አዲስ አበባ/ለካቲት /14/2017(ኢዜአ)አብ ቐፅሪ ሓይሊ አየር ኢፌዴሪኢ ዝተሰርሓት አውሪፐላን ፀሃይ - 2 ፈላሚ ፈተነ በረራአ ብዓወት ምዝዛማ ምኸትል አዛዚ ሓይሊ አየር ማእከል ከቢድ ፅገና ኮሎኔል መሰረት ጌታቸው ገሊፆም። አውሮፕላን ፀሃይ -2 ንመሰልጠኒ በረራን ንካልዖት አገልግሎታት ምውዓል እትኸእል ምኹና ዘፍለጡ ኮሎኔል መሰረት ጌታቸው ንዝተውሃባ መደብ ብብቐዓት ክትፈፅም ዘኸእላ ናይ እዚ ዘመን አቭዬሽን ቴክኖሎጂ ከምትዓጠቐት ሓቢሮም።

  አዲስ አበባ/የካቲት/10/2017/ዩኒቨርሲቲ ሳይንስን ቴክኖሎጅን ኣዲስ ኣበባ ኣጀንዳ 2063 ዘዕዉቱን ቑጠባዊ ዕብየት ዘመዝግቡን መፅናዕትታትን ምርምራትን እናሰርሐ ምዃኑ ኣፍሊጡ። ዩኒቨርስቲ ሳይንስን ቴክኖሎጅን 9ይ ዓለም ለኻዊ ዓመታዊ ጉባኤ መፅናዕትን ምርምርን እናሳለጠ ይርከብ። ኣብ መኽፈቲ እቲ ጉባኤ መደረ ዝገበሩ ፕሬዝዳንት ዩኒቨርሲቲ ሳይንስን ቴክኖሎጅን ኣዲስ ኣበባ ደረጀ እንግዳ(ዶ/ር)፤ እቲ ዩኒቨርሲቲ ንሃገር ኢኮኖሚያዊ ዕብየት ዘምፅኡ መፅናዕትን ምርምራትን እናሰርሐ ይርከብ፤ እናሰርሖም ዝርከቡ ርኽበታት መፅናዕቲ ፀገም እናፈትሑ ኢኮኖሚያዊ ዕብየት እናምፅኡ 'ዮም። እቲ ዩኒቨርሲቲ ንዘፈር ኢንዱስትሪ ብመፅናዕትን ምርምርን ብምድጋፍ ንኢኮኖሚያዊ ዕብየት ሃገር ግደኡ እናተዋፅአ 'ዩ ኢሎም። እቲ ጉባኤ ልውውጥ ፍልጠትን ልምድን ዝግበረሉን ፀገም ዝፈትሑ መፅናዕትታት ንኽስርሑ ዘተባብዕ 'ዩ። መፅናዕቲ ፀገም ዝፈትሕ፣ ኢኮኖሚ ሃገር ዘዕብይ፣ ዓለም ለኻዊ ተወዳዳራይነት ዘጠናኽርን 'ዩ፤ እቲ ዩኒቨርሲቲ 'ውን ምችው ኢኮኖሚያዊ ዕብየት ዘምፅኡን ኣጀንዳ 2063 ዘዐውቱን መፅናዕትታት እናሰርሐ 'ዩ ኢሎም።

  ኣዲስ ኣበባ/የካቲት/ 1/2017 (ኢዜኣ) ኣብ ዝቕፅሉ 5 ዓመታት ብወረቐት ዝሳለጡ ኣሰራርሓታት ብምትራፍ ዕድጊትን ኣገልግሎትን ዲጂታል ቴክኖሎጂ ብዝሓሸ መልክዑ ኣብ ስራሕ ከምዝውዕል ሚኒስቴር ኢኖቬሽንን ቴክኖሎጅን ገሊፁ። ሚኒስትር ዲኤታ ሚኒስቴር ኢኖቬሽንን ቴክኖሎጅን ይሹሩን አለማየሁ(ዶ/ር) ንኢዜኣ ከምዝበልዎ፤ ኣብ ቀፃሊ ዓመት ካልኣይ ዙር መርሃ ግብሪ ዲጂታል ኢትዮጵያ 2030 ክጅመር እዩ። እቲ መርሃ ግብሪ ትኹረት ካብ ዝገብረሎም ስራሕቲ ብወረቐት ገንዘብ ዝሳለጥ ዕድጊትን ብወረቐት ዝሳለጡ ኣገልግሎታትን ምትራፍ እቲ ሓደ ከምዝኾነ ገሊፆም። ኣብ ኢትዮጵያ ስርዓት ዲጂታል ቴክኖሎጂ ብስፍሓት ተግባራዊ እናተገበረ ከምዝኾነ ብምሕባር፤ ዓለም ለኸ ተቐባልነት ዘለዎ ምችው ስርዓት ዕድጊት ንምፍጣር እናተሰርሐ እዩ ኢሎም። ስለዝኾነ ድማ ኣብ ዝቕፅሉ 5 ዓመታት እቲ ስርዓት ዕድጊት ብምምዕባል ብወረቐት ገንዘብ ዝሳለጥ ዕድጊት ንምትራፍን ካብ ንኽክእ ወረቐት ነፃ ዝኾነ ኣገልግሎት ተግባራዊ ንምግባርን ከምዝተተለመ ተዛሪቦም። ኣብቲ ፈላማይ ዙር መርሃ ግብሪ ዲጂታል ኢትዮጵያ ኣገልግሎታት መንግስቲ ዲጂታላይዝ ንምግባር ዝተሳለጡ ስራሕቲ ውፅኢታዊ ከምዝኾኑ ኣረዲኦም። ኣብዚ ሕዚ እዋን እውን ኣብ 25 ትካላት መንግስቲ ልዕሊ 800 ኣገልግሎታት ዲጂታል ቴክኖሎጂ ተጠቒሞም ስራሕቶም እናሳለጡ ከምዝኾኑ ሓቢሮም። ስለዝኾነ ድማ ስርዓት ዲጂታል ዕድጊት ዘተኣማምን ንምግባር እናተሳለጠ ዘሎ ስራሕ ድሕንነት ሳይበር ውፅኢታዊ ስለዝኾነ እቲ ትልሚ ንምዕዋት ምችው ኩነታት ከምዝፈጠረ ተዛሪቦም።

