ኣዲስ ኣበባ/ሕዳር /5/2017 (ኢዜኣ) ኢትዮ ቴሌኮም ኣብ ከተማ ሸገር ክፍለ ከተማ መልካ ኖኖ ኣገልግሎት ስማርት ፓርኪንግ ኣጀሚሩ። ኣብቲ መርሃ ግብሪ ምጅማር፤ ዋና ፈፃሚ ስራሕ ኢትዮ ቴሌኮም ፍሬህይወት ታምሩ፣ከንቲባ ከተማ ሸገር ተሾመ አዱኛን ካልኦት ኣመራርሓ እቲ ከተማን ፃውዒት ዝተገበረሎም ኣጋይሽን ተረኺቦም። ዋና ፈፃሚ ስራሕ ኢትዮ ቴሌኮም ፍሬህይወት ታምሩ ኣብዚ እዋን ከምዝበልኦ፤ ከተማታት ብዲጂታል ስርዓት ናብ ስማርት ሲቲ ንክቕየራ ኢትዮ ቴሌኮም ዝጭበጡ ስራሕቲ እናሳለጠ እዩ። ሎሚ መዓልቲ ኣብ ከተማ ሸገር ዕለዊ ዝገበሮ ኣገልግሎት ስማርት ፓርኪንግ እውን ኣካል እዚ ከምዝኾነ ብምሕባር፤ እቲ ኣገልግሎት ኣብ ከተማ ሸገር ዝወሃብ ኣገልግሎት ፓርኪንግ ዘበናዊ ዝገብር እዩ ኢለን። እቲ ኣገልግሎት፤ ኣሽከርከርቲ መተግበሪ ሞባይል ብምጥቃም መኪና ጠጠው መበሊ ስፍራ ንምእላሽ፣ መኪና ጠጠው ንምባልን ንዝረኸብዎ ኣገልግሎት ክፍሊት ብቴሌብር ምፍፃም ዘኽእልን ከምዝኾነ ተዛሪበን። እዚ ኣገልግሎት ኣብ ቀፃሊ ኣብ ካልኦት ከባብታት እታ ሃገር ናይ ምስፍሕፋሕ ስራሕቲ ከምዝሳለጡ እውን እተን ዋና ፈጻሚት ስራሕ ኣፍሊጠን።

  ኣዲስ ኣበባ/ሕዳር 5/2017 (ኢዜኣ) ውህብቶ ፈጠራ ቴክኖሎጂ ዘለዎም መናእሰይ ክእለቶም ኣብ ስራሕ ንከውዕልዎ ብምድጋፍ ኢትዮጵያ ቴክኖሎጂ ተቐባሊት ጥራሕ ዘይኮነትስ ወሃቢት እውን ምግባር ከምዝግባእ ሚኒስትር ስራሕን ክእለትን ሙፈሪሃት ካሚል ገሊፀን። ካልኣይ ዙር ሃገራዊ ፕሮግራም መማዕበሊ ቴክኖሎጂ”ክእለት ኢትዮጵያ” ብዝብል ስያመ ማእኸል ልህቀት ምፍራይን ምርሻሽ ቴክኖሎጂን ኣብ ኢንስቲትዩት ስልጠና ቴክኒክን ሞያን ተጀሚሩ። እቲ መርሃ ግብሪ፤ ሚኒስቴር ስራሕ ክእለትን፣ ኢንስቲትዩት ስልጠና ቴክኒክን ሞያን ከምኡ እውን ኢንስቲትዩት ልምዓት ኢንተርፕረነርሺፕ ብሓባር ዘዳለውዎ እዩ። ኣብ መርሃ ግብሪ ምጅማር እቲ ፕሮግራም፤ ሚኒስትር ስራሕን ክእለትን ሙፈሩሃት ካሚል፣ ዋና ዳይሬክተር ኢንስቲትዩት ስልጠና ቴክኒክን ሞያን ብሩክ ከድር(ዶ/ር)፣ዋና ዳይሬክተር ኢንስቲትዩት ልምዓት ኢንተርፕረነርሺፕ ሓሰን ሑሴን(ዶ/ር)ን ካልኦት ሓለፍቲ ስራሕ መንግስትን ፃውዒት ዝተገበረሎም ኣጋይሽን ተረኺቦም። ሚኒስትር ስራሕን ክእለትን ሙፈሩሃት ካሚል ኣብዚ እዋን ከምዝበልኦ፤ እቲ መርሃ ግብሪ ካብ ኩሎም ከባብታት ኢትዮጵያ ዝተውፃእፅኡ ውህብቶ ፈጠራ ቴክኖሎጂ ዘለዎም መናእሰይ ኣብ ሓደ ማእኸል ብምእካብ ክእለቶም ብምዕባይ ፍርያትን መፍረያይነትን ዘዕብዩ ፀገም ዝፈትሑ ቴክኖሎጂታት ንክፈጥሩ ዝሕገዝሉ እዩ። ሃገራዊ ፕሮግራም መማዕበሊ ቴክኖሎጂ”ክእለት ኢትዮጵያ” መንፈስ ይከኣል እዩ ዝተረጋገፀሉ ከይዲ ከምዝኾነ ብምሕባር፤ ናይ ጽባሕ ኢትዮጵያ ንምህናፅ እቲ ሓደን ቀንድን ጉልበት ስለዝኾነ ናይ ኩሉ ትግሃት ይሓትት ኢለን። ናይ ሎሚ ወነንቲ ፈጠራ ቴክኖሎጂ መናእሰይ እቲ ፈጠራ ብምምዕባል ኢትዮጵያ ቴክኖሎጂ ተቐባሊት ጥራሕ ዘይኮነትስ ወሃቢት እውን ንክትኸውን ክሰርሑ ከምዝግባእ ሓቢረን። ዋና ዳይሬክተር ኢንስቲትዩት ስልጠና ቴክኒክን ሞያን ብሩክ ከድር(ዶ/ር) ብግደኦም፤ ሃገር ቦቆል ስራሕቲ ፈጠራ ቴክኖሎጂ ንዘጋጥሙ ፀገማት ሃገር ቦቆለ መፍትሕታት ንምሃብ ዝዓለሙ እዮም ኢሎም። ክሳብ ሕዚ ብፈጠራ ቴክኖሎጂ ዝተሰርሑ ስራሕቲ እውን ውፅኢት ከምዝተረኸበሎም ተዛሪቦም።

