ኣዲስ ኣበባ/ መጋቢት/24/ 2017 /ኢዚኣ/ህንፀቱ ክዛዘም ንዝተቓረበ ዓብዪ ግድብ ህዳሰ ኢትጵያ ዝግበር ሓገዝ ተጠናኺሩ ንኽቕፅል ፃውዒት ቀሪቡ፡፡ ቤት ፅሕፈት መተሓባበሪ ፕሮጀክት ግድብ ህዳሰ፤ ንኢትዮጵያውያን፣ ትውልደ ኢትዮጵያውያንን ፈተውቲ ኢትዮጵያን እምነ ኹርናዕ ህንፀት እቲ ግድብ ዝተቐመጠሉ መበል 14 ዓመት ኣመልኪቱ መልእኽቲ እንኳዕ ኣብፀሐኩም ኣመሓላሊፉ፡፡ ኣብ መልእኽቱ ድማ፤ ህንፀት እቲ ግድብ ናብ ምዝዛም ምቕራቡ ኣብ ማሕበራዊ ሚዲያ ገፁ ኣፍሊጡ፡፡ እቲ ግድብ ብኩለመዳይ ሓገዝ መላእ ህዝቢ እናተወገነ ከምዝርከብ፣ ህንፀቱ ድማ ሓድነት ከምዘጠናኸረ፣ ብድሙቕ ዲፕሎማሲያዊ ዓወት ተዓጂቡን ምስሊ ኢትዮጵያ ብምህናፅን ሎሚ ዘበን 14 ዓመት ከምዝመልኦ ፀሪሑ፡፡ ንህንፀት እቲ ግድብ ዝግበር ሓገዝ ሕዚ እውን ህንፀቱ ክሳብ ዝዛዘም ተጠናኺሩ ንኽቕፅል ፃውዒት ኣቕሪቡ፡፡

  መቐለ/መጋቢት /24/2017 (ኢዜኣ) ከተማ መቐለ ሰሓቢትን ፅርይትን ንምግባር ኣብ ዝሳለጡ ስራሕቲ ልምዓት ንልዕሊ 4 ሽሕ ዜጋታት ዕድል ስራሕ ንምፍጣር ብትኹረት እናተሰርሐ ከምዝኾነ ተገሊፁ። ኣብ ግዝያዊ ምምሕዳር ክልል ትግራይ መተሓባበርትን ሰብ ሞያን ዘፈር ማኑፋክቸሪንግ፣ኣናእሽተይን ደቀቕትን ከተማ መቐለ ንኢዜኣ ከምዝበልዎ፤ ኣብ ዝቕፅሉ 3 ኣዋርሕ እታ ከተማ ሰሓቢትን ፅርይትን ንምግባር ልዕሊ 588 ሚልዮን ብር በጀት ተመዲቡ እዩ። መተሓባበሪት ዘፈር ማኑፋክቸሪንግ፣ኣናእሽተይን ደቀቕትን ከተማ መቐለ ወይዘሮ ልዕልቲ ፍስሃ፤ ኣብ በጀት ዓመት 2017 ካብ ሚያዝያ ክሳብ ሰነ ኣብ ዘለዉ ሰለስተ ኣዋርሕ 161 ኪሎ ሜት መንገዲ ብፀፀር ንምሽፋንን 3 ነጥቢ 5 ኪሎ ሜትሮ መንገዲ ድማ ኮብልስቶን ንምንፃፍን ከምዝስራሕ ገሊጸን። እቲ ስራሕ ምንፃፍ ኮብልስቶንን ካልኦት ስራሕቲ ልምዓትን ኣብ 7 ክፍለ ከተማታት ከተማ መቐለ ከምዝስርሑ ብምግላፅ፤ ናብ ተግባር ንምእታው ዝሳለጥ ዝነበረ ምድላው እውን ሙሉእ ብሙሉእ ከምዝተዛዘመ ሓቢረን። እቲ ስራሕ መንገዲ ፀፀር እውን 15 ጣብያታት ገጠር ምስ ከተማ መቐለ ብምርኻብ ነበርቲ ተጠቀምቲ ማሕበራውን ኢኮኖሚያውን ልምዓት ንክኾኑ ዘኽእል እዩ ኢለን። ስለዝኾነ ድማ ን4 ሽሕን 490 ዜጋታት ዕድል ስራሕ ከምዝፍጠር ብምግላፅ፤ ካብዚኣቶም እተን ከባቢ ክልተ ሽሕ ደቂ ኣንስትዮ ከምዝኾና ፀሪሐን። መተሓባበሪ ዘፈር መፅናዕትን ምጥያሽን ኢንተርፕራይዝ ከተማ መቐለ ኣይተ ኣለምሰገድ ገብረህይወት ብግደኦም፤ እቲ ስራሕ ንምስላጥ ዝተመልመሉን ኣብ 23 ማሕበራት ዝተወደቡን መናእሰይ እቲ ስራሕ ብብቕዓትን ብፍጥነትን ንምስላጥ ዘኽእሎም ብተግባር ዝተደገፈ ስልጠና ሞያ ከምዝተውሃቦም ተዛሪቦም። ነባሪት ክፍለ ከተማ ሓድነት ከተማ መቐለ መንእሰይ መኣርግ ሃይሉ፤ ኣብቲ ልምዓት ተሳቲፋ ተጠቃሚት ንምዃን ተስፋ ከምዘለዋ ተዛሪባ። ነባሪ ክፍለ ከተማ ሓወልቲ ከተማ መቐለ መንእሰይ ኣብርሃም መብራህቱ ብግድኡ፤ “መናእሰይ እቲ ዝተፈጠረ ሰላም ብምሕላው ብልምዓት ዓርስና ንምቕያር ክንሰርሕ ኣለና” ኢሉ።