  ኣዲስ ኣበባ/ጥሪ/ 28/2017 (ኢዜኣ) “እጃም ማሕበራት ማሕበር ስራሕ ንብልፅግና ኢትዮጵያ” ኣብ ትሕቲ ዝብል መሪሕ ሓሳብ ሲምፖዜም ይሳለጥ ኣሎ። ኣብቲ መድረኽ፤ ሚኒስትር ግብርና ግርማ ኣመንቴ (ዶ/ር) ፣ምክትል ከንቲባን ሓላፊ ቢሮ ልምዓት ኢንዱስትርን ምምሕዳር ከተማ ኣዲስ ኣበባ ጃንጥራር ኣባይ፣ኮሚሽነር ኮሚሽን ሕብረት ስራሕ ኢትዮጵያ ኣምባሳደር ሽፈራው ሽጉጤን ኮሚሽነር ሕብረት ስራሕ ኣዲስ ኣበባ ልዕልቲ ግደይን ሓዊሱ ፃውዒት ዝተገበረሎም ኣጋይሽ ተረኺቦም። ኣብቲ ሲምፖዜም ዝተፈላለዩ መፅናዕታዊ ፅሑፋት ቀሪቦም ተዘትይሎም እዩ። ኣካል እቲ ሲምፖዜም ዝኾነ ኤግዚቢሽንን ባዛርን ሕብረት ስራሕ ካብ ጽባሕ ጀሚሩ ኣብ ማእኸል ኤግዚቢሽን ኣዲስ ኣበባ ከምዝካየድ እውን ተገሊፁ። ኣብቲ ክሳብ 3 ለካቲት 2017 ዓ/ም ዝፀንሕ ኤግዚቢሽንን ባዛርን ካብ ዝተፈላለዩ ከባብታት ኢትዮጵያ ዝተውፃእፅኡ ማሕበራት ሕብረት ስራሕ ክሳተፉ እዮም።

  ኣዲስ ኣበባ/ጥሪ/ 27/2017 /ኢዜአ/ሉሲን ሰላምን ዝተብሃላ ዕድመ ፀገብ ቅሪተ ኣካል ወዲ ሰብ ኣብ ብሄራዊ ሙዚየም ቼክ ሪፐብሊክ ንምርኢት ከምዝቐርባ ሚኒስቴር ቱሪዝም ኣፍሊጡ ሉሲን ሰላምን ካብ 25 ነሓሰ 2025 ዓ.ም.ፈ ጀሚሩ ማእኸል ባህሊ ኣብ ዝኾነት ከተማ ፕራግ ንህዝቢ ከፍቲ ከምዝኾና ሚኒስትር ቱሪዝም ሰለማዊት ከሳ ሓቢረን። እቲ ኤግዚቪሽን ሉሲ ኣብ ክልል ዓፋር ሃዳር ኣብ ዝተብሃለ ከባቢ ዝተረኸበትሉ መበል 50 ዓመት ስዒቡ ዝተዳለወ ኢዩ ተባሂሉ። ንክልተ ኣዋርሕ ከምዝፀንሕ እውን ተገሊፁ።