  ኣዲስ ኣበባ/ሕዳር/ 4/2017 (ኢዜኣ) ጉባኤ ትካላት ሃይማኖት ኢትዮጵያን ዩኒቨርሲቲ ኣዲስ ኣበባን ኣብ ዘፈር መፅናዕትን ምርምርን ብሓባር ንምስራሕ ዘኽእሎም ስምምዕ ተፈራሪሞም። እቲ ስምምዕ፤ ላዕለዋይ ፀሓፊ ጉባኤ ትካላት ሃይማኖት ኢትዮጵያ ቀሲስ ታጋይ ታደለን ተጠባባቒ ፕሬዚዳንት ዩኒቨርሲቲ ኣዲስ ኣበባ ሳሙኤል ክፍሌ(ዶ/ር)ን እዮም ፈሪመምዎ። ላዕለዋይ ፀሓፊ ጉባኤ ትካላት ሃይማኖት ኢትዮጵያ ቀሲስ ታጋይ ታደለ ኣብዚ እዋን፤ እቲ ጉባኤ ኣብ ኢትዮጵያ ኩለ መዳያዊ ሰላም ንምህናፅ ኣብ ዝግበር ፃዕሪ እጃሙ እናተዋፅአ እዩ ኢሎም። እቲ ጉባኤ ስራሕቱ ብመፅናዕትን ምርምርን ንምድጋፍ ምስ ዩኒቨርሲቲ ኣዲስ ኣበባ ስምምዕ ምትሕብባር ከምዝተፈራረመ እውን ሓቢሮም። ተጠባባቒ ፕሬዚዳንት ዩኒቨርሲቲ ኣዲስ ኣበባ ሳሙኤል ክፍሌ(ዶ/ር) ብግደኦም፤ ናብቲ ዩኒቨርሲቲ ዝመፁ ተምሃሮ ብስነ ምግባር ዝተሃነፁ ንክኾኑ ኣብ ምግባር ብርክት ዝበሉ ልምድታት ከኻዕብት ከምዝፀንሐ ገሊፆም። እዚ ልምዲ ብምጥቃም እቲ ጉባኤ ኣብ ህንፀት ሰላም እታ ሃገርን ወለዶን ዝገብሮ ፃዕሪ ንምድጋፍ ብመሰረት እቲ ስምምዕ መፅናዕትታትን ምርምራትን ከምዝገብር ተዛሪቦም።

  ኣዲስ ኣበባ/ ሕዳር/3/ 2017 /ኢዜአ/ግሩፕ ዣንገባኦ ሁዋን ቻይና ብርክት ዝበሉ ናውትታት ላቦራቶሪ ፎረንሲክ ንፖሊስ ፌዴራል ኢትዮጵያ ኣበርኪቱ፡፡ ኮሚሽነር ጀነራል ፖሊስ ፌዴራል ኢትዮጵያ ደመላሽ ገ/ሚካኤል ብሓገዝ ዝተበርከቱ ኣቑሑት ዝተረከቡ እንትኾኑ÷ እቲ ኩባንያ ንዝገበሮ ሓገዝ ምስጋና ኣቕሪቦም፡፡ መካየዲ ስራሕ እቲ ኩባንያ ኮንግ ዚንሚንግ ብግደኦም÷ ሰላምን ድሕንነትን ጉዳይ ሓንቲ ሃገር ጥራሕ ዘይኮነስ ዓለም ለኸ ጉዳይ ከምዝኾነ ብምሕባር እዚ ሓገዝ ብምግባርና ሓጎስ ይስመዐና ኢሎም፡፡ ኣብ ቀፃሊ ፖሊስ ፌደራል ኢትዮጵያ ኣብ ዓውዲ ምክልኻልን ምርመራን ገበን ንዝስራሕ ስራሕ ዝግበር ሓገዝ ተጠናኺሩ ከምዝቕፅል ምግላፆም ሓበሬታ ፖሊስ ፌዴራል የመላኽት፡፡

