Waggoottan jijjiiramaatti sirna daldalaa si’achiisuun fi dhiheessii guddisuun amma qaal’ainsa gatii fooyyessuun danda’ameera-Ministira Dr. Kaasahun Goofee

Bitootessa 23/2017(TOI)-Mootummaan jijjiiramaa sirna daldalaa si’achiisuun fi dhiheessii guddisuun amma qaal’ainsa gatii fooyyessuun danda’amuu ministirri qaxanaa fi walitti dhufeenya riijinii Dr. Kaasahun Goofee ibsan.

Ministirichi turtii TOI waliin taasisaniin, adeemsi jijjiiramichaa sektara hawaasummaa, dinagdee fi siyaasaa kaleessa ija badiin ilaaluu osoo hinta’iin idaas mindaas gochuun nihubata.

Damee daldalaan qormaannii fi carraaleen dalda biyya keessaa fi biyya alaa akkasumas qulqullina mirkaneessuun turan sakatta’amaniiru jedhan.

Itiyoophiyaa badhaate dhugoomsuuf dogoggora sirreessuu f cimina itti fufsiisuun bu’ura jijjiiramaa ta’uu eeranii, baay’inaa fi dandeettii dorgommii fooyyessuun rakkoo furuurratti dandeettii gabbataa ijaaruun akka danda’ame ibsaniiru.

Sirna daldalaa Itiyoophiyaa ammayyeessuuf hojmaatileen fooyya’uu eeranii, haala eyyamni daldalaa itti kennamu gabaabsuun milkaa’uun akka danda’ame dubbataniiru.

Appilikeeshinii sirni galmee eyyama daldalaa onlaayinii hojjechuun tajaajilamtoonni mana isaaniitti keessummeeffamuu akka danda’an taasifamuu eeraniiru.

Qaala’iinsa jireenyaa hir’isuun oomishaalee bu’uraa dabalatee dhiheessii fooyyessuuf hojjetamuu ibsaniiru.

Keessumaa sagantaan maaddii guutuu yaada ministirri muummee Dr. Abiyyi Ahimad maddisiisaniin eegalame oomishaa fi oomishtummaa magaalaatti guddisuun dhiheessii oomishaa fooyyessuun danda’ameera jedhaniiru.

Dhiheessii oomishaa guddisuurra darbee hawaasa daldalaa irratti sirna to’annoo cimaa diriirsuun daballii gatii hinmalle to’achuuf tarkaanfiinfudhatamuu ibsaniiru.

Haala Kanaan daballiin gatii Itiyoophiyaa kan biyyoota biroon wal bira yoo qabamu sadarkaa fooyya’aarra akka jiru dubbataniiru.