መቐለ/መጋቢት/ 24/2017 (ኢዜኣ) ኣብ ክልል ትግራይ ውፅኢታት መፅናዕትን ምርምራትን ዓውዲ ጥዕና ናብ ተግባር ብምቕያር እቲ ዓውዲ ውፅኢታዊ ንምግባር እናተሰርሐ ከምዝኾነ ቢሮ ጥዕና ግዝያዊ ምምሕዳር እቲ ክልል ገሊፁ። ኣብ ስርዓት ጥዕና እቲ ክልል ጠመተ ዝገበረ መበል 10ይ ዓውደ መፅናዕቲ ኣብ ከተማ መቐለ ይሳለጥ ኣሎ። ሓላፊ ቢሮ ጥዕና ግዝያዊ ምምሕዳር ክልል ትግራይ ዶክተር ኣማኑኤል ሃይለ ኣብ መርሃ ግብሪ መኽፈቲ እቲ ዓውደ መፅናዕቲ ተረኺቦም ከምዝበልዎ፤ ኣብ ዓውዲ ጥዕና ዝግበሩ ስራሕትን ውፅኢታትን መጽናዕትን ምርምራትን ፖሊሲ ንምምሕያሽ፣ውሳነ ንምሃብን ስርዓት ጥዕና ዝሓሸ ንምግባርን ዝለዓለ ኣስተዋፅኦ ኣለዎም። እቲ ቢሮ ኣብቲ ዓውዲ ዝተረኸቡ ውፅኢታት መፅናዕትን ምርምራትን ምስ ዝምልከቶም ኣካላት ብምትሕብባር ኣብቲ ዓውዲ ርኡይ ለውጢ ንምምፃእ ፃዕሪ እናገበረ ከምዝኾነ ተዛሪቦም። ዳይሬክተር ኢንስቲትዩት ምርምር ጥዕና ግዝያዊ ምምሕዳር እቲ ክልል ዶክተር ሓየሎም ካሕሳይ ብግደኦም፤ ምስ ትካላት ምርምርን ተመራመርትን ብምትሕብባር ብዝተሳለጡ ስራሕትን ውጽኢትን ምርምር መሰረት ብምግባር ሕማማት ናይ ምፍላይን ኣገልግሎት ሕክምና ንክመሓየሽ ናይ ምግባርን ስራሕ እናተሳለጠ ከምዝኾነ ኣረዲኦም። ክሳብ ሕዚ ብዝተሳለጡ ስራሕቲ እውን ስርዓት ጥዕና ኣብ ምምሕያሽ ውፅኢት ተረኺቡ እዩ ኢሎም። ኣብቲ ንክልተ መዓልቲ ዝፀንሕ ዓውደ መፅናዕቲ ተመራመርቲ ጥዕና ውሽጢ ሃገርን ወፃእን እናተሳተፉ እንትኸውን ልዕሊ 20 መፅናዕታዊ ፅሑፋት ቀሪቦም ከምዝዝተየሎም ተገሊፁ።

