ንዘበነ ፍርያት 2017/18 ናብ ውሽጢ ሃገር ዝተጎዓዓዘ መጠን መዳበሪያ ልዕሊ 900 ሽሕ ሜትሪክ ቶን ከምዝበፅሐ ተገሊፁ

 

ኣዲስ ኣበባ/መጋቢት/ 22/2017 (ኢዜኣ) ንዘበነ ፍርያት 2017/18 እታዎት ዝኸውን ክሳብ ሕዚ ልዕሊ 900 ሽሕ ሜትሪክ ቶን መዳበሪያ ናብ ውሽጢ ሃገር ከምዝተጉዓዓዘ በዓል መዚ ማሪታይም ኢትዮጵያ ኣፍሊጡ።

ነዚ ዘበነ ፍርያት እታዎት ዝኸውን 55 ሽሕ ሜትሪክ ቶን ዳፕ መዳበሪያ ዝፀዓነት "MV ABBAY II" ዝተብሃለት መበል 19 መርከብ ኣብ ወደብ ጅቡቲ ብምብፃሕ ኦፕሬሽን ምርጋፍ ከምዝጀመረት እቲ በዓል መዚ ገሊፁ።

መንግስቲ ንዘበነ ፍርያት 2017/18 እታዎት ዝኸውን 2 ነጥቢ 4 ሚልዮን ሜትሪክ ቶን (24 ሚልዮን ኩንታል) መዳበሪያ ብምግዛእ ናብ ውሽጢ ሃገር ንምእታው ትልሚ ሒዙ እናሰርሐ እዩ ዝርከብ።

ካብቲ ዝተትሓዘ ትልሚ ክሳብ ትማሊ ልዕሊ ሓደ ሚልዮን ሜትሪክ ቶን ኣብ ወደብ ጅቡቲ ከምዝበፅሐን እቲ ልዕሊ 900 ሽሕ ሜትሪክ ቶን ድማ ናብ ውሽጢ ሃገር ከምዝተጉዓዓዘን ኢዜኣ ካብቲ በዓል መዚ ዝረኸቦ ሓበሬታ ይሕብር።

ከባቢ 118 ሽሕን 956 ሜትሪክ ቶን መዳበሪያ ኣብ ወደብ ጅቡቲ ከምዝርከብ እውን እቲ በዓል መዚ ገሊፁ።