ኣዲስ ኣበባ/ መጋቢት/23/ 2017 /ኢዜአ/ሎሚ ምሸት ኣብ ዘሎ መበል 30 ሰሙን መርሃ ግብሪ ፕሪሚየር ሊግ እንግሊዝ ሰለስተ ፀወታታት ክካየዱ ኢዮም። ብመሰረት እቲ መርሃ ግብሪ፥ ኣርሴናል ኣብ ሜድኡ ሰዓት 3፡45 ምሸት ምስ ፉልሃም ክጋጠም ኢዩ። ኣርሴናል ክሳብ ሐዚ ኣብ ዝገበሮም ፀወታታት 58 ነጥቢ ብምውህላል ኣብ ካልኣይ ደረጃ ዘሎ እንትኸውን፥ ፉልሃም ድማ 45 ነጥቢ ብምሓዝ ሻምናይ ደረጃ ሒዙ ኣሎ። ዎልቭስን ምስ ዌስትሃም ዩናይትድ ሰዓት 3፡45፣ ኖቲንግሀም ፎረስት ምስ ማንቼስተር ዩናይትድ ድማ ሰዓት 4፡00 ክፃወቱ ኢዮም።

  ኣዲስ ኣበባ/ መጋቢት/20/ 2017 /ኢዜአ/ቢሮ መናእሰይን ስፖርትን ምምሕዳር ከተማ ኣዲስ ኣበባ ሃገራዊ ለውጢ ሻውዓይ ዓመት ምኽንያት ብምግባር ብዙሓት ክፋላት ማሕብረተሰብ ዝተሳተፉሉ ኣካላዊ ምንቅስቓስ ኣብ ሴንተር ኮንቬንሽን ኣፍሪካ ኣካይዱ፡፡ ምክትል ከንቲባ ምምሕዳር ከተማ ኣዲስ ኣበባ ጃንጥራር ኣባይ÷ "ትማሊ፣ ሎሚን ፅባሕ ንልዕልና ኢትዮጵያ" ብዝብል መሪሕ ቃል ኣብ ዝተኻየደ ኣካላዊ ብቕዓት ምንቅስቓስ ተረኺቦም መልእኽቲ ኣመሓላሊፎም። ኣብ ዝሓለፉ ሸውዓተ ናይ ለውጢ ዓመታት ኣብ ሃገራዊ ቁጠባዊ፣ ማሕበራዊን ፖለቲካዊን ጉዳያት ዕውት ውፅኢት ምምዝጋብ ተኻኢሉ ምባሎም ካብቲ ቢሮ ዝተረኸበ ሓበሬታ የረድእ፡፡ መንግስቲ ንስፖርት ዝሃቦ ጠመተ ድሕሪ ሃገራዊ ለውጢ ልዕሊ 1 ሺሕን 300 ስፖርታዊ ምንቅስቓሳት መስርሒ ቦታታት ምህናፆም ዝገለፁ ድማ ሓላፊ ቢሮ መናእሰይን ስፖርትን ምምሕዳር ከተማ ኣዲስ አበባ በላይ ደጀን እዮም፡፡

  ኣዲስ ኣበባ/ መጋቢት/20/ 2017 /ኢዜአ/ኣብ ፕሪሚየር ሊግ እንግሊዝ ፀወታታት ርብዒ ፍፃመ ኤፍ ኤ ካፕ ሎሚ ክካየዱ ኢዮም። ኣብቲ ናይ ሎሚ መዓልቲ መርሃ ግብሪ ፉልሃም ምስ ክሪስታል ፓላስ፣ ብራይተን ምስ ኖቲንግሃም ክጋጠማ ኢየን። ሰዓት 9፡15 ድሕሪ ቀትሪ ፉልሀም ኣም ሜድኡ ክሪስታል ፓላስን ከተኣናግድ ኢዩ። ምሸት ሰዓት 2፡15 ድማ ብራይተን ኣብ ሜድኡ ምስ ኖቲንግሀም ፎረስት ክጋጠም ኢዩ።