መቐለ/መጋቢት /23/2017 (ኢዜኣ) ኣብ ክልል ትግራይ ንዝርከቡ ትካላት ጥዕና 120 ኣምቡላንሳት ሓዊሱ ደገፍ መድሓኒትን ናውቲ ሕክምናን ከምዝተገበረ ቤት ፅሕፈት ማሕበር ቀይሕ መስቀል ኢትዮጵያ ጨንፈር ክልል ትግራይ ኣፍሊጡ። እቲ ጨንፈር ቤት ፅሕፈት ምስ መሓዙት ትካላት ብምትሕብባር ልዕሊ 33 ሚልዮን ብር ግምት ዘለዎም ኣምቡላንሳትን መሰረታዊ መድሓኒታትን ኣብቲ ክልል ንዝርከቡ ትካላት ጥዕና ደገፍ ከምዝተገበረ ገሊፁ። ሓላፊ እቲ ጨንፈር ቤት ፅሕፈት ኣይተ ብርሀኑ መኮንን ንኢዜኣ ከምዝበልዎ፤ ኣብቲ ክልል ዘሎ ሕፅረት መሰረታዊ መድሓኒት ንምፍታሕን ተበፃሕነት ኣምቡላንስ ንምስፋሕን እቲ ማሕበር ምስ መሓዙት ትካላት ብምትሕብባር ዝተፈላለዩ መድሓኒታት ኣከፋፊሉ እዩ። ብተወሳኺ እውን እቲ ቤት ፅሕፈት 120 ኣምቡላንሳት ደገፍ ዝገበረ እንትኸውን ብፍላይ ድማ ምስ ወሊድ ብዝተኣሳሰረን ብሃንደበታዊ ሓደጋን ኣብ ልዕሊ ኣዴታትን ህጻናትን ዘጋጥም ሞት ንምቕናስ ልዑል እጃም ከምዘለወን ተዛሪቦም። ስርዓት ኣገልግሎት ጥዕና እቲ ክልል ንምምሕያሽ ሕዚ እውን ተወሳኺ ስራሕቲ ምስራሕ ከምዝሓትት እቶም ሓላፊ ሓቢሮም። ብተወሳኺ እውን ስፔሻላይዝድ ሪፈራል ዓይደርን ሓፈሻዊ ሆስፒታላት መቐለን 18 ሚለዮን ብር ግምት ዘለዎም ናውቲ ሕክምና ብመልክዕ ደገፍ ከምዝረኸቡ ገሊጾም። አብ ምክንኻን ዕሸላት ምስ ዝሰርሕ ትካል ብምትሕብባር ዕሸላት ንምሕካም አብ አገልግሎት ዝውዕሉ 11 ዓይነት ናውቲ መውሀቢ ሕክምና ምኹኑ አብ ሆስፒታል ዓይደር ስፔሻሊስት ዶክተር ኪሮስ ወልደገሪማ ገሊፆም። እቲ ደገፍ ካብ እዋን ናብ እዋን እናወሰኸ ንዝመፀ ሞት ሕንጠይ ህጻናት ንምቕናስ ከምዝሕግዝ እውን ተዛሪቦም። ተወካሊ ቢሮ ጥዕና ግዝያዊ ምምሕዳር እቲ ክልል ኣይተ ሚኪኤለ ሃጎስ ኣብቲ ስነ ስርዓት ርኽክብ ዝተረኸቡ እንትኸውን፤ ነቲ ዝተገበረ ደገፍ ብምምስጋን መንግስታውን ዘይመንግስታውን ትካላት ዝገብርዎ ዘለዉ ደገፍ ኣጠናኺሮም ንክቕፅልሉ ሓቲቶም።

 

  ኣዲስ ኣበባ/ መጋቢት/22/ 2017 /ኢዜአ/ትካል ትምህርቲ፣ ሳይንስን ባህሊን ሕቡራት መንግስታት (ዩኔስኮ) ዓለም ለኸ ሓድጊታት ኢትዮጵያ ሓሊኻ ንምፅናሕ ዝገብሮ ሓገዝ ከምዘጠናኽር ኣፍሊጡ፡፡ ተወካሊ ዩኔስኮ ኣብ ኮሚሽን ሕብረት ኣፍሪካን ኢትዮጵያ ሪታ ቢሶናውት (ዶ/ር)÷ ኢትዮጵያ ብዙሓት ሓድገታት ኣብ ዓለም ለኸ ሓድጊታት ከምዘመዝገበት ሓቢሮም፡፡ ኣብ ዝቕፅሉ ክልተ ዓመታት ተወሳኺ ሓድጊታት ንምምዝጋብ እናተሰርሐ ከምዝኾነ እውን ገሊፆም። ሓድጊታት ኣብ ዩኔስኮ ምምዝጋቦም እቶም ሓድጊታት ንምክንኻንን ንምሕላውን ከምኡ እውን ቁፅሪ በፃሕቲ ብምውሳኽ ማሕበረሰብ እቲ ከባቢ ተረባሒ ቱሪዝም ንኽኸውን ዘኽእል ኢዩ ኢሎም፡፡ ዩኔስኮ ኣብ ሓዲጊ ዓለም ዝተመዝገቡ ሃፍቲታት ንማሕበረሰብ ዓለም ናይ ምፍላጥ ስራሕ ከምዝሰርሕ ብምሕባር÷ ኣብ ኢትዮጵያ ዝርከቡ ዲፕሎማሰኛታት ኣብታ ሃገር ዘለዉ ሓድጊታት ንኽጉብንዩ እናተሰርሐ ምዃኑ ኣመልኪቶም።

