenya yeroo dheeraa biyyoota qaban ta'uu eeruun kanaafis Itoophiyaan bara 1960 Iraanitti Qonsilaa ishee banachuu himaniiru. Obbo Taggaasee Caafoon Itoophiyaan biyya dingdee guddachaa jirtuu fi baay'ina uummataa hedduu kan qabdu ta'uu himanii; biyyoonni lamaan walitti dhufeenya gam,a dinagdee, hawasummaa fi siyaasaan qaban cimsuu qabu jedhaniiru. Af-yaa'iin Paarlamaa Iraan doktar Mahaammad Gaalibaaf gama isaaniin biyyoonni lamaan biyyoota seenaa fi aadaa waggoota hedduuf ture qabanidha jedhaniiru.

Amajjii 9/2017 (TOI) - Mootummaan ayyaanni Cuuphaa karaa nagaa fi kabaja olaanaa qabuun akka bajamuu fi yaa'iwwan gurguddoo fuula dura magaalaa Finfinneetti geggeeffamaniif qophii barbaachisaa taasisuu Ministirri Tajaajila Kominikeeshinii Mootummaa Doktar Laggasaa Tulluu beeksisan. Itiyoophiyaan ji’oota darban ayyaanoota uummataa fi amantaa gurguddoo akkasumas yaa'iiwwan gurguddoo keesumeesuu ishee yaadachiisaniiru. Doktar Laggasaa Tulluun; Itoophiyaan biyya ayyaanota ummataa hedduu kabajju ta’uu ibsuun, Hagayya irraa eegalee ayyaanonni kunneen ji'a Hagayyaa irraa eegaluun bifa oo'aa ta'een kabajamuu hibsaniiru. Ayyaanonnii fi taateewwan gurguddoon ardiilee fi idil-addunyaa haala ho'aa fi midhagaa ta'een karaa nagaa kabajamuun isaanii bu’a qabeessummaa tattaaffii nagaa eegsisuu mootummaa kan agarsiisuu fi damee turizimiitti si'oomina kan uumudha jedhaniiru. Torbee kana Sanbataa fi Dilbata dhufu ayyaanni Kataaraa fi Cuuphaa Itoophiyaatti bal'inaan kan kabajamu ta'uu ibsaniiru. Ayyaanni Cuuphaa ayyaana ummataa uumataa addabaabayitti kabajaman kan naannoo undaatti bal'inaan bajamudha jedhaniiru. Kanaas ijaara obbolummaa fi seenessa waloof itti fayyadamuu kan qabnudha jedhaniiru. Ji'a Guraandhalaa keessa Walgahiin Hoggantoota Gamtaa Afrikaa fi konfireesiwaan idil-addunyaa adda addaa magaalaa Finfinneetti kan geggeeffama ta'uu himaniiru. Ayyaanotaa fi taateewwan kunneen ijaarsa fuula gaarii magaalaaf dhimma itti bahamuu akka qabamu eeranii; misooma koridoorii, bu’uuraalee misoomaa turizimii fi tajaajila magaalattii madaalu diriirsuun xiyyeeffannoon hojjetama jirachuu himaniiru. Fedhii keessummoota gara magaalaa gudditti biyyattii fi Afrikaa Finfinnee dhufan guutuuf qophii gahaa taasisuuf tattaaffiin taasifamaa jiras jedhan. Ayyaanonnii fi taateewwan kunneen karaa nagaa akka raawwataman qaamoleen nageenyaa hojimaata teeknooloojiin deeggaramuun hojjecha jirachuu himaniiru. Kanaafis mootummaan qophii barbaachisu hunda taasisuu himaniiru. #Oromiyaa #Itoophiyaa #ayyaana_cuuphaa