  ኣዲስ ኣበባ/ መጋቢት/16/ 2017 /ኢዜአ/ኣብ ቻይና ናንጂንግ ኣብ ዝተኻየደ መበል 20 ዓለም ለኸ ሻምፕዮን ኣትሌቲክስ ውሽጢ ገዛ ዝተሳተፈ ጉጅለ ልኡኽ ኣትሌቲክስ ኢትዮጵያ ሎሚ ንግሆ ኣዲስ ኣበባ ኣትዩ፡፡ እቲ ጉጅለ ልኡኽ ኣብ ዓለም ለኸ መዕርፎ ነፈርቲ ቦሌ እንትበፅሕ ናይ ጅግና ኣቐባብላ ከምዝተገበረሉ ካብ ፌዴሬሽን ኣትሌቲክስ ዝተረኸበ ሓበሬታ የረድእ፡፡ ነቲ ልኡኽ ሚኒስትር ዲኤታ ባህሊን ስፖርትን መኪዩ መሓመድ፣ ፕሬዚዳንት ኮሚቴ ኦሎምፒክ ኢትዮጵያ ዶ/ር ኣሸብር ወልደጊዮርጊስ፣ ፕሬዚዳንት ፌዴሬሽን ኣትሌቲክስ ኢትዮጵያ ኮማንደር ኣትሌት ስለሺ ስህንን ፃውዒት ዝተገበረሎም ኣጋይሽን ኣብዝተረኸብሉ ኣቀባብላ ተገይሩሎም፡፡ ኢትዮጵያ ኣብ ዓለም ለኸ ሻምፒዮና ካብ ዓለም ሳልሰይቲ ካብ ኣፍሪካ ድማ ቀዳመይቲ ብምዃን ውድድራ ምዝዛማ ይፍለጥ፡፡

  ኣዲስ ኣበባ/ መጋቢት/16/ 2017 /ኢዜአ/ኣሰልጣኒ ሃገራዊት ጋንታ ኢትዮጵያ መሳይ ተፈሪ ትማሊ ምሸት ንጅቡቲ 6 ን 1 ብዝኾነ ሰፊሕ ውፅኢት ምስ ሰዓሩ እቲ ፀወታ ምስዓር ልዑል ትርጉም ከምዘለዎ ገሊፆም። እቲ ዓወት ንዝቕፅሉ ፀወታታት ዓቕሚ ከምዝኾኖም ብምሕባር፤ ኣብቲ ፀወታ ካብ ሓላዊ ልዳት ጀሚሩ ክሳብ ኣብ ቅድሚት መስመር ዘለዉ ተፃወትቲ ዝሐሸ ምንቅስቓሰ ከምዘርአዩ ተዛሪቦም፡፡ “ኣብ ልዕሊ ሃገራዊት ጋንታ ጅቡቲ ሽዱሽተ ሸቶታት ብምምዝጋብና ዘለና ዕዳ ሸቶ ክንስርዝ ክኢልና ኢና” ክብሉ ተዛሪቦም፡፡ ኣብ ሃገራዊት ጋንታ ኢትዮጵያ ዝርከቡ ተፃወትቲ ልዑል ዓቕሚ ከምዘለዎም ዝገለፁ እቶም ኣሰልጣኒ፤ ኣብ ከይዲ ፅቡቕ ቁመና ዘለዎ ጋንታ ምህናፅ ከምዝከኣል ገሊፆም፡፡ ሃገራዊት ጋንታ ኢትዮጵያ ኣብ መፃረዪ ፀወታ ፅዋዕ ዓለም 2026 ካብ ዝገበረቶም ሽዱሽተ ፀወታታት ሓደ ዓወት ክልተ ስዕረት ሰለስተ ማዕረ ብምፍልላይ ብ6 ነጥቢ ኣብ 4ይ ደረጃ ትርከብ፡፡ ኣብ ቀፃሊ ድማ 28 ነሓሰ 2017 ዓ.ም ምስ ግብፂ ከምኡ እውነ 1 ጳጉሜን 2017 ዓ.ም ምስ ሴራሊዮን ፀወታኣ ክተካይድ ኢያ፡፡

  ኣዲስ ኣበባ/ መጋቢት/14/ 2017 /ኢዜአ/ኣብ መበል 20 ሻምፒዮና ኣትሌቲክስ ውሽጢ ገዛ ዓለም ኢትዮጵያውያን ኣትሌታት ጉዳፍ ፀጋይን ድርቤ ወልተጂን ቀዳማይን ካልኣይን ብምውፃእ ተዓዊተን።