  አዲስ አበባ/መጋቢት /21/2017/ኢዜአ/ርእሳነ-ምምሕዳር ክልላት ንመበል 1 ሽሕን 446 በዓል ዒድ-ኣልፈጥር ምኽንያት ብምግባር መልእኽቲ እንኳዕ ኣብፀሐኩም ኣመሓላሊፎም። ርእሰ-ምሕዳር ክልል ማዕከላይ ኢትዮጵያ እንዳሻው ጣሰው (ዶ/ር)፣ ርእሰ-ምምሕዳር ክልል ቤኒሻንጉል ጉምዝ ኣይተ ኣሻድሊ ሓሰን፣ ርእሰ-ምምሕዳር ክልል ደቡብ ምዕራብ ኢትዮጵያ ኢንጅነር ነጋሽ ዋጌሾ (ዶ/ር)፣ መንግስቲ ክልል ሃረሪ፣ ርእሰ-ምምሕዳር ክልል ኦሮሚያ ሽመልስ ኣብዲሳ፣ ርእሰ-ምምሕዳር ክልል ዓፋር ሓጂ ኣወል ኣርባ፣ ርእሰ-ምምሕዳር ክልል ደቡብ ኢትዮጵያ ጥላሁን ከበደ፣ ርእሰ-ምምሕዳር ክልል ጋምቤላ ኣለሚቱ ኡሞድ፣ ርእሰ-ምምሕዳር ክልል ሶማሌ ሙስጠፌ ሙሓመድ ኸምኡ 'ውን ርእሰ-ምምሕዳር ክልል ኣምሓራ ኣረጋ ከበደ መልእኽቲ እንኳዕ ኣብፅሐኩም ኣመሓላሊፎም። ኣብ መልእኽቶም፤ እቲ በዓል ናይ ደስታ፣ ፍቕሪ፣ ሓድነትን ምትሕብባርን ንክኸውን ተመኒዮም። እቲ በዓል እንትኽበር፤ ዘለካ ብምክፋል፣ ዓቕሚ ንዘይብሎም ብምሕታትን ዝተለመደ ምትሕግጋዝ ብምጉልባትን ክኸውን ኣለዎ ኢሎም።

  ኣዲስ ኣበባ/ መጋቢት/21/ 2017 /ኢዜአ/ከንቲባ ምምሕዳር ኣዲስ ኣበባ ኣዳነች ኣቤቤ መበል 1 ሺሕን 446 በዓል ዒድ ኣል-ፈጥር ምኽኒያት ብምግባር ናይ እንቋዕ ኣብፀሐኩም መልእኽቲ ኣመሓላሊፈን። እተን ከንቲባ ኣብ መልእኽተን፥ በዓል ዒድ ኣልፈጥር ናይ ምትሕስሳብ፣ ምድግጋፍን ሓድነት እነጠናኽረሉን ንክኸውን እምነ ኢለን። ንመላእ ህዝበ ሙስሊም ዒድ ሙባረክ ብምባል ሰናይ ትምኒተን ገሊፀን። እቲ በዓል ናይ ሰላም፣ ፍቕሪ፣ ሓድነትን ምትሕግጋዝን ዝነበረ ምትሕስሳብ፣ ምድግጋፍን ሓድነትን ዘጠናኽር ንክኾነልኩም እምነ ኢለን።

