Guraandhala 16/2017(TOI)- Konfaransiin ummataa magaalaa Bishooftuutti taa’amaa jira. Konfaransiin ummataa sadarkaa biyyaatti murtoowwanii fi kallattiiwwan yaa’ii idilee lammaffaa paartii Badhaadhinaa irratti xiyyeeffate kaleessaa eegalee magaalaawwan gurguddoo biyyattii keessaatti taa’amaa jira. Haala Kanaan konfaransiin ummataa lammiileen kutaalee hawaasaa garagaraa irraa walitti dhufan irratti hirmaatan har’a magaalaa Bishooftuutti taa’amaa jira. Bulchaan naannoo Affaar Awwal Arbaa Af-yaa’iin Caffee Oromiyaa Sa’aadaa Abduraahimaan, hoogganaan ijaarsa aadaa demokiraasii Paartii Badhaadhinaa Mallasee Alamuu waltajjicha gaggeessaa jiru.

Guraandhala 16/2017(TOI)- Konfaransiin ummataa kutaaleen hawaasaa garagaraa irratti hirmaatan magaalaa Hararitti eegalame. Konfaransichi Murtoowwanii fi Kallattiiwwan yaa’ii idilee lammaffaa paartii Badhaadhinaa Kanaan dura deemsifamerratti darban irratti xiyyeeffatee mata duree “waadaarraa amma aadaatti” jedhuun taa’amaa jira. Ministirri Industirii Malaakuu Allebel, itti aanaan bulchaa naannoo Hararii Roozaa Umar, Af-yaa’iin mana maree naannichaa obbo Sulxaan Abdulsalaam, hoogganaan waajjira paartii badhaadhinaa naannoo Hararii obbo Geetuu Wayyeessaa dabalatee miseensonni hooggansaa naannichaa konfaransicharratti hirmaachaa jiru.

Guraandhala 15/2017(TOI)-Itti aanaan pirezidaantii Paartii badhaadhinaa Obbo Adam Faaraah Yaa’ii Paartii Turk Aki irratti hirmaachuuf Turk Ankaaraa dhaqaniiru. Itti aanaan Pirezidaantii Paartii Badhaadhinaa kun Ankaaraa wayita gahan hooggantoonni olaanoo Paartii Aki fi Turkitti ambaasaaddar Adam Mahaammad dabalatee hooggantoonni Embaasichaa simataniiru. Paartii Turk Aki boruu eegalee yaa’ii waliigalaa nitaa’a. Paartiin badhaadhinaa yaa’icharratti akka hirmaatu afeerraan taasifameefii karaa itti aanaa pirezidaantii Paartii Badhaadhinaa Adam Faaraah bakka bu’uun yaa’icharratti nihirmaata jedhameetu eegama. Paartiin Turk Aki yaa’ii idilee lammaffaa Paartii badhaadhinaa baatii darbe taa’amerratti ittaanaa pirezidaantii paartichaa Zaafar Siirakayaan bakka bu’uun yaa’icharratti hirmaateera. Hirmaannaa yaa’iin gamatti Paartiin badhaadhinaa fi Aki dhimmoota garagaraa irratti waliin hojjechuuf walii galtee mallatteessuun isaanii niyaadatama. Haala Kanaan itti aanaan pirezidaantii paartii Badhaadhinaa obbo Adam Faaraah mallattoo waliigalteen booda Ankaaraa dhaquun yaa’ii Paartii Aki irratti nihirmaatu. Paartileen kunneen walitti dhihaachuun hojjechuu fi ejjennoon qabxiileen waliigaltichaa Waloo irratti qabaman hojeeffamaa akka deeman carraa uumaa deemuuf akka dandeessisu odeeffannoon paartii badhaadhinaarraa argamenimul’isa. Hariiroo mootummootaa fi ummattootaa biyyoota lamaan jidduu jiru boqonnaa caalutti akka cehu hariiroon paartii Badhaadhinaa Fi Aki jidduutti jalqabame walooma seena qabeessa biyyoota lamaanii sadarkaa olaanaatti akka guddisu ibsameera.