  ኣዲስ ኣበባ/ሕዳር/ 2/2017 (ኢዜኣ) ምምሕዳር ድሕንነት መርበብ ሓበሬታ፣ኢንስቲትዩት ኣርቲፊሻል ኢንተለጀንስ፣ቢሮ ልምዓት ኢኖቬሽንን ቴክኖሎጂን ኣዲስ ኣበባ፣ኤጀንሲ ኣገልግሎት ምዝገባ ሲቪልን ነባርነትን ኣዲስ ኣበባን ፕሮግራም ብሄራዊ ዲጂታል መለለዪ መንነትን ብሓባር ንምስራሕ መረዳድኢ ሰነድ ተፈራሪሞም። እቲ ስምምዕ፤ ዜጋታት ተጠቀምቲ ዝገብር መፍትሕታት ቴክኖሎጂ ሲቪል ምዝገባን ወሳኒ ኩነትን ንምልማዕ፣ ንምምኻር፣ንምትግባር፣ብቐፃልነት ንምክትታልን ብሓባር ንምስራሕን ዝዓለመ ከምዝኾነ ተገሊፁ። እዞም ኣገልግሎታት ምስ ፕሮግራም ብሄራዊ ዲጂታል መለለዪ መንነት ዝተኣሳሰሩ ከምዝኑ ድማ ካብ ምምሕዳር ድሕንነት መርበብ ሓበሬታ ዝተረኸበ ሓበሬታ የመላኽት። ዋና ዳይሬክተር ምምሕዳር ድሕንነት መርበብ ሓበሬታ ወይዘሮ ትዕግስት ሃሚድ ኣብቲ እዋን ስምምዕ ከምዝበልኦ፤ ኤጀንሲ ኣገልግሎት ምዝገባ ሲቪልን ነባርነትን ኣዲስ ኣበባ ቅድሚ ሕዚ ዝነበርዎ ፀገማት ብምፍታሕ እቲ ኣሰራርሓ ንምምሕያሽ ዘርኣዮ ቆራፅነት ዝነኣድ እዩ። ምምሕዳር ድሕንነት መርበብ ሓበሬታ እውን ኣሰራርሓ እቲ ኤጀንሲ ዲጂታላይዝ ኣብ ምግባር ንምድጋፍን ንምምኻርን ሰፋሕቲ ስራሕቲ ከምዝሰርሕ ገሊፀን። ዋና ዳይሬክተር ኢንስቲትዩት ኣርቲፊሻል ኢንተለጀንስ ኢትዮጵያ ኢንጂነር ወርቁ ጋቸና(ዶ/ር) ብግደኦም፤ እቲ ዝህነፅ ስርዓት ኣገልግሎት ምዝገባ ሲቪልን ነባርነትን ምምሕዳር ከተማ ኣዲስ ኣበባ እታ ከተማ ስማርት ንምግባር ከምዝሕግዝ ሓቢሮም። ብተወሳኺ እውን ኣብታ ከተማ ዝፍፀሙ ዘይሕጋዊ ተግባራት ንምክልኻልን ካልኦት ኣገልግሎታት ንምትእስሳርን እቲ ስምምዕ ወሳኒ እዩ ኢሎም። ዋና ዳይሬክተር ኤጀንሲ ኣገልግሎት ምዝገባ ሲቪልን ነባርነትን ምምሕዳር ከተማ ኣዲስ ኣበባ ዮናስ ኣለማየሁ፤ እቲ ኤጀንሲ ብዋናነት ዘሳልጦም ስራሕቲ ኣገልግሎት ወሳኒ ኩነትን መለለዪ መንነትን ከምዝኾነ ገሊፆም። ይኹን እምበር ቅድሚ ሕዚ ዝነበረ ኣሰራርሓ ነዚ ዘበን ዝምጥንን ድሌት ተገልገልቲ ዘየማልእን ብምዃኑ ቴክኖሎጂ ምጥቃም ግድን ከምዝኾነ ብምሕባር ምስቶም ትካላት ብሓባር ምስራሕ ኣድላይ ከምዝኾነ ኣረዲኦም። ሓላፊ ቢሮ ልምዓት ኢኖቬሽንን ቴክኖሎጂን ምምሕዳር ከተማ ኣዲስ ኣበባ ኣይተ ሰለሞን ኣማረ ብግደኦም፤ ምስ ሃገር ቦቆል ትካላት ቴክኖሎጂ ብሓባር ምስራሕ ጭቡጥ ውፅኢት ከምዝርከብ ዘለዎም ተስፋ ሓቢሮም። መካየዲ ስራሕ ፕሮግራም ብሄራዊ ዲጂታል መለለዪ መንነት ኢትዮጵያ ኣይተ ዮዳሄ ኣርኣያስላሴ፤ እቲ ዝድለ ለውጢ ንምምፃእ ዝተዋደዱ ኣሰራርሓታትን ምትሕብባራትን ኣድለይቲ እዮም ኢሎም።

  ኣዲስ ኣበባ/ሕዳር/ 2/2017 (ኢዜኣ) ኢትዮ ቴሌኮምን ምምሕዳር ከተማ ቢሾፍቱን ፕሮጀክት ስማርት ቢሾፍቱ ክውን ምግባር ዘኽእሎም ስምምዕ ተፈራሪሞም። እቲ ስምምዕ፤ ዋና ፈጻሚት ስራሕ ኢትዮ ቴሌኮም ፍሬህይወት ታምሩን ከንቲባ ምምሕዳር ከተማ ቢሾፍቱ ዓለማየሁ ኣሰፋን እዮም ፈሪመምዎ። ዋና ፈጻሚት ስራሕ ኢትዮ ቴሌኮም ፍሬህይወት ታምሩ ኣብዚ እዋን ከምዝበልኦ፤ ፕሮጀክት ስማርት ቢሾፍቱ ዲጂታል መሰረተ ልምዓት ክላውድ፣ማእኸል ፃውዒት፣ፍጥነትን ፅሬትን ዘለዎ ኢንተርኔት፣ኦፕቲካል ፋይበርን ካልኦትን ብምህናፅ እታ ከተማ ዘማዕብል ፕሮጀክት እዩ። ብተወሳኺ እውን ኣገልግሎታት ቤት መዛጋጃ፣ትምህርቲ፣ጥዕና፣ግብርና፣ትራንስፖርትን ኣተኣኻኽባ ግብርን ንምምዕባል ከምኡ እውን ቱሪዝምን ኢንቨስትመንትን ንምዕባይን ዘተኣማምን ድሕንነት ዘለዋ ቢሾፍቱ ክውን ንምግባርን ልዑል እጃም ከምዝህልዎ ተዛሪበን። ከንቲባ ምምሕዳር ከተማ ቢሾፍቱ ዓለማየሁ ኣሰፋ ብግደኦም፤ “እቲ ስምምዕ ዘለና ፀጋ ብኣግባቡ ብምፍላጥ ኣብ ረብሓ ንምውዓል ዝሕግዝ እዩ” ኢሎም። ኣገልግሎታት ስርዓት ክፍሊት፣ትራንስፖርት፣ጥዕና፣ ትምህርትን ካልኦትን ንምምዕባል ከምዝሕግዝ እውን ሓቢሮም።