  ኣዲስ ኣበባ/ መጋቢት/21/ 2017 ዓ ም/ኢዜአ/ቀዳማይ ሚኒስትር ኣቢይ ኣሕመድ (ዶ/ር) በዓል ዒድ ኣል-ፈጥር ምኽኒያት ብምግባር ናይ እንቋዕ ኣብፀሐኩም መልእኽቲ ኣመሓላሊፎም። እቶም ቀዳማይ ሚስትር ኣብ ዘመሓላለፍዎ መልእኽቲ፥ “ዒድ ኣል ፈጥር” ፆመ ረመዳን መዛዘሚ በዓል ኢዩ ኢሎም። ዒድ ኣል ፈጥር “ናይ ምስጋና፣ ሰናይ ተግባርን ሕውነትን በዓል” ኢዩ እውን ኢሎም። ዒድ ኣል ፈጥር ድሕሪ ናይ ሓደ ወርሒ ፆም ዝመፅእ በዓል ከምዝኾነ ብምግላፅ፥ እቲ ፆም ናይ ሰብ ድኻም፣ ምንኣስ ዓቕሚን ልክዕን ዘርኢ ከምዝኾነ ኣብሪሆም። ፈጣሪ እንተዘይደጊፍዎ ዓቕሚ ወዲ ሰብ ውሱን ከምዝኾነ ዘርእይ ኢዩ እውን ኢሎም። ሎሚ ኣብ ሃገርና እንርእዮ ዘለና ፈተና ብቐንዱ ንባዕልኻ ካብዘይ ምግዛእ ዝመፅእ ፈተና ከምዝኾነ ኣብሪሆም። ንባዕሉ ዘይገዝእ ሰብ ዓቕሙ ኣይፈልጦን፤ ናብ ውሽጡ እውን ኣይርእን ኢሎም። ስለዚ ከም ረመዳን ዝበሉ እዋናት ውሽጥኻ ንምርኣይ ዝጠቕሙ ከምዝኾኑ ገሊፆም። መዛዘሚ እቲ ፆም ዝኾነ ዒድ ኣል ፈጥር ናይ ምስጋና በዓል ከምዝኾነ ሓቢሮም። እቲ ፆም ካብ ቤተሰብ ጀሚሩ ክሳብ ማሕበረሰብ ንባዕልኻ ፈሊጥካ ንምእካብ ዝጠቅም ከምዝኾነ ኣብሪሆም። ሃገራዊ ዘተ ካብ ስምዒት ዝወፅአ፣ ስኽነትን ንባዕልኻ ምፍላጥን ዝተላበሰ እንተኾይኑ ይጠቅም ኢዩ ኢሎም ኣብ መልእኽቶም። ኣብ መንጎ እምነታት፣ ፓርቲታት ፖለቲካ፣ ማሕበረሰብን ልሂቃንን ዝሓሸ ሓድነት ዝፍጠር ሕውነት ከምዝኾነ ኣፅንኦት ሂቦም።

  ኣዲስ ኣበባ/ መጋቢት/21/ 2017 /ኢዜአ/ብመዓርግ ምክትል ቀዳማይ ሚኒስትር ሓላፊ ማእኸል ምትሕብባር ስርዓት ዴሞክራሲን ምክትል ፕሬዚዳንት ፓርቲ ብልፅግናን ኣይተ ኣደም ፋራህ በዓል ዒድ ኣል-ፈጥር ምኽኒያት ብምግባር ናይ እንቋዕ ኣብፀሐኩም መልእኽቲ ኣመሓላሊፎም። ኣይተ ኣደም ፋራህ ኣብ መልእኽቶም፥ ንሰዓብቲ እምነት እስልምና እንቋዕ ንመበል 1 ሺሕን 446 በዓል ዒድ ኣልፈጥር ብሰላም ኣብፀሐኩም ኢሎም።