Amajjii 9/2017(TOI) - Mootummaan nageenya fi waliigaltee waaraa uumuuf hojiiwwan adda addaa hojjechaa turuu Ministirri Tajaajila Komunikeeshinii Mootummaa Doktar Laggasaa Tulluu beeksisan. Tajaajilli Komunikeeshinii mootummaa dhimmoota adda addaa ilaalchisuun ibsa kan kenne yoo ta'u; ibsicha kan kennaan doktar Laggasaa Tulluu mootummaan nageenyaa fi waliigaltee waaraa uumuuf hojiiwwan garaa garaa hojjecha turuu ibsaniiru. Mootummaan hojiiwwan fayyadamummaa waloo mirkaneessan hedduus hojjechuu ibsa isaaniin eeraniiru. Humnoonni sababa adda addaan qawwee kaasuun bosona galan gara daandii nagaatti akka deebi'an mootummaan yeroo garagaaratti waamicha taasisaa jira jedhaniiru. Kana hordofuun naannoo Gambeellaa fi Beenishaangul Gumuzitti humnoonni hidhatan kunneen waliigaltee nageenyaa raawwachuun gara jireenya idilee isaanitti deebi'uu ibsaniiru. Naannolee kanatti yeroo ammaa nagaa fi tasgabbiin fooyyee qabu uumamuu hordofee hojii misoomaas haala mijataa uumeera jedhaniiru. Waraana kabaa Itiyoophiyaa ture ilaalchisuun ABUT waliin waliigaltee Piritooriyaatti mallatteeffame mootummaan karaa sirriin hojiirra oolcha jiraachuu ibsaniiru. Mootummaan qaamolee fedhii adda addaa qaban waliin mari'atee rakkoolee furuu fi hidhatoonni duraanii gara nagaatti akka dhufan hojjecha jiras jedhaniiru. Kanaanis naannoo Oromiyaatti hidhatoonni hedduu fi hoggantoonni isaanii waliigaltee nageenyaa mootummaa naannichaa waliin mallateesuun gara jiddugalaawwan haaromsaa galaa jiraachuu ibsaniiru. Hojii kana keessattis gaheen abbootii Gadaa fi Hadholii Siinqee olaanaa ta'uu beeksisaniiru. Naannoo Amaaraattis hidhattoonni hedduun gara daandii nagaatti deebi'uu fi jiddugala haaromsaa galuun leenjii fudhachaa jirachuun gara hawaasaatti dabalamaa jirachuu himaniiru. Kana keessattis abbootiin amantii fi jaarsoliin biyyaa gaheen isaan bahatan olaanaa ta'uu Doktar Laggaasaa Tulluu ibsaniiru. Naannoo Oromiyaa fi Amaaraatti haalli nageenyaa amma jiru baay'ee fooyya'uu hordofee haalli daldalaa fi hojiin misoomaa irratti jijjiramni olaanaan argameera jedhaniiru. Naannoo Somaalee fi Affaan daangaa irratti walitti bu'insoota mudachaa turan mariin furuun nageenyi bu'eera. Humnoonni hidhatan misoomaa fi nageenya biyya keessatti gahee olaanaa waan qabaniif gara nagaatti deebi'uun ijaarsa biyyaa keessaatti gahee isaanirra eeggamu akka bahatan mootummaan ammaas waamicha ni taasisa jedhaniiru. #Oromiyaa #Itoophiyaa #Nageenya

Amajjii 8/2017(TOI)-Jilli miseensoota Paaarlamaa Iraan kan Af-yaa'ii Paarlaamaa Iraan Doktar Mahaammad Baqaar Qaalibaafiin durfamu daawwannaa hojiif Finfinnee dhufeera. Jilichi yeroo innii Buufata Xiyyyaara Idil Addunyaa Boolee gahu Af-yaa'iin Mana Maree Bakka Bu'oota Uummataa obbo Taaggasee Caafoo fi Ministir deetaa ministira Dhimma Alaa ambaasaaddar Burtukaan Ayyaanoon simataniiru. Jilli miseensoota Paarlaamaa Iraan turtii isaatiin daawwannaa adda addaa kan taasisaanii fi Af-yaa'ii Mana Maree Bakka Bu'oota Uummataa fi hoggantoota mootummaa olaanoo biroo waliin kan mari'atu ta'uun ibsameera.