  ኣዲስ ኣበባ/መጋቢት/ 23/2017 (ኢዜኣ) እዚ ናይ ለውጢ መንግስቲ ቅልጡፍ ስርዓት ንግዲ ብምዝርጋሕን ኣብ ቀረብ ትኹረት ዝገበረ ለውጢ ኣሰራርሓ ብምግባርን ምጣነ ናህሪ ዋጋ ምምሕያሽ ከምዝኸኣለ ሚኒስትር ንግድን ዞባዊ ምትእስሳርን ካሳሁን ጎፌ (ዶ/ር) ገሊፆም። ሚኒስትር ካሳሁን ጎፌ (ዶ/ር) ኣብ ምንቅስቓስ ኣታውን ወጻእን ንግድን ካልኦት እዋናዊ ኩነታትን ኢትዮጵያ ኣመልኪቶም ምስ ኢዜኣ ኣብ ዝነበሮም ፃንሒት ከምዝበለዎ፤ ኣካይዳ እቲ ለውጢ ኣብ ማሕበራዊ፣ ኢኮኖሚያውን ፖለቲካውን ዓውድታት ብጭፍን ምርኣይ ዘይኮነስ ዕዳ እውን ፀጋ እውን ገይሩ ዝርዳእ እዩ። ኣብ ዓውዲ ንግዲ እውን ኣብ ንግዲ ወጻእን ውሽጢ ሃገርን ከምኡ እውን ኣብ ከይዲ ምርግጋፅ ፅሬት ዝነበሩ ፈተናታትን ዕድላትን ተፈቲሾም እዮም ኢሎም። ዝበልፀገት ኢትዮጵያ ክውን ንምግባር ስሕታት ምስትኽኻልን ጥንካረታት ምጥንኻርን ሰረት እቲ ለውጢ ከምዝኾኑ ብምሕባር፤ ብዝሃነትን ተወዳዳሪነትን ንግዲ ወጻኢ ብምምሕያሽ ኣብ ኣፈታትሓ ጸገም ጠንካራ ዓቕሚ ምህናፅ ከምዝተኽኣለ ኣረዲኦም። ቅድሚ እቲ ለውጢ ምችዉነት ንግዲ ኢትዮጵያ ትሑት ከምዝነበረ ብምግላጽ፤ ኣብዚ ሕዚ እዋን ስራሕ ንግዲ ንምጅማር ምችው ኩነታት ኣብ ምፍጣር ብዝተሰርሑ ስራሕቲ ኣወንታዊ ውጽኢታት ከምዝተመዝገቡ ገሊፆም። መተግበሪ ስርዓት ኦንላይን ምዝገባ ፍቓድ ንግዲ ብምምዕባል ተገልገልቲ ኣብ ገዝኦም ኮይኖም ኣገልግሎት ዝረኽብሉ ኣሰራርሓ ከምዝተዘርገሐ እውን ሓቢሮም። ስለዝኾነ እውን በቲ ሃገራዊ ለውጢ ምችው ከባቢ ንግዲ ብምፍጣር ንማሕበረሰብ ንግዲ ቅልጡፍ ኣገልግሎት ምሃብ ከምዝተኽኣለ ፀሪሖም። ምኽባር ናብራ ንምቕናስ መሰረታዊ ፍርያታት ሓዊሱ ቀረብ ንምምሕያሽ ብርክት ዝበሉ ስራሕቲ ከምዝተሳለጡ ተዛሪቦም።

  ኣዲስ ኣበባ/ መጋቢት/23/ 2017 /ኢዜአ/ምምሕዳር ኣዲስ ኣበባ ኣገለግሎት ትራንስፖርት ብምስላጥ መርኣያ ዝኾነ ተግባር የካይድ አሎ ክብሉ ሚኒስትር ትራንስፖርትን ሎጂስቲክስን ኣለሙ ስሜ (ዶ/ር) ገሊፆም። ምዕባለ ኢኮኖሚ ኢትዮጵያ ንምቕፃል ዓውዲ ትራንስፖርት ወሳኒ ግደ ክፃወት ኣለዎ ። ምምሕዳር ከተማ አዲስ ኣበባ ኣብታ ከተማ ዘሎ ፀገም ትራንስፖርት ዘቃልላ 100 ዘበናዊ ብኤሌክትሪክ ዝንቀሳቐሳ ኣውቶብሳት ብመንግስቲን ውልቀን ሽርክና ናብ ኣገልግሎት ኣእትዩ። ኣብ ስነ ሰርዓት ርኽክብ እተን ተሽከርከርቲ ዝተረኸቡ እቶም ሚኒስትር፥ ምምሕዳር ኣዲስ ኣበባ ኣገለግሎት ትራንስፖርት ብምስላጥ መርኣያ ዝኾነ ተግባር የካይድ ኣሎ ኢሎም። ብምኽኒያት ትራንስፖርት ኣብ መገዲ ዝጠፍእ ግዘ ምሕፃር ከምዝግባእን እቲ ምምሕዳር ኣብቲ ዓውዲ ዘሎ ፀገም ብዘላቕነት ንምቕራፍ ብዛሓት ስራሕቲ ይሰርሕ ከምዘሎን ተዛሪቦም።