  ኣዲስ ኣበባ /ጥሪ/ 27/2017 /ኢዜአ/ኢትዮጵያ ኣባል ቤት ምኽሪ ምምሕዳር ማእኸል መፅናዕቲ ቴክኖሎጂ ኣፍሪካ ኮይና፡፡ መበል 34 ጉባኤ ቤት ምኽሪ ምምሕዳር ማእኸል መፅናዕቲ ቴክኖሎጂ ኣፍሪካ ኣብ ኬንያ ናይሮቢ ተኻይዱ፡፡ እቲ ጉባኤ ኣብ ሚኒስቴር ኢኖቬሽንን ቴክኖሎጂን መሪሕ ፈፃሚ ስራሕ ሃገራዊ ምርምር ልምዓት ንዝኾኑ ሃብታሙ ኣበራ (ዶ/ር) ካብ ጥሪ 2025 ጀሚሩ ን3 ዓመታት ተወካሊ ቤት ምኽሪ ምምሕዳር ማእኸል መፅናዕቲ ቴክኖሎጂ ኣፍሪካ ብምግባር ሾይሙ። ሃብታሙ ኣበራ (ዶ/ር) ኣብቲ እዋን÷ ኣብ ስራሕቲ ልምዓት ሳይንስ፣ ቴክኖሎጂን ፈጠራን ዘላቒ ኢኮኖሚያዊን ማሕበራዊን ልምዓት ኣፍሪካ ንምርግጋፅ ኣብ ኢትዮጵያ ዝተፈላለዩ ስራሕቲ ምርምር ኣብ ምድጋፍ ይርከብ ኢሎም። ኢትዮጵያ ቤት ምኽሪ ምምሕዳር ማእኸል መፅናዕቲ ቴክኖሎጂ ኣፍሪካ ምዃና ዓለም ለኸ ልምድታት ብምጥቃም ሃገራዊ ስራሕቲ ልምዓት ምርምር፣ ቴክኖሎጂን ኢኖቬሽንን ንምጥንኻር ከምዝሕግዛ ተዛሪቦም።

  ኣዲስ ኣበባ/ ጥሪ/24/ 2017 /ኢዜአ/ብብርኪ ሃገር ዝተዳለወ መድረኽ ዘተ ምልላይ ፓሊሲ ሕርሻን ልምዓት ገፀርን ኣብ ከተማ መቐለ ይሳለጥ ኣሎ። እቲ መድረኽ፥ ምልላይ ሃገር ለኸ ፓሊሲ ሕርሻን ልምዓት ገጠርን ኣፈፃፅማኡ ዕውት ንምግባርን መሓውራዊ ለወጢ ንምምፃእ ዝዓለመ ከምዝኾነ ተገሊፁ። ኣብቲ መድረኽ ተረኺቦም መደረ ዘስምዑ ርእሰ ምምሕዳር ግዚያዊ ምምሕዳር ክልል ትግራይ ኣይተ ጌታቸው ረዳ፥ ኣብ ትግራይ ዝነበረ ኲናት ስዒቡ ሕርሻ እቲ ክልል ኣዝዩ ዝወደቐሉ፣ ንኮሜርሻል ዝውዕል ዝነበረ ሕርሻ ንድሕሪት ዝተመለሰሉ ኩነታት ከምዝተፈጠረ ተዛሪቦም። ስለዝኾነ ኩሉ ዓይነት ዓቕሚ ተጠቒምካ ሕርሻ ትግራይ ናብ ንቡር ንምምላስ ኣብ ዝግበር ፃዕሪ ብብብርኪ ሃገር ዝወፅኡ ፓሊሲታት ምፍላጥ ረብሕኡ ልዑል ከምዝኾነ ሓቢሮም። ኩሉ ዓይነት ዓቕሚ ተጠቒምካ ሕርሻ ትግራይ ናብ ንቡር ንምምላስ ቴክኖሎጂን ሜካናይዜሽን ምትእትታውን ምጥቓምን ኣገዳሲ እዩ ኢሎም። ውዕሊ ፕሪቶሪያ ምፍፃም ማለት ትግራይ ዝበለፀ ዓቕሚ እትፈጥረሉ ኩነታት ምፍጣር ማለት ምዃኑ ብምግላፅ፥ ውዕሊ ፕሪቶሪያ ብምሉእነት ክፍፀም ከምዝግባእ እውን ኣገንዚቦም። ሓላፊ ቢሮ ሕርሻን ሃፍቲ ተፈጥሮን ግዚያዊ ምምሕዳር እቲ ክልል ኢያሱ ኣብርሃ(ዶክተር) ብግደኦም፥ ኢኮኖሚ ሃገር መሰረቱ ሕርሻ እዩ ኢሎም። ስለዚ በቢ እዋኑ ምስ ዘለዎ ዕብየታት እቲ ሴክተር ፓሊሲ እናማሓየሽካ ምኻድ ኣገዳሲ ከለምዝኾነ ኣገንዚቦም።