  አዲስ አበባ/መጋቢት /14/2017/ኢዜአ/ኣብ ቻይና ከተማ ናንጂንግ እናተኻየደ ኣብ ዝርከብ መበል 20 ሻምፒዮና ኣትሌቲክስ ውሽጢ ገዛ ዓለም ኢትዮጵያውያን ኣትሌታት ዝሳተፉሎም ኽልተ ውድድራት ፍፃመ ሎማዓንቲ ክሳለጡ 'ዮም። ድሕሪ ሰዓት 9:28 ብደቂ ኣንስትዮ 1500 ሜትር ፍፃመ ኣትሌት ጉዳፍ ፀጋይን ኣትሌት ድርቤ ወልተጂን ክወዳደራ 'የን። ድሕሪ ሰዓት 9:54 ድማ ብ800 ሜትር ደቂ ኣንስትዮ ውድድር ፍፃመ ኣትሌት ፅጌ ድጉማን ኣትሌት ንግስት ጌታቸውን ክሳተፋ 'የን። ኢትዮጵያ ክሳብ ሕዚ ኣብቲ ሻምፒዮና ኣትሌት ፍረወይኒ ሃይሌ ብ3000 ሜትር ደቂ ኣንስትዮ ወርቅን ብደቂ ተባዕትዮ 3000 ሜትር ኣትሌት በሪሁ ኣረጋዊ ብርን ሜዳልያ ረኺባ።

  አዲስ አበባ/ መጋቢት/ 13/2017 (ኢዜአ)፦ አብ ቻይና ናንጂንግ አብ ዝካየድ ዘሎ መበል 20 ሻምፒዮና አትሌቲክስ ዓለም በአወዳት ፍፃመ 3000 ሜትሮ አትሌት በሪሁ አረጋዊ ካልአይ ብምውፃእ ንሃገሩ ሜዳሊያ ብሩር አምፂኡ።

  አዲስ አበባ/ መጋቢት/ 13/2017(ኢዜአ)፦ ኢትዮጵያ አብ ሻምፒዮና አትሌትክስ ውሽጢ ገዛ ዓለም ፈላሚ መዳልያ ወርቂ ረኺባ። አብ ቻይና ቤጂንግ አብ ዝካየድ ዘሎ መብል 20 ሻምፒዮና አትሌቲክሰ ደቂ አንስትዮ ፍፃመ 3000 ሜትሮ አትሌት ፍሬወይኒ ኃይሉ ሜዳልያ ወርቂ ረኺባ ።

  አዲስ አበባ/ መጋቢት/ 13/2017(ኢዜአ)፡-መበል 10 ይ ከተማ ሓቖፍ ውድድር ስፖርት ሊግ መምህራንን ተምሃሮን ሎሚ ክጅመር እዩ ።

  ኣዲስ ኣበባ/ መጋቢት/12/ 2017 /ኢዜአ/ኣብ መበል 20 ሻምፒዮና ኣትሌቲክስ ውሽጢ ገዛ ዓለም ብደቂ አንስትዮ 1 ሺሕን 500 ሜትሮ ጉዳፍ ፀጋይን ድርቤ ወልተጂን ንፍፃመ ሓሊፈን፡፡ ኣብ ቻይና ናንጂንግ እናተኻየደ ኣብ ዝርከብ ሻምፒዮና፥ ኢትዮጵያውያን ኣትሌታት ዝተሳተፉሉ ውድድር ፍርቂ ፍፃመ 1 ሺሕን 500 ሜትሮ ደቂ ኣንስትዮ ተኻይዱ፡፡ ኣብ ምድብ 1 ዝተሳተፈት ኣትሌት ጉዳፍ ፀጋይ ብ4 ደቒቕ 11 ሰከንድን 87 ማይክሮ ሰከንድ 1ይቲ ብምውፃእ ንፍፃመ ክትሓልፍ ክኢላ፡፡ ኣብ ምድብ 3 ዝተሳተፈት ኣትሌት ድርቤ ወልተጂ ድማ ብ4 ደቒቕ 12 ሰከንድን 25 ማይክሮ ሰከንድ ብተመሳሳሊ 1ይቲ ብምውፃእ ናብ ፍፃመ ክትሓልፍ ክኢላ፡፡

