Tajaajilli guyyoota fudhachaa ture gurmaa’insa gandaa haaraan sa’aatii keessatti kennamaa jira

Bitootessa 19/2017(TOI)- Naannoo Oromiyaatti tajaajilli guyyoota fudhachaa ture gurmaa’insa gandaa haaraan sa’aatii keessatti argacha akka jiran jiraattonni godina Baha Shawaa ibsan.

Fayyadamtoota keessaa jiraattota aanaa Luumee TOI’n dubbise gurmaa’insi ganda jiddugaleessa godhate tajaajilli si’ataan maallaqaa fi humna qusatu kan itti kennamu ta’uu ibsaniiru.

Jiraataan aanaa Luumee ganda Dibaandiibaa Isheetuu Mitikkuu, gurmaa’insii fi hojmaatichi gandatti osoo gad hin bu’iin dura tajaajila barbaacha karaa fagoo deemuun aanaa dhaqanii tajaajila argachuuf guyyoota akka itti fudhatu yaadataniiru.

Tajaajilli gurmaa’insa gandaa haaraan erga jalqabamee booda tajaajilli guyyoota itti fudhatu sa’aatii keesatti tajaajila si’ataa argachaa akka jiran ibsaniiru.

Gurmaa’insa gandaa haaraan ogeessa leenji’ee fi hojmaata ammayyaan tajaajilli kennamaa waan jiruuf hundi keenya gammanneerra jedhan.

Hojmaata akkasii gandoota naannichaa hundaan gahuun hojmaatileen dadhabbii fi bu’aa bahii hambisan cimanii akka itti fufan gaafataniiru.

Anaa kanatti jiraataan ganda Kolba Godee obbo Masfin Dannaqaa, gurmaa’insa haaraan dura keessumaa dhimma lafaa rawwachiisuun rakkisaa fi dadhabsiisaa turuu yaadataniiru.

Guyya guyyaan deddeebi’uun bu’aa bayii fi baasii hinmalleef saaxilamaa jiraachuu eeranii, gurmaa’insa gandaa haaraan tajaajila kennamutti gammanneerra jedhan.

Kana dura aanaa Luumee magaalaa Mojootti deddeebi’uun bu’aa bayiif saaxilamuun gamatti hooggansi yeroosii tajaajila dadhabaa waan kennuuf rakkoon bulchiinsa gaarii tureera kan jedhan ammoo jiraataa aanichaa obbo Yaamii Kormeedha.

Yeroo ammaa ganda keenyatti tajaajila si’ataa argachaa waan jirruuf bu’aa bahii hedduu jalaa baaneerra jedhaniiru.

Godinichatti itti aanaan dura taa’aa fi hoogganaan waajjira qonnaa ganda Kolba Godee obbo Tasfaayee Hayiluu, gandichatti tajaajilli si’ataan kennamaa akka jiru dubbataniiru.

Bulchaan godina Shawaa bahaa obbo Abbaabbuu Waaqoo, ummataaf tajaajila si’ataa kennuuf caasaa gandaa godinichaa sirreessuun hojmaata haaraan hojiitti galamuu ibsaniiru.

Gurmaa’insichi keessumaa dargaggootaaf carraa hojii uumuun fi gandatti bu’ura misoomaa bal’isuu fi nagaa fi tasgabbii eeguun gumaacha guddaa akka qabu kaasaniiru.

Manneen hojii gandootaa Godinichaa 302 keessatti ijaaramaa jiran keessaa 61 xumuramuusaanii ibsanii, hooggantoonni kuma 2 fi 700 gandoota godinichaatti ramadamanii tajaajila kennaa jiru jedhaniiru.