  ኣዲስ ኣበባ/ መጋቢት/23/ 2017 /ኢዜአ/ኣብ ዝሓለፉ ሸሞንተ ኣዋረሕ ካብ ዓውዲ ሆርቲካልቸር 366 ሚሊየን ዶላር ከምዝተረኸበ ሚኒስትር ገብርና ግርማ ኣመንቴ(ዶ/ር) ገሊፆም። “ሆርቲካልቸር ንዘላቒ ሃገራዊ ሸቶ” ብዝብል መሪሕ ሓሳብ ዓለም ለኸ ኤግዚብሽን ሆርቲካልቸር ኣብ ኣዳራሽ ሚሌኒየም ይሳለጥ ኣሎ። እቶም ሚኒስትር፥ ከም ሃገር ኣብቲ ዓውዲ ገዚፍ ዓቕሚ ከምዘሎ ተዛሪቦም። እዚ ዓቕሚ ኣብ ረብሓ ንምውዓል መንግስቲ ፍሉይ ቆላሕታ ብምሃብ ይሰርሕ ከምዘሎ ገሊፆም። መንግስቲ ዓውዲ ሆርቲካልቸር ምስ ዘንቀሳቕሱ ኣካላት ፅኑዕ ዝምድና ስራሕ ከምዘለዎ ብምግላፅ፥ ኣብ ቀፃሊ ዝተፈላለዩ ደገፋት ብምግባር እቲ ዓውዲ ካብዚ ንላዕሊ ናይ ምዕባይ ስራሕ ከምዝስራሕ ኣረጋጊፆም።

  ኣዲስ ኣበባ/ መጋቢት/23/ 2017 /ኢዜአ/ ‘ካብ መጋቢት ክሳብ መጋቢት’ ብዝተገበረ ዝተዋደደ ምርብራብ በቢከባቢኡ ዝተሃነፁ ፍሪያታት ለውጢ ዝኾኑ ገዘፍቲ ልምዓታት ብርኪ ናብራ ህዝቢ የመሓይሹ ከምዘለዉ ጨንፈር ቤት ፅሕፈት ፓርቲ ብልፅግና ኣዲስ ኣበባ ገሊፁ። ፅባቐ ኣዲስ ኣበባን ኢትዮጵያን ይቕይሩ ዘለዉ እቶም ገዘፍቲ ስራሕቲ ልምዓት ካብ መጋቢት ክሳብ መጋቢት ብዝተኻየደ ምውዳድ ዝተመዝገቡ ፍረታት ለውጢ ከምዝኾኑ እቲ ቤት ፅሕፈት ኣፍሊጡ። በቢብርኩ ዝርከቡ ኣመራርሓታት፣ ኣቦታት ሃይማኖት፣ ዓበይቲ ዓዲ፣ ኣካላት ፀጥታን ዝተፈላለዩ ክፋላት ማሕበረሰበን ኣብ ዝሓለፉ ናይ ለውጢ ዓመታት ኣብ ኣዲስ ኣበባ ዝተሃነፁ ግዙፋትን ሰብ ተኮርን ፕሮጀክትታት ልምዓት ዑደት ይገብሩ ኣለዉ። እቲ ዑደት ንዝዓበየ ዓወት ተወሳኺ ምልዕዓል ንምስናቕ ዘኽእል ከምዝኾነ እቲ ቤት ፅሕፈት ብተወሳኺ ሓቢሩ።

አብ ክልል ደቡብ ኢትዮጵያ ዞባ ወላይታ ወረዳ ዳሞት ፑላሳ አብ ናይ ሎሚ ዘበን አዝመራ ብኩታ ገጠም ዝለምዐ ዝርአቲ ዕፉን /ብምስሊ/ ፍልፍል ቤት ፅሕፈት ኮሙኒኬሽን እቲ ክልል

  ኣዲስ ኣበባ/ መጋቢት/23/ 2017 /ኢዜአ/ፈንድ ልምዓት ቻይና ኣብ ኢትዮጵያ ኣብ ዝህነፅ ሓዱሽ ፕሮጀክት መዕርፎ ነፈርቲ ክሳተፍ ከምዝደሊ ምክትል ፕሬዚዳንት እቲ ትካል ዩ ዡሮይ ገሊፆም። ኣምባሳደር ኢትዮጵያ ኣብ ቻይና ተፈራ ደርበው ምስቶም ምክትል ፕሬዚዳንት ኣብ ክልተኣዊ ምትሕብባር እተን ሃገራት ብምድሃብ ተዛቲዮም። ኣምባሳደር ተፈራ ደርበው ኣብቲ እዋን፤ ምትሕብባር እተን ሃገራት ምጥንኻርን ኢንቨስትመንት ምድንፋዕን ከምዝግባእ ምግላፆም ካብ ኤምባሲ ኢትዮጵያ ኣብ ቻይና ዝረኸብናዮ ሓበሬታ የረድእ፡፡ ኣብ ኢትዮጵያ ዝህነፅ ሓዱሽ ዓለም ለኸ መዕርፎ ነፈርቲ ሓዊሱ ኣብ ኢንቨስትመንት ሆልዲንግስ ኢትዮጵያን ኢትዮ-ቴሌኮምን ብዝምልከት ገለፃ ገይሮም። ዩ ዡሮይ ብግደኦም፤ እቲ ዘተ ምትሕብባር ልምዓት እተን ሃገራት ንምዕባይን ሓደሽቲ ዓውዲታት ምትሕብባር ንምፍጣርን ከምዝሕግዝ ኣብሪሆም፡፡ ትካሎም ኣብ ኢትዮጵያ ኣብ ዝህነፅ ሓዱሽ ፕሮጀክት መዕርፎ ነፈርቲ ክሳተፍ ከምዝደሊ እውን ኣረጋጊፆም፡፡