Guraandhala 15/2016(TOI)- Itiyoophiyaatti Badhaadhina mirkaneessuu fi tokkummaa sabdaneessummaa ijaaruuf hojiin hojjetamu caalaa cimee kan itti fufu ta’uu hoogganaan damee ummataa fi hariiroo idil addunyaa Paartii badhaadhinaa Dr. Biqilaa Hurrisaa ibsan. Konfaransiin ummataa murtoowwanii fi kallattiiwwan yaa’iin idilee lammaffaa paartii Badhaadhinaa irratti mari’atu mata duree “waadaarraa amma aadeffannaatti” jedhuun magaalaa Bahaar Daaritti taa’amaa jira. Dr. Biqilaan konfaransii kanarratti, galmi ijoon Paartii Badhaadhinaa Itiyoophiyaa badhaatee fi tokkummaan sabdaneessummaa ishee mirkanaa’e dhugoomsuudha jedhaniiru. Tokkummaa sabdaneessummaa ijaaruun akkasumas Itiyoophiyaa badhaate dhugoomsuuf tumsi akka taasifamu ibsaniiru. Ummanni humnaa fi dandeettii qabuun misoomarratti akka hirmaatu carraa uumuun hirmaannaa fi itti fayyadamasaa mirkaneessuuf xiyyeeffannoon akka taasifamu himaniiru. Keessumaa dargaggoonni carraa hojii teeknooloojiin deeggarame uumuun nageenyaa fi misooma waaraa mirkaneessuufis akkasuma. Kanaaf murtoowwan Paartiin badhaadhinaa yaa’ii idilee lammaffaan dabarse amma gadiitti guutummaan hojeessuun ummanni akka tumsu gaafataniiru. Bulchaan naannoo Kibba Itiyoophiyaa Obbo Xilahun Kabbadaa ganasaaniin, diina waloo keenyaa kan ta’e hiyyumarratti duuluun badhaadhina hunda galeessa mirkaneessuuf nageenya buusuurratti xiyyeeffannee hojjechuu qabna jedhaniiru. Murtoowwanii fi kallattiiwwan yaa’ii idilee lammaffaa Paartii Badhaadhinaan kaa’aman raawwachuun Badhaadhina Itiyoophiyaa dhugoomsuu akka barbaachisu dubbataniiru. Ummanni naannoo Amaaraa qormaata amma yeroof isa mudate cehuuf carraaqquiin taasisaa jiru onnachiisaa fi kan galateeffamudha jedhaniiru. Jaarsoliin biyyaa, abbootiin amantaa, hayyoonni, hawaasni daldalaa, dubartoonni, dargaggoonnii fi kutaaleen hawaasaa biroon konfaransicha irratti hirmaachaa jiru.

Guraandhala 15/2017(TOI)- Bu’aalee misoomaa garagaraa magaalota keessatti galmaa’an itti fufsiisuuf hirmaannaan hawaasaa murteessaa ta’uusaa Kantiibaan bulchiinsa magaalaa Shaggar Dr. Tashoomaa Addunyaa ibsan. Konfaransiin murtoowwanii fi kallattiiwwan yaa’ii idilee lammaffaa Paartii Badhaadhinaa irratti xiyyeeffate magaalaa Diillaatti Taa’amaa jira. Sadarkaa itti aanaa pirezidaantii naannoo Oromiyaatti kantiibaan bulchiinsa magaalaa Shaggarii fi miseensi koree hojii raawwachiisaa Paartii Badhaadhinaa Dr. Tashoomaa Addunyaa akka ibsanitti, hojiilee dinagdee, hawaasummaa fi siyaasaa mootummaan yaadama haaraan jijjiiramaa asitti hojjeteen bu’aaleen galmaa’aniiru. Misoomaa fi bulchiinsa gaarii ilaalchisee magaalota keessatti jijjiiramoonni bu’uraa galmaa’uu eeranii, kana itti fufsiisuuf hirmaannaan ummataa murteessaa ta’uu dubbataniiru. Waltajjiin kun murtoowwanii fi kallattiiwwan yaa’ii idilee lammaffaa Paartii Badhaadhinaa irratti darban irratti hubannoo uumuun hojiirra oolmaa isaaf qindoominaan hojjechuuf kan akeekame ta’uu himaniiru. Guddinni si’ataan magaalota keessatti dhufaa jiran magaalota jijjiiraa akka jiru kan kaasan ammoo bulchaa godina Geede’oo Dr. Zinaabuu Waldeeti. Keessumaa misoomni kooriidarii fi hojiileen bu’ura misoomaa yaada ministirri muummee Dr. Abiyyi Ahimad maddisiisaniin hojjetamaa jiran rakkoolee misoomaa fi bulchiinsa gaarii magaalota keessatti furaa jira jedhaniiru. Magaalota qulqulluu fi jiraattotaaf mijataa taasisuuf hojiileen jalqabaman akka itti fufan hirmaannaan ummataa cimuu qaba jedhaniiru. Hooggantoonni mootummaa, bakka bu’oonni kutaalee hawaasaa garagaraa, abbootiin aadaa fi amantaa waltajjicharratti argamaniiru.

