ኣብ ክልል ኣምሓራ ባህሊ ስራሕ ምሸት ብምዕባይ ልምዓት ኮሪደር ጭቡጥ ውፅኢት እናርኣየ እዩ-ርእሰ ምምሕዳር ኣረጋ ከበደ

 

ባህር ዳር/ሕዳር/ 4/2017 (ኢዜኣ) ኣብ ክልል ኣምሓራ ዝሳለጥ ዘሎ ልምዓት ኮሪደር ምስሊ ከተማታት ካብ ምቕያር ብተወሳኺ ባህሊ ስራሕ ኣብ ምምዕባል እውን ጭቡጥ ለውጢ እናርኣየ ከምዝኾነ ርእሰ ምምሕዳር እቲ ክልል ኣይተ ኣረጋ ከበደ ገሊፆም።

ሓለፍቲ ስራሕ መንግስቲ ክልል ኣምሓራን ምምሕዳር ከተማ ባህር ዳርን ምንቅስቓስ ስራሕ ምሸት ልምዓት ኮሪደር ከተማ ባህር ዳር ተዓዚቦም።

ርእሰ ምምሕዳር እቲ ክልል ኣይተ ኣረጋ ከበደ ኣብዚ እዋን ከምዝበልዎ፤ ኣብቲ ክልል ባህር ዳር ሓዊሱ ኣብ 8 ዋና ዋና ከተማታት ልምዓት ኮሪደር እናተሳለጠ እዩ።

ብፍላይ ድማ ኣብ ከተማታት ባህር ዳርን ጎንደርን ስራሕ ልምዓት ኮሪደር ብዝተዋደደን ብሙሉእ ዓቕምን እናተሳለጠ ይርከብ ኢሎም።

እቲ ልምዓት ኮሪደር ብፅሬትን ቅልጣፈን ብምዝዛም ንሕብረተሰብ ክፍቲ ንምግባር ስራሕቲ ብምሸት እናተሳለጡ ከምዝኾነ ብምሕባር፤ እዚ እውን ባህሊ ስራሕ ምሸት ኣብ ምዕባይ ጭቡጥ ለውጢ እናርኣየ ከምዝኾነ ገሊፆም።

እቲ ስራሕ ልምዓት ኮሪደር ምስሊ ከተማታት ካብ ምቕያር ብተወሳኺ ንብርክት ዝበሉ ወገናት ዕድል ስራሕ ብምፍጣር ኢኮኖሚያዊ ተረባሕነት ዜጋታት እናረጋገፀ ከምዝርከብ ተዛሪቦም።

ልምዓት ኮሪደር ሓዊሱ ካልኦት ረብሓ ህዝቢ ዘረጋግፁ ስራሕቲ ልምዓት ንምስላጥ ሰላም ኣገዳሲ ስለዝኾነ ሰላም ንምሕላው ኩሉ ክረባረብ ከምዘለዎ እውን ኣገንዚቦም።