Jijjiirama Bitootessa 24’n argame ummanni fayyadama misoomaa akka ta’u kan taasisedha

Bitootessa 20/2017 (TOI)- Jijjiirama Bitootessa 24’n argame ummanni fayyadama misoomaa akka ta’u kan taasise ta’uu namoonni yaada kennan ibsan.

Bitootessa 24 sababeeffachuun naannoo Oromiyaatti sosochiin Ispoortii kutaalee garagaraa hirmaachise taasifameera.

Sosochiin Ispoortii kun kan taasifame Bitootessa 24 guyyaa mootummaan jijjiiramaa aangootti dhufee fi bu’urri hidha haaromsaa Itiyoophiyaa guddichi itti kaa’ame sababeeffachuuni.

Sosochiin Ispoortii kun Magaalaalee Maayaa, Jimma, Mattuu, Gimbii. Naqamte, Ambo fi magaalaawwan naanno birootti akka ta’e beekameera.

Sirna magaalaa Mayaarratti itti aanaan Af-yaa’ii caffee Oromiyaa Eliyaas Ummataa, bulchaan godina Harargee Bahaa adde Miskii Mahaammad, Kantiibaan magaalaa Mayaa Dr. Iifraah Waziir hooggantoonni olaanoo godinichaa fi bulchiinsa magaalichaa argamaniiru.

Itti aanaan Af-yaa’ii caffee Oromiyaa Eliyaas Ummataa, jijjiirama Bitootessa 24’n argame fayyadama dinagdee ummataa kan guddisedha jedhan.

Milkaa’ina hdha haaromsaa Itiyoophiyaa guddichaaf hawaasni deeggarsa jalqabe cimsee akka itti fufu wayituma kana waamicha taasisaniiru.

Hoogganaan biiroo qonnaa naannoo Oromiyaa obbo Geetuu Gammachuu sagantaa Jimmatti taasifamerratti argamuun Imala inisheetiivota qonna naannoo fi misooma magaalaatti jalqabame itti fifsiisuuf nihojjetama jedhaniiru.

Kantiibaan magaalaa Jimmaa obbo Xahaa Qamar gamasaaniin, walqabannee misooma si’achiisuun hiyyuma jalaa miliquu qabna jedhaniiru.

Itti aanaan bulchaa godina Baha Booranaa obbo Taajuraa Odaa sagantaa Nagallee Booranaa irratti argamuun akka jedhanitti, hidhi haaromsaa Itiyoophiyaa guddichi bu’ura jiraachuu keenyaa ibsituu duudhaalee keenyaa tokkummaa fi tumsaa waan ta’eef qabeenya hunda keenyaati jedhaniiru.

Ijaarsi hidha haaromsaa amma xumuramutti ummanni godinichaa deeggarsa akka itti fufu gaafataniiru.

Hirmataan sosochii Ispoortichaa Caalaa gaddafaa yaada kenneen, dorgommii yaadannoo hidha haaromsaa seena qabeessaa kana mo’achuu kootti gammadeera jedhe.

Faasituu Kookkoo gamasheetiin, Itiyoophiyaanonni yoo tokko taane bu’aa kanneen biroofillee ta’u galmeessisuuf dandeettii qabna jetteetti.

Hirmaattota sosochii Ispoortii Mattuutti taasifame keessaa dargaggoo Taammiraat Asaffaa fi shamarree Ayyaantuu Tashoomaa , Bitootessi 24 bu’aa qabsoo waloo Itiyoophiyaanotaa, boqonnaan guddinaa fi Badhaadhina biyyaa mirkaneessu kan itti baname guyyaa seena qabeessa jedhaniiru.