Guraandhala 15/2017(TOI)- Paartiin Badhaadhinaa Paartii Waadaa Hojiin Mirkaeesaa jiru ta’uu ministirri daldalaa fi walitti hidhamiinsa qaxanaa Dr. Kaasahuun Goofee ibsan. Waltajjiin marii ummataa murtoowwanii fi kallattiiwwan yaa’ii idilee Paartii badhaadhinaa lammaffaan darban irratti xiyyeeffate magaalaa Hawaasaatti taa’amaa jira. Ministirri daldalaa fi walitti hidhamiinsa qaxanaa Dr. Kaasahuun Goofee waltajjicharratti akka jedhanitti, Paartiin badhaadhinaa waadaa badhaadhina hawaasummaa fi dinagdee ummataa mirkaneessuuf gale qabatamaan mirkaneessaa jira. Keessumaa Qamadii biyya alaarraa galu hambisuuf yaa’ii paartichaa jalqabaa irratti ejjennoon qabamuu yaadachiisanii, yeroo ammaa fedhii qamadii biyya keessatti guuttachuun alatti gabaa alaaf erguun jalqabamuusaa dubbataniiru. Hiyyummaa fi boodatti hafummaa magaalota keessatti hambisuuf xiyyeeffatamee hojjetamaa akka jiru ibsaniiru. Haala Kanaan Finfinnee dabalatee magaalota biyyattii 56 keessatti hojiileen misooma kooriidarii Itiyoophiyaa madaalanii fi dhaloota dhufuuf cehan hojjetamaa akka jiran

Guraandhala 15/2017(TOI)- Konfaransiin hawaasaa jiraattonni kutaalee hawaasaa garagaraa irraa walitti dhufan irratti hirmaatan magaalaa Hawaasaatti taa’amaa jira. Ministirri daldalaa fi walitti hidhamiinsa qaxanaa Dr. Kaasahuun Goofee, Ministirri Turizimii Salaamaawiit Kaasaa, akkasumas hooggantoonni naannoo Sidaamaa fi magaalaa Hawaasaa waltajjicha irratti argamaniiru. Mootummaan nageenya waaraa fi guddina dhugoomsuuf rakkoolee adda baasuun ummataan walitti dhihaatee hojjechaa akka jiru ministirri daldalaa fi walitti hidhamiinsa qaxanaa Dr. Kaasahuun Goofee ibsaniiru. Ajandaan misoomaa kamiyyuu hirmaannaa ummataan alatti hinmirkanaa’u kan jedhan ministirichi, mootummaan kana xiyyeeffannoo keessa galchuun waltajjiiwwan ummataa walitti aanan taasisaa akka jiru himaniiru. Gaaffiiwwan ummanni kaasu irratti konfiransii kanaan akka mari’atamu ni’eegama.