  ኣዲስ ኣበባ/ መጋቢት/12/ 2017 /ኢዜአ/ሃገራዊት ጋንታ ኢትዮጵያ ኣብ መፃረዪ ፅዋዕ ዓለም 2026 ሓምሻይ ናይ ምድብ ፀወታኣ ምስ ሃገራዊት ጋንታ ግብፂ ክትገጥም ኢያ። እታ ሃገራዊት ጋንታ ኣብ ምድብ ካብ ዝገበረቶም ኣርባዕተ ፀወታታት ሰለስተ ነጥቢ ብመሓዝ ኣብቲ ምድብ 5ይ ደረጃ እንትትቅመጥ፤ ተጋጣሚታ ግብፂ ብ10 ነጥቢ ነቲ ምድብ እናመርሐት ትርከብ። ካዛብላንካ ኣብ ዝርከብ ስታዲየም ላርቢ ዛውሊ ሎሚ መዓልቲ ለይቲ ሰዓት 6 ዝግበር ፀወታ ክልቲአን ሃገራዊ ጋንታታት÷ ሞሪሸሳዊ ዳይና ፓትሪስ ሚላዛር ማእኸል ዳይና ብምዃን ክመርሑዎ ኢዮም። ኣብቲ ምድብ ዝርከባ ቡርኪናፋሶን ጅቡቲን ሎሚ ምሸት ሰዓት 1 ክራኸባ ኢየን። ካልኦት ናይቲ ምድብ ሃገራት ሴራሊዮንን ጊኒ ቢሳውን ትማሊ ምሸት ዝገበረኦ ፀወታ፤ ብዓወት ሴራሊዮን 3 ን 1 ተዛዚሙ። ሴራሊዮን ምስዓራ ስዒቡ ነጥባ ሸሞንተ ብምብፃሕ ኣብቲ ምድብ ኣብ ካልኣይ ደረጃ ክትቅመጥ ክኢላ።

  አዲስ አበባ/መጋቢት/12/2017/ኢዜአ/ኣብቲ ዝተጀመረ ሻምፒዮና ኣትሌቲክስ ውሽጢ ገዛ ዓለም ብ800 ሜትር ደቂ ኣንስትዮ ኢትዮጵያውያን ኣትሌታት ናብ ፍርቂ ፍፃመ ሓሊፈን። ኣብ 800 ሜትር ውድድር ደቂ ኣንስትዮ ዝተሳተፋ ሰለስቲአን ኢትዮጵያውያን ኣትሌታት ሃብታም ኣለም፣ ፅጌ ድጉማን ንግስት ጌታቸውን ናብ ፍርቂ ፍፃመ ሓሊፈን። ቐፃሊ ኢትዮጵያውያን ኣትሌታት ዝሳተፉሉ ብኽልቲኡ ፆታ 1500 ሜትር ውድድር ፍርቂ ፍፃመ ክካየድ 'ዩ። ብናይ ኢትዮጵያ ኣቆፃፅራ ሰዓት ቀትሪ 7:33 1500 ሜትር ደቂ ኣንስትዮ ፍርቂ ፍፃመን 8:18 ሰዓት 1500 ሜትር ደቂ ተባዕትዮ ፍርቂ ፍፃመ ውድድራት ክካየዱ 'ዮም። ኣብ ሻምፒዮና ውሽጢ ገዛ ዓለም ዝተለመዱ ከም ጉዳፍ ፀጋይ፣ ፅጌ ድጉማ፣ ለምለም ሃይሉ፣ ሳሙኤል ተፈራ፣ በሪሁ ኣረጋዊን ኻልኦት መናእሰይ ኢትዮጵያውያን ኣትሌታትን ልሙድ ዓወቶም ትፅቢት ይግበር።

  ኣዲስ ኣበባ/ መጋቢት/10/2017 /ኢዜአ/ኣብ ሻምፒዮና ኣትሌቲክስ ውሽጢ ገዛ ዓለም ዝሳተፍ ጉጅለ ሃራዊት ጋንታ ኣትሌቲክስ ኢትዮጵያ ናብ ቻይና ናንጂንግ ኣምሪሑ። እቲ ጉጅለ 12 ኣትሌታት፣ ክልተ ኣሰልጠንቲ፣ ሓደ መራሒ ጉጅለ፣ ሓደ መራሒ ጉጅለ ቴክኒክ፣ ሓደ ላዕለዋይ በዓል ሞያ ሕክምናን ሓደ ፊዝዮቴራፒስትን ዘካተተ ኢዩ። ሚኒስትር ዲኤታ ባህሊን ስፖርትን መኪዩ መሓመድን ፕሬዚዳንት ፌዴሬሽን ኣትሌቲክስ ኢትዮጵያ ኮማንደር ኣትሌት ስለሺ ስህንን ሓዊሱ ካልኦት ኣመራርሓ እቲ ፌዴሬሽንን ኣብ ዓለም ለኸ መዕርፎ ነፈርቲ ቦሌ ብምርካብ ነቲ ጉጅለ ምፍናው ምግባሮም ካብቲ ፌዴሬሽን ዝረኸብናዮ ሓበሬታ የረድእ። ከም ኣቆፃፅራ ኣውሮፓውያን ካብ 21 ክሳብ 23 መጋቢት 2025 እቲ ውድድር ክሳለጥ እዩ ።

