Dhaabbatichi pirojektii bishaan dhugaatii Samaraa magaalaa Loogiyaatti ijaarsise eebbisiise

Bitootessa 20/2017(TOI)- Dhaabbanni tajaajila geejjiba galaanaa fi loojistiksii Itiyoophiyaa pirojektii bishaan dhugaatii Samaraa bulchiinsa magaalaa Loogiyaatti ijaarsise eebbisiise.

Hojii raawwachiisaan olaanaa geejjiba galaanaa fi loojistiksii Itiyoophiyaa Dr. Bariisoo Amaloo, hojii raawwachiisaan olaanaa Itiyoophiyaa Invastimant Hooldiingis Itiyoophiyaa Dr Biruuk Taayyee, kantiibaan bulchiinsa magaalaa Samaraa Loogiyaa Abduu Muusaa dabalatee hooggantoonni biroo fi jiraattonni sagantaa eebbaarratti argamaniiru.

Hojii raawwachiisaa olaanaan Dr. Bariisoo Amaloo wayita kana akka jedhanitti, dhaabbatichi bakkeewwan garagaraatti hojii misoomaarratti hirmaachuun qoodasaa bahaa jira.

Pirojektiin bishaan dhugaatii qulqulluu bakka buufannii fi tarminaaliin Samaraa argamutti ijaarame kun gaaffii hawaasaa deebisuuf kan gargaaru ta’uu dubbataniiru.

Pirojektii kanaaf Birriin miiliyoona 11 tuqaa 4 baasii taasifamuu ibsaniiru.

Kantiibaan bulchiinsa magaalaa Samaraa Loogiyaa Abduu Muusaa Gamasaaniin, dhaabbatichi jiraattota naannawa buufataa fi tarminaalaa Samaraa gargaaruun dirqama hawaasummaa bahaa jira jedhan.