  ኣዲስ ኣበባ/መጋቢት /23/2017 (ኢዜኣ) ኣብ ዝተፈላለያ ሃገራት ኣፍሪካ ዝርከቡ ኢትዮጵያውያንን ትውልደ ኢትዮጵያን ንዓብይ ግድብ ሕዳሰ ኢትዮጵያ ዝገብርዎ ደገፍ ኣጠናኺሮም ከምዝቕፅልሉ ኣፍሊጦም። ኣምባሳደር ኢትዮጵያ ኣብ ዴሞክራቲክ ሪፐብሊክ ኮንጎ፣ኣንጎላን ጋቦንን መኩሪያ ጌታቸው ኣብ ኣንጎላ ምስ ዝነብሩ ኢትዮጵያውያንን ትውልደ ኢትዮጵያን ኣብ ሃገራዊ ዛዕባታት ብበይነ መረብ ዘትዮም። ኣምባሳደር መኩሪያ ጌታቸው፤ መንግስቲ ካብቲ እዋን ለውጢ ጀሚሩ ኣብ ፖሊሲ ጉዳይ ወፃኢ ትኹረት ካብ ዝገበረሎም ጉዳያት መሰል፣ክብርን ድሕንነትን ኣብ ዝተፈላለያ ሃገራት ዝርከቡ ኢትዮጵያውያን ዜጋታት ምሕላው እቲ ሓደ ከምዝኾነ ገሊፆም። ኣብ ዴሞክራቲክ ሪፐብሊክ ኮንጎ ዝርከብ ኤምባሲ ኢትዮጵያ ኣብ ዝሽፍነን ሃገራት ዝርከቡ ኢትዮጵያውያን ዜጋታት መሰሎምን ጥቕሞምን ንክኽበር እናሰርሐ እዩ ኢሎም። መንግስቲ ኣብ ዓውዲ ኢኮኖሚ ሰፊሕ ሪፎርም እናገበረ ከምዝርከብን ኣብ ዓውዲ ግብርና ብፍላይ ድማ ኢትዮጵያ ንስርናይ ብዝሃበቶ ትኹረት ካብ ኣፍሪካ ቀዳመይቲ መፍረይት ምዃን ከምዝኸኣለትን ሓቢሮም። ብተወሳኺ እውን መንግስቲ ጎንፅታትን ዘይምርድዳኣትን ብሰላማዊ መንገዲ ንክፍትሑ ብቆራፅነት እናሰርሐ ከምዝኾነ ኣረዲኦም። ዘይምርድዳኣት ንምፍታሕ ኮሚሽን ሃገራዊ ምኽክር ብትኹረት እናሰርሐ ከምዝርከብ ብምሕባር፤ እቲ ዲያስፖራ እውን ኣብዚ ጉዳይ ኣወንታዊ እጃም ንከበርክት ፃውዒት ኣቕሪቦም። ሕቶ ኣፍ ደገ ባሕሪ ኢትዮጵያ ብዝምልከት እውን ብሰላማውን ሂብካ ምቕባልን ጥራሕ መልሲ ንክረክብ ዝገብሮ ዘሎ ፃዕሪ ክቕፅለሉ እዩ ኢሎም። ኣባላት ዲያስፖራ ብግደኦም፤ ኣብ ኢትዮጵያ ኣብ ዝተፈላለዩ ሰናይ ተግባራትን ሃገራዊ ፃውዒትን እናተሳተፉ ከምዝርከቡ ብምግላፅ ንህንፀት ዓብይ ግድብ ሕዳሰ ዝገብርዎ ደገፍ እውን ኣጠናኺሮም ከምዝቕፅልሉ ምግላፆም ካብ ኤምባሲ ኢትዮጵያ ኣብ ኪንሻ ዝተረኸበ ሓበሬታ የመላኽት።