  ኣዲስ ኣበባ/ መጋቢት/21/ 2017 /ኢዜአ/ክብሪታት ዒድ ኣል ፈጥር ንህንፀት ሃገር ኣድለይቲ ኢዮም ክብሉ ምክትል ቀዳማይ ሚኒስትር ተመስገን ጥሩነህ ገሊፆም። እቶም ምክትል ቀዳማይ ሚኒስትር በዓል ዒድ ኣልፈጥር ምኽንያት ብምግባር መልእኽቲ እንኳዕ ኣብፀሐኩም ኣመሓላሊፎም፡፡ ኣብ መልእኽቶም ድማ፤ "እንኳዕ ንበዓል ዒድ ኣልፈጥር ኣብፀሐኩም፤ ድሕሪ ፆም ወርሒ ረመዳን ዝመፅእ ዒድ ኣል ፈጥር፣ በዓል ሓድነትና ሰናይ ምግባርን ኢዩ" ኢሎም፡፡ ኣብ እዋን ረመዳን ፆሙ፣ ሶላቱ ይኹን ኢፍጣሩ ብሓድነት ዝግበር ኢዩ፤ እዚ ድማ ሕብረት ዘጠናኽር ኢዩ" ኢሎም ኣብ መልእኽቶም፡፡ ብኻሊእ መዳይ ኣብ እዋን ፆምን እቲ በዓልን ንድኻታት ረሲዕኻ፣ ዓቕመ ደካማታት ገዲፍካ ምፍጣር ኣይፍቀድን ዝበሉ እቶም ምክትል ቀዳማይ ሚኒስትር፥ "ሰናይ ተግባር ምስራሕ ናይ ረመዳን ይኹን ዒድ ክብሪ ኢዩ" ኢሎም። ክብሪታት ዒድ ኣል ፈጥር ንህንፀት ሃገር ኣድለይቲ ከምዝኾኑ ብምሕባር፤ ሃገር ብዘይ ሕብረትን ሰናይ ምግባርን ክትህነፅ ከምዘይትኽእል ኣብሪሆም። ሰናይ ተግባር ናይ ባዕልኻ ንኻሊእ ምግዳፍ ኢዩ፤ ናይ ካሊእ ሕማም ምክፋል ኢዩ፤ ንናይ ካልኦት በደል ኣፍልጦ ምሃብ ኢዩ ክብሉ ኣብሪሆም፡፡ "በዞም ጠቐምቲ ክብሪታት ሃገር እናሃነፅና እቲ በዓል ከምነኽብር ተስፋ ይገብር" ኢሎም እቶም ምክትል ቀዳማይ ሚኒስትር ኣብ መልእኽቶም።

ኣዲስ ኣበባ/ መጋቢት/21/ 2017 /ኢዜአ/ፓርቲ ብልፅግና መበል 1 ሺሕን 446 በዓል ዒድ ኣልፈጥር ምኽኒያት ብምግባር ንመልላዝ ሰዓብቲ እምነት እስልምና ናይ እንቋዕ ኣብፀሐኩም መልእኽቲ ኣመሓላሊፉ። ኣብ መልእኽቱ፥ እቲ በዓል ሕብረት ኢትዮጵያውያን ዝደምቀሉ፣ ሰላም ዝረጋገፀሉን ሓድነት ዝጥንክረሉን ንክኸውን ተመኒዩ። ብተወሳኺ ንሕድ ሕድ ብምድግጋፍ ንምዕባለ ብንቕሓት እንሰርሓሉ ንክኸውን ተመኒዩ።

  ኣዲስ ኣበባ/ መጋቢት/21/ 2017 /ኢዜአ/ቀዳማዊት እመቤት ዝናሽ ታያቸው መበል 1 ሺሕን 446 በዓል ዒድ ኣልፈጥር ምኽንያት ብምግባር መልእኽቲ እንኳዕ ኣብፀሐኩም ኣመሓላሊፈን። ኣብ መልእኽተን ድማ “ንመላእ ተኸተልቲ እምነት እስልምና እንኳዕ ን1 ሺሕን 446 በዓል ዒድ ኣል ፈጥር ኣብፀሐኩም” ኢለን።

  አዲስ አበባ/መጋቢት /21/2017/ኢዜአ/ኣቦ-መንበር ኮሚሽን ሕብረት ኣፍሪካ መሓመድ ዓሊ ዮሱፍ ንመበል 1 ሺሕን 446 በዓል ዒድ-ኣልፈጥር ምኽንያት ብምግባር መልእኽቲ እንኳዕ ኣብፅሐኩም ኣመሓላሊፎም። ኣብ መልእኽቶም፤ ረመዳን ኣብ ኣፍሪካ ኢሉ'ውን ዓለም ሰላም፣ ፍትሕን ሕብረት ሒዙ ከምዝመፅእ ይኣምን ኢሎም። እቲ በዓል ናይ ታሕጓስን በረከትን ንክኸውን ተመኒዮም።

