Xaa’oo biyya keessatti oomishuun faayidaa dinagdeen alatti faayidaa hedduu qaba-hayyoota dinagdee

Bitootessa 20/2017(TOI)- Xaa’oo biyya keessatti oomishuun guddina dinagdee dabaluun alatti faayidaa hedduu akka qabu hayyoonni dinagdee ibsan.

Utubaa dinadee kan ta’e qonna guddisuun hojii bulfamu akka hintaane ogeeyyonni sektarichaa nidubbatu.

Sektara kana guddisuuf hudhaalee galteewwan akka xaa’oo egereef furuun murteessaa ta’uu kaasu hayyoonni.

Ministirri muummee Dr. Abiyyi Ahimad ibsa tibbana mana maree bakka bu’oota ummataaf taasisaniin, oomishaa fi oomishtummaa qonnaa dabaluuf yaalii taasifameen bu’aaleen qabatamaa galmaa’uu kaasaniiru.
 

Dhiheessii fi fedhii xaa’oo irratti rakkoon akka jiru ibsanii, mootummaan warshaa dhaabuun xaa’oo alaa galu bakka buusuun furmaata egeree ta’uu kaasaniiru.

Kun ammoo Hidha haaromsaa guddichatti aansuun pirojektii Itiyoophiyaanonni milkeessuu qaban akka ta’e himaniiru.

Galtee oomishaa murteessoo keessaa xaa’oon tokko yoo ta’u, biyya bitamerraa biyya galfamee qonnaan bulaa harka amma qaqqabutti baasii fi yeroo guddaa kan fudhatu ta’uu hayyoonni dinagdee TOI’tti himaniiru.

Hayyuun dinagdee Dr. Guutuu Teessoo dinagdeen Itiyoophiyaa guddachaa dhufuu ibsanii, guddina dinagdeef sektarri qonnaa qooda olaanaa akka qabu kaasaniiru.

Oomishii fi oomishtummaan qonnaa akka dabalu teeknooloojiin haaraa fi dhiheessii akka xaa’oo murteessaadha jedhaniiru.

Xaa’oo sharafa olaanaan biyya alaatii galchuun waan tokko ta’ee qonnaan bultoota fagoo jiran biraan gahuun rakkoo tokko ta’uu kaasaniiru.

Warshaan xaa’oo ijaaramuunsaa namoota hedduuf carraa hojii uumuurra darbee xaa’oo biyya alaaf dhiheessuun sharafa biyya alaa argachuuf shoora guddaa akka qabu ibsaniiru.

Warshaa xaa’oo ijaaruun faayidaa dinagdeerra darbee nageenya biyyaalessaa eeguu akka ta’e kan ibsan ammoo Inistiitiyuutii qu’annoo imaammata Itiyoophiyaa ekonoomistii dinagdee gooroo Dr. Tawaldee Girmaayidha.

Warshicha dhaabuun dandeettii wabii nyaataa biyyaa gama mirkaneessuun faayidaa olaanaa akka qabaatu ibsu.

Ministeera qonnaatti hojii raawwachiisaan hariiroo ummataa fi komunikeeshinii Kabbadaa Laaqoo gamasaaniin, ijaarsi warshaa xaa’oo sektara qonnaa Itiyoophiyaan itti milkaa’aa jirtuuf caalaa akka guddatu qooda guddaa qaba jedhan.

Hojiileen kuduraa fi uduraan jalqabaman bal’isuufis xaa’oo oomishuun sektarichaaf hiikoo guddaa qaba jedhaniiru.

Itiyoophiyaanonni hidha haaromsaa Itiyoophiyaa guddicha xumuraan gahuu kaasanii, warshaan xaa’oo kun pirojektii biyyaalessaa isa guddaa waan ta’eef tumsa hundaa akka gaafatu dubbataniiru.