  ኣዲስ አዘበባ/ መጋቢት/7/ 2017 /ኢዜአ/ፀወታ ፍፃመ ካራባኦ ካፕ ሎሚ ምሸት ሰዓት 1: 30ን ኣብ ስታዲየም ዌምብሌይ ኣብ መንጎ ሊቨርፑልን ኒውካስል ዩናይትድን ክካየድ ኢዩ። ሊቨርፑል ኣብ ፍርቂ ፍፃመ ንቶተንሃም ሆትስፐር ብምስዓር ናብ ፍፃመ ምብፅሑ ይዝከር። ኒውካስል ዩናይትድ እውን ንኣርሰናል ብምስዓር ናብ ፍፃመ ዝበፅሐ ጋንታ ኢዩ። ሎሚ ክልቲኦም ጋንታታት ንፍፃመ ዝጋጠሙ እንትኾኑ፥ ኣብ ኩሎም ውድድራት ኣብ ዝሓለፉ ውድድራት ብሕድሕድ ተራኺቦም ኣብ ዝገበርዎ ፀወታታት ሊቨርፑል ኣርባዕተ ግዘ ተዓዊቱ። ኣብ ሓደ ፀወታ ድማ ብማዓረ ምፍልላዮም ይዝከር።

  ኣዲስ ኣበባ/ መጋቢት/7/ 2017 /ኢዜአ/ሎሚ ኣብ ዝካይድ መበል 29 ሰሙን ፕሪሚየር ሊግ እንግሊዝ ኣርሴናል ኣብ ሜድኡ ሰዓት 10 ምስ ቼልሲ ዝገብሮ ፀወታ ልዑል ትፅቢት ተገይሩሉ ኣሎ። ኣርሴናል ክሳብ ሐዚ ብዝገበሮም ፀወታታት 55 ነጥቢ ብምውህላል ካብ ሊቨርፑል ቀፂሉ ኣብ መበል ካልኣይ ደረጃ ከምዝርከብ ይፍለጥ። ኣብ ተመሳሳሊ ሰዓት፥ ቶተንሃም ሆትስፐር ምስ ፉልሀምን ክጋጠም ኢዩ። ምሽት ሰዓት 4 ድማ፥ ሌስተር ሲቲ ምስ ማንቼስተር ዩናይትድን ከምዝጋጠም እቲ ዝወፅአ መርሃ ግብሪ የረድእ።

  ኣዲስ ኣበባ/ መጋቢት/6/ 2017 (ኢዜአ)ኣብ ቻይና ናንጂንግ ኣብ ዝካየድ ሻምፒዮና ውሽጢ ገዛ ዓለም ንኢትዮጵያ ዝውክሉ 14 ኣትሌታት ክሳተፉ ኢዮም፡፡ ኣብቲ ሻምፒዮና ክልተ ግዘ በዓል ክብሪ ዝኾነ መለሰ ንብረትን ሳሙኤል ተፈራ ብደቂ ተባዕትዮ 1 ሺሕን 500 ሜትር ንኢትዮጵያ ክውክሉ ኢዮም፡፡ በሪሁ ኣረጋዊ፣ ቢኒያም መሓሪን ጌትነት ዋለን ብ3 ሺሕ ሜትሮ ደቂ ተባዕትዮ ዝሳተፉ ኣትሌታት ኢዮም፡፡ ብ800 ሜትሮ ደቂ ኣንስተዮ ፅጌ ድጉማ ሓዊሱ ሃብታም ኣለሙን ንግስት ጌታቸውን ከምዝሳተፋ ተገሊፁ፡፡ ጉዳፍ ፀጋይ፣ ወርቅነሽ መሰለ ድርቤ ወልተጂን 1 ሺሕን 500 ሜትሮ ደቂ ኣንስትዮ ንኢትዮጵያ ክውክላ ኢየን፡፡ ብ 3 ሺሕ ሜትሮ ፅገ ገብረሰላማ፣ ፍሬወይኒ ሃይሉን ብርቄ ሓየሎምን ከምዝሳተፋ ካብ ፌዴሬሽን ኣትሌቲክስ ዓለም ዝረኸብናዮ ሓበሬታ የረድእ፡፡ ሻምፒዮና ውሽጢ ገዛ ዓለም 2025 ካብ ዝቕፅል ዓርቢ ጀሚሩ ንሰለስተ ተኸታተልቲ መዓልቲታት ኣብ ቻይና ከተማ ናንጂንግ ክካየድ ኢዩ፡፡

