Kaanaadaan tumsa Itiyoophiyaa waliin qabdu cimsuu barbaaddi—ambaasaaddar Jooshuwaa Taabaar

Bitootessa 23/2017(TOI)- Kaanaadaan tumsa Itiyoophiyaa waliin qabdu caalaatti cimsuuf fedhii akka qabdu Itiyoophiyaatti ambaasaaddarri Itiyoophiyaa Jooshuwaa Taabaar ibsan.

Itiyoophiyaatti ambaasaaddarri Kaanaadaa Jooshuwaa Taabaar turtii TOI waliin taasisaniin Itiyoophiyaa fi Kaanaadaan hariiroo dippilomaasii A.L.A bara 1965 jalqabuusaanii yaadachiisaniiru.

Hariiroon biyyoota lamaanii gama dippilomaasii, dinagdee fi walitti dhufeenya ummattootaan akkasumas tumsi biyyoota hedduu cimaa dhifuu himaniiru.

Lammiileen Itiyoophiyaa kuma 50 caalan Kaanaadaa akka jiraatan eeranii, hariiroon gamlamee caalaa akka cimu sababa ta’uu ibsaniiru.

Balalliin guyya guyyaa Finfinnee fi Tooroontoo Jidduu jiru walitti dhufeenyi biyyoota lamaanii akka guddatu taasiseera jedhan.

Kaanaadaan deeggarsi misoomaa Itiyoophiyaaf taasiftu cimaa dhufuu ibsanii, keessumaa walqixxummaa sirna saalaa,  oomishtummaa qonnaa fi deeggarsa namoomaarratti kan xiyyeeffatedha jedhaniiru.

Dureeyyiin Kaanaadaa Invastimantii Itiyoophiyaatti hirmaachuu ibsanii, biyyoonni lamaan gama Aviyeeshiniin tumsisaanii guddachaa dhufuu kaasaniiru.

Bunni, bu’aaleen hojii harkaa fi oomishaaleen huccuu gabaa Kaanaadaatti fudhatamnisaanii cimaa dhufuu dubbatan.

Gama biraan Kaanaadaan loltoota duraanii hidhannoo hiiksisuu fi adeemsa haaromsaa (DDR) deeggaraa akka jirtu ibsaniiru.