ኣብ ክልል ትግራይ ንዝርከቡ ትካላት ጥዕና 120 ኣምቡላንሳት ሓዊሱ ደገፍ መድሓኒትን ናውቲ ሕክምናን ተገይሩ

መቐለ/መጋቢት /23/2017 (ኢዜኣ) ኣብ ክልል ትግራይ ንዝርከቡ ትካላት ጥዕና 120 ኣምቡላንሳት ሓዊሱ ደገፍ መድሓኒትን ናውቲ ሕክምናን ከምዝተገበረ ቤት ፅሕፈት ማሕበር ቀይሕ መስቀል ኢትዮጵያ ጨንፈር ክልል ትግራይ ኣፍሊጡ።

እቲ ጨንፈር ቤት ፅሕፈት ምስ መሓዙት ትካላት ብምትሕብባር ልዕሊ 33 ሚልዮን ብር ግምት ዘለዎም ኣምቡላንሳትን መሰረታዊ መድሓኒታትን ኣብቲ ክልል ንዝርከቡ ትካላት ጥዕና ደገፍ ከምዝተገበረ ገሊፁ።

ሓላፊ እቲ ጨንፈር ቤት ፅሕፈት ኣይተ ብርሀኑ መኮንን ንኢዜኣ ከምዝበልዎ፤ ኣብቲ ክልል ዘሎ ሕፅረት መሰረታዊ መድሓኒት ንምፍታሕን ተበፃሕነት ኣምቡላንስ ንምስፋሕን እቲ ማሕበር ምስ መሓዙት ትካላት ብምትሕብባር ዝተፈላለዩ መድሓኒታት ኣከፋፊሉ እዩ።

ብተወሳኺ እውን እቲ ቤት ፅሕፈት 120 ኣምቡላንሳት ደገፍ ዝገበረ እንትኸውን ብፍላይ ድማ ምስ ወሊድ ብዝተኣሳሰረን ብሃንደበታዊ ሓደጋን ኣብ ልዕሊ ኣዴታትን ህጻናትን ዘጋጥም ሞት ንምቕናስ ልዑል እጃም ከምዘለወን ተዛሪቦም።

ስርዓት ኣገልግሎት ጥዕና እቲ ክልል ንምምሕያሽ ሕዚ እውን ተወሳኺ ስራሕቲ ምስራሕ ከምዝሓትት እቶም ሓላፊ ሓቢሮም።

ብተወሳኺ እውን ስፔሻላይዝድ ሪፈራል ዓይደርን ሓፈሻዊ ሆስፒታላት መቐለን 18 ሚለዮን ብር ግምት ዘለዎም ናውቲ ሕክምና ብመልክዕ ደገፍ ከምዝረኸቡ ገሊጾም።

 

 

 

አብ ምክንኻን ዕሸላት ምስ ዝሰርሕ ትካል ብምትሕብባር ዕሸላት ንምሕካም አብ አገልግሎት ዝውዕሉ 11 ዓይነት ናውቲ መውሀቢ ሕክምና ምኹኑ አብ ሆስፒታል ዓይደር ስፔሻሊስት ዶክተር ኪሮስ ወልደገሪማ ገሊፆም።

እቲ ደገፍ ካብ እዋን ናብ እዋን እናወሰኸ ንዝመፀ ሞት ሕንጠይ ህጻናት ንምቕናስ ከምዝሕግዝ እውን ተዛሪቦም።

ተወካሊ ቢሮ ጥዕና ግዝያዊ ምምሕዳር እቲ ክልል ኣይተ ሚኪኤለ ሃጎስ ኣብቲ ስነ ስርዓት ርኽክብ ዝተረኸቡ እንትኸውን፤ ነቲ ዝተገበረ ደገፍ ብምምስጋን መንግስታውን ዘይመንግስታውን ትካላት ዝገብርዎ ዘለዉ ደገፍ ኣጠናኺሮም ንክቕፅልሉ ሓቲቶም።