Amajji 8/2017 (TOI) - Itiyoophiyaa fi Saa'udii Arabiyaan haala tumasa gamlamee fi damdanuu qaban cimsuun danda'amurratti mari'atan. Ministir deetaan ministira Dhimma Alaa ambaasaaddar Misgaanuu Argaa Itiyoophiyaatti ambaasaaddara Saa'udii Arabiyaa Fahaad Abooydalaah Alhumii'aaydaanii Almootaayirii wajjira isaanitti simachuun waliin mari'ataniiru. Marii isaaniinis hoggantoonni olaanoo biyyoota lamaanii haala itti daawwanaa taasisan irratti mari'ataniiru. Itiyoophiyaa fi Sa'udii Arabiyaan dhimmoota fayidaa waloo ta'an irratti tumsa gamlamee fi damdanuu cimsuu akka qaban mari'achuu Odeeffannoon Ministira Dhimma Alaa irraa argame ni mul'isa.

Amajji 8/2017(TOI) - Ji'oota jahan daraban Dippilomaasii lammilee irratti xiyyeeffateen Itoophiyaanota biyyoota garaa garaatti haala rakkisaarra turan kuma 32 ol gara biyyaatti deebisuun danda'amuu Ministeerri Dhimma Alaa beeksise. Dubbi himaan Ministeera Dhimma Alaa ambaasaaddar Nabiyaat Geetaachoo haala waqtaa dippilomaasii fi dhimmoota qunnamtii alaa ilaalchisuun miidiyaaleef ibsa kennaniiru. Ibsa isaaniin raawwii hojii ji'a jahaa ministeerichaa, dippilomaasii lammileerratti xiyyeeffate, walitti dhufeenya Itiyoo- Somaalee fi dhimmoota biroo kaasaniiru. Ibsa isaaniin ji'oota jahan darbe gama dippilomasiin milkaa'inni guddaan argameera jedhaniiru. Itoophiyaan biyyoota naannawwaa waliin tumsa hundagaleessa uumuuf hojjecha jiraachuu beeksisaniiru. Akka fakeenyaattis waliigaltee ijaarsa daandii Itiyoophiyaa fi Sudaan Kibbaa walqunnamsiisuuf taasifame dabalatee Itiyoophiyaan hanga elektirikii Keeniyaaf ergitu dabaluuf waliigalteerra gahamuu eeraniiru. Waliigalteewwan walitti dhufeenya gamlamee faayidaa biyyaalessaa Itiyoophiyaa eegsisan baay'een ji'oota jahan darban raawwatamuus ibsaniiru. Daawwannaan Hoggantootaa olaanoo fi mariin adda addaa 128 geggeeffamuus eeraniiru. Dippilomaasii lammileerratti xiyyeeffateenis ji'oota jahan darban lammilee Itoophiyaa biyyoota adda addaatti haala rakkisaa keessa turan kuma 32 fi 918 gara biyya isaaniitti deebisuun danda'amuu himaniiru. Ji'oota jahan darban kana biyyoota ollaa waliin walitti dhufeenya gamlamee fi hawaasa hojiin cimsan raawwatamuus ibsa isaaniin eeraniiru. Waliigaltee Ankaaraa hordofee Pirezidaantiin Somaaliyaa Hasan Sheek Maahammud daawwannaa isaan Itiyoophiyaatti taasisan walitti dhufeenya biyyoota lamaanii gara duraan turetti kan deebisuuf carraa guddaa kan uumedha jedhaniiru.