  አዲስ አበባ/መጋቢት/21/2017/ኢዜአ/ፕሬዝዳንት ታዬ ኣፅቀስላሴ ንመበል 1 ሽሕን 446 በዓል ዒድ ኣልፈጥር ምኽንያት ብምግባር ንመላእ ሰዓብቲ እምነት እስልምና መግለፂ ሰናይ ትምኒት እንኳዕ ኣብፅሐኩም ኣመሓላሊፎም። እቶም ፕሬዝዳንት ኣብ ማሕበራዊ ገፆም ኣብ ዘስፈርዎ መልእኽቲ፤ ኽቡራት ኢትዮጵያውያን ሰዓብቲ እምነት እስልምና እንኳዕ ናብ በዓል ዒድ ኣልፈጥር ኣብፅሐኩም። በዓል ዒድናይ ሰላም፣ ፍቕሪ፣ ምትሕስሳብን ምድግጋፍን ንክኾነልኩም ይምነ ክብሉ መግለፂ ሰናይ ትምኒት መልእኽቶም ኣመሓላሊፎም።

 

  ኣዲስ ኣበባ/መጋቢት/ 20/2017 (ኢዜኣ) ዩኒቨርሲቲታት ኣብ ዙሪያ ፍልሰት ብሳይንሳዊ ምርምራት ዝተደገፉ መፍትሕታት ብምቕራብ እቲ ፀገም መፍትሒ ንክረክብ ብትኹረት ክሰርሑ ከምዘለዎም ሚኒስተር ዲኤታ ዘፈር ላዕለዎት ትምህርቲ ሚኒስቴር ትምህርቲ ኣይተ ኮራ ጡሹኔ ገሊጾም። እቲ ሚኒስቴር ዴዚምን ሶሊሲቲ ምስ ዝተብሃሉ ዓለም ለኸ መሓዙት ትካላት ብምትሕብባር ምስራሕ ዘኽእሎ መረዳድኢ ስምምዕ ተፈራሪሙ። እቲ ስምምዕ ምስ ፍልሰትን ስደትን ዝተኣሳሰሩ ፀገማት ብምርምር ኣብ ምፍታሕ ዘለዉ ፀገማት ንምፍታሕ ከምዝሕግዝ ተገሊፁ። ሚኒስተር ዲኤታ ዘፈር ላዕለዎት ትምህርቲ ሚኒስቴር ትምህርቲ ኣይተ ኮራ ጡሹኔ፤ ብመዳይ እቲ ስምምዕ ዝርከብ ደገፍ ገንዘብ ላዕለዎት ትካላት ትምህርቲ ዝሓሸ ምርምር ንምግባር ከምዘኽእሎም ሓቢሮም። ዩኒቨርሲቲታት ኣብ ዙሪያ ፍልሰት ሳይንሳዊ ምርምራት ብምግባር ንፖሊሲ እታዎት ዝኾኑ ሓሳባት ከፈልፍሉ ከምዝግባእ እውን ተዛሪቦም። ብፍላይ ድማ መንግስቲ እቲ ጸገም ንምፍታሕ ኣብ ዝገብሮ ፃዕሪ ሳይንሳዊ ምኽረ ሃሳብ ብምፍልፋል ሓላፍነቶም ንክዋፅኡ ኣተሓሳሲቦም። ተወከልቲ ትካላት ዴዚምን ሶሊሲቲን እውን፤ እቲ ስምምዕ ኣብ ቀርኒ ኣፍሪካ ዘሎ ፍልሰት ብምርዳእ ኣብ ሓበሬታ መሰረት ዝገበረ ፖሊሲ ንምውፃእን ነቲ ፀገም ንዝተቃልዑ ወገናት ንምሕጋዝን ከምዝሕግዝ ኣረዲኦም። ኣብቲ ስምምዕ፤ ምክትል ፕሬዚዳንትታት ኣብ ፍልሰት ዝሰርሑ 7 ዩኒቨርሲቲታት፣ሚኒስቴር ፍትሕን ካብ ዝተፈላለዩ ትካላት ዝተውፃእፅኡ መዳርግቲ ኣካላትን ከምዝተረኸቡ ሓበሬታ እቲ ሚኒስቴር ይሕብር።