  አዲስ አበባ/ጥሪ/19/2017/ኢዜአ/ኣብ ዝሓለፉ ዓመታት ለውጢ ንህንፀት ዲጂታል ኢኮኖሚ ብወሳኒ ሰረት ዘንበሩ ንጥፈታት ተሰሪሖም 'ዮም ክብሉ ምክትል ቀዳማይ ሚኒስትር ተመስገን ጥሩነህ ገሊፆም። ሎማዓንቲ ንጉዕዞን ጅማሮታትን ዲጂታል ትራንስፎርሜሽን ኢትዮጵያ ዝምልከት ኤግዚቢሽንን ዓውደ መፅናዕትን ኣሳሊጥና ኢሎም። መንግስቲ ድሕሪ ፅባሕ ለውጢ 2012 ዓ.ም ጀሚሩ ብስትራቴጂ ዲጂታል ኢትዮጵያ 2025 ሃገርና ዕድላት ዕብየት ቴክኖሎጂ ንኽትጥቀም ዘኽእሉ ንጥፈታት ከምዝሰርሐ ተዛሪቦም። ዲጂታል መሰረተ ልምዓት ብምስፍሕፍሑ ስርዓት ፋይናንስን ኽፍሊትን ብልዑል ቕልጣፈ እናዓበየ ምዃኑ ገሊፆም። ግልጋሎታት መንግስቲ ናይ ምዝማንን ናብ ዲጂታል ምስግጋርን ኸምኡ 'ውን ተሳትፎ ውልቃዊ ዘፈር ወሲኹ ክብሉ ኣብ ማሕበራዊ ሚድያኦም ኣስፊሮም።

  ኣዲስ ኣበባ/ ጥሪ/19/ 2017 /ኢዜአ/ድሕንነቱ ዝተሓለወ ዲጂታል ከባቢ ምህናፅን ስግኣታት ሳይበር ምክልኻልን ንዓወት ዲጂታል ኢትዮጵያ ወሳኒ ኢዩ ክብሉ ምክትል ቀዳማይ ሚኒስትር ተመስገን ጥሩነህ ገሊፆም። ኣብ ጉዕዞ ዲጂታል ትራንስፎርሜሽን ኢትዮጵያን እንፋተን ጠመተ ዝገበረ ኤግዚብሽንን ዓውደ መፅናዕቲን ኣብ ኣዲስ ኣበባ ሙዚየም ሳይነስ ይካየድ ኣሎ። እቲ መድረኽ ብዕሊ ዘጀመሩ ምክትል ቀዳማይ ሚኒስትር ተመስገን፥ ድሕንነቱ ዝተሓለወ ዲጂታል ከባቢ ምህናፅን ስግኣታት ሳይበር ምክልኻልን ንዓወት ዲጂታል ኢትዮጵያ ወሳኒ ኢዩ ኢሎም። ኣብ መወዳእታ ዓመት ትግበራ ስትራቴጂ ዲጂታል ኢትዮጵያ 2025 ክንራኸብ ኢና ብምባል፥ ኣብቲ ስትራቴጂ ናይ ዝሓለፈ ናይ ተግባር እዋን ብዙሓት ዓወታት ምምዝጋቦም ተዛሪቦም። ብኣንፃሩ ዝተፈላለዩ ብድሆታት ምግጣሞም ሓቢሮም። ነዚ መበገሲ ብምግባር ኣብ ዝቕፅሉ ሓሙሽተ ዓማውቲ “ስትራቴጂ ዲጂታል ኢትዮጵያ 2030” ምዕፃዉ ሓቢሮም ።

አዲስ አበባ/ጥሪ/16/2017/ኢዜአ/ መበል 38 ጉባኤ መራሕቲ ሕብረት ኣፍሪካን መበል 46 ኣኼባ ሚኒስትራትን ዕዉት ንክኸውን እኹል ምድላው ከምዝተገበረ ፌደራል ፖሊስ ኣፍሊጡ። ስነ-ስርዓት ምረቓ ዓጀብቲን ኣሽከርከርትን ፍሉይ (ቪኣይፒ) ፕሮቶኮልን ተሳሊጡ። ኣብቲ ምረቓ መደረ ዝገበሩ ኮሚሽነር ፌደራል ፖሊስ ኢትዮጵያ ጀነራል ደመላሽ ገ/ሚካኤል፤ መበል 38 ጉባኤ መራሕቲ ሕብረት ኣፍሪካን መበል 46 ኣኼባ ሚኒስትራትን ንክሳኻዕ ካብ ብሕዚኡ እኹል ምድላው ተገይሩ ኢሎም። እቲ ጉባኤ ዕዉት ንክኸውን እቲ ትካል ዝተዓጠቐን ድሮናትን ኻልኦት ነዚ ዘመን ዝምጥኑ ቴክኖሎጂታትን ኣብ ስራሕ ከምዝውዕሉ ተዛሪቦም። ሓይሊ ሰብ ኣብ ውሽጢ ሃገር፣ ኣብ ቻይናን ሕቡራት ዓረብ ኤምሬታትን ብምስልጣንን ስራሕቲ ፀጥትኡ ብምዝማንን ልዑል ምድላው ከምዝተግበረ ኣረጋጊፆም ። እቶም ተመረቕቲ ካብ 55 ትካላት ዝተውፃእፅኡ ምዃኖም መረዳእታ ፌደራል ፖሊስ ኢትዮጵያ የረድእ።