Amajjii 8/2017 (TOI) - Jilli Pirezidaantii Giddugala Qorannoo Misooma Mana Maree Mootummaa Chaayinaa Luu Haa'oon durfamu har'a ganama magaalaa Finfinnee dhufeera. Jilli kun Buufata Xiyyaaraa Idil Addunyaa Boolee wayita gahu Ministir deetaan Ministira Daldalaa fi walitti dhufeenya Naannaawwa Obbo Indaalew Mokonniin simataniiru. Jilli kun daldala fi invastimantii biyyoota lamaanii akkasumas dhimmoota kanaan walqabatan irratti Ministira Daldalaa fi Misooma Naannawwa Doktar Kaashuun Gofee waliin kan mari'atu ta'uu Odeeffannoon Ministeera Daldalaa fi walitti dhufeenya naannawwaa irraa argame ni mul'isa. #Oromiyaa #Itoophiyaa

Amajji 7/2017(TOI) - Naannawa adda addaatti waamicha ummataa fi mootummaa fudhachuun hidhatoota galan gara jireenya idilee isaaniitti akka deebi'an deebisanii dhaabuun cimee itti fufuu Komishinarri Komishiinii Haromsaa Biyyaalessaa Tamasgeen Xilahuun beeksisan. Komishinarichi kana kan jedhan naannoo Amaaraa godina jiddugala Gondor aanaa Cilgaa jiddugala Sarabaatti leenjii deebisanii dhaabuu hidhatoota duraaniif kennamu yeroo jalqabsiisanidha. Daandiin nagaa karaa tasgabbii qabuun waldhabdee furuuf murteessaa ta'uu himanii; hidhatoonni waamicha nageenyaa mootummaa fi ummataa fudhachuun isaanii biyyaaf abdii guddaadha jedhaniiru. Hidhatoonni duraanii gara haaromsaatti galanis uummata miidhaan deebi'anii kiisuuf qophii ta'uu isaanii agarsiisuu himanii; kunis hidhatoota hanga ammmaatti bosona jiraniif barnoota kan ta'udha jedhaniiru. Komishinichi hidhatoonni duraanii gara jireenya idilee isaanitti deebi'anii akka jiraataniif naannoo Tigiraay, Affaar, Oromiyaa fi Amaaraatti hojii garaa garaa hojjecha jira jedhaniiru. Hojiin deeggarsaa fi deebisanii dhaabuu cimee itti fufuu eeraniiru. Hidhatoonni duraanii waldhabdee karaa nagaan furuuf murteesuun isaanii gatii nageenyaa hubachuu isaanii kan mul'isu ta'uu Itti aanaan Komishinara Komishiinii Haaromsa Biyyaalessaa birgaader jeneraal Darribee Makuraa himaniiru. Ijaarsa biyyaa keessatti hirmaachuun carroomuu fi dirqama seenaa ta'uu himanii; hidhatoonni duraanii carraa argatanitti fayyadamuun humana nageenyaa fi misooma akka ta'an hubachiisaniiru. Hidhattoonni duraanii gara leenjii haaromsaatti galanis hawaasa kanaan dura miidhan kan kiisan ta'uu himaniiru.