  ኣዲስ ኣበባ/ መጋቢት/20/ 2017 /ኢዜአ/ፕሬዚዳንት ላዕለዋይ ቤት ምኽሪ ጉዳያት እስልምና ኢትዮጵያ ሓጂ ኢብራሂም ቱፋ መበል 1 ሺሕን 446 በዓል ኢድ ኣልፈጥር ምኽኒያት ብምግባር መልእኽቲ ሰናት ትምኒት ኣመሓላሊፎም። ኣብ መልእኽቶም፥ ህዝበ ሙስሊም እቲ በዓል እንተኽብር ኣስተምህሮት ብምትግባር ክኸውን ከምዝግባእ ኣተሓሳሲቦም። ናይ ሎሚ ዘበን ፆመ ሮመዳን ፍቕርን ሓድነትን ዘርእዩ ሓበራዊ መርሃ ግብሪታት ኢፍጣር ዝተርኣዩሉ ከምዝኾነ ሓቢሮም። ወርሒ ሎሚ ምሸት እንተተራእያ ፅባሕ፣ ሎሚ እንተዘይተራእያ ድማ ሶኑይ 22 መጋቢት 2017 ዓ.ም እቲ በዓል ከምዝኽበር ተገሊፁ።

  መቐለ/መጋቢት/ 20/2017 (ኢዜኣ) ኣብ ዝተፈላለዩ ከተማታት ክልል ትግራይ ብልዕሊ 1 ነጥቢ 5 ቢልዮን ብር ወጻኢ ህንፀት ፕሮጀክትታት ፅሩይ መስተ ማይ እናተሳለጠ ከምዝኾነ ቢሮ ማይን ኢነርጅን ግዝያዊ ምምሕዳር እቲ ክልል ኣፍሊጡ። ሓላፊ ቢሮ ማይን ኢነርጅን ግዝያዊ ምምሕዳር ክልል ትግራይ ኣይተ ሞጎስ ገብረእግዚኣብሄር፤ ኣብቲ ክልል ብፍላይ ድማ ኣብ ከተማታት ዝሳለጥ ዘሎ ልምዓት ኣመልኪቶም ንኢዜኣ ኣብ ዝሃብዎ መብራህርሂ፤ ብምትሕብባር መንግስቲ ፌዴራልን ትካላት ልምዓትን ኣብ ዝተመረፁ 7 ከተማታት እቲ ክልል ብልዕሊ 1 ነጥቢ 5 ቢልዮን ብር ወጻኢ ህንፀት ፕሮጀክትታት ፅሩይ መስተ ማይ እናተሳለጡ ከምዝርከቡ ሓቢሮም። ህንፀት እቶም ፕሮጀክትታት ሚኒስቴር ማይን ኢነርጅን ክትትል እናገበረሎም ከምዝኾነ ብምሕባር፤ እቶም ፕሮጀክትታት ኣብዚ ሕዚ እዋን ብማእኸላይ ካብ 80 ክሳብ 90 ሚኢታዊ ከምዝተዛዘሙ ተዛሪቦም። ህንፀት እቶም ፕሮጀክትታት ክሳብ ወርሒ ሰነ 2017 ዓ/ም ተዛዚሞም ንኣገልግሎት ክፍቲ ከምዝኾኑ እውን ፀሪሖም። ኣብቲ ክልል ዘሎ ፀገም ዝስተ ማይ ንምፍታሕ ኣብ ዝተፈላለዩ ከባብታት እቲ ክልል ስራሕቲ ህንፀት ፕሮጀክትታት ዝስተ ማይ፣ኳዕቲ ዓሞቕቲ ጎዳጉዲ ማይ፣ምቕባር ቱቦን ዝርገሐ መስመርን ብሰፊሑ እናተሳለጡ እዮም ኢሎም። ሚኒስቴር ማይን ኢነርጅን ንስራሕቲ ማይ ትግራይ ኣገልግሎት ዝህቡ ተሽከርከርትን 25 ፓምፕታት ማይን ደገፍ ከምዝገበረ ተገሊፁ።