  ኣዲስ ኣበባ/ ጥቅምቲ/30/ 2017 /ኢዜአ/ዩኒቨርስቲ መቐለ ሎሚ ዓመት ንመበል 30 ግዜ ብዝተፈላለዩ ዓውዲ ትምህርቲ ከምህሮም ዝፀንሐ 2 ሺሕን 811 ተምሃሮ ኣመሪቑ። ሎሚ መዓልቲ ዩንቨርስቲ መቐለ ኣብ ዘሳለጦ ስነ ስርዓት ምረቓ ዝተረኸቡ ርእሰ ምምሕዳር ግዚያዊ ምምሕዳር ክልል ትግራይ ኣይተ ጌታቸው ረዳ፥ ''መሃያ ዘይተኸፈለና፣ ደኺሙና ጠሚዩና ከይበልኩም ዘሎ ፀገም ተፃዊርኩም ወለዶ ኣብ ምህናፅ ዘለኹም መምህራን ልዑል ናእዳ ኣለኒ ክብሉ ገሊፆም። ኣይተ ጌታቸው ረዳ፥ ነዚ ኣብ ትግራይ ዝነበረ ኲናትን ዕንወትን ተሳጊርኩም ናብዚ ምርቓ ምብፃሕኹም እንኳዕ ደስ በለኩም ኢሎም። ተመረቕቲ ተምሃሮ ሳላ ዝተረኸበ ሰላም ተማሂርኩም ክትምረቑ ምብቃዕኹም ዝተሰመዐኒ ታሕጓስ ልዑል ኢዩ ብምባል፥ንሰላምን ልምዓትን ዓዱኹም ክትሰርሑ ይፅውዕ ክብሉ ድማ ፃውዒት ኣቕሪቦም። ኣብ ክሊ ዘለዎም ኩለመዳያዊ ፀገም ኮይኖም ወለዶ ንምህናፅ ለይትን ቀትርን ንዝሰርሑን ወለዶ ዝሃንፁን መምህራን ድማ ክብሪ ይግበኦም ብምባል ኣመስጊኖም። ፕሬዚዳንት ዩኒቨርስቲ መቐለ ፋና ሓገስ(ዶ/ር) ብግደአን፥ ዩንቨርስቲ መቐለ ዓቕሚ ዘለዎ ሓይሊ ሰብ ኣብ ምፍራይ እጃሙ ይፍፅም ኣሎ ኢለን። እቲ ዩኒቨርስቲ ካብቲ ሐዚ ዘለዎ ዓቕሚ ብዝበለፀ ንምጥንኻር ካብ ዩኒቨርስቲ ኣዲስ ኣበባ ቀፂሉ ዓርሱ ብዓርሱ ዝመሓደር ዩኒቨርስቲ ንምግባር ኣብ ምድላው ይርከብ ክብላ አውን ገሊፀን። ተመረቕቲ ተምሃሮ ሙሉእ ዓቕሚን ፍልጠትን ሒዞም እንትምረቑ ኣምባሳደራትና ዝበላ እተን ፕሬዚዳንት፥ ብኲናት ዝዓነወት ትግራይ ኣብ ምሕዋይ ዘይትካእ ግደ ከምዘለዎም ዘለወን እምነት ተዛሪበን።

  ኣዲስ ኣበባ/ ጥቅምቲ/29/ 2017 /ኢዜአ/ትግበራ ኣህጉራዊ ነፃ ዞባ ንግዲ ንምስላጥ ንዲጂታል ኣሰራርሓታት ጠመተ ምሃብ ከምዘድሊ ተገሊፁ። አብ ዓለም ለኸ ቤት ትምህርቲ ቢዝነስ ቻይና ኣውሮፓ ዳይሬክተር ካምፓስ ኣፍሪካ ማቲው ሳሚኒይ(ፕ/ር)፥ ዝማዕበለት ኣፍሪካ ዕላዊት ንምግባር ንዝትግበሩ መርሃ ግብሪታት ቴክኖሎጂ ወሳኒ ኢዩ ኢሎም። ኣፍሪካ ዝምድና ንግዲን ኢኮኖሚን ብምጥንኻር መዕባለ ወግዓዊ ንምግባር ተግባራዊ ካብ መንጎ ዝገበረቶም መርሃ ግብሪታት ኣህጉራዊ ነፃ ዞባ ንግዲ ቀዳማይ ከምዝኾነ ኣዘኻኺሮም። ኣብ ኣፍሪካ ካብ መንጎ ዝነብሩ 1 ነጥቢ 3 ቢሊየን ህዝቢ ዝትግበር ስርዓት ንግዲ ብምጥንኻር ሓድነታ ዝተጠናኸረን ዝማዕበለትን ኣፍሪካ ወግዓዊ ንምግባር እቲ ሰርዓት ብቑርፀኝነት ምትግባር ግቡእ ከምዝኾነ ሓቢሮም። ዕዳጋ ኤሌክትሮኒክስ ምስፋሕ፣ ኣተሓሕዛን ልውውጥን መረዳእታ ዲጂታል ምጥንኻር ወዘተ ምትግባር ኣድላዪ ኢዩ እውን ኢሎም።