Amajjii 6/2017 (TOI)-Manni Maree Ministirootaa Walga'ii Idile 41ffaa gaggeesseen dhimmoota garaagaraarratti mari'achuun murtoo dabarseera. Haaluma kanaan: 1. Mootumman Itiyoophiyaa Waldaa Misoomaa Idil Addunyaa waliin raawwii pirojektii fooyyessa tajaajila mootummaaf waliigaltee deeggarsa maallaqaa fi liqii SDR miiliyoonaa 53 fi kuma 300 akkasumaas raawwii pirojektii damee faayinaansii cimsuuf kan ooluu SDR miiliyoona 500 fi miiliyoona 25 fi kuma 700 raggaasisuuf wixineewwan labsii lamarratti mari’ateera. Kanaanis liqiiwwan lameen dhalarraa bilisa, kaffaltii tajaajilaa %0.75 kan itti kaffalamuu ta’ee, yeroo haafura fudhannaa waggoota ja’aa dabalatee waggoota 38 keessatti kaffalamee kan xumuramu ta’uun ibsameera. Manni marichaas imaammataa liqii biyyaattii waliin kan walsimu ta’uu mirkaneessuun wixineewwan labsichaa Mana Maree Bakka Bu’oota Ummataaf akka qajeelfaman sagalee guutuun murteesseera. 2. Dambii onnachiistuu invastimantii fooyyessuuf dambii ba’erratti mari’ateera. Dambii onnachiistuu invastimantii lakkoofsa 517/2014 hojiirra oolaa jiraatus dambichi ba’uun duras ta’e, booda, dhaabbileen dameewwan garaagaraarratti bobba’an rakkoon raawwii mudachaanii jiraachuun eerameera. Tumaawwan dambichaa akka ifa ta’aniif dambii fooyyeffamuun dhiyaate irratti mari’atee gabbisuun, dambichi guyyaa Gaazeexaa Nagaariit irratti maxxanfamee ba’ee eegalee hojiirra akka oolfamu sagalee guutuun murtoo dabarseera. 3. Wixinee dambii qabiyyee fi bulchiinsaa Dhabbilee misooma mootummaa haquuf ba’erratti maria’ateera. Hojiilee ‘piraayveetaayizeeshinii’ bulchiinsaa fi qabiyyee dhaabbilee misoomaa mootummaa gara Koorporeeshinii Bulchiinsaa Qabeenyaa fi Idaatti dabarfamuun akka gaggeeffaman taasisuuf seerrii bulchiinsaa fi qabiyyee dhaabbilee dhuunfaa haqamee, mirgaa fi itti gaafatama jiru koorporeeshinichaaf kennuun barbaachisaa ta’uun dambichi mana marichaaf dhiyaateera. Manni marichaas wixinee dambichaarratti bal’inaan mari’achuun ergaa gabbisee, guyyaa Gaazeexaa Nagaarit irratti maxxanfamee ba’ee eegalee akka hojiirra oolu sagalee guutuun murtoo dabarseera.

Amajji 6 /2017(TOI) - Manni Maree Bakka Bu'oota Uummataa muudama doktar Saamsoon Mokonniin akka daarektara olaanaa Abbaa Taayitaa Miidiyaalee Itiyoophiyaa ta'aniif dhihaate raggaase. Manni maree bakka bu'oota uummataa walgahii idilee 15ffaa bara hojii 4ffaa geggeessa jira. Manni marichaa walgahii isaa kanaanis muudama doktar Saamsoon Mokonniin akka Daarektara Abbaa Taayitaa Miidiyaalee Itiyoophiyaa ta'uuf dhihaateef raggaasiseera.

Amajji 6 /2017(TOI) - Manni Maree Bakka Bu'oota Uummataa Wixinee labsii taaksii qabeenyaa raggaasise. Manni marichaa wagalihii idilee 15ffaa bara hojii 4ffaa geggeessa jira. Koreen dhaabbii dhimma pilaanii, bajataa fi faayinaansii wixinee labsii taaskii qabeenyaa ilaalchisuun mana marichaa gabaasaa fi yaada murtoo dhiheessera. Manni marichaas gabaasaa fi yaada murtoo korichi dhiheesse qorachuun wixinee labsichaa sagalee caalmaan raggaaseera.  

Amajjii 6 /2017(TOI)-Manni maree bakka bu’oota ummataa walgahii idilee 15ffaa bara hojii waggaa afraffaa taa’aa jira. Manni marichaa yaa’ii Kanaan gabaasaa fi yaada murtee labsii wixinee taaksii qabeenyaa ilaalchisuun koree dhaabbataa dhimmoota pilaanii, bajataa fi fayinaansiin dhihaatu ilaalee akka raggaasu ni’eegama. Kana malees gabaasaa fi yaada murtii koreen dhaabbataa dhimmoota seeraa fi haqaa yaada gaggeessaa gumiin bulchiinsa abbootii murtii federaalaa abbootii murtii lama irratti dhiheesse ilaalee akka raggaasisu ibsameera. Dabalataanis muudama daarektara olaanaa abbaa taayitaa miidiyaalee Itiyoophiyaa ilaalee niraggaasisa jedhamee akka eegamu odeeffannoon mana murteerraa argame nimul’isa.