  ኣዲስ ኣበባ/መጋቢት/ 23/2017 (ኢዜኣ) ሰብ ሃፍቲ ኣሜሪካ ኣብ ኢትዮጵያ ኣብ ዝተፈላለዩ ዓውድታት ኢንቨስትመንት ዝተፈጠረ ምችው ዕድል ንክጥቀሙ ኣምባሳደር ኢትዮጵያ ኣብ ኣሜሪካ ብናልፍ ኣንዷአለም ሓቲቶም። ኣምባሳደር ብናልፍ ኣንዷአለም ኣብ ዌስት ቨርጂንያ ትርከብ ከተማ ሞርጋንታውን ጎብንዮም። እቲ ዑደት ኣብ ንግድን ኢንቨስትመንትን፣ትምህርትን ምርምርን፣ቴክኖሎጂን ኢኖቬሽንን፣ሰብ ስራሕ ኣስተውዕሎት ከምኡ እውን ኣብ ልውውጥ ባህሊ ትኹረት ዝገበረ ከምዝኾነ ሓበሬታ ኤምባሲ ኢትዮጵያ ኣብ ዋሺንግተን ዲሲ ይሕብር። ኣምባሳደር ብናልፍ ኣንዷአለም፤ ኢትዮጵያ ካብ ቀረባ እዋን ናብዚ ብሙሉእ ዓቕማ ተግባራዊ ትገብሮ ዘላ መመሓየሺ ኢኮኖሚ ኣመልኪቶም ንኣፍረይቲ መብራህርሂ ሂቦም። ኣብ ዝተፈላለዩ ዓውድታት ኢንቨስት ንምግባር ናብ ኢትዮጵያ ንዝመፁ ሰብ ሃፍቲ ካብ ዝኾነ እዋን ብዝበለፀ ምችው ኩነታት ከምዘሎ እቶም ኣምባሳደር ኣብ ዝሃብዎ መብራህርሂ ገሊፆም። ዝተፈላለዩ ዘፈራት ኢንቨስትመንት ንምዕዛብ ናብ ኢትዮጵያ ንዝኸዱ ሰብ ሃፍቲ ኣሜሪካ እቲ ኤምባሲ ኣድላይ ደገፍ ከምዝገብረሎም እውን ተዛሪቦም። ካብቲ ኢኮኖሚ ብተወሳኺ ኣብ ዓውዲ ትምህርቲ ርክብ ብምፍጣር ኣብ ባዮ ቴክኖሎጂ፣ጥዕና ማሕበረሰብን ተዛመድቲ ዘፈራትን ልውውጣት ፕሮግራምን ሓባራዊ ምትሕብባርን ንምግባር ምስ ኣመራርሓ ቦርድን ኣባላትን ዩኒቨርሲቲ ዌስት ቨርጂኒያ ዘተ ተሳሊጡ። ኣብ ዓውዲ ትምህርቲ ኣብ ዌስት ቨርጂኒያ ዝርከቡ ትካላት ኣብ ኢትዮጵያ ምስ ዝርከቡ ትካላት ንምትእስሳርን ምትሕብባራት ንምጥንኻርን ምችው ዕድል ከምዝተፈጠረ እቲ ኤምባሲ ገሊፁ።

  አዲስ አበባ/መጋቢት/23/2017/ኢዜአ/ ብኤሌክትሪክ ዝሰርሓ ሚኢቲ አውቶብሳት ትራንስፖርት ሓፋሽ ምግዛእን ናብ ስራሕ ምእታወን ምንግልታዕ ህዝቢ ንምንካይ 'ዩ ክብላ ከንቲባ ምምሕዳር ከተማ ኣዲስ ኣበባ ኣዳነች ኣቤቤ ገሊፀን። ፀገም ትራንስፖርት ክፈትሕ 'ዩ ተባሂሉ ብወገን መንግስቲ እናተሰርሐ ንዝርከብ ስራሕ ማእኸል ብምግባር 100 ናይ ኤሌክትሪክ ኣውቶቢሳት ብሓደ መዓልቲ ስራሕ ናይ ምጅማር መርሃ ግብሪ ኣብ መስቀል ኣደባባይ እናተሳለጠ ይርከብ። ኣዲስ ኣበባ ወፃኢ ዝቑጥብ ነዳድን ሓምለዋይ ኸባቢ ንምፍጣርን ዝሰርሓ ተሽከርከርቲ ኣብ ግልጋሎት ብምውዓል ቅድሚ ኹሉ እትስራዕ ምዃና ገሊፀን።

  ኣዲስ ኣበባ/ መጋቢት/22/ 2017 /ኢዜአ/ኣብ ሃዋሳ ፍሉይ ዞባ ኢኮኖሚ ውሽጢ ዝርከብ ኩባንያ ሶላር ቶዮ ኣብ ኢትዮጵያ ዘለዎ ሓፈሻዊ ኢንቨስትመንት ናብ 110 ሚሊየን ዶላር ኣሜሪካ ምብፅሑ ተገሊፁ። እቲ ኩባንያ ኣብ ውሽጢ ፍሉይ ዞባ ኢኮኖሚ ብ60 ሚልየን ዶላር ዝተሃንፀ ፋብሪካ ፈላማይ ምዕራፍ ዛዚሙ ስርሕ ንምጅማር ዘተ ኣብ ዘካየደሉ እዋን እዩ፡፡ እቲ ኩባንያ ምስፍሕፋሑ ስዒቡ ኣብ ኢትዮጵያ ዘካየዶ ሓፈሻዊ ኢንቨስትመንት 110 ሚሊየን ዶላር ኣሜሪካ ከም ዝበፅሐ ተሓቢሩ። ዋና ፈፃሚ ስራሕ እቲ ኩባንያ ጁንሴይ ሪዩ ÷ እቲ ኩባንያ ንፍርያታት ሶላር ሴል ዝረኸቦ ዓለምለኻዊ ድልየትን ትእዛዝን ብተወሳኺ ምስፍሕፋሕ ከምዝገብር ገሊፆም፡፡ ኣብ 28 ሺሕ ስኩዌር ካሬ ሜትር ዘግበር ናይ ምስፍሕፋሕ ስራሕ በስሉጥ እናዓበየ ንዘሎ ማእኸል ኢንዱስትሪ ተሓዳሲ ሓይሊ ኢትዮጵያ ዘሕግዝ እንትኸውን፥ ህንፀቱ ኣብ ወርሒ ሓምለ ብምዝዛም ከይዲ ፍሪያቱ ክሳብ ነሓሰ ክጅምር ኢዩ ተባሂሉ ትፅቢት ይግበር።