  ኣዲስ ኣበባ/ጥቅምቲ/ 28/2017 (ኢዜኣ) ውፅኢት ትግበራ ወሳኒ ምዕራፍ ኣብ ዓለም ውሑዳት ሃገራት ጥራሕ ዘማዕብልኦ ፕሮጀክት ቴክኖሎጂ ዝናብ ደመና (cloud seeding) ብዓወት ፈፂምና ኢና ክብሉ ሚኒስትር መስኖን ከባብታት ቆላን ኣብርሃም በላይ(ዶ/ር) ገሊፆም። እቶም ሚኒስትር ኣብ ማሕበራዊ ምትእስሳር ገፆም ኣብ ዘመሓላለፍዎ መልእኽቲ፤ ቴክኖሎጂ ናይ ምልምማድን ምምዕባልን ድሌትናን ተኸታተልቲ ስራሕትናን ዘይጭበጡ ግመታት ከምዘይኾኑ ዘረጋግፁ መርኣያታት ውፅኢት እናቐፀሉ እዮም ኢሎም። ቅድሚ ውሑዳት ዓመታት ብደገፍ መንግስቲ ሕቡራት ዓረብ ኢሚሬትስ ተግባራዊ ዝተገበረን ኣብ ዓለም ውሑዳት ሃገራት ጥራሕ ዘማዕብልኦን ፕሮጀክት ቴክኖሎጂ ዝናብ ደመና (cloud seeding) ወሳኒ ፈተነ ምዕራፍ ውፅኢት ትግበራ ብዓወት ፈፂምና ኢና ክብሉ ገሊጾም። ብምትሕብባር ምምሕዳር ድሕንነት መርበብ ሓበሬታን ኢንስቲትዩት ብሄራዊ ሚቲዎሮሎጂን ከምኡ እውን ብደገፍ ገንዘብ ኣመራርሓ ሚኒስቴር መስኖን ከባብታት ቆላን ተግባራዊ ዝኾነ ቀዳማይ ምዕራፍ ፕሮጀክት ምምዕባል ቴክኖሎጂ ብዓወት ከምዝተዛዘመን ምጅማር ምትሕብባር ትካላት ንካልኣይ ምዕራፍ ዝምልከት ሓዱሽ ኣንፈት ኣፈፃፅማ ከምዘቐመጡን ኣረዲኦም።

  ኣዲስ ኣበባ/ ጥቅምቲ/25/ 2017 /ኢዜአ/ቐነ ኣእምሯዊ ንብረት ይኽበር ኣሎ። ንሰለስተ መዓልታት ኣብ ዝሳለጥ መድረኽ፥ ለዕሊ 13 ተወከልቲ ኢንተርፕራይዝ፣ ቢሮታት ሳይንስን ዬክኖሎጂን፣ ኤጀንሲታት ኢኖቬሽን ክሳተፉ ኢዮም ተባሂሉ። ትካላት ኣእሙራዊ ንብረት ኣብቲ ዓውዲ ዘለወን ግንዛበ ክብ ብምባል ንልምዓት ሃገር ዘበርክቶ ኣስተዋፅኦ ልዑል ብምዃኑ ሓበራዊ ሃገራዊ ግንዛበ ምፍጣር ቀንዲ ዕላማ እቲ መድረኽ ከምዘኾነ ዳይሬክተር እቲ በዓል መዚ ኣይተ ወልዱ ይመሰል ገሊፆም። ብፍላይ እቲ ዓውዲ ሃገር ቦቀል ኢኮኖሚ ምዕባይ ዘኽእል ከምዝኾነ ብምግላፅ፥ ኣብ ቀረባ እዋን ወግዓዊ ዝኾነ መመሓየሺ ማክሮ ኢኮኖሚ ዕላዊ ንክኸውን ኣብ ምግባር ብዙሓት ዕድላት ከምዘለዎ ኣብሪሆም። እቲ ቐነ ስልጠና ክእለት፣ ሀንፀት ዓቕሚን መጨበጢ ግንዛበን ዝካተትሉ ኢዩ ተባሂሉ።

  ኣዲስ ኣበባ/ ጥቅምቲ/25/ 2017 /ኢዜአ/መዛዘሚ መርሃ ግብሪ 5ይ ሃገር ለኸ ወርሒ ድሕንነት ሳይበር ኣብ ምምሕዳር ከተማ ድሬዳዋ ይካየድ ኣሎ፡፡ እቲ መርሃ ግብሪ "ድሕንነት ቁልፊ መሰረተ ልምዓት ንዲጂታል ሉኣላዊነት" ብዝብል መሪሕ ሓሳብ ኢዩ እናተኻየደ ዝርከብ፡፡ ኣብቲ መድረኽ ከንቲባ ምምሕዳር ከተማ ድሬዳዋ ከድር ጁሃር፣ ዋና ዳይሬክተር ምምሕዳር መርበብ ሓበሬታን ድሕንነትን (ኢመደኣ) ወ/ሮ ትዕግስት ሃሚድን መዳርግቲ ኣካላትን ተሳቲፎም፡፡ ወ/ሮ ትእግስት ሃሚድ ኣብቲ እዋን÷ ድሕንነት ሳይበርን ዲጂታል መለለዪ መንነትን ንጉዕዞ ዲጂታል ኢኮኖሚ ወሳኒ ከምዝኾነ ተዛሪበን፡፡ ኣብቲ መድረኽ "ኣብ ጉዕዞ ዲጂታል ኢኮኖሚ ግደ ድሕንነት ሳይበርን ዲጂታል መለለዪ መንነትን" ብዝብል ሓሳብ ዘተይካየድ ከምዘሎ ካብ ኮሙኒኬሽን እቲ ምምሐዳር ዝረኸብናዮ ሓበሬታ የመላኽት፡፡