Amajji 3/2017 (TOI) - Magaalaa Finfinneetti Ayyaanni Cuuphaa karaa nagaa akka kabajamuuf qophiin gahaan taasifamuu Hoggantuun Biiroo Bulchiinsa Nageenyaa fi Tasgabbii magaalichaa aadde Liidiyaa Girmaa beeksisan. Biiroon Nageenyaa fi Tasgabbii magaalichaa kabaja ayyaanaa kana ilaalchisee humnoota nageenyaa fi qooda fudhattoota adda addaa waliin mari'achaa jira. Hoggantuun Biiroo Bulchiinsa Nageenyaa fi Tasgabbii Magaalaa Finfinnee aadde Liidiyaa Girmaa akka ibsanitti, ayyaanichi rakkoo nageenyaa tokko malee karaa duudhaa isaa eeggateen akka kabajamuuf qophiin gahaan taasifameera. Adeemsa kana keessatti hawaasni tumsa barame cimsuu akka qabu hubachiisaanii; humni nageenyaa waloo ayyaana kanaaf qophii gahaa taasisuu isaa eeraniiru.

Amajji 3/2017 (TOI) - Ministirri Qonnaa Doktar Girmaa Amantee Ministira Qonnaa Zimbaabuwee Dokta Ankishees Jongiwee Masuukaa waliin tumsa misooma qonnaa biyyoota lamaanii ilaalchisuun mari'ataniiru. Walgahiin ariifachiisaa Sagantaa Misooma Qonnaa hunda galeessaa Afrikaa erga geggeeffamu jalqabee har’a guyyaa sadaffaadha. Ministirri Qonnaa Doktar Girmaa Amantee walgahii kanarratti hirmaachuun cinaatti Ministira Qonnaa Zimbaabuwee waliin mar'ataniiru. Ministiroonni kunneen dhimmoota biyyoonni lamaan misooma qonnaa irratti tumsuu danda’an irrattis marii waloo gaggeessuu isaanii odeeffannoon ministee Qonnaa irraa argame ni mul’isa. Walgahiin ariifachiisaan Sagantaa Misooma Qonnaa Hunda Galeessaa Afrikaa har’a sadarkaa hoggantootaatti gaggeeffamaa kan jiru yoo ta’u, murteewwan adda addaa dabarsuun ni xumurama jedhamee eegama.

Mudde 3/2017(TOI) - Poolisiin Magaalaa Finfinnee marsaa 29ffaaf miseensoota Poolisii idilee leenjisaa ture eebbisiisaa jira. Sirna eebbaa kana irratti Kantiibaan magaalaa Finfinnee aadde Adaanech Abeebee, hoggantuu Biiroo Nageenyaa fi Tasgabbii magaalaa Finfinnee Liidiyaa Girmaa, Komishinara Komishiinii Poolisii magaalaa Finfinnee Geetuu Argaawu akkasumas hoggantoonni Poolisii magaalaa Finfinnee sadarkaan argaman argamuu Odeeffannoon Poolisii Magaalaa Finfinneerra argame ni mul'isa. #Finfinnee #Oromia #Ethiopia #Ethiopian_News_Agency