  ኣዲስ ኣበባ/ መጋቢት/22/ 2017 /ኢዜአ/ሃገራዊ ለውጢ ስዒቡ ኣብ ዓውዲ ሕርሻ ዝተመዝገቡ ዓወታት ኢትዮጵያ ናብ ሓዱሽ ምዕራፍ ዘሰጋገሩ ምዃኖም ሚኒስትር ሕርሻ ግርማ ኣመንቴ (ዶ/ር) ገሊፆም፡፡ ግርማ ኣመንቴ (ዶ/ር) ኣብ ዓውዲ ሕርሻ ዝተመዝገቡ ዓወታት ኣመልኪቶም ኣብ ዝሃብዎ መብራህርሂ÷ ኣብቲ ዓውዲ መሓውራዊ ስግግር ንምምፃእ ዘኽእሉ ስራሕቲ ምስርሖም ገሊፆም፡፡ ብፍላይ ኣብ ምልማዕ ኩታ ገጠም ሜካናይዜሽን ሕርሻ ምስፋሕ ከምኡውን ተፀባያይ ዝናብ ዝነበረ ሕርሻ ብምቕያር ሙሉእ ዓመት ናብ ማሕረስ ብምእታው ፍርያት ኣብ ምዕባይ ኢትዮጵያ ናብ ሓዱሽ ምዕራፍ ዘሰጋገረ ምዃኑ ገሊፆም፡፡ ዝተመዝገበ ዓወት ዘላቒ ንምግባር ብምኽንያት መርሃ ግብሪ ሓምለዋይ ኣሰር ብለውጢ ከባቢያዊ ኣየር ዘይብዳህ ልምዓት ሕርሻ ንምትግባር ፃዕሪ ይግበር ከምዘሎ ገሊፆም፡፡ ሚኒስትር ዴኤታ ሕርሻ መለስ መኮነን (ዶ/ር) ብግዲኦም÷ ቅድሚ ለውጢ ኣብ ክረምቲ 12 ነጥቢ 5 ሚሊየን ሄክታር መሬት ይሕረስ ከምዝነበረ ብምዝኽኻር ኣብዚ ሕዚ እዋን ናብ 20 ነጥቢ 5 ሚሊየን ሄክታር ምዕባይ ተኻኢሉ ኢሎም። በዙይ ድማ ብብርኪ ሃገር ዝእከብ ፍርያት ካብ 293 ሚሊየን ኩንታል ናብ 608 ሚሊየን ኩንታል ክብ ክብል ምኽኣሉ ኣብሪሆም፡፡

  ኣዲስ ኣበባ/መጋቢት/ 22/2017 (ኢዜኣ) ንዘበነ ፍርያት 2017/18 እታዎት ዝኸውን ክሳብ ሕዚ ልዕሊ 900 ሽሕ ሜትሪክ ቶን መዳበሪያ ናብ ውሽጢ ሃገር ከምዝተጉዓዓዘ በዓል መዚ ማሪታይም ኢትዮጵያ ኣፍሊጡ። ነዚ ዘበነ ፍርያት እታዎት ዝኸውን 55 ሽሕ ሜትሪክ ቶን ዳፕ መዳበሪያ ዝፀዓነት "MV ABBAY II" ዝተብሃለት መበል 19 መርከብ ኣብ ወደብ ጅቡቲ ብምብፃሕ ኦፕሬሽን ምርጋፍ ከምዝጀመረት እቲ በዓል መዚ ገሊፁ። መንግስቲ ንዘበነ ፍርያት 2017/18 እታዎት ዝኸውን 2 ነጥቢ 4 ሚልዮን ሜትሪክ ቶን (24 ሚልዮን ኩንታል) መዳበሪያ ብምግዛእ ናብ ውሽጢ ሃገር ንምእታው ትልሚ ሒዙ እናሰርሐ እዩ ዝርከብ። ካብቲ ዝተትሓዘ ትልሚ ክሳብ ትማሊ ልዕሊ ሓደ ሚልዮን ሜትሪክ ቶን ኣብ ወደብ ጅቡቲ ከምዝበፅሐን እቲ ልዕሊ 900 ሽሕ ሜትሪክ ቶን ድማ ናብ ውሽጢ ሃገር ከምዝተጉዓዓዘን ኢዜኣ ካብቲ በዓል መዚ ዝረኸቦ ሓበሬታ ይሕብር። ከባቢ 118 ሽሕን 956 ሜትሪክ ቶን መዳበሪያ ኣብ ወደብ ጅቡቲ ከምዝርከብ እውን እቲ በዓል መዚ ገሊፁ።