  ኣዲስ ኣበባ/ ጥቅምቲ/22/ 2017 /ኢዜአ/ኣብ መንጎ ዘፈር ማሕበር መፍረይቲ ማሽነሪ ኢንዳስትሪ ትግራይን ዩኒቨርሲቲ መቐለን ውዕሊ ስምምዕነ ተኸቲሙ። ቢሮ ኢንዳስትሪ ግዚያዊ ምምሕዳር ክልል ትግራይ ዝዓነወ ዓውዲ ኢንዳስትሪ እቲ ክልል ናብ ንቡር ንምምላስ ኣብ ዝስራሕ ስራሕ ምትእስሳር ኢንዳስትሪን ላዕለዎት ትካላት ትምህርትን መሰረታዊ ምዃኑ ገሊፁ። ዘፈር ማሕበር መፍረይቲ ማሽነሪ ኢንዳስትሪ ክልል ትግራይ ካብ ዝጣየሽ ሓደ ዓመት ዝገበረ እንትኸውን፥ ልዕሊ 70 ማሽነሪ ዘፍርዩ ኢንዳስትሪታት ዝሓቖፈ ኢዩ ተባሂሉ። ምክትል ሓላፊ እቲ ቢሮ ኣይተ መሓሪ ገብረሚካኤል፥ እቲ ውዕሊ ስምምዕነት ኣብ ውፅኢታውነት መፍረይቲ ማሽነሪ ኢንዳስትሪ ክልል ትግራይ ብቴክኖሎጂ እናተደገፈ ዝለዓለ ዓቕሚ ክፈጥር ዘኽእል ምዃኑ ገሊፆም። ነቲ ስምምዕነት ብወገን ዩኒቨርሲቲ መቐለ ዝፈረሙ ኣብቲ ዩኒቨርሲቲ ምክትል ፕረዚደንት ምርምርን ተሳትፎ ማሕበረሰብን ዶክተር አያሱ ያዘው ብግደኦም፥ እቲ ዝተኸተመ ስምምዕነት ዩኒቨርሲቲ መቐለ ዘለዎ ፍልጠት፣ ዓቕሚ ምርምርን ቴክኖሎጅን ኣብ ምድጋፍ መፍረይቲ ኢንዳስትሪ ንምሕጋዝ ዘኽእሎ ኢዩ ኢሎም።

  ‹‹ቀዳማዊት እመቤት ዝናሽ ታያቸው ሎሚ መዓልቲ ቁፅሮም ልዕሊ 2000 ዝኾኑ መፃሕፍቲን 25 “ኦርካም ማይ ኣይ” ዝተባህለን ንዓይነ ስውራን ኣንበብቲ ዝሕግዝ መሳርሒ ንቤተ-መፃሕፍቲ ኣብርሆት ብህያብ ኣበርኪተን፡፡ ነቲ ቤተ መፃሕፍቲ ዝተበርከቱ መፃሕፍቲ ኣብ ዝተፈላለዩ ርእሰ ጉዳያት ንኣንበብቲ ብፍላይ ንተምሃሮ ዩኒቨርስቲ ሓፈሻዊ ፍልጠት ዝህቡ እኩባት መፃሕፍቲ እንትኾኑ፤ እቶም መፃሕፍቲ “Book for Africa” ካብ ዝተብሃለ ትካል ብሓገዝ ዝተረኸቡ ከምዝኾኑ ተገሊፁ፡፡›› - ቤት ፅሕፈት ቀዳማዊት እመቤት

  ኣዲስ ኣበባ/ ጥቅምቲ/19/ 2017 /ኢዜአ/ፖሊሲ መፈፀሚ ስትራቴጂ ሳይንስ፣ ቴክኖሎጂን ኢኖቬሽንን ኢኮኖሚያዊ ዕቤት ንምስጓም ወሳኒ ኢዩ ክብሉ ሚኒስትር ኢኖቬሽንን ቴክኖሎጂን በለጠ ሞላ (ዶ/ር) ገሊፆም፡፡ ሚኒስቴር ኢኖቬሽንን ቴክኖሎጂን÷ ኣብ ሰነድ መፈፀሚ ስትራቴጂ ሳይንስ፣ ቴክኖሎጂን ኢኖቬሽንን (ኤስ ቲ ኣይ) ዘሰናደዎ መፅናዕቲ ጠሚቱ ይካየድ ኣሎ፡፡ ኣብቲ ወርክሾፕ ሰነድ መፈፀሚ ስትራቴጂ ሳይንስ፣ ቴክኖሎጂን ኢኖቬሽንን (ኤስ ቲ ኣይ) ንሚኒስትራት፣ ንላዐለዎት ሓለፍቲ ስራሕ ፌደራል ትካላት ከምኡ እውን ንሓለፍቲ ቢሮ ክልላትን ዕድመ ዝተገበረሎም ኣካላትን ቀሪቡ። በለጠ ሞላ (ዶ/ር) ÷ እቲ ፖሊሲ መፈፀሚ ስትራቴጂ ንኢትዮጵያን ማእኸላይ እቶት ምስ ዘለወን ሃገራት ንምስራዕ ዝዓለመ ሃገራዊ ስትራቴጂ ከምዝኾነ ኣብሪሆም። እቲ ስትራቴጂ ኩሎም ሴክተራት ዝድህስስ ከምዝኾነ ብምሕባር÷ ኣብቲ ዓውዲ ውፅኢታዊ ንምዃን ድሉዋት ንኽኾኑ ምሕባሮም ሓበሬታ እቲ ሚኒስቴር የመላኽት፡፡

  ኣዲስ ኣበባ/ጥቅምቲ /19/2017 (ኢዜኣ) ቻይና ንህንፀት ዲጂታል ኢኮኖሚ ኢትዮጵያ ትገብሮ ደገፍ ኣጠናኺራ ከምትቕፅለሉ ኣፍሊጣ። ግሎባል ኢንሼቲቭ ዓሊባባ ኣብ ዓውዲ ንግዲ ምስ ዝሰርሑ ኢትዮጵያውያን መናእሰይ ይዝቲ ኣሎ። ኣብ ኤምባሲ ቻይና ኣብ ኢትዮጵያ ሚኒስትር ካውንስለር ጉዳይ ሃፍቲ ምጣነን ንግድን ያንግ ይሃንግ ኣብዚ እዋን ከምዝበልዎ፤ ኢትዮጵያ ዲጂታል ምጣነ ሃፍቲ ንምህናፅ ተሳልጦ ዘላ ስራሕ ዝተባባዕ እዩ። ነዚ እውን ቻይና ኤሌክትሮኒክ ንግዲ(E-commerce) ሓዊሱ ዲጂታል ኢኮኖሚ ንምህናፅ ኣብ ኢትዮጵያ እናተሳለጡ ንዘለዉ ስራሕቲ ትገብሮ ደገፍ ኣጠናኺራ ከምትቕፅለሉ ሓቢሮም። ሚኒስትር ዲኤታ ሚኒስቴር ኢኖቬሽንን ቴክኖሎጂን ይሽሩን ኣለማየሁ(ዶ/ር) ብግደኦም፤ ኢትዮጵያ ህንፀት ዲጂታል ኢኮኖሚ ንምዕዋት ኣብ መሰረተ ልምዓት፣ፖሊስን ካልኦትን ምችው ኩነታት ከምዝፈጠረት ኣፍሊጦም። ምስ ዓሊባባ ዝተፈጠረ ምትሕብባር እውን ኢትዮጵያውያን መናእሰይ ክእለት ንምዕባይ፣ልምዲ ንምቕሳምን ኣብ ዓለም ለኸ ዕዳጋ ተበፃሒ ብምዃን ዲጂታል ኢትዮጵያ ክውን ንምግባርን ከምዝሕግዝ ተዛሪቦም። ላዕለዋይ ኣማኻሪ ዓሊባባ ዳን ሊዩ፤ ዓሊባባ ብዝበፅሖ ብርኪ ቴክኖሎጂ ኣብ ኣፍሪካ ከምኡ እውን ኣብ ኢትዮጵያ ኤሌክትሮኒክ ንግዲ ንምስፍሕፋሕ ደገፍ ከምዝገብር ገሊፆም።

