Duudhaalee fakkeenya Waloomaa, nagaa fi waliif yaaduu Fiichee Cambalaalaa eeguun nibarbaachisa

Bitootessa 19/ 2017 (TOI)- Duudhaalee fakkeenya Waloomaa, nagaa fi waliif yaaduu Fiichee Cambalaalaa eeguun tursuun nibarbaachisa jedhan bulchitoonni naannolee ayyaanicharratti argaman.

Jijjiirraa bara haaraa Sidaamaa kan ta’e Fiichee Cambalaalaan kabajamaa jira.

Bulchaan naannoo Sidaamaa obbo Dastaa Leedaamoo ayyanicharratti ergaa dabarsaniin, duudhaalee fakkeenya Waloomaa, nagaa fi waliif yaaduu Fiichee Cambalaalaa osoo wal hinmakiin hundi eeguu qaba jedhan.

Sidaamaan sirna kaalaandaraa ofiisaa kan qabu ta’uu kaasanii, sirna Kanaan deeggaramuun ayyaanni Fiichee Cambalaalaa akka kabajamu ibsaniiru.

Pirezidaantiin naannoo Oromiyaa obbo Shimallis Abdiisaa, Fiichee Cambalaalaan ayyaana yeroon, beekumsii fi falaasamni itti ifoomedha jechuun ibsan.

Abbootii ayyaanichi hambaa addunyaa akka ta’u eeganii tursan galata qabu kan jedhan obbo Shimallis, ayyaanichi kan hunda keenyaa ta’uu ibsuuf Gudumaalleetti argamuusaanii dubbatanii ayyaanichi kan nagaa fi gammachuu akka ta’u hawwaniiru.

Bulchaan naannoo Somaalee obbo Musxajee Mahaammad gamasaaniin, ayyaanichi walitti hidhata ummattootaa cimsuuf akka gargaaru dubbataniiru.

Ayyaanni Fiichee Cambalaalaa nagaa fi waloomaan baratti cehuu kan agarsiisuayyaan guddaa ta’uu kaasanii, ayyaanichi eegamee akka turu hundi ittigaafatama qaba jedhan.

Bulchaan naannoo kibba Itiyoophiyaa obbo Xilahuun Kabbadaa Fiichee Cambalaalaan hambaa addunyaa akka ta’u kan gumaachan abbootiin Sidaamaa galateeffamuu qabu jedhaniiru.

Ayyaanichi walitti hidhataa fi tokkummaa ummataa kan cimsu waan ta’eef eeguun tursuun akka barbaachisu himaniiru.

Erga hambaa addunyaatti waggaa 10ffaa kan qabate Fichee Cambalaalaan Hawaasaa Sooressaa Gudumaalleetti kabajamaa jira.