  አዲስ አበባ/መጋቢት/20/2017/ኢዜአ/ግድብ ኣባይ መንፈስ ይከኣል 'ዩ ዝተረኣየሉን ንደቅና ነመሓላልፎን ዓብዪ ቕርሲ ምዃኑ ዋና ዳይሬክተር ቤት ፅሕፈት መተሓባበሪ ዓብዪ ግድብ ህዳሰ ኣረጋዊ በርሀ (ዶ/ር) ገሊፆም። ቀዳማይ ሚኒስትር ኣብይ ኣሕመድ(ዶ/ር) ናብ ስልጣን ዝመፅእሉን እምነ ኩርናዕ ግድብ ኣባይ ዝተቐመጠሉን 24 መጋቢት ምኽንያት ብምግባር ኣብ ክልል ኦሮሚያ ዝካየድ ዓብዪ ጉያ ኣብ ከተማ ሸገር ክፍለ ከተማ ኮዬ ፈጬ ዝተፈላለዩ ስፖርታዊ ውድድራት እናተኻየዱ 'ዮም። ኣረጋዊ በርሀ(ዶ/ር) ኣብ ዘመሓላለፉዎ መልእኽቲ ህንፀት ግድብ ኣባይ ብመላእ ህዝቢ ኢትዮጵያ ብምትሕብባር ኣብቲ ሕዚ ዝርከበሉ ብርኪ ምብፅሑ ተዛሪቦም። ግድብ ኣባይ መንፈስ ይከኣል 'ዩ ዝተረኣየሉን ንደቅና ነመሓላልፎን ዓብዪ ቕርሲ ምዃኑ 'ውን ኣፍሊጦም።

  ኣዲስ ኣበባ/ መጋቢት/20/ 2017 /ኢዜአ/ካብ 12 ክሳብ 18 መጋቢት ብዝተገበረ ክትትል ልዕሊ 264 ሚሊየን ብር ግምት ዘለዎም ዝተፈላለዩ ናውቲታት ኮንትሮባንድ ከምዝተትሓዙ ኮሚሽን ጉምሩክ ኣፍሊጡ። ካብ መንጎ እቶም ዝተትሓዙ ናውቲታት፥ 250 ነጥቢ 7 ሚሊየን ብር ኣታዊ 13 ነጥቢ 6 ሚሊየን ብር ድማ ወፃኢ ሸቐጣት ክምዝኾኑ ተገሊፁ። ዝተፈላለዩ ማእድናት፣ ኣልባሳት፣ ኤሌክትሮኒክስ፣ ቡን፣ ጥራምረ፣ መለዋወጢ ተሽከርከርቲ፣ ጫት፣ መዐወንቲ እፃት፣ መድሓኒት ወዘተ ከምዝርከብዎም ካብቲ ኮሚሽን ዝረኸብናዮ ሓበሬታ የረድእ።

  ኣዲስ ኣበባ/መጋቢት/ 19/2017 (ኢዜኣ) ኢትዮጵያን ኬንያን ኣብ ኣገልግሎት ጉምሩኽ ዘለወን ምትሕብባር ንምጥንኻር ከምዝተስማዕምዓ ኣፍሊጠን። ኣብ መንጎ ኮሚሽን ጉምሩኽ ኢትዮጵያን በዓል መዚ እቶት ኬንያን ንክልተ መዓልትታት ኣብ ኣዲስ ኣበባ ክካየድ ዝፀንሐ ዘተ ተዛዚሙ። ኮሚሽነር ኮሚሽን ጉምሩኽ ደበሌ ቃበታ፤ ክልቲአን ሃገራት ተወሰኽቲ ጣብያታት ኣገልግሎት ዶብ ሓደ ማእኸል ብምስፍሕፋሕ ኣገልግሎት ግምሩኽ ከባቢ ዶብ ቀሊልን ቅልጡፍን ንምግባር ኣብ ቀፃሊ ተቀራሪብካ ንምስራሕ ኣብ ስምምዕ ከምዝበፅሑ ገሊፆም። መራሒ ጉጅለ ልኡኽ በዓል መዚ እቶት ኬንያ ሞሰስ ሙያ ብግደኦም፤ ምንቅስቓስ ንግዲ ዓለም ብዝለዓለ መጠን እናወሰኸን እናተሓላለኸን ምምፅኡ ብምሕባር ትካላት ጉምሩኽ ክልቲአን ሃገራት እዚ ኣብ ግምት ብምእታው ተዋዲዶም ክሰርሑ ከምዘለዎም ተዛሪቦም። ጎና ጎኒ እቲ ዘተ፤ ጉጅለ ልኡኽ በዓል መዚ እቶት ኬንያ ዓለም ለኸ ኮንቬንሽን ኣዲስ ኣፍሪካን ማእኸል ኤግዚቢሽንን ከምኡ እውን ካልኦት ስራሕቲ ልምዓት ከምዝጎብነዩ ካብ ኮሚሽን ጉምሩኽ ዝተረኸበ ሓበሬታ ይሕብር።