  ኣዲስ ኣበባ/ ጥቅምቲ/12/ 2017 /ኢዜአ/ኣብ ትግበራ ሃገራዊ ፖሊሲ ሳይበር ደሕንነት መዳርግቲ ኣካላት ብፅሒቶም ንክዋፅኡ ዋና ዳይሬክተር ምምሕዳር ኢንፎርሜሽንን መረብ ድሕንነትን ትእግስት ሃሚድ ተዛሪበን። እቲ ምምሕዳር ሓምሻይ ሃገር ለኸ ወርሒ ሳይበር ድሕንነት ጠሚቱ፥ ”ሃገራዊ ፖሊሲ ሳይበር ድሕንነትን ግደ መዳርግቲ ኣካላትን” በዝበል መሪሕ ሓሳብ መድረኽ ዘተ የሳለጥ ኣሎ። እተን ዋና ዳይሬክተር፥ ፖሊሲ ሳይበር ድሕንነት ቀንዲ መሐለዊ መሰረተ ልምዓት ክኸውን ዘኽእል ሰፊሕ ትሕዝቶ ዘለዎ ኢዩ ኢለን። ጉዳይ ሳይበር ድሕንነት ናይ ሓደ ትካል ጥራሕ ከምዘይኮነ ብምግላፅ፥ እቲ ፖሊሲ ተግባራዊ ብምግባር ሳይበር ድሕንነት ንምሕላው ሕድሕድ መዳርግቲ ኣካል ሓላፍነቱ ክዋፃእ ከምዝግባእ ገሊፀን።

  ኣዲስ ኣበባ/ጥቅምቲ/ 8/2017 (ኢዜኣ) ኣብ ኢትዮጵያ ልኣላዊነት ምግቢ ብዘላቕነት ምርግጋፅ ዘኽእል ዓቕሚ ከምዘሎ ብተግባር ብምርግጋፅ ጭቡጥ ውፅኢት ከምዝተረኸበ ኣብ ቤት ፅሕፈት ቀዳማይ ሚኒስትር መተሓባበሪ ሚኒስትር ማእኸል ህንፀት ስርዓት ዲሞክራሲ ቢቂላ ሁሪሳ(ዶ/ር) ገሊፆም። ̎ልኣላዊነት ብመፍረያይነት̎ ኣብ ትሕቲ ዝብል መሪሕ ሓሳብ ዝተዳለወ ዘተ ፓነል ኣብ ከተማ ኣዳማ ይካየድ ኣሎ። ኣብ ቤት ፅሕፈት ቀዳማይ ሚኒስትር መተሓባበሪ ሚኒስትር ማእኸል ህንፀት ስርዓት ዲሞክራሲ ቢቂላ ሁሪሳ(ዶ/ር) ኣብዚ እዋን፤ ልኣላዊነት ምግቢ ቁልፊ ጉዳይ ኢትዮጵያ ከምዝኾነ ሓቢሮም። ኣብ ዝሓለፉ ዓመታት ልኣላዊነት ምግቢ ንምርግጋፅ ዝተሳጡ ስራሕቲ ጭቡጥ ውፀኢት እናተረኸበሎም ምዃኑ ብምሕባር፤ ልኣላዊነት ምግቢ ምርግጋፅ ዘኽእል ዓቕሚ ከምዘሎ እውን ምርግጋፅ ተኻኢሉ እዩ ኢሎም። ዋና ፈጻሚ ስራሕ ናይ ኢትዮጵያ ዜና ኣገልግሎት(ኢዜኣ) ኣይተ ሰይፈ ደርቤ ብግደኦም፤ ኢዜኣ ምስ መሓዙት ኣካላት ብምትሕብባር ኣብ ዝተፈላለዩ ሃገራዊ ጉዳያት ዝጠመቱ ብርክት ዝበሉ መድረኻት እናዳለወ ከምዝርከብ ተዛሪቦም። ልዕሊ 14 ዓበይቲ ሃገራውን ዓለም ለኻውን ትሕዝቶ ዘለዎም መድረኻት ዘተ ፓነል ብዝተፈላለዩ ቋንቋታት ከምዝተዳለዉን ዝተሳለጡን እውን ኣዘኻኺሮም። እዚ ናይ ሎሚ መድረኽ እውን መቐፀልቲ ናይዚ ምዃኑ ብምግላፅ ኣብ ኣገደስቲ ጉዳያት መሰረት ዝገበሩ መድረኻት ዘተ ተጠናኺሮም ከምዝቕፅሉ ኣረጋጊፆም። ኣብቲ መድረኽ፤ ልኣላዊነት ምግቢ ምስ ልኣላዊነት ሃገር ዘለዎ ምትእስሳር፣ምስ ፖሊሲ ቅነሳ ብሄራዊ ስግኣት ሓደጋ ዘሎዎ መስተጋብር ከምኡ እውን ልኣላዊነት ምግቢ ንምርግጋጽ እጃም ሚድያን ኮሚዩኒኬሽንን ዝድህስሱ መፅናዕታዊ ፅሑፋት ቀሪቦም ክዝተየሎም እዩ።