  ኣዲስ ኣበባ/ መጋቢት/20/ 2017 /ኢዜአ/ባንኪ ንግዲ ኢትዮጵያ ዲስትሪክት መቐለ ኣብ መቐለን ከባቢኣን ንዝነብሩ 150 ዝተፀገሙ ወገናት ንበዓል ዒድ ኣልፈጥር መውዓሊ ሓገዝ ስነ ስርዓት ምክፋል መኣዲ( ሰደቃ) ገይሩ። ፕሬዝደንት ጉዳያት እስልምና ትግራይ ሸኽ ኣደም ዓብደልቃድር፥ እዚ ዝተገበረ ሓገዝ ሕጊ ሽሪዓ ዝተኸተለ ኢዩ ኢሎም። ንመላእ ስዓብቲ እምነት እስልምና ድማ ርሑስ በዓል ዒድ ክኾን ስናይ ትምኒቶም ገሊፆም። ዳይሬክተር ባንኪ ንግዲ ኢትዮጵያ ዲስትሪክት መቐለ ኣይተ ኤልያስ ልሳነወርቅ፥ እታ ንእሽተይ እንገበራ ዘለና ሓገዝ እንቋዕ ኣብፅሐኩም ንምባል እዩ ኢሎም።

  ኣዲስ ኣበባ/ መጋቢት/20/ 2017 /ኢዜአ/ኣብ ዩንቨርስቲ ኣርባምንጭ ኣካዳሚ ማሪታይምስ ንምኽፋት ዘኽእል ስምምዕነት ተኸቲሙ። እቲ ሰነድ ስምምዕነት፥ በዓል መዚ ማሪታይም ኢትዮጵያ ባሕረኛታት ኣሰልጢኑ ን ዓለም ብምቕራብ ተወሳኺ ዕድል ስራሕ ንምፍጣርን ዝዓለመ ኢዩ። ኣብቲ ዩንቨርስቲ ዝኽፈት ኣካዳሚ ማሪታይም ንኢትዮጵያ መበል ሳልሳይ ኢዩ። ኣካዳሚ ሎጅስቲክስን ማሪታይምን ባቦጋያ ከምኡ’ውን መሰልጠኒ ኢንስቲትዩት ማሪታይም ኢትዮጵያ ባሕረኛታት ብምስልጣን ንዕዳጋ ዓለም ኣብ ምቕራብ ከምዝርከብ ኣብቲ በዓል መዚ ዝረኸብናዮ ሓበሬታ የረድእ።

ኣዲስ ኣበባ/መጋቢት/20/ 2017 /ኢዜአ/ኣብ ክልል ጋምቤላ ንልዕል 990 ሺሕ ክፋላት ማሕበረሰብ ተበፃሒ ዝገብር ክታበት መከላኸሊ ሕማም ውፅአት ይወሃብ ኣሎ። ሚኒስትር ጥዕና ዶክተር መቅደስ ዳባ ነቲ ክትባት ኣብ ዘጀመራሉ እዋን፥ ለበዳ ሕማም ውፅአት ኣብ ዘጋጠመሎም ወረዳታት ጊዚያዊ ማእኸላት መሐከሚ ውፅአት ከምዝተጣየሻ ተዛሪበን። ነቲ ለበዳ ዝተውሃበ ምላሽ ውፅታዊ ክኸውን መእንታ ተሳትፎ ማሕበረሰብ ብምትሕብባር ስራሕቲ ጎስጓስ ከምዝተገበሩ ገሊፀን። እቲ ክታበት ውፅኢታዊ ንክኸውን ኩሉ ሰብ ግድኡ ክዋፃእ ይግባእ ድማ ኢለን።