Guraandhala 15/2017(TOI)- Konfaransiin ummataa guyyoota lamaaf turu Magaalaawwan gurguddoo biyyattii garagaraatti eegalameera. Konfaransichi mata duree “Waadaarraa amma aadeffannaatti” jedhuun murtoowwanii fi kallattiiwwan yaa’ii idilee lammaffaa paartii badhaadhinaa Kanaan dura taa’amerrattii akka xiyyeeffatu ni’eegama. Kunis murtoowwanii fi kannattiiwwan kana ummatatti gadi buusuun hojiirra oolmaasaaf haala mijataa uumuu akka ta’e himameera. Bahaar Daar, Adaamaa, Gondar, Jimma, Dirree Dawaa fi Daseen Magaalaawwan Konfaransiin kun keessatti jalqabe keessaayyu.

Guraandhala 15/2017(TOI)- Konfaransiin ummataa magaalaa Shaggaritti taa’amaa jira. Konfaransiin ummataa sadarkaa biyyaalessaatti har’a irraa eegalee magaalota Itiyoophiyaa gurguddoo 25 keessatti akka taa’amu paartiin badhaadhinaa ifoomsuunsaa niyaadatama. Bulchaan naannoo Amaaraa Araggaa Kabbadaa, ministirri jallisii fi naannawa gammoojjii Dr. Abrihaam Balaay, hoogganaan waajjira Paartii badhaadhinaa magaalaa Shaggar Alamaayyoo Tulluu fi hoogganaan biiroo daldalaa Oromiyaa Masarat Asaffaa Konfaransicharratti argamaniiru. Jiraattonni kutaalee magaalaa Magaalaa Shaggar irraa walitti dhufan Konfaransii ummataa kanarratti hirmaachaa jiru.

Guraandhala 15/2017(TOI)- Konfaransiin ummataa sadarkaa biyyaatti taa’amu magaalaa Arbaa Mincitti eegalameera. Konfaransiin ummataa biyyaalessaa har’a irraa eegalee magaalota gurguddoo 25 keessatti akka taa’amu ibsameera. Konfaransiin Arbaa Minci kun Kantiibaan magaalaa Finfinnee Adaanech Abeebee dabalatee koreen hojii raawwachiisaa Paartii badhaadhinaa fi miseensonni mana maree bakka argamanitti magaalaa Arbaa Mincitti taa’amaa akka jiru odeeffannoon naannoo kibba Itiyoophiyaarraa argame nimul’isa.

Guraandhala 15/2017(TOI)- Konfaransiin ummataa Finfinneetti taa’amaa jira. Konfaransiin ummataa sadarkaa biyyaatti har’aa eegalee magaalaawwan gurguddoo Itiyoophiyaa 25 keessatti akka taa’amu Paartiin Badhaadhinaa ifoomsuun isaa nibeekama. Haala Kanaan Konfaransiin ummataa lammiileen kutaalee hawaasaa garagaraa irraa walitti dhufa irratti hirmaatan Finfinneetti taa’amaa jira. Bulchaan naannoo jiddugaleessa Itiyoophiyaa Dr. Idaashaawu Xaasoo, bulchituun naannoo Gaambeellaa Alamituu Umood, hoogganaan waajjira Paartii Badhaadhinaa damee Finfinnee obbo Mogos Baalchaa waltajjii kana gaggeessaa jiru.

Guraandhala 15/2017(TOI)- Konfaransiin ummataa har’aa eegalee sadarkaa biyyaatti magaalaawwan Itiyoophiyaa garagaraa 25 keessatti akka taa’amu Paartiin Badhaadhinaa beeksise. Konfaransiin kun koree hojii raawwachiisaa Paartichaa fi miseensota mana mareen akka gaggeeffamu ibsameera.