  ኣዲስ ኣበባ/ጥቅምቲ/ 8/2017 (ኢዜኣ) ̎ልኣላዊነት ብመፍረያይነት̎ ኣብ ትሕቲ ዝብል መሪሕ ሓሳብ ኣብ ከተማ ኣዳማ ዘተ ፓነል ምክያድ ጀሚሩ። ኣብቲ ዘተ ፓነል፤ ኣብ ቤት ፅሕፈት ቀዳማይ ሚኒስትር መተሓባበሪ ሚኒስትር ማእኸል ህንፀት ስርዓት ዲሞክራሲ ቢቂላ ሁሪሳ(ዶ/ር)፣ዋና ዳይሬክተር ኣገልግሎት ዲያስፖራ ኢትዮጵያ ኣምባሳደር ፍጹም ኣረጋ፣ኮሚሽነር ኮሚሽን ኣመራርሓ ስግኣት ሓደጋ ኣምባሳደር ሽፈራው ተክለማሪያም (ዶ/ር)፣ሚኒስትር ዲኤታ ሚኒስቴር ግብርና ፍቅሩ ረጋሳ (ዶ/ር)፣ሚኒስትር ዲኤታ ሚኒስቴር ኣገልግሎት ኮሚዩኒኬሽን መንግስቲ ሰላማዊት ካሳ፣ዋና ዳይሬክተር ኢንስቲትዩት ትራንስፎርሜሽን ግብርና ማንደፍሮ ንጉሴ (ዶ/ር) ከምኡ እውን ሓለፍቲ ቢሮ ግብርና ክልላት፣ኮሚሽነራት ኣመራርሓ ስግኣት ሓደጋ ክልላት፣ሓለፍቲ ሚዲያን ኮሚዩኒኬሽንን፣ ሙሁራን፣ሓለፍቲ ስራሕ መንግስትን ፃውዒት ዝተገበረሎም ኣጋይሽን ተረኺቦም። ኣብቲ መድረኽ፤ ልኣላዊነት ምግቢ ምስ ልኣላዊነት ሃገር ዘለዎ ምትእስሳር፣ምስ ፖሊሲ ቅነሳ ብሄራዊ ስግኣት ሓደጋ ዘሎዎ መስተጋብር ከምኡ እውን ልኣላዊነት ምግቢ ንምርግጋጽ እጃም ሚድያን ኮሚዩኒኬሽንን ዝድህስሱ መፅናዕታዊ ፅሑፋት ቀሪቦም ክዝተየሎም እዩ። እቲ መድረኽ፤ ናይ ኢትዮጵያ ዜና ኣገልግሎት፣ሚኒስቴር ግብርና፣ኮሚሽን ኣመራርሓ ስግኣት ሓደጋን ኣገልግሎት ዲያስፖራ ኢትዮጵያን ተሓባቢሮም ዘዳለውዎ እዩ።

  ኣዲስ ኣበባ/ጥቅምቲ/ 8/2017 (ኢዜኣ) ደቂ ኣንስትዮ ኣብ ዓውዲ ድሕንነት ሳይበር ናብ ቅድሚት ንክመፃን እጃም መሪሕነት ንክዋፅኣን ምብቃዕን ምሕጋዝን ከምዘድሊ ዋና ዳይሬክተር ምምሕዳር መርበብ ድሕንነት ሓበሬታ ኢትዮጵያ ወይዘሮ ትዕግስት ሃሚድ ገሊፀን። ኣብ ሕቡራት ዓረብ ኢሚሬትስ ኣብ ዱባይ እናተኻየደ ኣብ ዝርከብ ኤክስፖ ጂ.ኣይ.ቴክስ (GITEX 2024) ደቂ ኣንስትዮ ኣብ ድሕንነት ሳይበር ዘለወን ተሳትፎን እጃምን ዝጠመተ ዘተ ፓነል ተኻይዱ። ኣብቲ ዘተ ብፓናሊስትነት ዝቐረባ ዋና ዳይሬክተር ምምሕዳር መርበብ ድሕንነት ሓበሬታ ወይዘሮ ትዕግስት ሃሚድ፤ ደቂ ኣንስትዮ ኣብ ዓውዲ ድሕንነት ሳይበር ናብ ቅድሚት ንክመፃ ኩለመዳያዊ ደገፍ ምግባር ይግባእ ኢለን። ብተወሳኺ እውን ደቂ ኣንስትዮ ዓርሰን ምብቃዕን ተወዳዳሪ ኮይነን ምቕራብን ትፅቢት ከምዝግበረለን ገሊፀን። ኢትዮጵያ ደቂ ኣንስትዮ ኣብ ዓውዲ ድሕንነት ሳይበር ናብ ቅድሚት ንክመፃ ዘኽእሉ ስጉምትታት፣ብፖሊሲን ዝተፈላለዩ ማዕቐፋት ሕግን ንምድጋፍ ዝተፈላለዩ ስራሕቲ እናሳለጠት ከምዝኾነት እውን ኣረዲአን። ምምሕዳር መርበብ ድሕንነት ሓበሬታ ደቂ ኣንስትዮ ኣባላት እቲ ትካል ናብ ኣመራርሓ ንክመፃን ኣብ ኩሉ ዓውዲ ውፅኢታዊ ንክኾናን ግቡእ ትኹረት ሂቡ እናሰርሐ ከምዝኾነ ምግላፀን ካብቲ ምምሕዳር ዝተረኸበ ሓበሬታ የመላኽት።