  አዲስ/አበባ/ጥሪ/13/2017/ኢዜአ/ዲጂታል ኢትዮጵያ ጋህዲ ንምግባር እናተሰርሐ ዝርከብ መሰረተ ልምዓት ኢንተርኔት ንኣባል ሃገራት ኢጋድ ኣብነት ዝኸውንን ኣብተን ሃገራት መሰረተ ልምዓት ኢንተርኔት ንምስፍሕፋሕ ከምዝሕግዝን ሚኒስትር ኢኖቬሽንን ቴክኖሎጅን በለጠ ሞላ(ዶ/ር) ገሊፆም። ኮንፈረንስ ልምዓት ኢንተርኔት 2025 ኣብ ኣዲስ ኣበባ እናተሳለጠ ይርከብ። እቲ ኮንፈረንስ ኣብ ሃገራት ኢጋድ ንዘሎ ልምዓት ዓቐሚ ኢንተርኔት ፣ ኣፍልጦን ልምድን ብምጥቃም ኣብተን ሃገራት ልምዓት ኢንተርኔት ንምዕባይ ይጠቅም። ኣብ መኽፈቲ እቲ ኮንፈረንስ መደረ ዝገበሩ ሚኒስትር ኢኖቬሽንን ቴክኖሎጅን በለጠ ሞላ(ዶ/ር)፤ 40 ሚሊዮን ዜጋታት ተጠቀምቲ ስርዓት ዲጂታል ዕዳጋ 'ዮም ኢሎም። ኣብ ኣባል ሃገራት ኢጋድ መሰረተ ልምዓት ኢንተርኔት ብምዕባይ ቑጠባዊ ዕብየት ንምስላጥን ማሕበራዊ ርክብ ንምጥንኻርን ብምውዳድ ክንሰርሕ ኢና ክብሉ ሓቢሮም።

  መቐለ/ጥሪ /13/2017 (ኢዜኣ) ኢንስቲትዩት ምርምር ሕርሻ ግዝያዊ ምምሕዳር ክልል ትግራይን ዩኒቨርሲቲ መቐለን ዓሌት በለስ ብምምሕያሽ ዓቕሚ ምፅዋር ሕማም ምዕባይ ዘኽእል ምርምር እናሳለጡ ምዃኖም ገሊፆም። ኣብ ግዝያዊ ምምሕዳር እቲ ክልል ተመራማሪ ሓለዋ ዝራእቲ ኢንስቲትዩት ምርምር ሕርሻ ተስፋይ በላይ(ዶ/ር) ንኢዜኣ ከምዝበልዎ፤ ኣብቲ ክልል ልዕሊ 350 ሽሕ ሄክታር መሬት ብተኽሊ በለስ ዝተሸፈነ እዩ። ካብ ቀረባ ዓመታት ናብዚ ግና በለስ ''ኮቺንያል'' ተባሂሉ ብዝፅዋዕ ሕማም ስለዝተጠቕዐ እቲ ዝድለ ፍርያት እናተረኸበሉ ከምዘይኮነ ሓቢሮም። ተመራማርን መምህርን ዩኒቨርሲቲ መቐለ ኪሮስ መለሰ(ዶ/ር) ብግደኦም፤ ዓቕሚ ምፅዋር ሕማም ተኽሊ በለስ ዘዕብዩ ስራሕቲ ምርምር፣ምርባሕን ምድቓልን በቲ ዩኒቨርሲቲ፣ኢንስቲትዩት ምርምር ሕርሻን ማእኸል ባዮ ቴክኖሎጅን እናተሳለጡ እዮም ኢሎም። ተኽሊ በለስ ድርቂ ተፃዊሩ ብዙሕ ፍርያት ንክህብ 35 ዓይነታት ዓሌታት ብምድቓል እቲ ዝሓሸ ተመሪፁ ኣብ ሕርሻ ሓረስቶት እናተፈተነ ከምዝኾነ ኣረዲኦም። ብተወሳኺ እውን ብምርምር ክልቲኦም ትካላት ዝተረኸበ መድሓኒት መከላኸሊ እቲ ሕማም እውን ውፅኢታዊ ምዃኑ ኣብ ሕርሻ ሓረስቶት ብተግባር ስለዝተረጋገፀ ስራሕ ምንፃግ እናተሳለጠ ከምዝኾነ ተዛሪቦም።