Amajji 2/2017 (TOI) - Itiyoophiyaa fi Chaayinaan damee haqaa irratti tumsaan hojjechuuf fedhii akka qaban beeksisan. Chaayinaatti Ambaasaaddarri Itiyyoophiyaa Tafarraa Darribeew Ministeera Haqaa Chaayinaatti Hogganaa Damee Tumsa Idil Addunyaa kan ta'an Yuuwaan Liyaang waliin mari’ataniiru. Mariin kun hariiroo biyyoota lamaanii irratti kan xiyyeeffatedha jedhameera. Marii kanaan Itiyoophiyaa fi Chaayinaan walta’iinsa tarsiimaawwaa yeroo kamiyyuu hin jijjiramne( (all-weather strategic partnership) kan qaban ta'uun gamalamaniinu eerameera. Ambaasaaddar Tafarraan marii kanarratti akka ibsanitti; Itoophiyaa fi Chaayinaan tumsa damdaneessa ta'e kan qaban yoo ta’u, kunis walitti dhufeenya uummataa fi uummataa, invastimantii, daldala, fi turizimii kan dabalatudha jedhaniiru. Ministeera Haqaa Chaayinaatti hogganaan damee tumsa idil-addunyaa Yuuwaan Liyaang hariiroon cimaan biyyoota lamaanii kan dinqisiifamu ta’uu ibsaniiru. Hagganichi ji'a Guraandhala 2025 keessa Ministirri Haqaa Chaayinaa Hii Roon daawwannaa hojiif gara Itoophiyaa kan dhaqan ta'uu beeksisaniiru. Kanaanis Dhaabbileen kunneen yaadannoo waliigaltee waliin hojjechuuf isaan dandeessisu ni mallatteessu jedhamee eegama jedhaniiru. Mootummaan daawwannaa hojii jilli Chaayinaa Ministira Haqaatiin durfamu Itoohiyaatti taasisuu milkaa'aa akka ta'uuf deeggarsa barbaachisu kan taasisu ta'uu ambaasaaddar Tafarraa Darriboo himaniiru. Imbaasiin Itoophiyaa Beejiingitti argamu ibsa kenneen, Daawwannaan jila kanaa tumsa tarsiimaawwa biyyoota lamaanii guddachaa dhufe keessatti boqonnaa haaraa kan uumuu ta’uu odeeffannoon Imbaasii Itoophiyaa Beejingitti argamurra argame ni mul'isa.

Amajjii 1/2017 (TOI) – Manni Maree Bakka Bu’oota Ummataa walga’ii idilee 14ffaa har’a gaggeesseen labsii qabeenya seeraan ala horatame deebisiisuufi gaafatama seeraa hordofsiisu raggaasiseera. Wixineen labsichaa qabeenya mootummaa fi ummataa deebisiisuuf hanqina seeraa ture kan guutu ta’uun ibsameera. Lammiileen hojjetanii qabeenya akka horatan kan jajjabeessu, kanneen yakkaan qabeenya horatan gaafatamtoota kan taasisu, guddina biyyaa kan saffisiisuu akka ta’e himameera.   Qabeenya namni dhuunfaa seeraan alaa fi malaammaltummaan horate kan deebisiisu ta’uun, raawwii isaarratti eeggannoo taasisuu fi qaamolee raawwachiistotaa cimsuun akka barbaachisuu fi mirgi qabeenya horachuu lammiilee akka hinsarbamne sirnaan ilaalamuu akka qabu ibsameera. Walitti Qabduun Koree Dhaabbii Dhimmoota Seeraa fi Haqaa Itsagannat Mangistuun, labsichi mirga qabeenyaa horachuu fi dhaaluu heeraan ragga’ee jiru kan kan hin faallesinedha jedhaniiru. Qabsoon farra malaammaltummaa akka cimu kan taasisu, qabeenya biyyaa saamamee fi seeran ala horatame deebisiisuu fi seeraa alummaa kan dhaabsisu akka ta’e akeekaniiru. Labsichis sagalee mormii sadii fi kan sagalee hinkennine afuriin, sagalee caalmaan ragga'eera. #Oromia #Ethiopia