  ኣዲስ ኣበባ/ መጋቢት/19/ 2017 /ኢዜአ/ሚኒስትር ዴኣታ ገንዘብ ኢዮብ ተካልኝ (ዶ/ር) ምስ ሚኒስትር ገንዘብ ደቡብ ሱዳንን ተጠባባቒ ሚኒስትር ነዳዲ ማሪያን ዶንግሪን (ዶ/ር)ን ኣብ ኣዲስ ኣበባ ተዛቲዮም፡፡ ኣብ ዘተኦም ድማ፤ ሓበራዊ ተረባሕነት ክልቲአን ጎረባብቲ ሃገራት ከደንፍዑ ኣብ ዝኽእሉ ጉዳያት ትኹረት ገይሮም፡፡ ካብዚ ብተወሳኺ ክልተኣዊን ኢኮኖሚያዊን ምትሕብባር ክልቲአን ሃገራት ምጥንኻር ኣብ ዝከኣለሎም ጉዳያት ከምዝተዛተዩ ካብ ሚኒስቴር ገንዘብ ዝረኸብናዮ ሓበሬታ የረድእ፡፡ እተን ሃገራት ኣብ ዓውዲታት መሰረተ ልምዓት፣ ኢነርጂን ካልኦት ዓውዲታት ልምዓትን ንምትእስሳር አብ ዘኽእሉ ኩነታት እውን ተመያይጦም፡፡ ዘላቒ ዛባዊ ሰላምን ፀጥታን ቅድሚት ሂብካ ምስራሕ ከምዝግባእ እውን ኣብቲ እዋን ዘተ ኣፅንኦት ተዋሂቡዎ፡፡

  ኣዲስ ኣበባ/ መጋቢት/19/ 2017 /ኢዜአ/ንዝለዓለ ወፅኢት ጎስጓስ ኢትዮጵያ ተፍሪ ትካላት ብምውዳድን ዝተናበበ ኣሰራርሓ ምትግባርን ትፅቢት ከምዝግበረለን ሚኒስትር ኢንዱስትሪ መላኩ ኣለበል ኣፍሊጦም። መደባት ኣፈፃፅማ ሸሞንተ ኣዋርሕ ሓሙሽተ ክላስተራት ጎስጓስ ኢትዮጰያ ተፍሪ ይግምገም ኣሎ። በቲ ጎስጓስ ለውጢ ምምፃእ ዝኸኣላ ብዙሓት ስራሕቲ ከምዝተሰርሑ ኣብቲ ገምጋም ዝገለፁ ኣይተ መላኩ፥ ኮሚቴታት ሓሙሽቲአን ክላስተራት ነቲ ጎስጓስ ውፅኢታዊነት ልዑል ግደ ሒዞም ምውስኦም ተዛሪቦም። ምዕባለ ኣፍረይ ዓውዲ ናይ ኩለን ትካላት ርብርብ ከምዝሓትትን ነቲ ጎስጓስ ዝበለፀ ውፅኢታዊነት ዝተዋደደ ኣሰራርሓ እተን ትካላት ወሳኒ ከምዝኾነ ገሊፆም።

  ኣዲስ ኣበባ/ መጋቢት/18/ 2017 /ኢዜአ/ስርዓት ኣጠቃቕማ በጀት መንግስቲ ውፅኢታዊ ንክኸውን ዝገብር ኣሰራርሓ ዕላዊ ከምዝኸውን ሚኒስቴር ገንዘብ ኣፍሊጡ፡፡ እቲ ኣሰራርሓ ብዝተፈላለዩ መገዲታት መንግስቲ ዝረኽቦም ገንዘብ ናብ ሓደ ትካል ንምእካብ ዘኽእልን ንዝተተለመሉ ግልጋሎት ንክውዕል ዝሕግዝን “ትሬዥሪኣሰራርሓ ነፀላ ኣካውንት” ምዃኑ ተገሊፁ፡፡ መንግስቲ ዘለዎ መጠን ገንዘብ ምፍላጥ ከምዘኽእል ዝተገለፀ እንትኾን÷ ገንዘብ መሓዝን ከይዲ ምምሕዳር ኣብ ሓደ ማእኸል ንክኾን ዝገብር ምዃኑ ተገሊፁ፡፡ ሚኒስትር ዲኤታ ሚኒስቴር ገንዘብ ኢዮብ ተካልኝ (ዶ/ር)፥ እቲ ኣሰራርሓ ዘበናዊ ስርዓት ምምሕዳር ገንዘብ ዝፈጥር ምዃኑ ሓቢሮም። እዚ ድማ ኣብ ስራሕቲ ቁፅፅር ዕውት ዝገብር ምዃኑ ገሊፆም፡፡ ኣብ ዝተፈላላዩ ቑፅሪታት ሒሳብ ዝተበታተነ ገንዘብ መንግስቲ ናብ ሓደ ዘምፅእ ኣሰራርሓ ከምዝኾነ ብምሕባር ÷ ብቀዳምነት ብብርኪ መንግስቲ ተግባራዊ ምግባር ከምዝጅምር ተሓቢሩ፡፡ እዚ ኣሰራርሓ ቐፃሊ ናብ ክልላትን ምምሕዳር ከተማታትን ከምዝወርድ ብምግላፅ÷ንተግባራዊነቱን ዕውትነቱን ኩሎም ዝምልከቶም ኣካላት ግዲኦም ክዋፅኡ ፃውዒት ቀሪቡ፡፡