  ኣዲስ ኣበባ/ጥሪ/ 9/2017 (ኢዜኣ) ኢትዮ ቴሌኮም ክፍተት ዲጂታል ኣገልግሎት ንምፅባብን ኢኮኖሚያዊ ዕድላት ንምፍጣርን እናሰርሐ ከምዝርከብ ዋና ፈፃሚት ስራሕ እቲ ትካል ፍሬሕይወት ታምሩ ገሊፀን። እተን ዋና ፈፃሚት ስራሕ ምስ ብምክትል ፕሬዚዳንት ባንኪ ልምዓት ኣፍሪካ ሰለሞን ኩዋይኖርን ምክትል ዋና ዳይሬክተር ሪጅን ምብራቕ ኣፍሪካ እቲ ባንኪ ሊያንድር ባሶሌ(ዶ/ር)ን ዝተመርሐ ላዕለዋይ ጉጅለ ልኡኽ ኣብ ቀፃሊ ዲጂታል ዕቤት ኣፍሪካ ዝጠመተ ዘተ ኣሳሊጠን። እተን ዋና ፈፃሚት ስራሕ ኣብዚ እዋን፤ ኢትዮ ቴሌኮም ካብ ኣፈሪካ እቲ ዝዓበየ ኦፕሬተር ቴሌኮም ስለዝኾነ ክፍተት ዲጂታል ኣገልግሎት ንምፅባብ፣ኢኮኖሚያዊ ዕድላት ንምፍጣርን ሓቛፍን ቀጻልነት ዘለዎን ዕቤት ንምምፃእን እናሰርሐ ከምዝርከብ ኣረዲአን። ኣፍሪካ ዘለውዋ ፈተናታት ንምሽጋር፣ሓደሽቲ ዕድላትን ዘላቒ ልምዓትን ንምፍጣር ቴክኖሎጅን ዲጂታል መፍትሕታትን ክትጥቀም ከምዘለዋ ወሲኸን ገሊፀን። ምክትል ፕሬዚዳንት ባንኪ ልምዓት ኣፍሪካ ሰለሞን ኩዋይኖር፤ ቅልጡፍ ዕቤት ኢትዮ ቴሌኮም ኣብ ዲጂታል ትራንስፎርሜሽን ኢትዮጵያ ዘበርክቶ ዘሎ ኣስተዋፅኦ ንኢዶም። ምስ ኢትዮ ቴሌኮም ብምትሕብባር ምስራሕ ኣብ ዝከኣለሎም ጉዳያት ብምብርህራህ ባንኪ ልምዓት ኣፍሪካ ዲጂታል ኢንሼቲቭ እቲ ኩባንያ ንምድጋፍ ዘለዎ ድሉውነት ኣረጋጊፆም።

  ኣዲስ ኣበባ/ ጥሪ/5/ 2017 /ኢዜአ/ኮሌጅ ቴክኒክን ሞያን ኮረም ብዝተፈለለዩ ሞያታት ከሰልጥኖም ዝፀነሐ ልዕሊ 500 ተምሃሮ ኣመሪቑ። እቲ ኮሌጅ 285 ደቂ ኣንስትዮ ከምዝኾና ተሓቢሩ። ትማሊ ዝተመረቑ ተምሃሮ÷ ኣብ 2012 ዓ.ም ትምህርቲ ጀሚሮም ብሰንኪ ኲናት ትምህርቶም ኣቋሪፆም ዝነበሩ ኢዮም፡፡ ስምምዕነት ሰላም ፕሪቶሪያ ምምፅኡ ስዒቡ ሚያዝያ 2016 ዓ.ም ዳግም ናብ መኣዲ ትምህርቲ ዝተመለሱ ከምዝኾኑ ኮሌጅ ቴክኒክን ሞያን ኮረም ኣፍሊጡ።

