Itiyoophiyaan shaampiyoonaa atileetiksii mana keessaa addunyaa irratti atileetota 12n bakka bu’uun ni hirmaatti

Bitootessa 10/2017 (TOI)- Shaampiyoonaa Atileetiksii Addunyaa 20ffaa mana keessaa Bitootessa 12 hanga 14 bara 2017TTI Chaayinaa Naanjiingitti gaggeeffama.

Jilli atileetiksii Itiyoophiyaa shaampiyoonaa kana irratti hirmaatu kaleessa galgala

 Garasitti imaleera..

Ministeera aadaa fi Ispoortiitti de’eetaan ministiraa damee misooma Ispoortii  obbo Makkiyyuu Mahaammad jila kana gaggeessaniiru.

Atileetotni kunneen injifannoon deebi’anii dirree addunyaa irratti alaabaa Itiyoophiyaa akka olkaasan amantaa qaban ibsaniiru.

Ummanni Itiyoophiyaa injifannoo waan barateef, imaanaa isiniif kenname fudhanii injifannoo murteessaa akka argattan amantaa guutuun qaba jedhaniiru.

De’eetaan ministiraa kun guddina atileetiksii irrattis mootummaan xiyyeeffannoo addaa kennaa akka jirus akeekaniiru.

Prezdaantiin Federeeshinii Atileetiksii Itiyoophiyaa Komaandar Atleet Silashii Sihin fi miseensonni koree hojii raawwachiiftuu federeeshinichaa Sirna gaggeessaa irratti argamaniiru.

Jilli kun atileetota 12, leenjistoota lama, hogganaa garee, hogganaa garee teeknikaa, ogeessa fayyaa olaanaa, fi ogeessa fayyaa qaamaa kan of keessaa qabu ta’uu odeeffannoon federeeshinii irraa argame ni mul’isa.

Dorgommii meetira 800 dubartootaan Tsigge Dhugumaa, Habtaam Alamuu, fi Ngisti Getachew Itiyoophiyaa bakka bu'uun ni hirmaatu.

Gudaaf Tsaggaay, irrirbee Waltajjii, fi Woarkninash Malasee atileetota dorgommii meetira 1,500 dubartootaati.

Fiigicha meetira 3,000 dubartootaa irrattis Fireeweyinii Hayiluu fi Birqee Hayyeloom hirmaachaa jiru.

Dorgommii dhiiraatiin ammoo Barrihuu Aragaawii, Biiniyaam Mahaarii, fi Geetinnat Waalee fiigicha meetira 3000 dhiirotaa irratti ni hirmaatu.

Fiigicha meetira 1,500 irratti atileet Mallasaa Nibrat nihirmaata.

Fiigicha meetira 1,500 irratti kan hammatame atileet Saamu’eel Tafaraa sababa dhukkubaatiin garee kana keessaa akka hafe gabaafameera.

Shaampiyoonaa atileetiksii addunyaa mana keessaa 20ffaa irratti biyyoota 127 irraa atileetonni 570 ol akka hirmaatan atileetiksiin addunyaa beeksiseera.