Guraandhala 14/2017(TOI)- Itiyoophiyaan hariiroo gamlamee gamtaa Awurooppaa waliin qabdu kan barootaaf ture caalaatti cimsuuf fedhii cimaa akka qabdu ministirri dhimma alaa Dr. Geediyoon Ximootiwoos ibsan. Walgahiin ministiroota dhimma alaa biyyoota garee G-20 Kibba Afriikaa Johaanisbargitti taa’amaa jiru har’a guyyaa lammaffaa isaati. Gareen jila Itiyoophiyaa ministira dhimma alaa Dr. Geediyoon Ximootiwoosiin durfamu walgahicharratti hirmaachaa jira. Ministirichi walgahii kana cinaatti bakka buutuu olaantuu dhimmoota alaa Awurooppaa fi imaammata nageenyaa fi itti aantuu pirezidaantii komishinii Awurooppaa Kaajaa Kaalaas waliin mari’ataniiru. Qaamonni lamaan walitti hidhata Itiyoophiyaa fi gamtaa Awurooppaa jidduu jiru irratti akkasumas dhimmoota waloo biyyaa, qaxanaa fi idil addunyaa irratti yaada walii qoodaniiru. Ministirri dhimma alaa Dr. Geediyoon Ximootiwoos hariiroo gamlamee bara dheeraa Itiyoophiyaan gamtaa Awurooppaa waliin qabdu caalaatti cimsuuf kutannoo akka qabdu ibsuu isaanii odeeffannoon ministeera dhimma alaarraa argame nimul’isa. #Tajaajila Oduu Itiyoophiyaa#TOI #Itiyoophiyaa #dippilomaasii

Guraandhala 14/2017(TOI)- Manni maree qaama dubartootaa paartii badhaadhinaa Adaamaatti walgahii idilee taa’aa jira. Raawwii baatii jahaa mana marichaa fi murtoowwanii fi kallattiiwwan paartiin badhaadhinaa yaa’ii lammaffaa irratti dabarse irratti nimari’atama jedhameera. Hoogganaan damee ijaarsa aadaa demokiraasii Paartii Badhaadhinaa Mallasee Alamuu wayita kana akka jedhanitti, Paartiin Badhaadhinaa kallattiiwwan milkaa’inoota amma ammaatti argaman sadarkaa olaanaatti ceesisuu dandeessisan kaa’eera. Murtoowwanii fi kallattiiwwan Paartichaa sirnaan hojiirra oolanii bu’aa barbaachisu akka buusan gumaachi dubartootaa guddaa ta’uu dubbataniiru. Badhaadhina biyyaa fi ijaarsa nageenyaa milkeessuuf shoora dubartootaa guddisuun akka barbaachisu eeraniiru. Manni maree Miseensota qaama dubartootaa sKaroorri paartichaa akka milkaa’an ittigaafatama isaanii akka bahan gaafataniiru. Fayyadama dinagdee dubartootaa mirkaneessuuf carraaqqiiwwan gaggeessummaa Paartii Badhaadhinaan jalqabaman galmaan gahuuf miseensonni qaama dubartootaa itti gaafatama isaanii ga’umsaan bahuu akka qaban ibsaniiru.

Guraandhala 14/2017(TOI)- Xiyyaarri leenjii Tsahaay-2 humna qilleensaa RDFI keessatti hojjetamte balallii yaalaa kan jalqabaa milkaa’inaan xumuushee itti aanaan ajajaa humna qilleensaa suphaa olaanaa Aviyeeshinii koloneel Masarat Geetaachoo ibsaniiru. Xiyyaarri Tsahaay-2 leenjii balaliiftotaa fi tajaajiloota biroof ooluu akka dandeesu kan beeksisan koloneel Masarat Geetaachoo, teeknooloojii ammayyaa dirqama kennameef ga’umsaan raawwachuu dandeessisu hidhachuushees ibsaniiru. Balalliin yaalii milkaa’aa kun imala guddinaa humni qilleensaa irra gahe akka mul’isu kan ibsan Koloneel Masarat, fuulduras gara oomishaatti cehuuf warshicha meeshaalee sakatta’iinsaa guutuu fi ogeeyyota ga’oomsuu irratti akka argaman dubbataniiru. Ajajaan Skuwaadiroonii Xiyyaara Geejjibaa fi balaliisaan akkasumas yaalii balallii Xiyyaara Tsahaa-2 milkaa’inaan kan raawwatan Kumaalaa Fiqaaduu Damisee gamasaaniin, Xiyyaarri kun teeknooloojii Xiyyaaraa addunyaan irra gahe kan hidhatte, dandeettiin balali’uu ishees amansiisaa fi mul’ata dhaabbatichi qabateef gumaacha olaanaa kan gumaachitu ta’uu ibsaniiru.