Amajji 1/2017 (TOI) - Ogeeyyiin suphaa xiyyaara Daandii Qilleensaa Itoophiyaa marsaa 8ffaaf Akkaadaamii Humna Qilleensaa Itiyoophiyaatti leenji'aa turan eebbifamaniiru. Eebbifamtoonni kunneen, walta'insa dhaabbilee lamaaniin Mana Barumsaa Leenjii Waraanaa Akkaadaamii Humna Qilleensaa Itoophiyaatti ji’a tokkoof leenjii ijaarsa qaamaa, guddina xiinsammuu fi jaalala biyyaarratti kennumu fudhataniiru. Leenjifamtoonni kunneen guyyaa har'aa bakka hoggantoonni olaanoo dhaabbilee lamaanii argamanitti eebbifamaniiru. Itti aanaan ajajaa Humna Qilleensaa Itiyoophiyaa loojistikii qilleensaa Birgaadeer Jeneraal Nagaraa Leellisaa sirna eebbaa kanarratti leenjiin kun ogeessonni haala yeroo biyyattiin keessa jirtu hubachuun naamusaa fi jaalala biyyaa qabaatanii damee itti bobba’an irratti akka ciminaan hojjetan kan gargaarudha jedhaniiru. Garee Daandii Qilleensa Itoophiyaatti Itti aantuun Pireezidaantii humna namaa Aadde Zennabawarqi Gabratsaadiq leenjiin kun walta’iinsa dhaabbilee lamaaniin kan geggeeffame ta'uu ibsaniiru. Leenjiin kun daandiin xiyyaaraa Itoophiyaa humna hojjetaa jaalala biyyaa, naamusa fi gahumsa qaamaan ijaarame horachuuf tattaaffii taasisaa jiru kan dhugoomsuuf gargaarudha jedhaniiru. Eebbifamtoonni gama isaaniitiin leenjichi dandeettii isaanii kan guddise ta'uu himanii; kutannoodhaan biyya isaanii akka tajaajilanis kaka'umsa isaanitti uumuu himaniiru. Odeeffannoon Raayyaa Ittisa Biyyaa irraa argame akka agarsiisutti sirna eebbaa kanarratti barattoota Akkaadaamii Humna Qilleensaa Itiyoophiyaa waggaa tokkoffaa fi lammaffaatti sirni asxaa aangoo uffisuu raawwatameera.

Amajjii 1/2017 (TOI) – Manni Maree Bakka Bu’oota Ummataa walga’ii idilee 14ffaa har’a gaggeesseen labsii sirna bittaa fi gurgurtaa bu’aalee boba’aa irratti mari’achuun sagalee caalmaan raggaaseera. Yaada murtoo wixinichaa kan dhiheessan walitti qabduun Koree Dhaabbii Dhimma daldalaa Aayishaa Yaahiyaa fiyadaa dinagdee fi hawaasummaa bu'aaleen Boba'aa qabuun oomishaalee tarsamaa'oo ta'uu beekisaniiru. Wixineen kun kan dhihaate dhiheesii tarsimaaaa bu'aalee boba'aa, kuusaa fi rabsa, Sadarkaa qulqullinaa fi nageenyaa idil addunyaa kan eegaan akka ta'an taaisuufi jedhaniiru. Bu'aalee Boba'aa Dhiheesitootaa hanga fayyadamtootaatti tekinolojiin kan deeggarame,si'ataa, iftoomina kan qabu, amanamaa, rabsa dhiheessii haqa qabeessa taasiisuuf kan dandeeisudhas jedhaniiru. Kanaanis cancala sirna bittaa fi gurgurtaa Boba'aa keessaatti rakkolee seeraan alummaa mul'achaa jiran to'achuuf kan dandeesisu ta'uus himaniiru. Manni marichaas gabaasa fi yaada mortoo dhihaate erga qoratteen booda yaada mormii lamaa, dhorkii sagalee tokkoo fi sagalee caalmaan raggaasiseera.