Tapha Gulaallii Itiyoophiyaa fi Jibutii Waancaa addunyaa

Bitootessa 15/2017 (TOI)-Gareen biyyaalessaa Itiyoophiyaa gulaallii zoonii Afriikaa Waancaa addunyaa Fiifaa 23ffaa tapha ramadii 6ffaa har’a Jibutii waliin nitaphata.

Biyyoonni lamaa galgala sa’aatii 6tti Moorookoo  magaalaa El Jediikoo Istaadiyeemii El Abdiitti  nitaphatu.

Gareen biyyaalessaa Itiyoophiyaa tibbana tapha ramaddii shanaffaa goolii 2 fi 0n mo’atameera. Ramaddii tokkoo keessaa qaxii sadihiin sadarkaa saddettaffaarratti argamu.

Jibutiin Burkiinaafaassoo waliin tapha gulaallii taphatteen goolii 4 fi 1n mo’amteetti. Gareen kun qabxii 1n sadarkaa jahaffaarratti argama.

Gareen biyyaalessaa Itiyoophiyaa kaleesa tapha shaakalaa taasisuusaa odeeffannoon TOI’n Federeeshinii kubbaa miilaa Itiyoophiyaa irraa argate nimul’isa.

Waancaa addunyaa Fiifaa 23ffaa A.L.A bara 2026 adeemsifamu Ameerikaa, Kaanaadaa fi Meeksikootu waliin qopheessa. Seenaa dorgommii Kanaan yeroo jalqabaaf biyyoonni 48 nihirmaatu.

Biyyoonni Afriikaa 54 ramaddii 9 qoodamanii Waancaa addunyaarratti hirmaachuuf tapha gulaallii taasisaa jiru.

Afriikaan biyyoota 9 Waancaa addunyaarratti kallattiin nihirmaachifti. Kanaan dura Afriikaarraa biyyoota 5 qofatu Waancaa addunyaarratti hirmaatu ture.

 Gareen Afriikaa tokko biyyoota Ardii biroo keessa jiran waliin tapha mo’anii darbuu yoo mo’ate biyya 10ffaa ta’uun Afriikaa kan bakka bu’u ta’a.