Guraandhala 13/2017( (TOI) - Itiyoophiyaa fi Hindi michoomaa fi tumsa isaanii sadarkaa olaanaatti guddisuuf waliigalaniiru. Ministirri dhimma alaa Dr. Geediyoon Ximootiwoos waltajjii ministiroota dhimm alaa garee 20 Kibba Afriikaa, Johaanisbargitti taa’amaa jiru cinaatti ministira dhimma alaa Hindi Jeeyishaankaar waliin mari’ataniiru. Marii kanaanis gitni isaanii Hindi Jeeyishaankaar Dr. Geediyoon ministira dhimma alaa ta’uun muudamuusaaniif “baga gammaddan” ittiin jedhaniiru. Ministiroonni dhimma alaa kunneen mariisaaniin tumsaa fi michooma biyyoota lamaanii bara dheeraaf ture cimsuu fi sadarkaa olaanaatti ceesisuuf walii galaniiru.

Guraandhala 13/2017(TOI)- Tumsi dippilomaasii gamlamee Itiyoophiyaa fi Ruusiyaa bu’ura cimaarratti kan hundaa’e ta’uu dura teessuun mana maree federeeshinii Ruusiyaa Valentiinaa Matveeyeenkoo ibsan. Valentiinaa Matveeyeenkoo, daawwannaa hojii guyyoota lamaaf Itiyoophiyaatti taasisaa turan xumuranii har’a biyyasaaniitti daabi’aniiru. Af-yaa’iin mana maree federeeshinii Aganyoo Tashaagar buufata Xiyyaaraa idil addunyaa Booleetti argamuun dura teessuu kana gaggeessaniiru. Dura teessuun Valentiinaa Matveeyeenkoo simannaa dinqisiisaa Itiyoophiyaatti isaaniif taasifameef maqaa koo fi garee jilaan guddaa galateeffachuun barbaada jedhaniiru.   Daawwannaa Kanaan guddaa gammaduusaanii fi hariiroon dippilomaasii biyyoota lamaanii akkuma waggoottan darbanii cimaa fi kan hinsochoone ta’ee kan itti fufu ta’uusaa arguusaanii dubbataniiru. Af-yaa’ii Aganyoo Tashaagar gamasaaniin, daawwannaan fi mareen garee jilaa kun guyyoota lamaaf Finfinneetti taasisee bu’a qabeessa akka ture dubbataniiru. Tumsi dippilomaasii Ruusiyaa fi Itiyoophiyaa jidduutti yeroo dheeraaf ture fuulduras cimee akka itti fufu ibsuusaanii odeeffannoon mana maree federeeshiniirraa argame nimul’isa.

Guraandhala 13/2017(TOI)- Tumsi dippilomaasii gamlamee fi heddumminaa Itiyoo-Ruusiyaa kan baratti cehe cimee akka ittifufu Pirezidaantiin RDFI Taayyee Atsqasillaasee ibsan. Pirezidaant Taayyee Atsqasillaasee Af-yaa’ii mana maree federaalaa federeeshinii Ruusiyaa Valentiinaa Matviiyenkoo waliin mari’ataniiru. Marii kunis dhimmoota tumsaa fi michooma dippilomaasii seenaa, siyaasaa fi dinagdee Itiyoophiyaa fi Ruusiyaa cimsuu dandeessisan irratti kan xiyyeeffatedha. Itiyoophiyaa fi Ruusiyaan biyyoota tumsa seena qabeessa gamlamee fi heddumminaa qajeelfamarratti hundaa’e qabanidha jedhan Pirezidaant Taayyeen wayituma kana.   Biyyoonni lamaan tumsi gama saayinsii, barnoota, aadaa akkasumas dameewwan dippilomaasii garagaraan qaban cimee akka itti fufu ibsaniiru. Daawwannaan Af-yaa’iin mana maree federaalaa federeeshinii Ruusiyaa Valentiinaa Matviiyenkoo itiyoophiyaatti taasisan tumsa hundagaleessa biyyoota lamaanii cimsuu akka dandeessisu ibsaniiru. Saayinsii fi Teeknooloojiin akkasumas damee dinagdeen hariiroo cimsuuf kutannoo jirurratti marii taasisuu isaanii dubbataniiru. Af-yaa’ii mana maree federaalaa federeeshinii Ruusiyaa Valentiinaa Matviiyenkoo turtii Itiyoophiyaatti taasisaniin ministira muummee Dr. Abiyyi Ahimad fi hooggantoota dhaabbilee federaalaa biroo waliin mari’ataniiru.

