Itiyoophiyaan riifoormii dippilomaasii faayidaa biyyaalessaa kabachiisnii fi lammiileeshee fayyadamaa taasisan raawwatteetti

Bitootessa  23/2017(TOI)- Waggoottan jijjiiramaa darban Itiyoophiyaan riifoormii dippilomaasii faayidaa biyyaalessaa kabachiisnii fi lammiileeshee fayyadamaa taasisan raawwachuushee mana maree bakka bu’oota ummataatti itti aanaan walitti qaba koree dhaabbataa hariiroo alaa fi dhimmoota nageenyaa Dr. Fatiih Mahaadii ibsan.

Mana maree bakka bu’oota ummataatti itti aanaan walitti qaba koree dhaabbataa hariiroo alaa fi dhimmoota nageenyaa Dr. Fatiih Mahaadii TOI waliin turtii taasisaniiru.

Itiyoophiyaan waggoota jijjiiramaa darbanitti riifoormii dippilomaasii faayidaa biyyaalessaa kabachiisnii fi lammiileeshee fayyadamaa taasisan raawwachuushee dubbataniiru.

Riifoormii taasifameen hojiileen qajeelfamootaa fi imaammattoota hojmaataa, caaseffamaa, teeknooloojii, misooma qabeenya namaa sirreessuun hojjetamuu ibsan.

Hojiileen jijjiiramaa hojjetaman caaseffamni Itiyoophiyaa madaaluu fi dhageettiishee guddisu uumuu akka dandeessise kaasaniiru.

Itiyoophiyaan Waliigaltee Piriitooriyaa fi Ankaaraa dabalatee rakkooleen Afriikaa Afriikaanotaan akka furamu kutannoon argisiifte bu’aa dippilomaasii bilchina qabuuti jedhan.

Imaammanni dhimma alaa Itiyoophiyaa isheerra darbee biyyoota ollaa akka fayyadu yaadamee bocamuusaa beeksisaniiru.

Hariiroo gamlamee fi  biyyoota hedduu biyyoota ollaa waliin jiru guddisuuf hojii hojjetameen gama dippilomaasiin milkaa’inni olaanaan galmaa’uu fakkeenya kaasaniiru.

Itiyoophiyaan waltajjiiwwan biyyoota hedduun hirmaannaan qabaachaa turte miseensummaa BIRICS’tti akka galmooftu taasisuusaa yaadachiisaniiru.

Itiyoophiyaan yeroo dheeraaf qabeenyashee akka hinfayyadamne dhiibbaan biyya alaa irratti taasifamaa turuu yaadachiisanii, waggoottan jijjiiramaa dippilomaasiitti fayyadamuun dhiibbaa jiru maqsuun danda’ameera jedhan.

Keessumaa hammattoon tumsa sulula Abbayyaa akka mallatteeffamu Itiyoophiyaan adeemsa dippilomaasii bu’a qabeessa fayyadamuushee eeranii, ulaa galaanaa ilaalchisee karaa faayidaa biyyaalessaa kabajeen gaaffii dhiheessuushee himaniiru.

Mana maree bakka bu’oota ummataatti miseensi koree dhaabbataa hariiroo alaa fi dhimmoota nageenyaa ambaasaaddar Diinaa Muftii gamasaaniin, jijjiiramni gama dippilomaasiin biyyattiitti adeemsifame milkaa’inni akka galmaa’u taasiseera jedhan.

Keessumaa hariiroo biyyoota ollaa waliin jiru guddisuuf karaan deemame milkaa’aa akka turee fi hidha haaromsaa irratti hojiin bu’a qabeessi hojjetamuu dubbataniiru.