  ኣዲስ ኣበባ/ጥሪ/ 2/2017 (ኢዜኣ) ፖስታ ኢትዮጵያ ኣብ ትሕቲ ሆልዲንግ ኢንቨስትመንት ኢትዮጵያ ምጥርናፉ ዝተጀመሩ ስራሕተ ለውጢ ንምጥንኻር ልዑል እጃም ከምዘለዎ ዋና ፈፃሚ ስራሕ እቲ ትካል ዳግማዊ ሃይሌ ገሊፆም። ኣብ ቀረባ እዋን 8 ተወሰኽቲ ትካላት ልምዓት መንግስቲ ኣብ ትሕቲ ሆልዲንግ ኢንቨስትመንት ኢትዮጵያ ከምዝተጠርነፉ ዝዝከር እንትኸውን፤ ፖስታ ኢትዮጵያ ድማ ካብቶም ኣብዚ ዝተጠርነፉ ትካላት እቲ ሓደ እዩ። ዋና ፈጻሚ ስራሕ ፖስታ ኢትዮጵያ ዳግማዊ ሀይሊዬ ንኢዜኣ ከምዝበልዎ፤ ሆልዲንግ ኢንቨስትመንት ኢትዮጵያ ኣብ ትሕቲኡ ዘለዉ ትካላት ልምዓት ኣብ ኢንቨስትመንት ብዝበለፀ ውፅኢታዊ ኮይኖም ንክሰርሑን ንሃገር ዝሓሸ ረብሓ ንከበርክቱን ዝሕግዝ እዩ። እቲ ትካል ቅድም ኢሉ ስራሕቲ ሪፎርም ከምዝጀመረ ብምዝኽኻር፤ ሕዚ ዝረኸቦ ዕድል ድማ እቲ ዝጀመሮ ምዕራፍ ለውጢ ንምጥንኻር ከምዝሕግዞ ተዛሪቦም። ፖስታ ኢትዮጵያ ከም ትካል ካብ 2016 ዓ/ም ጀሚሩ ኣገልግሎቱ ብስፍሓት ተበፃሒ ንምግባር ብትኹረት ክሰርሕ ከምዝፀንሐ እውን ገሊፆም። ስለዝኾነ ድማ እዚ ዝረኸቦ ዕድል ተጠቒሙን ኣሰራርሕኡ ምስ ስትራቴጂ ሆልዲንግ ኢንቨስትመንት ብምርኻብን ዝህቦ ኣገልግሎት ንምስፍሕፋሕ ከምዝሰርሕ ኣረጋጊፆም። እዚ ድማ ብብርኪ ዓለም ኣገልግሎቱ ንምዝርጋሕ ከምዝሕግዞ ሓቢሮም። ፖስታ ኢትዮጵያ ኣብ ዝሓለፉ ውሑዳት ዓመታት ውፅኢታዊ ከምዘይነበረ ብምሕባር፤ ካብ ቀረባ እዋን ናብዚ ግና ውፅኢታዊ እናኾነ ከምዝመፀ ኣረዲኦም። ኣብ ቀጻሊ እውን ሓደሽቲ ተሞኩሮታትን ኣሰራርሓታትን ብምውዳድ ንሃገር ዝሓሸ ዕቤት ንምምዝጋብ ብትኹረት ከምዝሰርሕ ገሊጾም።

 

  ኣዲስ ኣበባ/ ጥሪ/1/ 2017 /ኢዜአ/ብሽይጣት መፅሓፍ “የመደመር ትውልድ” ቀዳማይ ሚኒስትር ኣቢይ ኣሕመድ(ዶ/ር) ቤተ መፃሕፍቲ ህዝቢ ጋምቤላ ከህነፅ ኢዩ። ፍሉይ ኣማኻሪ ርእሰ ምምሕዳር ክልል ጋምቤላ ብርሃኑ ደጀኔ ከምዝበልዎ፥ ካብ ሽይጣት እቲ መፅሓፍ ብዝርከብ ኣታዊ በዓል ከልተ ደብሪ ቤተ መፃሕፍቲ ንምህናፅ ስራሕቲ ዲዛይን ተዛዚሙ እምነ ኩርናዕ ተቐሚጡ። ክሳብ ሐዚ ልዕሊ 18 ሚሊየን ብር ቃል ከምዝተኣተወን ካብ ውሽጢ እዚ ልዕሊ 9 ነጥቢ 7 ሚሊየን ናብ ዝተዳለወ ዕፁው ኣካውንት ኣታዊ ከምዝተገበረ ኣረጋጊፆም። ኣብ ቀረባ ድማ ምስ ኣብያተ ዕዮ፣ ዞባታተን ወረዳታትን ለዕሊ 3 ሚሊየን ከምዝተኣከበ ገሊፆም። ኣብ ቀፃሊ ጨረታ ብምውፃእ ስራሕቲ ህንፀት ከምዝጅመር ኣፍሊጦም።

  መቐለ/ ታሕሳስ/30/ 2017 /ኢዜአ/ኣብ ክልል ትግራይ ኣብ 41 ቀወምቲን ተንቀሳቐስቲን ማእኸላት ምዝገባ ብሄራዊ ዲጂታል መለለዪ መንነት (ፋይዳ) እናተሳለጠ ምዃኑ ኣብ ኢትዮ-ቴሌኮም ሪጅን ሰሜን ኣፍሊጡ። ኣብ ኢትዮ-ቴሌኮም ሪጅን ሰሜን ዳይሬክተር ኦፕሬሽን ሙሉ ወልደስላሰ÷ እቲ ዲስትሪክት ኣብ ዝሓፉ 8 ኣዋርሕ ምዝገባ ዲጂታል መለለዪ መንነት ሓዊሱ ሕትመት ዲጂታል መለለዪ መንነት ኣገልግሎት ኣብ ምሃብ ከምዝርከብ ኣብሪሆም፡፡ ዲስትሪክት ሪጅን ሰሜን ኣብ 26 ቀወምቲን 15 ተንቀሳቐስቲን ማእኸላት ኣገልግሎት ኣብ ምሃብ ከምዝርከብ ገሊፆም፡፡ ዓማዊል ናይቲ ኩባኒያ ኣገልግሎት ንምርካብ ናብተን ማእኸላት እንትመፅኡ ኢሉ እውን ኣብ ተንቀሳቐስቲ ማእኸላት ኣብ ዘለዉዎ ቦታ ብምዃን ኣገልግሎት ንኽረኽቡ እናተገበረ ከምዝኾነ ሓሮም፡፡ እቲ ዲስትሪክት ክሳብ ሕዚ ልዕሊ 235 ሺሕ ዜጋታት ዲጂታል መለለዪ መንነት ክረኽቡ ከምዝተገበረ ብምሕባር÷ ኣብ ቀፃሊ እተን ማእኸላት ንምስፍሕፋሕ እናተሰርሐ ምዃኑ ንኢዜአ ገሊፆም፡፡