Guraandhala 13/2017(TOI)- Komishiniin marii biyyaalessaa waggaa tokko keessatti hojiiwwan hafan xumuruun ajandaa bocee akka ifoomsu Piroofeesar Masfin Ar’ayaa beeksisan. Komishinichi raawwii hojii waggoottan sadan darbanii fi hojii waggaa tokko keessatti hojjetu ilaalchisuun har’a gaazexessitootaaf ibsa kenneera. Komishinarri olaanaa komishinichaa Pirofeesar Masfin Ar’ayaa, akka ibsanitti, komishinichi waggaa tokko keessatti hojiiwwan hafan xumuruun marii adeemsisuuf nihojjeta. Dabalataanis hirmaattota qaamolee diyaasporaa kan fo’atu yoo ta’u hirmaattota yaa’ii maree bakka buusuuf kan hojjetu ta’uu ibsaniiru. Haala Kanaan waggaa tokko kana keessatti ajandaa bocuu fi ifoomsuu, gorsitoota fi mijeessitoota akka adda baasus eeraniiru. Yaada mareerraa argatu qindeessee kan dhiheessu ta’uus dubbataniiru. Sosochii biyyaalessaa uumuun hubannoon akka uumamu kan hojjetu ta’uus beeksisaniiru.

Guraandhala 13/2017 (TOI) Hojiiwwan walitti hidhamiinsa hawaasummaa fi dinagdee ummtoota daangaa naannolee Oromiyaa fi Gaambeellaa guddisuuf jalqabaman caalaatti cimanii akka itti fufan ibsame. Naannoleen Oromiyaa fi Gaambeellaa waltajjii maree hariiroo mootummootaa cimsuuf dandeessisu har’a magaalaa Gaambeellaatti taa’ameera. Hoogganaan biiroo Nageenyaa fi tasgabbii naannoo Gasmbeellaa obbo Maahibar Koor waltajjichi yoo banamu akka jedhanitti, ummattoonni naannoo Oromiyaa fi Gambeellaa walitti hidhata bara dheeraa qabu.   Walitti hidhata dinagdee fi hawaasummaa cimsuuf carraaqqiin waliin jalqabaman nicimu jedhaniiru. Hoogganaan waajjira qindeessaa nageenyaa fi misoomaa naannoo Oromiyaa, Gaambeellaa fi Beeniishaangul Gumuz obbo Firoomsaa Salamoon waltajjicharratti akka jedhanitti, nageenyaa fi misooma egeree ummata daangaa naannolee lmamaanii mirkaneessuuf waloomaan hojjetamaa jira. Keessumaa tokkummaa fi obbolummaa ummattoota naannolee lamaanii jidduu jiru caalaatti cimsuuf hojiileen qindoominaan jalqabaman kan nama onnachiisu ta’uu dubbataniiru.   Waltajjiin maree har’aas nageenyaa fi misoom waloo godinaalee fi aanaalee naannolee lamaanii mirkaneessuuf kan akeekame ta’uu ibsaniiru. Hooggantoonni aanaalee fi godinalee daangaa naannolee lamaanii waltajjicharratti hirmaachaa jiru.