  ኣዲስ ኣበባ/ መጋቢት/6/ 2017 /ኢዜአ/ ኣብ መበል 29 ሰሙን መርሃ ግብሪ ፕሪሚየር ሊግ እንግሊዝ ኣብ ተሳትፎ መድረኽ ኣውሮፓ ወሳንነት ዘለዎም ፀወታታት ክካየዱ ኢዮም። ኣብ ዝቕፅል ዓመት ተሳትፎ ቻምፒየንስ ሊግ ንምርካብ ትነሓናሕ ማንቼስተር ሲቲ ምሸት ሰዓት 12 ኣብ ኢቲሃድ ንብራይተን ክተተኣናግድ ኢያ፡፡ ፅቡቕ ዓመተ ውድድር እናሕለፈት ትርከብ ኖቲንግሀም ፎረስት ድማ ካብ ሜዳኣ ወፃእ ኣብ ምውራድ ምስ ትርከብ ኢፕስዊች ታውን ክትገጥም ኢያ። ኤቨርተን ምስ ዌስትሃም ዩናይትድ ከምኡ እውን ሳውዛምፕተን ምስ ዎልቭስ ብተመሳሳሊ ሰዓት ምሸት ሰዓት 12 ፀወተአን ዝገብራ ጋንታታት ኢየን። ቦርንመዝ ምስ ብሬንትፎርድ ድማ ምሸት ሸዓት 2፡30 ክራኸባ ኢየን፡፡ ነቲ ሊግ ሊቨርፑል ብ70 ነጥቢ እንትትመርሖ ኣርሰናል ብ55 ከምኡ እውን ኖቲንግሃም ፎረስት ብ51 ነጥቢ 2ይን 3ይን ደረጃ ሐዘን ይርከባ። ኢፕስዊች ታውን ፣ ሌስተር ሲቲን ሳውዛምፕተንን ድማ ኣብ ምውራድ ስግኣት ተቐሚጠን ኣለዋ።

  ኣዲስ ኣበባ/ መጋቢት/2/ 2017 /ኢዜአ/ማንቼስተር ዩናይትድ 100 ሺሕ ተመልከትቲ ዘተኣናግድ ሓዱሽ ዓብዪ ስታዲየም ክሃንፅ ምዃኑ ዕላዊ ገይሩ፡፡ ብክልተ ቢሊየን ፓውንድ ወፃኢ ዝህነፅ እቲ ሓዱሽ ስታዲየም ኣብ ውሽጢ ሓሙሽተ ዓመት ክዛዘም ኢዩ ዝብል ትፅቢት አሎ፡፡ እቲ ሓዱሽ ስታዲየም÷ ኣብ ጥቓ እታ ጋንታ ን115 ዓመታት እናተገልገለትሉ ዝነበረት ኦልድትራፎርድ ከምዝህነፅ ተገሊፁ፡፡ እታ ጋንታ ዕላዊ ብዝገበረቶ ዲዛይን መሰረት እቲ ስታዲየም ሕድሕዶም 200 ሜትሮ ብራኸ ዘለዎም ሰለስተ ዓንዲታት ከምዝህልዉዎ ፀብፃብ ቢቢሲ ስፖርት የመላኽት፡፡

  አዲስ አበባ/ለካቲት/23/2017/ኢዜአ/ኣብ ማራቶን ቶኪዮ ብኽልቲኡ ፆታ ኢትዮጵያውያን ኣትሌታት ላዕለዎት ብምዃን ስዒሮም። ብኣትሌቲክስ ዓለም ፕላቲኒየም ደረጃ ኣብ ዝተወሃቦ ማራቶን ብደቂ ኣንስትዮ ኣትሌት ሱቱሜ ኣሰፋ 2:16:31 ብምእታው ቐዳመይቲ ኾይና ተዓዊታ። ብደቂ ተባዕትዮ ኣትሌት ታደሰ ታከለ ብ2:03:23 ብምእታው ስዒሩ። ኣትሌት ደረሳ ገለታ ብ2:03:51 ኻልኣይ ደረጃ ብምሓዝ ምዝዛሙ ኣትሌቲክስ ፌዴሬሽን ኣፍሊጡ።