  ኣዲስ ኣበባ/ ታሕሳስ/26/ 2017 /ኢዜአ/ዘይመንግስታዊ መራኸብቲ ሓፋሽ ንህንፀት ሃገርን ወሎዶን ዘለወን ግደ ልዑል ኢዩ ከብሉ ምክትል ቀዳማይ ሚኒስትር ተመስገን ጥሩነህ ገሊፆም። እቶም ምክትል ቀዳማይ ሚኒስትር ኣብ ማሕበራዊ ሚዲየኦም ኣብ ዘመሓላለፍዎ መልእኽቲ፥ ኣብ ሃገርና ፈላማይ ዝኾነ ውልቀ ጣብያታት ቴሌቪዥን ብቐዳምነት ካብ ዝስርዑ ሓደ አብዝኾነ ኣብ ጣቢያ ቴሌቪዥን ኢቢኤስ ዑደት ገይርና ኢሎም። ኢቢኤስ ኣብ ዝሓለፉ 15 ዓመታት ኣብ ዓውዲ ውልቀ ሚዲያ ብዙሓት መሀደስቲን እዋናዊን ሓበሬታታት ናብ ህዝቢ ብምብፃሕ ልዑል ግደ ከምዝነበሮ ተዛሪቦም። ብተወሳኺ እቲ ትካል ናይ ኢትዮጵያ ውቁብ ባህሊ፣ ታሪክን ማሕበራዊ ዝምድናን ኣግዚፉ ብምርኣይ ንዓለም ተበፃሒ ይገብር ከምዘሎ ኣብሪሆም።

  ኣዲስ ኣበባ/ ታሕሳስ/23/ 2017 /ኢዜአ/ኣማራፂታት ቴክኖሎጂ ብምጥቃም ኣብ ዝሓለፉ ሒደት ዓመታት 295 ዝኾኑ ሓደሽቲ ምስፍሕፋሓት ቴሌኮም ኣብ ገፀር ቀበሌታት ተበፃሒ ገይርና ክብላ ዋና ፈፃሚት ስራሕ ኢትዮ ቴሌኮም ፍሬህይወት ታምሩ ገሊፀን፡፡ ባይቶ ወከልቲ ህዝቢ ስራሕቲ ምንቅስቓስ ኢትዮ ቴሌኮም ዝገምገመ እንትኸውን÷ እተን ዋና ፈፃሚት ስራሕ ንዝተልዓሉ ሕቶታት ምላሽን መብርሂን ሂበን፡፡ ኣብ መብርሂአን ድማ÷ ኣገልግሎት ቴሌኮም ተበፃሒ ንምግባር ካብ ዝልዩ ነገራት ሓደ ቀረብ ሓይሊ ከምዝኾነ ብምሕባር ኣብ ገፀር ዝርከቡ ጣቢያታት ቴሌኮም ሶላርን ብክፋል ጀነሬተርን ከምዝጥቀሙ ገሊፀን፡፡ ዋና ሥራ አስፈጻሚዋ እስካሁን 3 ነጥብ 3 ትሪሊየን ብር በቴሌ ብር መተግበሪያ ዝውውር መፈጸሙንም ተናግረዋል፡፡ 240 ሺሕ ዝኾኑ ነጋዶ ክፍሊቶም ብቴሌ ብር እናፈፀሙ ከምዝኾኑ ብምሕባር፤ እዚ ድማ ኣብ ህንፀት ዲጂታል ኢኮኖሚ ኣስተዋፅኦ እናገበረ ከምዝርከብ ኣብሪሀን፡፡ ኣገልግሎት ዲጂታል ፋይናንስ ብምቕራብ ህይወት ንምቕላል ከምኡ እውን ትራንስፎርሜሽን ዲጂታል ኢትዮጵያ ኣብ ምቅልጣፍ ብትኹት እናተሰርሐ ከምዝርከብ ገሊፀን።