Itiyoophiyaa fi Keeniyaan tumsa tajaajila Gumurukii cimsuuf waliigalan

Bitootessa 19/2017 (TOI)- Itiyoophiyaa fi Keeniyaan tumsa tajaajila Gumurukii cimsuuf walitti dhiheenyaan hojjechuuf waliigalan.

 Mariin komishinii Gumurukii Itiyoophiyaa fi abbaa taayitaa galiiwwanii Keeniyaa jidduutti guyyoota lamaaf Finfinneetti taa’amaa ture xumurameera.

Komishinariin komishinii Gumurukii Itiyoophiyaa Dabalee Qaabataa, biyyoonni lamaan buufataalee daangaa jiddugala tokkoo bal’isuun tajaajila Gumurukii naannawa daangaa salphaa fi si’ataa gochuuf fuulduraaf waliin hojjechuuf waliigalteerra gahuu ibsaniiru.

Dursaan garee abbaa taayitaa Gumurukii Keeniyaa Moses Muuyaa gamasaaniin, sochiin daldala addunyaa akka malee dabalaa fi walxaxaa dhufuusaa ibsanii, dhaabbileen Gumurukii biyyoota lamaanii kana hubachuun qindoominaan hojjechuu akka qaban himaniiru
.

Marii Kanaan cinaattis jilli abbaa taayitaa Gumurukii Keeniyaa jiddugala konveenshinii idil addunyaa Addis fi jiddugala egzibiishinii fi hojiilee misoomaa biroo daawwachuusaanii odeeffannoon komishinii Gumurukii irraa argame nimul’isa.